Va tondwa ongaho

‘Ovo va tonda nge ongaho.’—JOHANNES 15:25.

1, 2. (a) Omolwashike vamwe hava kala va kumwa ngeenge Ovakriste tava popilwa mowii, ndele omolwashike ihatu kumwifwa komapopyo a tya ngaho? (b) Eityo loshitya “tonda” lilipi hatu ka konakoneni moshitukulwa eshi? (Tala eshangelo lopedu.)

EENDOMBWEDI DAJEHOVA ohadi kendabala okukala metwokumwe nomafinamhango oo e li mEendjovo daKalunga. Oshidjemo, odi na edina liwa moilongo ihapu. Ndele nande ongaho omafimbo amwe oda hokololwa panghedi ya penga. Pashihopaenenwa, omukwanepangelo umwe moshilando St. Petersburg shomuRussia, okwa ti: “Eendombwedi daJehova otwe di hokololelwa di li oshimhanga hashi longo meholeko, nonokutya ohadi dipaa ounona nohadi lidipaa do vene.” Ndele konima yokulonga nEendombwedi daJehova shi na sha noshoongalele shopaiwana, omukwanepangelo oye tuu oo okwa ti: “Paife ondi wete kutya odi li ngaashi ovanhu vakwao, di na ehafo . . . Odi li ovanambili noda ngungumana nodi holafane neenghono.” Okwa weda ko a ti: “Kandi udite ko nandenande kutya omolwashike ovanhu hava popi oipupulu ya tya ngaho shi na sha nado.”—1 Petrus 3:16.

² Ovapiya vaKalunga ihava hafela okulundilwa kutya ove li ovanyoni, ndelenee ihava kala va kumwa ngeenge ovanhu tave va popile mowii. Jesus okwa londwela ovashikuli vaye komesho yefimbo a ti: “Ounyuni ngenge tau mu tondo, kaleni mu shi shii, owo wa tonda nge tete. . . . Ondjovo ei ya shangwa momhango yavo oi nokuwanifwa: Ovo va tonda nge [ongaho].”a (Johannes 15:18-20, 25; Epsalme 35:19; 69:5) Nale, okwa li a lombwela ovahongwa vaye a ti: “Omwene weumbo ngenge ve mu ifana Belsebul, hano unene ovaneumbo vaye osho tave va ifana.” (Mateus 10:25) Ovakriste ove udite ko kutya okulididimikila omasheko a tya ngaho oshi li oshitukulwa shokuhumbata “omuti womahepeko” oo va tambula ko eshi va ninga ovashikuli vaKristus.—Mateus 16:24, NW.

3. Ovalongelikalunga vashili ova kala tava hepekwa okudja naini?

³ Okuhepekwa kwovalongelikalunga vashili okwa dja nale, kwa hovela pefimbo ‘lomuyuki Abel.’ (Mateus 23:34, 35) Kakwa li ashike haku ningwa omalufe. Jesus okwa ti kutya ovashikuli vaye otava ka ‘tondelwa edina laye kuaveshe.’ (Mateus 10:22) Natango, omuyapostoli Paulus okwa shanga a ti kutya ovapiya vaKalunga aveshe—mwa kwatelwa keshe umwe womufye—ove na okuteelela okuhepekwa. (2 Timoteus 3:12) Omolwashike ve na okuhepekwa?

Odjo youtondwe u he li pauyuki

4. Ombibeli otai holola ngahelipi kutya olyelye odjo youtondwe aushe u he li pauyuki?

⁴ Eendjovo daKalunga otadi holola kutya okudja nale, opa kala omuxwaxwameki woutondwe iha monika. Diladila shi na sha nokudipawa kunyanyalifi kwomulumenhu wotete weitavelo, Abel. Ombibeli otai ti kutya omumwaina omudipai, Kain, okwa “dja momunawii,” Satana Ondiaboli. (1 Johannes 3:12) Kain okwa li e na oikala ya fa yaSatana, naSatana okwe mu longifa a wanife po omalalakano aye oukolokoshi. Ombibeli otai yandje yo ouyelele u na sha nonghandangala oyo Satana a dana momaponokelo onyanya oo a ningilwa Job naJesus Kristus. (Job 1:12; 2:6, 7; Johannes 8:37, 44; 13:27) Embo lEhololo ola popya sha yela kutya olyelye odjo yomahepeko oo ovashikuli vaJesus tava hepekwa nao, la ti: ‘Ondiaboli otai idilile vamwe vomunye modolongo, mu yelekwe.’ (Ehololo 2:10) Heeno, Satana oye odjo youtondwe aushe u he li pauyuki wokutonda oshiwana shaKalunga.

