“Aaifupipiki otaa ka thigulula evi”—Ngiini?
“NGOYE otashi vulika wa tseya oohapu dhaJesus tadhi nyanyudha omutima kutya ‘aaifupipiki otaa ka thigulula evi.’ Ihe mokutala nkene aantu taa ningile ooyakwawo nosho wo evi, oto dhiladhila kutya mbela aaifupipiki otaya ka thigilwa po shike okuthigulula?”—Mateus 5:5; Epsalmi 37:11; OB-1986.
Myriam, e li gumwe gwomOonzapo dhaJehova, okwa longitha epulo ndika opo a vule okutameka noonkundathana dhopaMbimbeli. Omulumentu ngoka a li ta popi naye okwa ti kutya, ngele Jesus okwe shi uvaneka, nena evi oli na okukala lya gwana okwiithanwa uuthiga nokali na okukala ehala lya yonuka nenge moka itaamu vulu okukalwa.
Nopwaahe na omalimbililo, olya li eyamukulo tali etitha omukumo. Mbela otu na etompelo okukala netaloko ewanawa lya tya ngaaka? Eeno, otu na, oshoka Ombimbeli otayi tu pe omatompelo ga yela kutya euvaneko ndika otali ka gwanithwa. Muushili wo wene, egwanitho lyeuvaneko ndyono oli na naanaa ekwatathano nelalakano lyaKalunga shi na ko nasha naantu nosho wo nevi. Ihe tse otu na uushili kutya shoka Kalunga e na elalakano okuninga, ote ke shi gwanitha. (Jesaja 55:11) Onkee ano, elalakano lyaKalunga lyopetameko li na ko nasha naantu olini, nongiini mbela tali ka gwanithwa?
Elalakano lyaKalunga lyaaluhe li na ko nasha nevi
Jehova Kalunga okwa shiti evi nelalakano lyontumba. “Oshoka osho ta ti Omuwa ngu, a shiti egulu—oye Kalunga—a gumbu evi nokwe li opaleke; okwe li koleke, ye inee li shita, li mbugale, aawe, okwe li shitile okukala mo: Ongame Omuwa, kaku na we gulwe.” (Jesaja 45:18) Ano evi olya shitwa opo aantu ya kale kulyo. Niishewe, oshi li elalakano lyaKalunga opo evi li kalwe kaantu sigo aluhe. “Evi we li dhikila koongundhi dhalyo, lyaa tenguke nosigo aluheluhe.”—Epsalmi 104:5; 119:90.
Elalakano lyaKalunga li na ko nasha nevi oli iwetikile melombwelo ndyoka a pe aantu yotango yaali. Jehova okwa lombwele Adam naEva a ti: “Kaleni mu na oluvalo, indjipaleni, nevi mu li udhithe aantu, ne mu li pangele, niikwameya yomomafuta yi pangelii wo noondhila dhokegulu niinamwenyo ayihe hayi yangagula kevi.” (Genesis 1:28) Evi ndyono Kalunga a li i inekelele Adam naEva, olya li li na okukala egumbo lyawo sigo aluhe opamwe noluvalo lwawo. Konima yethimbo sho pwa pita omathelemimvo ogendji, omupsalmi okwa tile: “Egulu olyo egulu lyOmuwa, nevi okwe li pa aana yaantu.”—Epsalmi 115:16.
Opo Adam naEva nosho wo oluvalo lwawo ya mone etimaumbwile ndyoka tali nyanyudha, kehe gumwe gwomuyo okwa li e na okuzimina kutya Jehova Kalunga, Omushiti nOmugandji gwomwenyo oku li Omupangeli gwawo noye na okukala ye na ehalo okuvulika kuye. Moshinima shino Jehova ina popya pamukalo inaagu yela sho a lombwele omulumentu ta ti: “Lya komiti adhihe dhoParadisa, ngashika wa hala; omuti ngwiyaka agwike gwokudhimbulula uuwanawa nuuwinayi ino gu lya, oshoka shimpa to gu li, u na okusa.” (Genesis 2:16, 17) Opo Adam naEva ya tsikile okukala nomwenyo moshikunino shaEden, okwa li ye na okuvulika kelombwelo ndyoka lya popiwa sha yela. Ando oye shi ningile, ando oshu ulike olupandu lwawo okupandula He yawo gwomegulu kwaashoka e ya ningile.
