Eendjovo daJehova odi na omwenyo
Omanenediladilo okudja mEmbo etivali lOmapsalme
TU LI ovapiya vaJehova, otu na okushakeneka omaupyakadi nosho yo omapataneko monghalamwenyo. Omuyapostoli Paulus okwa shanga a ti: “Aveshe ovo va hala okukala metilokalunga muKristus Jesus, otava ka hepekwa.” (2 Timoteus 3:12) Opo tu ulike oudiinini wetu muKalunga, mbela oshike tashi ke tu kwafela tu lididimikile omaupyakadi nomahepeko?
Embo etivali lOmapsalme, Epsalme 42 fiyo eti-72, otali tu kwafele neenghono. Omapsalme oo otaa ulike kutya opo tu lididimikile omaupyakadi nomupondo, otwa pumbwa okulineekela filufilu muJehova nokuteelela alushe exupifo laye. Kashi fi tuu oshilihongomwa sha fimanenena kufye! Ngaashi ashike omambo makwao Ombibeli, etumwalaka olo li li mEmbo etivali lOmapsalme oli li oshitukulwa shEendjovo daKalunga noli “nomwenyo neenghono” fiyo okunena. — Ovaheberi 4:12.
JEHOVA OYE “EHONDAMO LETU NEENGHONO DETU”
(Epsalme 42:1–50:23)
Fimbo Omulevi wonhumba a li moupongekwa, okwa li a nyemata molwaashi ka li ta dulu okuya kongulu yaJehova e ke mu longele, nomolwaasho okwe lihekeleka a ti: “Omwenyo wange, oshike wa polimanena [ngaha], ndee to nukauka meni lange u he na efudo? Teelela Kalunga!” (Epsalme 42:6, 12; 43:5) Ediladilo olo ola tumbulwa lwoikando itatu mEpsalme 42 no 43, nokungaha, ola kwatakanifa omapsalme oo noku a ninga oshitevo shimwe. Epsalme 44 eindilo li na sha nOvajuda eshi va li moudjuu, tashi dulika omolwokukondekwa kOvaassiria pefimbo lohamba Hiskia.
Epsalme 45 eimbilo li na sha nehombolo lohamba, olo tali xunganeke shi na sha nOhamba yopaMessias. Omapsalme atatu a landula ko otaa hokolola Jehova e li ‘ehondamo neenghono,’ “ohamba inene kombada yedu alishe,” nosho yo e li “ohote ya pama.” (Epsalme 46:2; 47:3; 48:4) Epsalme 49 ola yelifa nawa kutya kape na omunhu “ta dulu okukulila omumwaina.” (Epsalme 49:8) Epsalme 42 fiyo 49 okwa imbwa kovana vaKora. Epsalme 50 ola totwa kuAsaf.
Omapulo opamishangwa taa nyamukulwa:
44:20 — ‘Omikwena douvandje’ otadi ulike kushike? Omupsalme oo otashi dulika a li ta ulike konhele yolwoodi, oko oimhu yaavo va fila molwoodi hai lika po kouvandje.
45:14, 15a — Olye “okakadona kohamba” oko “taka twalwa kohamba”? Okakadona oko oke li omonakadona ‘wohamba yoiwana aishe,’ Jehova Kalunga. (Ehololo 15:3) Otaka faneke eongalo lOvakriste 144 000 metumbalo lavo lomeulu, ovo Jehova a vaeka nomhepo yaye opo va ninge ovana vaye vopamhepo. (Ovaroma 8:16) “Okakadona” oko ka “wapalekwa ngaashi omuvalekwa a djalekelwa omulumenhu waye” otaka ka twalwa komuhomboli wako — Ohamba yopaMessias. — Ehololo 21:2.
45:15b, 16 — “Oukadona” ovo va popiwa movelishe 16 otava faneke shike? Otava faneke “ongudu inene” yovalongelikalunga vashili, ovo ve limbwanga mumwe noshixupe shovavaekwa notave shi yambidida. Ongudu inene oyo tai ka xupa “moudjuu munene” otai ka hangwa kombada yedu eshi ehombolo lOhamba yopaMessias lomeulu tali ka pwa. (Ehololo 7:9, 13, 14, yelekanifa NW.) Pefimbo olo, ongudu inene otai ka ‘kuwilila nehafo.’
