Nkene ‘okawe ke na ondilo’ taka kongwa nena
“Nevaangeli ndika [lyuukwaniilwa, KB] otali ku uvithilwa nuuyuni auhe.”—Mateus 24:14.
1, 2. (a) Aajuda pethimbo lyaJesus oya dhiladhila ngiini kombinga yUukwaniilwa waKalunga? (b) Jesus okwa ningi shike okufatulula nawa Uukwaniilwa, niizemo oya li ngiini?
UUKWANIILWA waKalunga owa li oshipalanyolo shihokitha mokati kAajuda sho Jesus i ile kombanda yevi. (Mateus 3:1, 2; 4:23-25; Johannes 1:49) Ihe tango, oyendji yomuyo kaya li ye uvite ko nawa shoka tau ti nosho wo oonkondo dhawo, nokaya li wo ye uvite ko kutya owa li tau ka kala epangelo lyomegulu. (Johannes 3:1-5) Nokuli nayamwe mboka ya ningi aalanduli yaJesus kaya li yu uva ko nawa shoka Uukwaniilwa waKalunga tau ti nenge shoka ye na okuninga opo ya lalekwe nuuyamba ya ninge aapangeli mboka taya pangele pamwe naKristus.—Mateus 20:20-22; Lukas 19:11; Iilonga 1:6.
2 Mokweendela ko kwethimbo, Jesus okwa longo neidhidhimiko aalongwa ye iiyilongomwa oyindji, mwa kwatelwa eyele lyokawe ke na ondilo hoka ka kundathanwa moshitopolwa sha tetekele, e te yu ulukile esimano lyokukondja mokukonga Uukwaniilwa womegulu. (Mateus 6:33; 13:45, 46; Lukas 13:23, 24) Osha yela kutya shoka osha guma unene omitima dhawo molwaashoka nziya oya ningi aauvithi yonkundana ombwanawa yUukwaniilwa ihaaya vulwa noye li aalaadhi miitopolwa yokooha dhuuyuni, nembo lyIilonga yAayapostoli otali gandja uunzapo oundji kwaashoka.—Iilonga 1:8; Aakolossa 1:23.
3. Mokuulika kethimbo lyetu, oshike Jesus a popi kombinga yUukwaniilwa?
3 Ihe oshi li ngiini mbela nena? Aantu omamiliyona otaya pewa ompito okumona omalaleko nuuyamba goparadisa yokevi kohi yUukwaniilwa. Mehunganeko lye enene kombinga ‘yehulilo lyonkalelo yiinima’ Jesus okwa popi kondandalunde a ti: “Nevaangeli ndika [lyuukwaniilwa] otali ku uvithilwa nuuyuni auhe, li ningile iigwana ayihe ehokololo; notaku ya ihe ehulilo.” (Mateus 24:3, 14, yelekanitha NW; Markus 13:10) Okwa fatulula wo kutya iilonga mbyoka iinene noonkondo oyi na okulongwa nonando opu na iiyimbi iinene nomashongo, nokuli nomahepeko. Nonando ongaaka, okwa gandja eshilipaleko ndika tali ti: “Oongoka ti idhidhimike sigo ehulilo, oye ta hupithwa.” (Mateus 24:9-13) Ayihe mbyoka otayi pula eiyambo nosho wo eigandjo lya fa ndyoka lyu ulikwa komulandithi omweendi gwomeyele lyaJesus. Mbela opu na oohandimwe mboka nena tayu ulike eitaalo nuulaadhi wa tya ngaaka mokukonga Uukwaniilwa?