Sho Adam naEva inaaya vulika owina kuKalunga noya taaguluka elombwelo ndyoka e ya pe, muushili wo wene oya pilamene ngoka a li he ya pe ashihe shoka ya li ye na. (Genesis 3:6) Mokuninga ngawo, oyi ikanithile yo yene nosho wo oluvalo lwawo egumbo lyawo Oparadisa ombwanawa. (Aaroma 5:12) Okwaahavulika kwaaihokani yotango okwa li kwa ya mbela moshipala elalakano lyaKalunga lyokushita evi?
Kalunga ngoka ina lunduluka
Okupitila momuprofeti gwe Malakia, Kalunga okwa ti: “Ongame Omuwa, itandi lunduluka.” (Malakia 3:6, OB-1986) Ketyokosha kovelise ndjino, omulongwantu gwOmbimbeli Omufulaanisa L. Fillion okwa ti kutya oohapu ndhino odhi na ekwatathano lyolela negwanitho lyomauvaneko gaKalunga. Fillion okwa nyola ta ti: “Jehova okwa li ta vulu okuhanagula po oshigwana she shono sha li oshinashipotha, ihe omolwashoka ye iha lundulula omauvaneko ge, ota ka gwanitha omauvaneko ngoka a ningi nale, kutya nduno oshike sha ningwa po.” Omauvaneko gaKalunga, kutya nduno okuhandimwe, okoshigwana, nenge okaantu ayehe, itaga ka dhimbiwa po ihe otaga ka gwanithwa pethimbo lye lyo opala. “Ehangano lye ohe li dhimbulukwa aluhe, noohapu dhe e dhi dhikilile omaluvalo gomayuvi.”—Epsalmi 105:8.
Ihe mbela otu na uushili lela kutya elalakano lyaJehova lyopetameko inali lunduluka shi na ko nasha nevi? Otu na uushili molwashoka okupitila mOohapu dhaKalunga adhihe dha nwethwa mo, Ombimbeli, otayi uvaneke elalakano lyaKalunga okugandja evi kaantu mboka taa vulika kuye. (Epsalmi 25:13; 37:9, 22, 29, 34) Natango, Omishangwa otadhi popi mboka ya yambekwa kuJehova kutya otaa ka kala ya gamenwa, kehe gumwe “mokati komiviinu nomikwiyu dhe, nokape na ngoka te mu halutha we.” (Mika 4:4, OB-1986; Hesekiel 34:28) Mboka ya hogololwa kuJehova “oyo taa kala nokudhika omagumbo nokukala mo, taa kala nokutsika iikunino yoomviinu nokulya iiyimati yadho.” Otaa ka kala pamwe nombili niilikama yomiihwa.—Jesaja 11:6-9; 65:21, 25.
Ombimbeli otayi tu ulikile momukalo gulwe nkene euvaneko lyaKalunga tali ka gwanithwa monakuyiwa. Pethimbo lyepangelo lyomukwaniilwa Salomo, oshigwana shaIsrael osha li mombili nomuulinawa. Kohi yepangelo lye, “Aajuda nAaisrael ya kala ya kuutumba ya mwenenena thilu, okehe omuntu momuzile gwomuviinu gwe [nomomukwiyu] gwe muDan sigo Berseba, manga Salomo kwa li ku na omwenyo.” (1 Aakwaniilwa 5:5 [4:25, OB-1986]) Ombimbeli otayi ti kutya Jesus oku “vule Salomo,” nomokupopya kombinga yokupangela kwe, omupsalmi okwa popi pahunganeko a ti: “Omuyuuki ta tsama nawa pomasiku ge nombili oyindji sigo kaku na we omwedhi.” Pethimbo ndyono, “ekuta lyiilya tali kala moshilongo nosigo koondungu dhoondundu.”—Lukas 11:31; Epsalmi 72:7, 16.
Jehova Kalunga ota ka gwanitha naanaa oohapu dhe mokushilipaleka kutya evi ndyoka lyu uvanekwa itali ka thigululwa owala kaantu, ihe otali ka opalekwa wo li kale li li nawa ngaashi lya li petameko. MEhololo 21:4, Oohapu dhaKalunga otadhi tu lombwele kutya muuyuni uupe wu uvanekwa, Kalunga “nota theta po omahodhi momeho [gaantu], neso kali kala we nenge oluhodhi nenge elilagano, nenge uuwehame kau kala mo we.” Shoka shu uvanekwa otashi ka kala lela Oparadisa.—Lukas 23:43.