5. Omolwashike Satana e tonde ovalongelikalunga vashili?

⁵ Omolwashike Satana e tonde ovalongelikalunga vashili? Satana okwa shonga ‘Ohamba yaalushe,’ Jehova Kalunga, okupitila momhangela ya nyika ekonda oyo ya holola okukala nounhwa kwaSatana. (1 Timoteus 1:17; 3:6, OB-1954) Okwa ti kutya Kalunga ota pangele oishitwa yaye nonyanya nosho yo kutya kape na oo ha longele Kalunga nelinyengotomheno la yuka, ndele ovanhu ohave ve shi ningi ashike omolwokulimonena ouwa vo vene. Satana ota ti kutya ngeenge okwa efwa a yeleke ovanhu, ota dulu oku va ningifa va efe po okulongela Kalunga. (Genesis 3:1-6; Job 1:6-12; 2:1-7) Mokulundila Jehova kutya oku li omuhepeki, omunaipupulu nomunyengwi, Satana ota kendabala okulininga omunamapangelo oo e li omhinge naJehova. Nomolwaasho, okuhandukila kwaye ovapiya vaKalunga otaku xwaxwamekwa kokukala kwaye a hala okulongelwa.—Mateus 4:8, 9.

6. (a) Ongahelipi twa kwatelwa mo momhata i na sha nounamapangelo waJehova? (b) Ongahelipi okuuda ko omhata oyo haku tu kwafele tu kanyatele oudiinini wetu? (Tala oshimhungu pepandja 12.)

⁶ Mbela ou wete nghee omhata oyo ye ku kuma? U li omupiya waJehova, otashi dulika wa mona kutya nonande okulonga ehalo laKalunga otaku pula eenghendabala da mana mo, omauwa oo taa di moku shi ninga omahapu neenghono. Ndele ongahelipi ngeenge eenghalo mokukalamwenyo kwoye ode shi ningi shidjuu, noshiyahameka nokuli kwoove okutwikila okukala metwokumwe neemhango nosho yo omafinamhango aJehova? Nongahelipi ngeenge otashi monika sha fa ito mono ouwa washa mokuninga ngaho? Mbela oto ka fika pexulifodiladilo kutya itashi ti sha okutwikila okulongela Jehova? Ile ohole yokuhola Jehova nolupandu linene li na sha nomaukwatya aye makumwifi otai ke ku linyengifa u twikile okweenda meendjila daye? (Deuteronomion 10:12, 13) Mokweefa Satana e tu etele omaudjuu onhumba, Jehova okwa pa keshe umwe womufye omhito tu nyamukule pauhandimwe eshongo laSatana.—Omayeletumbulo 27:11.

“Ngenge tave mu sheke”

7. Onghedi imwe ilipi Ondiaboli hai longifa mokukendabala oku tu ningifa tu efe po Jehova?

⁷ Paife natu konakoneni twa mana mo limwe lomomakonda oo Satana ha longifa mokukendabala a popile ombinga yaye yomhata—okulongifa kwaye okusheka kwoipupulu. Jesus okwa ifana Satana ‘xe yoipupulu.’ (Johannes 8:44) Edina Ondiaboli olo tali ti “Omulunduli,” otali holola Satana e li omulundili a shiya ko oo ta popile mowii Kalunga, eendjovo daye di shii okulineekelwa nosho yo edina laye liyapuki. Ondiaboli ohai longifa omapopyo okuulila mo noipupulu yo venevene mokushonga ounamapangelo waJehova, nohai longifa yo eenghedi odo tuu odo okupopila mowii ovapiya vaJehova ovadiinini. Mokusheka unene Eendombwedi, otai dulu okuninga omayeleko a kwata moiti a kale nokuli madjuu unene kudo oku e lididimikila.