45:17 — Omeityo lilipi ovanamati vohamba tava ka kala ponhele yooxe vohamba? Eshi Jesus a li kombada yedu, okwa li e na ooxekulululwa vopanhu. Otava ka ninga ovanamati vaye eshi te ke va nyumunina momwenyo pefimbo lepangelo laye lomido eyovi. Vamwe vomuvo otava ka nangekwa po ve li vamwe ‘vomoidale moshilongo ashishe,’ sha hala kutya, kombada yedu.
50:2 — Omolwashike taku tiwa Jerusalem oshi li ‘ewano lewapalelo’? Kasha li hashi ifanwa ngaho omolwomutungilo washo. Ndelenee omolwaashi Jehova a li he shi longifa nokwa li e shi tumbalekifa eshi a tungifa mo otembeli yaye nokwa li e shi ninga oshilandopangelo sheehamba odo kwa li ha nangeke po.
Oilihongomwa kufye:
42:2-4. Omulevi oo ta hokololwa meevelishe odo okwa li a djuulukwa Jehova, ngaashi oholongo tai kwenene komatondokelo omeva medu loluteni. Omulevi oo okwa li a nyemata neenghono, molwaashi ka li ta dulu okuya a ka longele Jehova kongulu yaYe, nomolwaasho ‘omahodi aye okwa li a ninga eendja daye omutenya noufiku’ — sha hala kutya, okwa li a kanifa ehalo laye lokulya. Mbela katu na okukala nolupandu linene li na sha nokulongela Jehova pamwe novaitaveli vakwetu?
42:5,6, 12; 43:3-5. Ngeenge otwa topoka ko keongalo lopaKriste pakafimbo omolwetomheno lonhumba ile longadi noitatu dulu okuninga po sha lela, ohatu ka pamekwa ngeenge otwa diladila shi na sha neendafano olo twa li hatu hafele. Nonande petameko otashi dulika shi kale shidjuu neenghono omolwodjuulufi, otashi ke tu dimbulukifa kutya Kalunga oye ehondameno letu nonokutya otwa pumbwa okuteelela e tu xupife.
46:2-4. Kashi na nee mbudi kutya ohatu shakeneke oudjuu u fike peni, otu na okukala nelineekelo la kola kutya “Kalunga Oye ehondamo letu neenghono detu.”
50:16-19. Keshe oo ha popi oipupulu noha longo oilonga ii ke na oufemba okukala omukalelipo waKalunga.
50:20. Ponhele yokukala noikala yokupopya kombinga yomapuko avamwe, otwa pumbwa okukala hatu diminafana po. — Ovakolossi 3:13.
“LOTA, MUKALUNGA AMUKE, OMWENYO WANGE”
(Epsalme 51:1–71:24)
Omapsalme oo okwa hovela neilikano laDavid tali di komutima li na sha nokunyona ohombo kwaye naBatseba. Epsalme 52 fiyo 57 otaa ulike kutya Jehova ota ka xupifa ovo tava undulile omitengi davo kuye nokuteelela e va xupife. Ngaashi Epsalme 58-64 tae shi ulike, David okwa li a ninga Jehova ehondameno laye pefimbo olo a li moudjuu. Okwa imba a ti: “Lota, muKalunga amuke, omwenyo wange, osheshi kuye otaku di eteelelo lange.” — Epsalme 62:6.
Ekwatafano letu lopofingo nOmuxupifi wetu oli na oku tu linyengifa tu “imbile efimano ledina laye ehambelelo.” (Epsalme 66:2) Epsalme 65 otali tange Jehova omolwokuyandja kwaye nehalo liwa, ofimbo Epsalme 67 no 68 tae mu tange omolwoilonga yaye yexupifo. Epsalme 70 no 71 otae mu tange e li Omuxupifi.
Omapulo opamishangwa taa nyamukulwa:
51:14 — David okwa li ta pula a yambididwe “nomhepo yeduliko” yalyelye? Omhepo oyo itai ulike kehalo laKalunga okukwafela David ile komhepo yaYe iyapuki, ndele otai ulike komhepo yaDavid — eamo laye lopamadiladilo. David okwa li ta pula Kalunga opo e mu kwafele a kale e na ehalo lokulonga osho sha yuka.
53:2 — Omolwashike omunhu oo ha ti kutya kaku na Kalunga taku tiwa “elai”? Osho inashi hala kutya omunhu a tya ngaho ke na eendunge dokudiladila. Ovanhu va tya ngaho otaku dulu okutiwa omalai, molwaashi ihava kala ve na eenghedi ngaashi tashi hokololwa mEpsalme 53:2-5.