Nkene to vulu okukala nombinga muuthiga mboka wu uvanekwa
Okulundulula evi li ninge oparadisa otashi ka ningwa kepangelo ndyoka tali pangele okuza megulu, li li Uukwaniilwa u na Jesus Kristus e li Omukwaniilwa gwawo. (Mateus 6:9, 10) Tango, Uukwaniilwa otau ka ‘yona po mboka haa yono evi.’ (Ehololo 11:18; Daniel 2:44) Nopo nduno, e li “Omuwa-omunambili,” Jesus Kristus ota ka gwanitha oohapu dhopahunganeko ndhoka tadhi ti: “Elelo lye olindjilindji, nombili kayi na mpo tayi hulile po.” (Jesaja 9:5, 6) Kohi yUukwaniilwa mboka, aantu omamiliyona otaa ka kala ye na ompito yoku ka thigulula evi, mwa kwatelwa naamboka taya ka ninga omwenyo ishewe okupitila meyumuko.—Johannes 5:28, 29; Iilonga 24:15.
Oolye taya ka mona ompito okunyanyukilwa uuthiga mboka uuwanawa? Dhiladhila koohapu dhaJesus ndhika: “Aanelago oomboka aaifupipiki, oshoka oyo taa ka thigulula evi.” (Mateus 5:5, OB-1986) Otashi ti ngiini okukala omwiifupipiki? Omambwiitya olwiindji otaga fatulula “omwiifupipiki” kutya omuntu ngoka e li omunambili, e na ondjele, omuvuliki, a mwena, nokuli e na onge. Ihe oshitya shOshigreka sha longithwa mpaka otashi ti oshindji. ONew Testament Wordbook yaWilliam Barclay otayi ti kutya oshitya shika ‘otashi ulike kengungumano, ihe konima yengungumano oku na oonkondo dha fa dhoshiyela.’ Otashi ulike iikala yopamadhiladhilo mbyoka tayi kwatha omuntu i idhidhimikile okuningwa nayi kaapu na okukwatela gumwe onkone nenge okudhiladhila oku mu shunithila uuwinayi, molwashoka oku na ekwatathano ewanawa naKalunga, nekwatathano ndyoka oli li onzo yoonkondo dhe.—Jesaja 12:2; Aafilippi 4:13.
Gumwe ngoka e li omwiifupipiki oha taamba ko neifupipiko omithikampango dhaKalunga mukehe shoka ta ningi monkalamwenyo ye; iha kala owala a hala okuninga iinima pamadhiladhilo ge mwene nenge gayalwe. Ye oku na wo ehalo okulongwa kuJehova. Omupsalmi David okwa nyola a ti: “Aaishonopeki [Jehova] ote ya tula mondjila yu uka note ya longo okutseya ehalo lye.”—Epsalmi 25:9, OB-1986; Omayeletumbulo 3:5, 6.
Mbela ngoye oto ka kala mokati ‘kaaifupipiki’ mboka taa ka thigulula evi? Mokutseya Jehova nehalo lye mokupitila mokukonakona nuudhiginini Oohapu dhe nosho wo okutula miilonga shoka twi ilongo, nangoye oto ka kala netegameno lyokuthigulula eviparadisa nokukala mo sigo aluhe.—Johannes 17:3.
[Ethano pepandja 5]
Elalakano lyaKalunga li na ko nasha nevi oli iwetikile melombwelo ndyoka a pe Adam naEva
[Caption on page 6, 7]
Ombili negameno mepangelo lyaSalomo otayi tu ulikile nkene uuthiga mboka wu uvanekwa tau ka kala u li
[Omadhina gaathaneki]
Sheep and background hill: Pictorial Archive (Near Eastern History) Est.; Arabian oryx: Hai-Bar, Yotvata, Israel; farmer plowing: Garo Nalbandian
[Ethano pepandja 7]
Uuyuni uupe wuuyuuki ou li pokuya—ngoye omo to ka kala mbela?