8. Ongahelipi Satana a sheka Job, noshidjemo osha li ngahelipi?

⁸ Diladila kwaasho kwa li sha ningilwa Job, oo edina laye tali ti “Omutondwa.” Kakele kokweetifa okukanifa kwaJob ouxupilo noukolele waye nosho yo okufilwa ounona vaye, Satana okwa ningifa Job a kale a talika ko e li omunyoni oo a li ta handukilwa kuKalunga. Nonande Job okwa li a fimanekwa neenghono, okwa ka kala a dinika nokuli nokovapambele vaye nosho yo kookaume kaye kopofingo. (Job 19:13-19; 29:1, 2, 7-11) Natango okupitila movahekeleki ovanaipupulu, Satana okwa kendabala ‘okunyanyaula Job neendjovo,’ tete okupitila moku mu ulila mo kutya okwa nyona sha kwata moiti, nopo nee okwe mu tokola sha yukilila kutya oku li omunyoni. (Job 4:6-9; 19:2; 22:5-10) Osho kasha li tuu tashi teya Job omukumo!

9. Oshike sha ningilwa Jesus opo a monike a fa omulunde?

⁹ Omona waKalunga oo a shiya ko mokukala omudiinini kounamapangelo waKalunga, oye unene kwa li e tondike kuSatana. Eshi Jesus e uya kombada yedu, Satana okwa kendabala oku mu monikifa a fa a nyata pamhepo, a fa omunyoni, ngaashi a ninga shi na sha naJob. (Jesaja 53:2-4; Johannes 9:24) Ovanhu ove mu ifana ongholwe nomufukulume nova ti kutya ‘oku na ondemoni.’ (Mateus 11:18, 19; Johannes 7:20; 8:48; 10:20) Okwa li a lundilwa kutya okwa sheka Kalunga. (Mateus 9:2, 3; 26:63-66; Johannes 10:33-36) Osho okwa li sha nyikifa Jesus oluhodi, molwaashi okwa li e shi shii kutya otashi dinifa Xe oinima yongaho. (Lukas 22:41-44) Xuuninwa, Jesus okwa li a valelwa ongomukolokoshi a fingwa. (Mateus 27:38-44) Mokukanyatela oudiinini wa wanenena, Jesus okwe lididimikila ‘ondubo inene yovalunde.’—Ovaheberi 12:2, 3.

10. Ongahelipi oshixupe shovavaekwa sha kala oshihakanwa shaSatana kunena?

¹⁰ Kunena, oshixupe shovashikuli vaKristus ovavaekwa nasho osha ninga oihakanwa youtondwe wOndiaboli. Satana ota hokololwa e li ‘omuhokololifi wovamwaxe vaKristus oo he va hokololifa koshipala shaKalunga omutenya noufiku.’ (Ehololo 12:9, 10) Okudja eshi a umbwa mo meulu nokungabekelwa komudingonoko wedu, Satana okwa hapupalifa eenghendabala daye dokuningifa ovamwaxe vaKristus va kale tava talika ko ve li ovanhu va dinifa novongaho. (1 Ovakorinto 4:13) Moilongo imwe, ova lundilwa kutya ove li oshimhanga sha nyika oshiponga, ngaashi ashike Ovakriste vomefelemudo lotete va li va lundilwa. (Oilonga 24:5, 14; 28:22) Ngaashi sha popiwa metetekelo, ova lundilwa okupitila momitotolombo. Ndele kutya nee “omokufimanekwa nomokudinwa, omokupopilwa mouwa nomowii,” ovamwaxe vaKristus ovavaekwa pamwe noovakwao ‘veedi dimwe’ odo da kala noku va yambidida, ova kendabala nelininipiko ‘okudiinina oipango yaKalunga nokuhepaulula Jesus.’—2 Ovakorinto 6:8; Johannes 10:16, OB-1954; Ehololo 12:17.

11, 12. (a) Oshike tashi dulu yo okushekifa Ovakriste omafimbo amwe? (b) Omeenghedi dilipi Omukriste tashi dulika a hepekwe shi he li pauyuki ndele omolweitavelo laye?