Enyanyu lyokumona oshili
4. Oshili yUukwaniilwa ohayi nwetha mo ngiini aantu nena?
4 Omulandithi gwomeyele lyaJesus okwa li a nyanyukwa noonkondo sho a mono shoka a li e wete shi li ‘okawe ke na ondilo.’ Enyanyu ndyoka olye mu inyengitha a ninge kehe shimwe ngaashi ta vulu opo a mone okawe hoka. (Aaheberi 12:1) Sha faathana, nena oshili kombinga yaKalunga nUukwaniilwa we otayi hili aantu notayi yi inyengitha. Shika otashi tu dhimbulukitha omatyokosha gomumwatate A. H. Macmillan, ngoka a nyola kombinga yokukonga kwe Kalunga nelalakano Lye li na ko nasha naantu membo Faith on the March. Okwa ti: “Shoka nda mono otashi monika natango kaantu omayuvi omvula kehe. Noye li owala aantu ngaashi ngoye nangame, molwashoka oya za momaukwashigwana agehe, momihoko adhihe, momaputuko agehe nomomapipi agehe. Oshili kayi na ondjoolola. Ohayi hili aantu yomaludhi agehe.”
5. Iizemo iiwanawa yini ya monika molaporta yomumvo gwiilonga 2004?
5 Oshili yoohapu ndhoka ohayi monika omvula nomvula sho oohandimwe ye na omitima dhu uka omayovi omathele hayi inyengithwa konkundana ombwanawa yUukwaniilwa waKalunga oku mu yapulila onkalamwenyo yawo nokulonga ehalo lye. Momumvo gwiilonga 2004, ngoka gwa tameka muSeptemba 2003 sigo omuAguste 2004, namo omwa ningwa wo sha faathana. Moomwedhi ndhoka 12, aantu 262 416 oyu ulike montaneho okwiiyapulila kwawo Jehova okupitila mokuninginithwa momeya. Shoka osha ningwa miilongo 235, moka Oonzapo dhaJehova hadhi ningi omakonakonombimbeli gopegumbo koshiwike 6 085 387 opo dhi kwathele aantu yomomaputuko agehe noyomiigwana ayihe, yomomihoko adhihe noyomomalaka agehe ya mone oshili ndjoka tayi gandja omwenyo mOohapu dhaKalunga.—Ehololo 7:9.
6. Oshike sha li she etitha eindjipalo enene tali tsikile oomvula dha piti?
6 Mbela oshike sha ningitha ayihe mbyoka tayi wapa? Kapu na omalimbililo kutya Jehova oha hilile kuye mboka ye na iikala iiwanawa kombinga yomwenyo gwaaluhe. (Johannes 6:65; Iilonga 13:48, NW) Ihe ombepo yokwaaihola mwene noonkambadhala dhokwaavulwa dhaamboka ya kala nokwiitula mo mokukonga Uukwaniilwa kadhi na nando okudhinika. Omumwatate Macmillan sho a li e na oomvula 79 okwa nyola a ti: “Okuza sho ndi ilongo tango omauvaneko ngoka gu uvanekelwa aantu mboka taye ehama nokusa, etegameno lyandje metumwalaka ndyoka Ombimbeli ya holola inali shonopala. Ethimbo olyo tuu ndyoka onda li nda tokola okutseya oshindji kombinga yomalongo gOmbimbeli opo ndi vule okukwathela yalwe ngaashi ngame mboka taya kongo ontseyo yi na ko nasha naKalunga Omunankondoadhihe, Jehova, nosho wo omalalakano ge omawanawa ge na ko nasha naantu.”
