Ovanyasha, tangeni Jehova!

“Ovakwambadayedu, tangeni Omwene, . . . ovamati nye noukadona.”—EPSALME 148:7, 12.

1, 2. (a) Ovanyasha vahapu ove shii omangabeko elipi oo hava tulilwa po? (b) Omolwashike ovanyasha ve he na okuuda nai omolwomangabeko oo hava tulilwa po kovadali vavo?

OVANYASHA ohava kala ve shii nawa osho inava efiwa va ninge. Vahapu vomuvo otava dulu oku ku lombwela noupu kutya ove na okukala ve na omido ngapi fimbo inava pewa epitikilo lokutauluka opate ovo aveke ile kutya ove na okunangala pongapi nosho yo kutya onaini tava dulu okuhovela okushinga otuwa. Omafimbo amwe, ovanyasha ohava kala ve udite kutya mahapu omomapulo avo oo hava pula va mana mo, ohaa nyamukulwa luhapu taku ti: “Teelela u kule.”

² Ovanyasha, omu shi shii kutya ovadali veni ove wete kutya oshi li pandunge oku mu tulila po omangabeko a tya ngaho, tashi dulika omolweameno leni. Omu shii yo lela kutya, Jehova ota ka kala a hafa ngeenge tamu dulika kovadali veni. (Ovakolossi 3:20) Ndele mbela ohamu kala mu udite kutya onghalamwenyo yeni yolela inai hovela natango? Mbela oinima aishe oyo ya fimanenena omwe i ngabekwa fiyo osheshi mwa kula? Osho hasho nandenande! Ope na oshilonga tashi longwa kunena osho sha fimanenena shi dulife omaufembanghenda aeshe oo tashi dulika mwa teelela okumona. Mbela ovanyasha omwa efiwa mu kufe ombinga moshilonga osho? Inamu pitikwa ashike oku shi ninga, ndele otamu shivwa kuKalunga Omukombadambada mu shi ninge!

3. Jehova ota shivi ovanyasha va kale ve na oufembanghenda ulipi, nomapulo elipi hatu ka kundafana paife?

³ Oilonga ilipi hatu popi? Didilika eendjovo domushangwa woshipalanyole shoshitukulwa shetu eshi, odo tadi ti: “Ovakwambadayedu, tangeni Omwene, . . . ovamati nye noukadona, ovaxungu nounona nye.” (Epsalme 148:7, 12) Oufembanghenda weni munene oyoo kutya: Otamu dulu okutanga Jehova. U li omunyasha, mbela owa hafa okukufa ombinga moshilonga osho? Vahapu ova hafa oku shi ninga. Opo tu mone kutya omolwashike sha fimana okukala u udite ngaho, natu konakoneni omapulo atatu. Lotete, omolwashike u na okutanga Jehova? Etivali, ongahelipi to dulu oku mu tanga nomupondo? Etitatu, onaini shi li efimbo la wapala okuhovela okutanga Jehova?

Omolwashike mu na okutanga Jehova?

4, 5. (a) PaPsalme 148, otu li monghalo iwa ilipi? (b) Ongahelipi oishitwa oyo ihai popi noihai diladila tai dulu okutanga Jehova?

⁴ Etomheno la fimanenena lokutanga Jehova, omolwaashi oye Omushiti. Epsalme 148 otali tu kwafele tu yandje elitulemo koushili oo. Diladila ashike: Ngeno owe uya nee pongudu inene yovanhu tava imbi pamwe eimbilo lihokwifa nolitunhula, ngeno oto ka kala u udite ngahelipi? Ongahelipi ngeenge eendjovo deimbilo olo ou shii kutya odoshili, tadi hepaulula omadiladilo oo u shii kutya okwa fimana, mahafifa notae linyengifa? Mbela oto ka kala nehalo lokulihonga eendjovo deimbilo olo nokwiimba pamwe navo? Vahapu vomufye ngeno osho hatu ka ninga. Epsalme 148 otali ulike kutya ou li monghalo ya faafana, ndele oiwa i dule oyo kokule. Epsalme olo otali hokolola ongudu inenenene, tai tange Jehova pamwe. Eshi to lesha Epsalme olo, oto ka didilika mo oshinima shimwe osho shikumwifi. Oshike mbela osho?

