Natu hambeleleni Jehova esiku kehe
1. Aapiya yaKalunga oya tokola toko okuninga shike, nomolwashike?
1 Omukwaniilwa David okwa li a tokola toko okutanga Jehova “esiku kehe,” aluhe sigo aluhe. (Eps. 145:2, 7, 21) Natse wo otu na omatompelo omawanawa okutanga Jehova esiku kehe. — Eps. 37:10; 145:14, 18; 2 Pet. 3:13.
2. Ongiini omaukwanegumbo taga vulu okuhambelela Jehova esiku kehe?
2 Megumbo lyetu: Otu na iileshomwa tayi tungu nelalakano oku tu kwathela tu kale tu na oonkundathana dhopambepo uuna tatu lesha enyolo lyesiku kehe, uuna tatu ningi Ekonakono lyUukwanegumbo nosho wo uuna tatu ilongekidhile okugongala. Omaukwanegumbo ogendji oge na omukalondjigilile gokulila pamwe esiku kehe, ngoka hagu ya pe ompito okukundathana ya ngungumana nokuhambelela Jehova. Oonkundathana dha tya ngaaka otadhi kwathele aavali ‘ya putudhe nokukumagidha’ oyana ngaashi Jehova a hala. — Ef. 6:4; Deut. 6:5-7.
3. Otu na oompito okuninga shike uuna tu li naamwatate?
3 Uuna tu li naamwatate: Uuna tu li miilonga yomomapya nenge pokugongala kwegongalo, otu na oompito oombwanawa lela okuhambelela Jehova pamwe nooitaali ooyakwetu. (Omayel. 15:30; Fil. 4:8; Heb. 13:15) Molwaashoka atuheni otu hole Jehova, otashi ka kala oshipu okukwatela mo oohapu dholupandu tadhi zi komutima omolwuuwanawa we uuna tatu popi naamwatate. — Eps. 106:1.
4. Omoonkalo dhini dhilwe tatu vulu okuhambelela Jehova?
4 Uuna tatu popi naamboka kaaye shi ooitaali: Nonando oonkalo itadhi tu pitike tu kuthe ombinga muukalele womontaneho esiku kehe, okupopya paufupi naaniilonga ooyakwetu, naanasikola ooyakwetu nosho wo nayalwe mboka tatu tsakaneke kombinga yaJehova nomalalakano ge otashi vulu okukwathela aantu mboka ye na omitima dhu uka ya kale netegameno. (Eps. 27:14; 2 Pet. 3:15) Omumwameme gumwe manga a li e li mondhila, okwe shi pondola okuuvithila omweendi pamwe naye ngoka konima a li e uvite a talalelwa nokwa tsuwa omukumo kwaashoka u uvu. Okwa pe omumwameme ondjukithi ye nonomola yongodhi opo ya vule okukwatathana. Manga uuyuni tawu mono iihuna kuupyakadhi uunene nokoonkalo dha nayipala, Oonzapo dhaJehova otadhi tsikile nokuuvithila mboka ya hala okupulakena “onkundana ombwanawa.” Shika otashi pe yalwe etegameno notashi ya ningitha ya hambelele Jehova. — Jes. 52:7; Rom. 15:11.
5. Omolwashike shi li ehalo lyetu okuhambelela Jehova, naashika otashi vulu okweeta shike?
5 Itashi nyanyudha tuu Jehova okuuva aapiya ye taye mu tanga esiku kehe! Ngaashi eshito lyaJehova ndyoka lye tu dhingoloka hali mu hambelele, natse otatu vulu wo oku mu hambelela esiku kehe momagumbo getu, megongalo nuuna tatu popi nayalwe mboka inaaya tameka natango oku mu hambelela. — Eps. 19:1-4.