7. Iimoniwa yini tayi ulike enyanyu nuulaadhi waamboka ya mona oshili yOmbimbeli?
7 Uulaadhi mboka ou wetike wo mokati kaapiya yaJehova yonena. Tala oshiholelwa shaDaniela a za kuVienna, Austria. Okwa ti: “Okuza kuunona wandje, Kalunga okwa kala kuume kandje kopothingo. Onda kala aluhe nda hala okutseya edhina lye molwashoka kungame oshitya ‘Kalunga’ osha kala tashi ulike kutya kandi mu shi nawa. Ihe onda li ndi na okutegelela sigo nda ningi oomvula 17, sho Oonzapo dhaJehova dhe ya keelo lyaandjetu. Odha li dha fatululile ndje kehe shimwe shoka nda li nda hala okutseya kombinga yaKalunga. Lwahugunina, oshili onde yi mono, nosha li oshiwanawa noonkondo. Onda li nda nyanyukwa noonkondo nomolwashoka onda tameke okuuvithila kehe gumwe.” Omolwokupopya kwe nuulaadhi okwa li a shekwa kaanasikola ooyakwawo. Daniela ota tsikile ta ti: “Ihe kungame osha li sha fa ndi wete omahunganeko gOmbimbeli taga gwanithwa, molwaashoka onda li ndi ilongo kutya Jesus okwa ti kutya aalanduli ye oya li taya ka tondwa notaya ka hepekwa molwedhina lye. Onda li nda nyanyukwa noonkondo nonda kumwa.” Nziya, Daniela okwa yapulile Jehova onkalamwenyo ye, okwa ninginithwa nokwa tameke okulalakanena elalakano lyiilonga yuutumwa. Konima yokuhokanwa, Daniela, pamwe nomusamane gwe Helmut, oya tameke okuuvitha mokati kaakalimo Aayafrika, Aakiina, Aafilipine nAaindia muVienna. Daniela naHelmut masiku otaya ka longa ye li aatumwa muAfrika lyokuuningininolukadhi.
Inaya tyololoka
8. Omukalo gumwe oguni ngoka gu na ondjambi moka aantu oyendji yu ulike ohole yawo yokuhola Kalunga nosho wo uudhiginini kUukwaniilwa we?
8 Dhoshili, iilonga yuutumwa oyi li yimwe yomomikalo ndhoka oshigwana shaJehova nena hashi ulike ohole yasho yokuhola Kalunga nosho wo uudhiginini kUukwaniilwa we. Ngaashi omulandithi gwomeyele lyaJesus, mboka haya yi miilonga mbyoka oye na ehalo okuya komahala gokokule omolwUukwaniilwa. Dhoshili, aatumwa mbaka ihaye endaenda opo ya mone onkundana ombwanawa yUukwaniilwa; ohaye yi faalele aantu mboka ya kala kooha nooha dhevi, oku ya longa noku ya kwathela ya ninge aalongwa yaJesus Kristus. (Mateus 28:19, 20) Miilongo oyindji, oye na okwiidhidhimikila omaudhigu inaaga monika nando onale. Ihe okwiidhidhimika kwawo okwa pewa ondjambi onene.
9, 10. Iimoniwa yinyanyudha yini ya nyanyukilwa kaatumwa kiilongo yokokule, ngaashi mOrepablika yaAfrika lyoPokati?
9 Tala oshiholelwa shomOrepablika yaAfrika lyoPokati, moka omvula ya za ko aakali pEdhimbuluko lyeso lyaKristus ya li 16 184, omwaalu gwaauvithi yUukwaniilwa lwiikando iheyali moshilongo shoka. Molwashoka iitopolwa oyindji yomoshilongo shoka kayi na olusheno, aantu olundji ohaya longo iilonga yawo yesiku pondje ye li momizile dhomiti. Onkee ano oshe eleka lela sho aatumwa taya longo iilonga yawo komukalo gwa faathana, okuningila omakonakonombimbeli pondje momizile dhomiti. Pondje kapu na owala uuyelele nopwa talala ihe opu na wo uuwanawa ulwe. Aantu oye na ohole onene yokuhola Ombimbeli, nohaya kundathana iipalanyolo yi na ko nasha nelongelokalunga nuupu ngaashi naanaa aantu yomomaputuko galwe haya popi kombinga yomaudhano nenge yonkalombepo. Olundji, aaendipo ohaya mono shoka tashi ningwa po e taya kala wo pekonakono ndyoka.
10 Onkee ano sho omutumwa gumwe a li ta ningi ekonakonombimbeli pondje, omulumentu omugundjuka ngoka a kala handiyaka yepandaanda okwe ya kuye nokwa ti kutya molwaashoka ina talelwa po, omutumwa oku na okuya kuye a konakone wo naye Ombimbeli. Dhoshili, omutumwa okwe shi ningi nenyanyu, nomugundjuka ngoka ota ningi ehumokomeho neendelelo. Moshilongo shoka, olundji opolisi ohayi thikameke Oonzapo mondjila, haku dhi falitha kompangu nenge oku dhi futitha, ihe oku dhi pula iifo iipe yOshungonangelo noAwake! nenge oku dhi pandula unene molwiitopolwa mbyoka ya nyanyukilwa noonkondo.