¹¹ Doshili, haalushe ovapiya vaKalunga pauhandimwe hava shekelwa “ouyuki.” (Mateus 5:10) Omaupyakadi amwe otaa dulu okuholoka omolwokuhawanenena kwetu. Kape na efimano lasha ngeenge hatu “lididimike eshi [twa] dengelwa omanyonauno.” Ndele ngeenge Omukriste “ta humbata oudjuu omolweliudo laye la dama Kalunga, eshi ta hepekwa ina ninga sha . . . , osho onghenda” koshipala shaKalunga. (1 Petrus 2:19, 20) Omeenghalo dilipi Ovakriste tashi dulika va hepekwe inava ninga sha?

¹² Vamwe ova ungaungwa navo monghedi ii molwaashi va anya okukufa ombinga meenghedindjikilile di na sha nomafudiko di he li pamishangwa. (Deuteronomion 14:1) Ovanyasha ovo ve li Eendombwedi ova kala oihakanwa yokuulwa nai alushe omolwokudiinina omifikamhango daJehova di na sha noukoshoki wopaenghedi. (1 Petrus 4:4) Ovadali vamwe Ovakriste ova lundilwa kutya “kave na ko nasha” ile “ohava ningi nai” ounona, molwaashi oha ve va kongele ouhaku inau kwatela mo elongifo lohonde. (Oilonga 15:29) Ovakriste ova tondwa kovapambele nokovashiinda molwaashi ashike va ninga ovapiya vaJehova. (Mateus 10:34-37) Aveshe ovo otava hepekwa shi he li pauyuki ngaashi ashike ovaprofeti nosho yo Jesus va li va hepekwa.—Mateus 5:11, 12; Jakob 5:10; 1 Petrus 2:21.

Natu lididimikileni omasheko

13. Oshike tashi ke tu kwafela tu ha kanife ondjele yetu yopamhepo ngeenge hatu shekwa unene?

¹³ Ngeenge hatu shekwa unene molweitavelo letu, otashi dulika tu teke omukumo, ngaashi omuprofeti Jeremia, ndele hatu kala tu udite kutya itatu dulu okutwikila okulongela Kalunga. (Jeremia 20:7-9) Oshike tashi dulu oku tu kwafela tu ha kanife ondjele yetu yopamhepo? Kendabala okutala ko oinima pataleko laJehova. Oha tale ko ovo hava kala ovadiinini nonande pe na omayeleko ve li ovafindani, ndele haangashi oihakanwa. (Ovaroma 8:37) Kala wa fa u wete momadiladilo oye ovo va kala ovadiinini kounamapangelo waJehova nonande opa li odino oyo Ondiaboli ye va etela—ovakainhu novalumenhu ngaashi Abel, Job, Maria ina yaJesus nosho yo ovadiinini vakwao vopefimbo lonale nosho yo ovapiya vakwetu vokunena. (Ovaheberi 11:35-37; 12:1) Dilonga shi na sha noudiinini wavo. Oshilemo osho shinene shovadiinini otashi tu shivi tu hangane pamwe nasho komutune wefindano wopafaneko oko taku ka kala ovo tava findi ounyuni neitavelo lavo.—1 Johannes 5:4.

14. Ongahelipi omailikano a mana mo taa dulu oku tu pameka tu kale ovadiinini?

¹⁴ Ngeenge otu na ‘oisho idjuu meni letu,’ ohatu ka ilikana kuJehova twa mana mo, naye ote ke tu hekeleka noku tu pameka. (Epsalme 50:15; 94:19) Ote ke tu pa ounongo oo twa pumbwa opo tu lididimikile omayeleko noku tu kwafela tu kaleke momadiladilo omhata inene younamapangelo waye, oyo ya etifa outondwe u he li pauyuki wokutonda ovapiya vaye. (Jakob 1:5) Jehova ota dulu yo oku tu pa “ombili [yaye] ei i dule eendunge adishe.” (Ovafilippi 4:6, 7) Ombili oyo hai di kuKalunga ohai tu kwafele tu kale twa ngungumana nokukala twa tokola toko nonande ope na omafininiko manene, tu ha kwatwe komalimbililo ile koumbada. Okupitila momhepo yaye, Jehova ota dulu oku tu yambidida tu pite mukeshe osho ta efa shi tu ningilwe.—1 Ovakorinto 10:13.