⁵ Ihapu yomoinima oyo tai tange Jehova oyo ya hokololwa mEpsalme 148, ihai dulu okupopya ile okudiladila. Pashihopaenenwa, ohatu lesha kombinga yetango, ohani, eenyofi, oihemime, oikungulu nosho yo eemhunda noikulundudu tai tange Jehova. Ongahelipi oishitwa oyo i he na omwenyo tai dulu okutanga Jehova? (Ovelishe 3, 8, 9) Heeno, omonghedi omo omiti, oinamwenyo yomefuta noyokombada yedu hai tange Jehova. (Ovelishe 7, 9, 10) Owa tala ngoo nande onale eningino liwa letango ile ohani i yadi i li mokati keenyofi ile wa hafifwa kokumona oinamwenyo tai danauka ile wa kumwifwa komutungilo wedu tau monika nawa? Hano owa “uda” eimbilo lokutanga Jehova tali imbwa keshito. Aishe oyo Jehova a shita otai tu dimbulukifa kutya ye Omushiti omunaenghono adishe, nonokutya kape na umwe meshito alishe e na eenghono dinene, eendunge, ile omunahole e mu dule.—Ovaroma 1:20; Ehololo 4:11.

6, 7. (a) Epsalme 148 otali hokolola oishitwa inaendunge ilipi tai tange Jehova? (b) Omolwashike tashi dulika tu linyengifwe tu tange Jehova? Shi yelifa.

⁶ Epsalme 148 otali hokolola yo oishitwa inaendunge tai tange Jehova. Movelishe 2, ohatu lesha mo “eengudu” daJehova domeulu—ovaengeli—tave mu tange. Movelishe 11, ohatu lesha mo ovanenenhu novafimanekwa, ngaashi eehamba novatokoli, tava shivwa va kufe ombinga mokutanga Jehova. Ngeenge ovaengeli ovanaenghono ohava hafele okutanga Jehova, omunhu wongaho elipi ta dulu lela okutya okwa fimana neenghono nomolwaasho ita dulu oku shi ninga? Opo nee movelishe 12 no 13, ovanyasha omwa shivwa mu kufe yo ombinga mokutanga Jehova. Mbela owe linyengifwa u kale wa hala oku shi ninga?

⁷ Diladila kefaneko eli. Ngeno okwa li u na kaume kopofingo e na ounghulungu wa denga mbada—tashi dulika moudano, mokufaneka, ile momusika—mbela ito ka lombwela oukwaneumbo weni nookaume koye vamwe kombinga yaye? Nope he na omalimbililo, osho to ka ninga. Doshili, okulihonga kombinga yaasho Jehova a ninga otaku dulu oku tu linyengifa monghedi ya faafana. Pashihopaenenwa, Epsalme 19:2, 3 otali ti kutya eulu li yadi eenyofi ohali ‘lalekida.’ Ngeenge hatu diladila kombinga yoilonga ikumwifi oyo Kalunga a longa, itatu dulu okweefa nandenande okulombwela vamwe kombinga yaKalunga ketu.

8, 9. Omolwomatomheno elipi Jehova a hala tu mu tange?

⁸ Etomheno vali limwe la fimana molwaashi tu na okutanga Jehova, omolwaashi okwa hala tu shi ninge. Omolwashike? Mbela osheshi a pumbwa okutangwa kovanhu? Ahowe. Omafimbo amwe otashi dulika twa pumbwa okutangwa, ndele Jehova oku tu dule kokule. (Jesaja 55:8) Oku lishii nawa ye mwene nosho yo omaukwatya aye. (Jesaja 45:5) Ndelenee okwa hala tu mu tange noha kala a hafa ngeenge hatu shi ningi. Omolwashike? Konakona omatomheno avali. Lotete, oku shi shii kutya otwa pumbwa oku mu tanga. Okwe tu shita nomhumbwe yopamhepo, omhumbwe yoku mu longela. (Mateus 5:3, NW) Ohashi hafifa Jehova oku tu mona hatu wanifa po omhumbwe oyo, ngaashi ashike hashi hafifa ovadali voye mokumona to li oikulya oyo ve shii kutya otai ku palula.—Johannes 4:34.

