Jehova oye omunene nonakuhambelelwa pombanda
Uulalelo wOmuwa otau ka dhanwa mo 16 Apilili
1 Enyanyu lyetu otali indjipala sho 16 Apilili 2003 taga hedha popepi. Ongulohi ndjoka otatu ka dhimbulukwa eso lyaJesus, pamwe nomamiliyona gaalongelikalunga ooyakwetu muuyuni auhe mokusimaneka edhina lyaJehova. Jehova okwa gwana okuhambelelwa kutse noonkondo adhihe molwelongekidho ekumithi lyiikulila ndyoka e tu ningila. Okupitila muyo, ota ka laleka nuuyamba aantu ayehe aavuliki nomalaleko nuuyamba omakumithi. Otatu igidha nomutima aguhe pamwe nomupsalmi tatu ti: “Omuwa oye omunene [nonakuhambelelwa, NW] pombanda.” — Eps. 145:3.
2 Ndika olyo ethimbo lyokutedhatedha uuwanawa waKalunga nosho wo oongunga dholupandu ndhoka tu nine Jehova molwokutuma “Epona lye muuyuni, opo tu kale tu na omwenyo muye.” (1 Joh. 4:9, 10) Okudhana nevuliko Uulalelo wOmuwa otaku thindile momitima dhetu kutya “Omuwa oye omunamutimahenda nomunalukeno . . . nesilohenda lye olindji.” (Eps. 145:8) Dhoshili, iikulila oyo euliko enene lyaJehova lyohole yokuhola aantu ayehe. (Joh. 3:16) Uuna tatu holele okuulika ohole kwaKalunga e tatu dhiladhila uulaadhi waJesus wokukakatela uudhiginini, otatu inyengithwa tu hambelele Jehova. Otatu ke mu hambelela sigo aluhe molwohole ye onene yu ulikwa mokuninga omwenyo gwaaluhe tagu wapa kutse. — Eps. 145:1, 2.
3 Kwathela yalwe ya hambelele Jehova: Olupandu okupandula omagano dhingi gaKalunga giikulila otali tu inyengitha tu hiye yalwe ya hambelele Jehova pamwe natse. Omupsalmi okwa nwethwa mo okunyola ta ti: “Okudhimbulukwa kuuwanawa woye otaye ku tondokitha, nuuyuuki woye otaye u nyanyukililwa.” (Eps. 145:7) Omvula ya za ko oyo awike, Oonzapo dhaJehova muuyuni auhe odha longa oowili dhi vulithe pomamiliyona eyuvi miilonga yokuuvitha. Oshike sha zi moonkambadhala dhadho? Oshiwike kehe, uupokati woohandimwe ye vulithe 5 100 oya li ya ninginithwa shi li endhindhiliko lyeiyambo lyawo kuJehova. Molwashoka pEdhimbuluko opwa li pu na omwaalu 15 597 746, mwa kwatelwa omamiliyona 9 mboka inaaya tameka natango okuhambelela Jehova ye li aauvithi yonkundana ombwanawa, otapu vulu okukala natango eindjipalo enene. Tu li aauvithi yUukwaniilwa, otwa simaneka uuthembahenda wetu wokuuvitha onkundana ombwanawa nokuukitha omitima dhayalwe kuJehova, kOmwana nokUukwaniilwa we.
4 Omukalo omwaanawa gwokuladhipika yalwe ya simaneke Jehova ogwo moku ya hiya ya kale pamwe natse pokudhana Uulalelo wOmuwa. Owa nyola mbela omusholondondo gwaayehe mboka wa hala okuhiya nosho wo yalwe mboka tashi vulika ya pumbwa okudhimbulukithwa kutya esiku etingapi nonokutya opongapi? Ayehe mboka u na momusholondondo gwoye owe ya hiya mbela? Ngele hasho, ya hiya nondjungu methimbo ndyoka lya hupa ko. Ya kwathela yu uve ko elalakano lyedhimbuluko ndika. Kala wi ilongekidha okupopitha aayenda pedhimbuluko. Ya hambelela, ya tseyitha kuyalwe, e to ya pandula sho ye ya okukala po.
5 Okukala pEdhimbuluko otaku vulu okwiinyengitha aape ya ninge ehumokomeho lyopambepo. Omukonakoni gwOmbimbeli ngoka ta hepekwa keidhitiko lyomutima konima sho a kwatwa koshiponga, ndyoka tali shi ningi oshidhigu unene kuye okuya pomahala gaayehe, okwe ya kEdhimbuluko. Sho a pulwa shoka ta dhiladhila kombinga yokugongala, okwa ti: “Oya li ongulohi ondjapuki noonkondo, nopo nda li.” Okuza ethimbo ndyono, okwa tameke okukala ha kala pokugongala.
6 Konima yEdhimbuluko: Oshike tashi vulu okuningwa okukwathela mboka ye na ohokwe okuhambelela Jehova? Aakuluntugongalo otaya ka gandja eitulomo kaape mboka ye li pEdhimbuluko nokuninga omalongekidho opo aauvithi ya pyokoka ye ya talele po nziya konima yalyo okweendulula iinima iipe mbyoka yi ilonga noya mona. Yamwe otashi vulika ya hala okukala ye na ekonakonombimbeli pegumbo. Oye na wo okuhiwa ya kale haya kala pokugongala akuhe kwegongalo kwokoshiwike, oshoka okukala po aluhe otaku vulu okwiindjipaleka ontseyo yawo yOmbimbeli.
7 Omalongekidho oge na okuningwa okuladhipika ayehe mboka haya faula naamboka ihaaya yi we momapya ya kale haya kala pokugongala itaaya faula. Ngele owa pulwa kaakuluntugongalo u kwathele gumwe ngoka ihaa longo sha we okutamekulula okukutha ombinga miilonga yomomapya, kala to shi ningi nehalo ewanawa. Okuulikila aamwatate olukeno lwopahole lwa tya ngaaka otaku tsu kumwe nekumagidho lyomuyapostoli Paulus, tali ti: “Manga tu na ethimbo, tu ningileni ayehe uuwanawa, ihe unene oomboka ooyakwetu meitaalo.” — Gal. 6:10.
8 Atuheni natu ningeni oonkambadhala dhi ikalekelwa okukala pEdhimbuluko mo 16 Apilili. Inatu hala okukala kaatu po poshiningwanima shika oshiyapuki noonkondo okuhambelela Jehova. Onkee ano ngashingeyi nosigo aluhe, natu hambelele Jehova molwiilonga ye iinene! — Eps. 145:21.