15. Oshike tashi dulu oku tu kwafela tu ha kale twa nyemata ngeenge hatu hepekwa?

¹⁵ Oshike tashi dulu oku tu kwafela tu ha nyematele ovo ve tu tonde ongaho? Natu dimbuluke kutya ovatondi vetu vanene oSatana neendemoni. (Ovaefeso 6:12) Ofimbo ovanhu vamwe have tu hepeke ve shi shii notave shi ningile owina, vahapu vomwaavo hava pataneke oshiwana shaKalunga ohave shi ningi omolwokuhashiiva kwavo ile molwaashi va hekwa kuvamwe. (Daniel 6:5-17; 1 Timoteus 1:12, 13) Jehova okwa hala “ovanhu aveshe va xupifwe nova fike meshiivo loshili.” (1 Timoteus 2:4) Doshili, vamwe ovo va li ovapataneki ove li paife ovamwatate Ovakriste molwaashi va mona elihumbato letu li he na oshipo. (1 Petrus 2:12) Natango, ohatu dulu okulihonga oshilihongomwa koshihopaenenwa shomonamati waJakob, Josef. Nonande Josef okwa li a mona unene oixuna omolwovamwaxe, ka li e va kwatela onghone. Omolwashike mbela? Omolwaashi okwa mona kutya Jehova okwa li a kufa ombinga moiningwanima oyo, ta endifa oinima opo a wanife po elalakano laYe. (Genesis 45:4-8) Jehova ota dulu okweefa tu hepekwe shi he li pauyuki opo a fimanekife edina laye.—1 Petrus 4:16.

16, 17. Omolwashike tu he na okulipula unene shi na sha neenghendabala dovapataneki dokuya moshipala oilonga yokuudifa?

¹⁶ Inatu pumbwa okukala hatu lipula unene ngeenge omafimbo amwe ovapataneki tava monika va fa tava pondola mokuya moshipala okutandavelifwa kwonghundana iwa. Jehova ota kakamifa paife oiwana okupitila moundombwedi oo tau yandjwa mounyuni aushe, noinima iwaelela yoiwana otai ongelwa. (Haggai 2:7) Kristus Jesus, Omufita Muwa, okwa ti: ‘Eedi dange ohadi udu ondaka yange, naame ondi di shii, ndele odo tadi shikula nge. Ndele Ame ohandi di pe omwenyo waalushe, ndele kape na ou te di vakula mo meke lange.’ (Johannes 10:27-29) Ovaengeli ovayapuki ova kwatelwa mo yo meteyo linene lopamhepo. (Mateus 13:39, 41; Ehololo 14:6, 7) Onghee hano, kape na sha osho ovatondi tava popi ile tava ningi tashi dulu okuya moshipala elalakano laKalunga.—Jesaja 54:17; Oilonga 5:38, 39.

¹⁷ Luhapu eenghendabala dovapataneki ohadi ponyo. Moshitukulwa shimwe muAfrika, omwa li omalundilo mahapu manyanyalifi oo a tandavelifwa shi na sha nEendombwedi daJehova, mwa kwatelwa olo kutya odi li ovalongeli vOndiaboli. Molwoipupulu oyo, ngeenge Eendombwedi tadi talele po ovanhu, Grace okwa li ha tondokele konima yeumbo a ka hondame fiyo da ya. Efiku limwe omufita wongeleka yavo okwa li a ulika oshishangomwa shimwe shEendombwedi, ndele ta lombwele ovo va li po kutya inave shi lesha, molwaashi otashi ke va efifa po eitavelo lavo. Osho osha pendula okatalekonawa kaGrace. Omhito ya landula ko eshi Eendombwedi da talela po, ponhele yokuhondama okwa kundafana nado nokwe likufila po oshishangomwa shaye. Okwa hovela okukala ha konakona Ombibeli nokwa ninginifwa mo 1996. Grace paife oha longifa efimbo laye mokukonga vamwe ovo tashi dulika kwa li va hokololelwa Eendombwedi daJehova panghedi ya penga.

Pameka eitavelo loye paife

18. Omolwashike twa pumbwa okupameka eitavelo letu fimbo omayeleko a kwata moiti inaa holoka, nongahelipi hatu dulu oku shi ninga?