11. Nonando opu na omamakelo, mbela aatumwa mboka ya kala muutumwa ethimbo ele oye uvitile ngiini iilonga yawo?
11 Oyendji yomwaamboka ya kala miilonga yuutumwa oomvula 40 nenge 50 dha piti, otaya longo natango nuudhiginini momapya. Kashi shi tuu oshiholelwa sheitaalo noshuudhiginini kutse atuheni! Oomvula 42 dha piti, aaihokani yaali oya longo pamwe ye li aatumwa miilongo itatu ya yoolokathana. Omusamane ota ti: “Opwa li omaupyakadhi. Pashiholelwa, otwa li twa kondjo nomalaria uule woomvula 35. Ihe inatu yemata nando sho twa ningi etokolo okukala aatumwa.” Omukulukadhi gwe ota gwedha ko ta ti: “Opwa li aluhe oshindji okunyanyukilwa. Iilonga yomomapya oyi li enyanyu enene, noshi li oshipu okutameka omakonakonombimbeli. Ngele u wete aakonakoni taye ya kokugongala notaya tseyathana, ethimbo kehe ohashi kala sha fa uukwanegumbo tau gongala pamwe.”
‘Iinima ayihe oye yi tala ko oyo ekanitho lyowala’
12. Ongiini olupandu lwashili okupandula ongushu yUukwaniilwa lyu ulikwa?
12 Sho omulandithi omweendi a mono okawe ke na ondilo, “okwa yi nokwa [landitha po, KB] iinima ye ayihe nokwe ki ilandele.” (Mateus 13:46) Ehalo ndika okugandja po shoka sha talika ko shi na ondilo oli li uukwatya waamboka ya pandula shili ongushu yUukwaniilwa. E li gumwe ngoka a li ta ka kala pamwe naKristus meadhimo lyUukwaniilwa waKalunga, omuyapostoli Paulus okwa ti: “Iinima ayihe yilwe oyo ekanitho lyowala, ngele tandi yi yeleke nokutseya Jesus Kristus, Omuwa gwandje, shoka osho oshinima shondilo shi vule ayihe. Omolwe onde ekelehi iinima ayihe nonde yi tala oyo iiyagaya yowala, opo ndi likole Kristus.”—Aafilippi 3:8, OB-1986.
13. Ongiini omuntu gumwe mOrepablika yaCzech u ulike ohole ye yokuhola Uukwaniilwa?
13 Komukalo gwa faathana, oyendji nena oye na ehalo okuninga omalunduluko omanene monkalamwenyo yawo opo ya mone omalaleko nuuyamba gUukwaniilwa. Pashiholelwa, muKotoba 2003, omukuluntusikola gwoomvula 60 mOrepablika yaCzech okwa mono embo hali kwathele mekonakono lyOmbimbeli, Ontseyo Ndjoka Tayi Fala kOmwenyo Gwaaluhe. Nziya konima yoku li lesha, okwa ningi ekwatathano nOonzapo dhaJehova moshitopolwa shawo dhi konakone naye Ombimbeli. Okwa ningi ehumokomeho ewanawa nokwa tameke nziya okukala pokugongala akuhe. Ihe ongiini kombinga yomalalakano ge okuhogololwa a kale meya nokuya methigathano lyokuhogololwa a kale oshilyo shoparlemende? Okwa tokola okuya methigathano lyi ili, sha hala okutya, ethigathano lyokumona omwenyo, e li omuuvithi gwUukwaniilwa. Okwa ti: “Onda li nda wapa okugandja iileshomwa oyindji yOmbimbeli kaalongwa yandje.” Okwiiyapulila kwe Jehova okwe ku ulike mokuninginithwa momeya poshigongi shoshitopolwa muJuli 2004.