58:4-6 — Omeityo lilipi ovahenakalunga ve li ngaashi omayoka? Ohava popi oipupulu oyo tai yahameke ngaashi oudiyo weyoka. Ohava nyono po edina liwa laavo tava popile mowii. “Ngaashi efu efitamatwi, eli tali lipwililikile mokuhauda ko,” ovahenakalunga ihava pwilikine komayele ile komapukululo.
58:8 — Ongahelipi ovahenakalunga hava “pwinine po, ngaashi omeva aa taa ningine medu”? David otashi dulika a li ta diladila komeva oo kwa li haa tondoka momalufilu onhumba omEdu lEudaneko. Nonande omalufilu okwa li haa kala e yadi omeva pefimbo lodula yomupoolela, omeva oo okwa li haa kunguluka mo noku pwiinina po diva. David okwa li ta ilikana opo ovahenakalunga va xulifwe po diva.
68:14 — Osha hala kutya ngahelipi eshi taku ti, “omavava onghuti otaa vema, a vaekwa noshisilveri, nomalwenya ayo taa twima ngaashi oshingoldo”? Eenghuti dimwe odo di na oluvala la fa onhata odi na omalwenya amwe e na omuvemo wa twa. Ngeenge di li pomutenya, omalwenya ado ohaa kala taa vema ngaashi oshisilveri noshingoldo. David otashi dulika a li ta faafanifa ovakwaita Ovaisrael ovafindani molwoodi nonghuti oyo i na omavava a kola noi na oshinge shiwa. Ngaashi ovahongwanhu vamwe tava diladila, ovelishe oyo otashi dulika tai popi shi na sha noilonga yomupondo, okudja molwoodi noixuulwa. Kashi na nee mbudi kutya oshike, David okwa li ta popi shi na sha nomafindano oo Jehova a li a pa oshiwana shaye okufinda ovatondi vasho.
68:19 — ‘Omilongelo odo di li ovanhu’ oda li tadi ulike koolyelye? Oda li ovalumenhu ovo va li mokati keenghwate odo da li da kwatwa pefimbo lokukwata ko Edu lEudaneko. Konima yefimbo, ovalumenhu ovo ova li va pewa oshilonga shokuyakula Ovalevi moilonga yavo. — Esra 8:20.
68:31 — Eindilo “hanyena oshilyani, shi li menenge” ola hala okutya shike? David okwa li ta popi pafaneko shi na sha novatondi voshiwana shaJehova, ta pula Jehova a hanyene ovatondi ovo, sha hala kutya, e va kelele vaha etele oshiwana shaye oshiponga.
69:24 — ‘Okutifaukifa oiya’ yovatondi okwa hala kutya shike? Eenhumba domoshiya oda fimana neenghono, molwaashi ohadi kwafa mokulonga oilonga idjuu, pashihopaenenwa ngaashi mokutumba nomokuhumbata oinima idjuu. Omunhu oo e na oshiya sha mbeba ile hashi tifauka ke na eenghono dokulonga sha. David okwa li ta indile opo ovatondi vaye vehe mu dule eenghono.
Oilihongomwa kufye:
51:3-6, 19. Katu na okuliteeka po Jehova Kalunga omolwokunyona kwetu. Ngeenge otwe li vele ombedi, ote ke tu fila onghenda.
51:7, 9-12. Ngeenge otwa nyono, ohatu dulu okwiilikana kuJehova e tu dimine po omolwoufyuululwalunde wetu. Otu na yo okwiilikana kuye opo e tu koshe omatimba etu, e tu velule noku tu kwafele tu finde eamo loulunde olo li li momitima detu, noku tu pe omhepo i na eenghono.
51:20. Onghalonawa yoshiwana ashishe oya li ya kumwa omolwokunyona kwaDavid. Nomolwaasho, David okwa li a ilikana opo Sion shi ningilwe ouwa kuKalunga panghenda yaYe. Luhapu, ngeenge otwa nyono enyono la kwata moiti, ohashi shekifa edina laJehova nosho yo eongalo. Otwa pumbwa okwiilikana kuKalunga opo a kufe po odino oyo tashi dulika twa etifa po.
52:10. Ohatu dulu okukala ngaashi ‘olumono litalala mongulu yaKalunga’ — tu na ekwatafano lopofingo naye nohatu imike oiimati moilonga yaye — mokudulika kuye nokutambula ko outekuduliko waye nehalo liwa. — Ovaheberi 12:5, 6.