¹⁸ Molwaashi Satana ota dulu oku tu ponokela ombadilila efimbo keshe noutondwe u he li pauyuki, osha fimanenena okupameka eitavelo letu paife. Ongahelipi hatu dulu oku shi ninga? Ehokololo limwe lomoshilongo omo oshiwana shaJehova sha kala tashi hepekwa ola ti: “Oshinima shimwe sha yela oshosho kutya: Ovo ve na eenghedindjikilile dopamhepo diwa nosho yo olupandu linene okupandula oshili yOmbibeli ihava kala ve na oupyakadi mokudiinina ngeenge pe na omayeleko. Ndele ovo ‘mefimbo liwa’ va li hava faula okwoongala, ihava i ondjikilile moilonga yomomapya nohave liyandje moinima inini ovo luhapu hava pondolwa komayeleko a fa ‘omundilo.’” (2 Timoteus 4:2) Ngeenge ou wete eenghedi omo wa pumbwa okuxwepopala, ninga eenghendabala da mana mo nope he na okwoongaonga.—Epsalme 119:60.

19. Okukanyatela oudiinini kwovapiya vaKalunga nonande ope na outondwe u he li pauyuki otaku eta oidjemo ilipi?

¹⁹ Okukanyatela oudiinini kwovalongelikalunga vashili nonande ope na outondwe waSatana wa nyika oshiponga oku li oumbangi wolelalela kutya Jehova oku na oufemba nokwa wana okukala omunamapangelo, nounamapangelo waye ou li pauyuki. Oudiinini wavo ohau hafifa omutima waKalunga. Nonande ovanhu otashi dulika ve va sheke unene, oo a fimanenena meulu nokombada yedu “ite va fi ohoni a ifanwe Kalunga kavo.” Doshili, shi na sha novadiinini aveshe ovo, osha yuka okutya kutya: “Ovo tuu ava ounyuni inau wana va kale muo.”—Ovaheberi 11:16, 38.

[Omashangelo opedu]

Oto dulu okuyelifa?

• Oshike tashi etifa outondwe u he li pauyuki wokutonda ovalongelikalunga vashili?

• Ongahelipi Satana a longifa omasheko mokukendabala okuteya po oudiinini waJob nowaJesus?

• Ongahelipi Jehova he tu pameke tu kale twa pama nonande ope na outondwe waSatana?

[Oshimhungu/Efano pepandja 12]

Ova mona omhata yashili oyo i li po

Ondombwedi yaJehova imwe muUkraine, omo oilonga yokuudifa Ouhamba kwa li ya shilikwa oule womido da koya po 50, oya ti: “Onghalo omo Eendombwedi daJehova da li kai na okutalika ko ashike monghedi omo ovanhu va ungaunga nado. . . . Ovanambelewa vepangelo okwa li ashike tava wanifa po oilonga yavo. Eshi epangelo la lunduluka, navo ova lunduluka ndele tava kala ovadiinini kepangelo lipe, ashike fye inatu lunduluka. Otwa mona kutya odjo yolela yomaupyakadi etu oya hololwa mOmbibeli.

“Katwa li twe litala ko tu li ashike oihakanwa yovanhu ovahepeki i he na ondjo. Osho she tu kwafela tu lididimike osha li eudeko la yela li na sha nomhata oyo ya li ya pendulwa moshikunino shaEden—omhata i na sha noufemba waKalunga wokupangela. . . . Otwa yambidida noudiinini ombinga yomhata oyo i he na ko nasha ashike nouwa wovanhu ndele oi na ko nasha yo nOmunamapangelo weshito alishe. Okwa li tu na eudeko lomoule lela li na sha nomhata yashili oyo kwa li ya kwatelwa mo. Osho oshe tu pameka noshe tu dulifa tu kanyatele oudiinini wetu nokuli nomeenghalo da nyaya keonga.”

[Efano pepandja 9]

Olyelye a li a etifa omasheko oo Jesus a shekwa nao?

[Efano pepandja 11]

Job, Maria nosho yo ovapiya vaKalunga vokunena ngaashi Stanley Jones, ova kala ovadiinini kounamapangelo waJehova

[Efano pepandja 12]

Victor Popovych, oo a li a kwatwa po mo 1970