⁹ Etomheno etivali, Jehova oku shi shii kutya ovanhu vakwetu navo ova pumbwa oku tu uda hatu mu tange. Omuyapostoli Paulus okwa li a shangela omulumenhu omunyasha Timoteus eendjovo edi a ti: “Lipashukila ove mwene nenongeko loye; dama mulo! Osheshi ngenge to shi ningi, oto lixupifa ove mwene naava tave ku pwilikine.” (1 Timoteus 4:16) Doshili, ngeenge to hongo vamwe kombinga yaJehova Kalunga noku mu tanga, otashi dulika ve mu shiive yo. Eshiivo la tya ngaho otali dulu li va etele exupifo laalushe!—Johannes 17:3.

10. Oshike tashi tu linyengifa tu tange Kalunga?

¹⁰ Ope na vali natango etomheno limwe lokutanga Jehova. Oto dimbuluka efaneko li na sha nakaume koye e na ounghulungu wa denga mbada. Ngeenge owa udu vamwe tava popi oipupulu shi na sha naye, tava popile mowii edina laye liwa, mbela ito ka kala wa tokola toko oku mu tanga shi dulife nale? Jehova ota popilwa mowii apeshe mounyuni ou. (Johannes 8:44; Ehololo 12:9) Onghee hano, ovo ve mu hole ohave linyengifwa va popye oshili kombinga yaye, sha hala okutya, va pukulule ovo va pukifwa. Mbela naave owa hala okuulikila Jehova ohole yoye nosho yo oku mu pandula nokuulika kutya oye wa hala a kale Omupangeli woye ponhele yomutondi waye munene, Satana? Aishe oyo oto dulu oku i ninga mokutanga Jehova. Nepulo likwao ololo kutya, ongahelipi to dulu oku mu tanga?

Nghee ovanyasha vamwe va li va tanga Jehova

11. Oihopaenenwa yOmbibeli ilipi tai ulike kutya ovanyasha otava dulu okupondola filufilu mokutanga Jehova?

¹¹ Ombibeli otai ulike kutya luhapu ovanyasha ohava pondola filufilu mokutanga Jehova. Pashihopaenenwa, opa li okakadona Okaisrael oko kwa li ka twalwa moukwatwa kOvaarami (Ovasiria). Oka li ka yandja oundombwedi nouladi komwene wako womukainhu shi na sha nomuprofeti waJehova, Elisa. Eendjovo dako oda etifa oshikumwifilonga, noundombwedi u na eenghono owa li wa yandjwa. (2 Eehamba 5:1-17) Jesus naye okwa li a yandja oundombwedi nouladi eshi a li okaana. Moiningwanima aishe yomounyasha waye oyo kwa li tai dulu okukala ya shangwa mOmishangwa, Jehova okwa hoolola mo shimwe, oshiningwanima osho sha ningwa fimbo Jesus a li e na omido 12, eshi a li ta pula nouladi ovahongi vomalongelokalunga omapulo motembeli muJerusalem ndele te va fiye va kuminwa eudeko laye li na sha neendjila daJehova.—Lukas 2:46-49.

12, 13. (a) Okafimbo kanini fimbo Jesus ina fya, okwa li a ninga shike motembeli, nosha li she linyengifa ngahelipi ovanhu ovo va li po? (b) Jesus okwa li e udite ngahelipi shi na sha nokutanga kwounona?