14. (a) Onkundana ombwanawa yUukwaniilwa oyi inyengitha aantu omamiliyona ya ninge shike? (b) Omapulo ga simana geni kehe gumwe gwomutse ta vulu okwiipula?
14 Aantu yalwe omamiliyona muuyuni auhe oyi inyenge konkundana ombwanawa yUukwaniilwa komukalo gwa faathana. Oya za muuyuni mbuka wa kolokosha, yi ihula uukwatya uukulu, ye etha po ookuume kawo yonale noye etha po wo omalalakano gawo guuyuni. (Johannes 15:19; Aaefeso 4:22-24; Jakob 4:4; 1 Johannes 2:15-17) Mbela omolwashike haya ningi iinima ayihe mbika? Omolwaashoka oya pandula noonkondo omalaleko nuuyamba gUukwaniilwa waKalunga shi vulithe kehe oshinima shoka onkalelo yongashingeyi tayi vulu oku ya pa. Mbela ou uvite sha faathana kombinga yonkundana ombwanawa yUukwaniilwa? Mbela owi inyengithwa kuyo okuninga omalunduluko ga pumbiwa opo onkalamwenyo yoye, omithikampango ndhoka ho landula nosho wo omalalakano goye yi tse kumwe naashoka Jehova ta pula? Ngele to shi ningi otashi ke ku etela omalaleko nuuyamba ogendji, ngashingeyi nosho wo monakuyiwa.
Eteyo oli li pokupwa
15. Oshike sha li sha hunganekwa shoka oshigwana shaKalunga tashi ka ninga momasiku gahugunina?
15 Omupsalmi okwa nyola a ti: “Esiku lyolugodhi lwoye oshigwana shoye tashi [igandja, NW] shili nenyanyu.” Mboka yi igandja omwa kwatelwa ‘aagundjuka ngaashika omume mekolo lyeluwa’ nosho wo “ongundu onene yaakiintu tayi fala elaka lyesindano.” (Epsalmi 68:12, KB; 110:3) Mbela oshike sha li oshizemo shokulonga nuudhiginini nokwiiyamba kwoshigwana shaJehova, aalumentu naakiintu, aagundjuka naakulupe momasiku gahugunina ngoka?
16. Gandja oshiholelwa shankene aapiya yaKalunga taya ningi oshindji okukwathela yalwe yi ilonge kombinga yUukwaniilwa.
16 Omukokolindjila, nenge omuuvithi gUukwaniilwa gwethimbo lyu udha, muIndia okwa li i ipula nkene aathitamatsi ye vulithe pomamiliyona gaali moshilongo shoka taya vulu okukwathelwa okwiilonga kombinga yUukwaniilwa. (Jesaja 35:5) Okwa tokola oku ki inyolitha koshiputudhilolongo muBangalore oku ki ilonga elaka lyokuudhika. Hoka okwa li a vulu okulombwela aathitamatsi oyendji etegameno lyUukwaniilwa, nopwa li pwa totwa ongundu yekonakonombimbeli. Meni lyiiwike iishona, aantu ye vulithe pomulongo oya li ya tameke okuya kokugongala kOshinyanga shUukwaniilwa. Konima yethimbo, poshituthihango, omukokolindjila okwa tsakanene nomulumentu omugundjuka omuthitamatsi a za kuCalcutta ngoka a li e na omapulo ogendji nokwa li u ulike ohokwe onene mokutseya oshindji kombinga yaJehova. Ihe opwa li pu na uupyakadhi. Omugundjuka ngoka okwa li e na okushuna kuCalcutta, pu na ookilometa 1 600 lwaampono, oku ka tameka kokolidji, naahoka kakwa li ku na Oonzapo ndhoka dhi shi elaka lyokuudhika. Nonkambadhala onene okwi itaalitha he opo e mu pitike a ye kosikola koBangalore pehala lyokuya kuCalcutta opo a vule okutsikila nekonakonombimbeli lye. Okwa ningi ehumokomeho ewanawa, nokonima yomvula lwaampono, okwa yapulile onkalamwenyo ye Jehova. Okwa konakona wo Ombimbeli naathitamatsi yontumba, mwa kwatelwa kuume ke gwokuunona. Oshitayimbelewa muIndia ngashingeyi otashi ningi elongekidho opo aakokolindjila yi ilonge elaka lyokuudhika opo ya kwathele aantu mboka.