55:5, 6, 13-15, 17-19. Omhangela yomonanguwi oyo ya li ya ningwa komona waye Absalom nosho yo okukengelelwa kwaye komuyandjimayele waye Ahitofel okwa li kwa yahameka David pamaliudo. Ndele nande ongaho, David ina kanifa nande elineekelo laye muJehova. Katu na nande okweefa ouyahame wopamaliudo u tu ningife tu kanife elineekelo letu muKalunga.
55:23. Ongahelipi hatu dulu okuundulila omitengi detu kuJehova? Ohatu dulu oku shi ninga (1) moku mu shiivifila omaupyakadi etu okupitila meilikano, (2) mokukonga ewiliko nekwafo mEendjovo daye nosho yo kehangano laye, nosho yo (3) mokuninga ngaashi hatu dulu opo tu xwepopaleke onghalo omo tu li. — Omayeletumbulo 3:5, 6; 11:14; 15:22; Ovafilippi 4:6, 7.
56:9. Jehova ke wete ashike eenghalo omo tu li, ndele oku shii yo nawa nghee de tu kuma pamaliudo.
62:12. Kalunga ina pumbwa eenghono tadi mu dilile pamwe pelili. Oye odjo yeenghono. Ovelishe oyo otai ti: “Eenghono odaKalunga.”
63:4. ‘Ouwanghenda waKalunga ouwa u dule okukalamwenyo,’ molwaashi ngeenge kau po onghalamwenyo itai kala i na eityo ile elalakano. Onghee hano, oshi li pandunge okupanga oukaume naKalunga.
63:7. Molwaashi oufiku ohaku kala kwa mwena noihaku kala ku na omapiyaano asha, ohashi kala efimbo liwa nokudilonga.
64:3-5. Okwaamba omunhu to mu popile mowii otaku dulu okunyona po edina laye liwa nonande ke na ondjo. Katu na okupwilikina kolwaambo la tya ngaho ile tu li tandavelife.
69:5. Opo tu kaleke po ombili, omafimbo amwe otashi dulika shi kale shiwa tu “fute” meityo lokuyandja ombili, nonande otu shi shii kutya katu na ondjo.
70:2-6. Jehova oha udu omailikano etu opaulumomumbwe ngeenge hatu mu indile e tu kwafe. (1 Ovatessaloniki 5:17; Jakob 1:13; 2 Petrus 2:9) Kalunga otashi dulika a efe oupyakadi wonhumba u kale po, ndele nande ongaho, ote ke tu pa ounongo opo tu ungaunge neenghalo nosho yo eenghono opo tu dule okulididimika. ‘Ite ke tu efa tu yelekwe nomayeleko e dule eenghono detu.’ — 1 Ovakorinto 10:13; Ovaheberi 10:36; Jakob 1:5-8.
71:5, 17. David okwa kala e na ouladi nosho yo eenghono, molwaashi okwa kala e lineekela Jehova okudja kounyasha waye — nokuli nofimbo a li ina lwifa omutongolume Omufilisti wedina Goljat. (1 Samuel 17:34-37) Ovanyasha omwa pumbwa okupula ekwafo kuJehova mu keshe osho tamu ningi.
‘Edu alishe nali yadifwe oshinge shaye’
Eimbilo laxuuninwa mEmbo etivali lOmapsalme, Epsalme 72, otali popi kombinga yokupangela kwaSalomo, tali xunganeke shi na sha nanghee eenghalo tadi ka kala pefimbo lokupangela kwaMessias. Itali hokolola tuu omanangeko noupuna makumwifi — ombili inene, okuxula po kwomafininiko nomalwifo nosho yo oshishipo shoilya kombada yedu! Mbela ohatu ka kala ngoo mokati kaavo tava ka hafela omanangeko noupuna oo Ouhamba nosho yo makwao amwe? Ohatu dulu oku ke a hafela ngeenge otwa teelele Jehova nehafo, noku mu ninga ehondameno neenghono detu, ngaashi omupsalme David a li a ninga.
‘Omailikano aDavid okwa xulifa’ taa ti: “Kalunga Omwene, Kalunga kaIsrael na fimanekwe, ou ha longo oikumifilonga, Ye aeke! Edina laye liwa la fimana nali pandulwe fiyo alushe, nedu alishe nali yadifwe noshinge shaye! Amen, heeno, Amen.” (Epsalme 72:18-20) Nafye natu hambeleleni Jehova nomutima aushe nokutanga edina laye la fimana.
[Efano pepandja 9]
Mbela ou shii kutya “okakadona kohamba” otaka faneke shike?
[Efano pepandja 10]
Mbela ou shii kutya omolwashike Jerusalem kwa li taku tiwa oshi li ‘ewano lewapalelo’?