¹² Eshi Jesus a ninga omukulunhu, okwa li yo e linyengifa ounona va tange Jehova. Pashihopaenenwa, omafiku ashike manini fimbo ina fya, okwa li kotembeli muJerusalem. Ombibeli otai ti kutya okwa longa ko “oikumifi.” Okwa li a taataa mo ovo va li tava ningi onhele oyo iyapuki ekololo leembudi. Okwa twikulula yo ovapofi nokwa velula oingudu. Keshe umwe oo a li po, naunene tuu ovawiliki vomalongelokalunga, okwa li ve na okukala ve linyengifwa va tange Jehova nOmona waye, Messias. Shinyikifa oluhodi, vahapu vopefimbo olo inava tanga Jehova nOmona. Ova li ve shi shii kutya Jesus okwa tumwa kuKalunga, ndele ova li va tila ovawiliki vomalongelokalunga. Ndelenee ongudu imwe yovanhu oya li ya popya nouladi. Mbela ou shii kutya ova li oolyelye? Ombibeli otai ti: ‘Ndele ovapristeri ovakulunhu novanongo vomishangwa eshi va mona oikumifi [Jesus] e i longa, nounona, nhumbi va ingida motembeli va tya: Hoshianna, Omona waDavid, ova umana ndele ova tya [kuJesus]: Ou udite ko tuu ava osho tava ti?’—Mateus 21:15, 16; Johannes 12:42.

¹³ Ovapristeri ovo ova li ve shi Jesus ota ka mweneka ounona ovo va li tave mu tange. Mbela okwa li e va mweneka? Hasho nandenande! Jesus okwa nyamukula ovapristeri a ti: “Heeno, onye inamu lesha hamba nande lumwe: Omomakanya ounona nouhanana we lilongela ehambelelo?” Doshili, Jesus naXe ova li va hafela okutanga kwounona ovo. Ounona ovo ova li tava ningi osho ovakulunhu ovo va li po va li ve na okuninga. Pamadiladilo avo oshinyasha, okwa li ve wete kutya oinima aishe oya yela. Ova mona omulumenhu oo ta longo oikumwifilonga, ta popi nouladi noneitavelo nokuulika ohole ya xwama yokuhola Kalunga noshiwana shaye. Okwa li “Omona waDavid,” Messias a udanekwa, ngaashi a li e shi popya. Omolweitavelo lavo, ounona ovo ova li ve na oufembanghenda wokuwanifa exunganeko.—Epsalme 8:3.

14. Ongahelipi eeshali odo ovanyasha ve na hadi va dulifa okutanga Kalunga?

¹⁴ Oshike hatu dulu okulihonga moihopaenenwa ya tya ngaho? Ohatu lihongo mo kutya ovanyasha otava dulu okupondola filufilu mokutanga Jehova. Luhapu ohava kala ve na oshali yokumona nawa nokuuda ko nawa noupu oshili nohava hepaulula eitavelo lavo va mana mo nove na ouladi. Ove na yo oshali oyo ya tumbulwa mOmayeletumbulo 20:29: “Ewapeko lovamati, olo eenghono davo.” Heeno, ovanyasha omu na eenghono—odo tamu dulu shili oku di longifa mokutanga Jehova. Ongahelipi to dulu okulongifa nomupondo eeshali odo?

Ongahelipi tamu dulu okutanga Jehova?

15. Opo u tange Jehova nomupondo, omalinyengotomheno elipi a pumbiwa?

¹⁵ Okutanga Jehova nomupondo okwe likolelela komalinyengotomheno omutima. Ito dulu okutanga Jehova nomupondo ngeenge oto shi ningi ashike molwaashi vamwe va hala u shi ninge. Dimbuluka, oshipango shinene shi dule oipango aishe osho: “Hola Omwene Kalunga koye nomutima woye aushe nomwenyo woye aushe neendunge doye adishe.” (Mateus 22:37) Mbela owa shiiva Jehova paumwene okupitila mekonakono loye lopaumwene lEendjovo daye? Oshidjemo shiwa shokulihonga Eendjovo daKalunga oshosho kutya, oto ka kala u mu hole. Onghedi yopaushitwe yokuulika ohole yoye yoku mu hola, oyo oku mu tanga. Ngeenge omalinyengotomheno oye okwa yuka nokwa kola, oto dulu okutanga Jehova wa xwama.

16, 17. Onghandangala ilipi tai danwa kelihumbato mokutanga Jehova? Shi yelifa.