17. Hokolola shoka wa mono she ku ladhipika unene molaporta yomumvo gwiilonga 2004 pepandja 21 sigo 24.
17 Pepandja 21 sigo 24 lyoshifo shika, oto ka adha po olaporta yiilonga yomomapya yOonzapo dhaJehova muuyuni auhe yomumvo gwiilonga 2004. Longitha okathimbo u yi konakone, e to mono uunzapo kutya oshigwana shaJehova oshi itula mo okukonga ‘okawe ke na ondilo’ nena.
Kaleni ‘nokukonga tango uukwaniilwa’
18. Uuyelele uni Jesus inaa kwatela meyele lyomulandithi omweendi, nomolwashike inee shi ninga?
18 Ngele tatu dhiladhila natango keyele lyaJesus lyomulandithi omweendi, otwa ndhindhilika kutya Jesus ina popya nando osha shi na ko nasha nankene omulandithi a li ta ka hupa konima yokulanditha po ayihe mbyoka a li e na. Dhoshili, yamwe otashi vulika taya pula taya ti: ‘Mbela omulandithi openi a li ta ka adha iikulya, oonguwo nosho wo ehala lyokukala sho kee na we sha? Uuwanawa uni a li ta ka mona mokawe ke na ondilo?’ Ngoka ogo omapulo ge eleka okupulwa pataloko lyopanyama. Ihe mbela Jesus ina ladhipika aalongwa ye a ti: “[Kaleni ano nokukonga tango uukwaniilwa nuuyuuki we, NW], nena oombino ayihe otamu yi gwedhelwa ko”? (Mateus 6:31-33) Enenedhiladhilo lyeyele ndika olyo kutya osha pumbiwa okuulika nomutima aguhe eigandjo kuKalunga nosho wo uulaadhi omolwUukwaniilwa. Mbela otwi ilonga mo sha muka?
19. Oshiilongomwa sha simana shini tatu vulu okwiilonga meyele lyaJesus lyokawe ke na ondilo?
19 Kutya nduno opo owala twi ilongo kombinga yonkundana ombwanawa noonkondo nenge otwa konga Uukwaniilwa notatu lombwele yalwe kombinga yomalaleko nuuyamba uule woomvula omilongo, otu na okutsikila okuninga Uukwaniilwa oshinima sha simana shoka tatu gandja eitulomo kusho. Ngaka ogo omathimbo omadhigu, ihe otu na omatompelo ga kola okwiitaala kutya otatu lalakanene oshinima sholela noitashi vulu okuyelekwa nasha, sha fa okawe hoka omulandithi a mono. Iiningwanima yuuyuni nokugwanithwa kwomahunganeko gOmbimbeli otaku gandja euliko lya kola kutya otu li ‘mehulilo lyonkalelo yiinima.’ (Mateus 24:3, NW) Ngaashi omulandithi omweendi, natu ulike nomutima aguhe uulaadhi omolwUukwaniilwa waKalunga nokunyanyukilwa uuthemba wokuuvitha onkundana ombwanawa.—Epsalmi 9:1, 2.
Oto dhimbulukwa?
• Oomvula dha piti, oshike she etitha po eindjipalo mokati kaalongelikalunga yashili?
• Ombepo yini yi wetike mokati kaamboka ye li aatumwa?
• Omalunduluko geni aantu ya ningi molwonkundana ombwanawa yUukwaniilwa?
• Oshiilongomwa shini shi na oshilonga tatu vulu okwiilonga meyele lyaJesus lyokawe ke na ondilo?
[Omathano pepandja 26, 27]
Ngaashi omulandithi omweendi, aatumwa nena oya lalekwa nuuyamba uunene
[Ethano pepandja 27]
‘Oshigwana shoye tashi igandja nenyanyu’