¹⁶ Ofimbo nokuli ino diladila osho to ka tya, diladila kunghee to ka katuka. Ngeno okakadona Okaisrael kenya kopefimbo laElisa oka li ke na odino, ke he na efimaneko ile ke he fi okanashili, oto diladila kutya ngeno ovakwati vako Ovasiria ngeno ova pwilikina keendjovo dako di na sha nomuprofeti waJehova? Otashi dulika ngeno hasho. Sha faafana, ovanhu otashi dulika va pwilikine kwoove ngeenge va mono kutya oho fimaneke ovanhu, u li omunashili, noho lihumbata nawa. (Ovaroma 2:21) Konakona oshihopaenenwa eshi.

¹⁷ Okakadona kokOputu, komido 11, oka li ka taalela omafininiko e na sha nokudana omadano omafiku kofikola oo a li taa dulu okunyona po eliudo lako la deulwa kOmbibeli. Nefimaneko, oka yelifila omuhongifikola wako kutya omolwashike ke na okwaanya, ndele omuhongifikola okwa li e ka sheka. Momukokomoko wefimbo, omuhongifikola oo okwa kendabala oikando noikando oku ka fifa ohoni, a kala ta sheke elongelokalunga lako. Ndelenee okakadona oko okanyasha oka kala ke na efimaneko. Omido donhumba konima yaasho, omumwameme oo omunyasha okwa li ta longo e li omukokolindjila wondjikilile, omukalele wefimbo liyadi. Poshoongalele shimwe shoshitukulwa, omumwameme oo omunyasha okwa li ta tale ovanhu ovo va li tava ninginifwa nokwa dimbuluka po umwe womuvo. Okwa li omuhongifikola waye wonale! Konima yokulipapatela tava lili, omukainhu oo womukulunhu okwa lombwela oo womunyasha kutya ina dimbwa nande okulihumbata kwaye nefimaneko. Ondombwedi imwe oya li ya talela po omuhongifikola oo, nomuhongifikola okwa li a popya kombinga yelihumbato laao a li nale omuhongwa waye. Oshidjemo, omukainhu oo okwa hovela okukonakona Ombibeli nokwa tambula ko oshili yOmbibeli. Doshili, elihumbato loye otali dulu okukala onghedi i na eenghono unene mokutanga Jehova!

18. Oshike osho omunyasha ta dulu okuninga ngeenge oha ongaonga okuhovela eenghundafana kombinga yaJehova Kalunga nosho yo yOmbibeli?

¹⁸ Mbela omafimbo amwe ohashi kala shidjuu kwoove okuhovela eenghundafana shi na sha neitavelo loye kofikola? Haave auke ho kala u udite ngaho. Ndelenee oto dulu okuningifa vamwe ve ku pule kombinga yeitavelo loye. Pashihopaenenwa, ngeenge oshi li paveta nosha pitikwa oku shi ninga, omolwashike ito twaalele oishangomwa ya kanghamena kOmbibeli noku i lesha pefimbo lomusha ile pomafimbo amwe e lili? Ovanafikola vakweni otashi dulika ve ku pule kombinga yaasho to lesha. Moku va nyamukula noku va lombwela osho wa mona mo shihokwifa moshifo ile membo olo to lesha, oto papala ashike eshi mwa hovela eenghundafana. Dimbuluka okupula omapulo, u shiive osho ovanafikola vakweni va itavela. Pwilikina nefimaneko, ndele to va lombwele osho we lihonga mOmbibeli. Ngaashi oihopaenenwa oyo i li pepandja 29 tai ulike, ovanyasha vahapu otava tange Kalunga keefikola. Eshi ohashi va etele ehafo linene nohashi kwafele vahapu va shiive Jehova.

19. Ongahelipi ovanyasha tava dulu okupondola filufilu moukalele weumbo neumbo?

¹⁹ Oukalele weumbo neumbo oo onghedi iwa unene nokutanga Jehova. Ngeenge iho kufa natango ombinga moukalele oo, omolwashike ito u litulile po u li elalakano? Ngeenge oho kufa ombinga, mbela ope na omalalakano amwe vali oo to dulu okulitulila po? Pashihopaenenwa, ponhele yokupopya ashike oshinima shimwe peumbo keshe, kendabala okuxwepopala, mokupula ovadali voye nosho yo vamwe ovo ve na owino, ve ku pe omaetepo e na oshilonga. Lihonga okulongifa Ombibeli luhapu, okuninga omalishuneko taa pondola nokutameka omakonakonombibeli. (1 Timoteus 4:15) Apa ngoo pe fike okutanga kwoye Jehova meenghedi da tya ngaho, opo ngoo tapa ka kala pe fike okupondola kwoye nopo ngoo tapa kala pe fike okuhafela kwoye oukalele.

Onaini mu na okuhovela okutanga Jehova?

20. Omolwashike ovanyasha inava pumbwa okukala ve udite kutya ovanini unene nokutanga Jehova?

²⁰ Momapulo oo atatu e na sha neenghundafana edi, enyamukulo kepulo eli laxuuninwa olo lipu. Didilika enyamukulo lOmbibeli la yukilila, tali ti: “Ndele dimbulukwa Omushiti woye momafiku ounyasha woye.” (Omuudifi 12:1) Heeno, efimbo lokutanga Jehova opaife. Otashi dulika u kale wa hala okutya: “Ame ondi munyasha unene nokutanga Jehova. Nghi na owino. Ondi na okuteelela fiyo osheshi nda kula.” Haave wotete okukala u udite ngaho. Pashihopaenenwa, omunyasha Jeremia, okwa li a lombwela Jehova a ti: “Akutu Omwene Kalunga! Tala, ame kandi shii kupopya osheshi aame omunyasha.” Jehova okwe mu shilipaleka kutya ka li e na etomheno lokutila. (Jeremia 1:6, 7) Sha faafana, katu na osho tu na okutila ngeenge hatu tange Jehova. Kape na owii tau dulu oku tu ningilwa ndele Jehova ita dulu oku u kandula po.—Epsalme 118:6.

21, 22. Omolwashike ovanyasha ovo tava tange Jehova tava faafanifwa nomume, nomolwashike efaafanifo olo tali tu omukumo?

²¹ Onghee hano, ovanyasha, ohatu mu ladipike kutya: Inamu ongaonga okutanga Jehova! Paife omanga mu li ovanyasha, olo efimbo liwa elela okukufa ombinga moshilonga osho sha fimanenena moilonga aishe tai longwa kombada yedu kunena. Ngeenge tamu shi ningi, otamu ningi oilyo yoshinima shimwe shikumwifi—oukwaneumbo womeshito alishe waavo tava tange Jehova. Jehova okwa hafa eshi u li oshilyo shoukwaneumbo oo. Didilika eendjovo edi da nwefwa mo odo omupsalme a li a yukifa kuJehova a ti: “Oshiwana shoye oshe lilongekidila nehalo liwa unene mefiku lehomono loye: momidjalowapeko diyapuki ovanyasha voye tave iluka ngaashi omume mekolo leluwa.”—Epsalme 110:3.

²² Omume tai vema kouyelele wongula ohai kala tai monika nawa, hasho mbela? Ohai kala tai tulumukifa nomata ayo itaa dulu okuvalulwa, molwaashi omahapu neenghono. Jehova osho he mu tale ko ngaho nye ovanyasha ava tamu mu tange noudiinini momafimbo aa madjuu. Doshili, ehoololo leni lokutanga Jehova otali hafifa omutima waye. (Omayeletumbulo 27:11) Onghee hano, ovanyasha, tangeni Jehova!

Oto nyamukula ngahelipi?

• Omatomheno amwe a fimana okutanga Jehova oelipi?

• Oihopaenenwa yOmbibeli ilipi tai ulike kutya ovanyasha otava dulu okupondola filufilu mokutanga Jehova?

• Ongahelipi ovanyasha tava dulu okutanga Jehova kunena?

• Onaini ovanyasha ve na okuhovela okutanga Jehova, nomolwashike?

[Efano pepandja 18]

Ngeno kaume koye okwa li e na ounghulungu wa denga mbada, ngeno ito ke shi lombwela vamwe?

[Efano pepandja 21]

Ngeenge owa hala okuxwepopala moukalele woye, pula Ondombwedi oyo i na owino muhapu i ku pe omaetepo e na oshilonga