Aprili — ethimbo ‘lyokulonga nuudhiginini nokukondja’
1 Iiwike yopopepi nEdhimbuluko oyo ethimbo lyokutedhatedha koshigwana shaJehova. Ndika olyo ethimbo ndyoka lyokutedhatedha shoka sha tsakanithwa keso lyaKristus nosho wo okudhiladhila etegameno lyetu twe li pewa kuKalunga lya ningwa tali wapa kombinzi ya tika yaJesus. Ngele to dhiladhila konima kesiku eti-19 Aprili omvula ya za ko, oshike to dhimbulukwa? Oto vulu mbela okudhimbulukwa iipala mbyoka wa mwene ongulohi ndjoka? Onkalo yi na uupambepo u li nawa ndjoka ya li pEdhimbuluko? Oonkundathana dha kwata miiti dhopaMbimbeli nosho wo omagalikano taga zi komutima? Otashi vulika wa li wa tokola okuulika shu udha olupandu lwoye lwomuule molwohole ndjoka yu ulikwa kuJehova naJesus. Okutedhatedha kwa tya ngeyi otaku ku nwetha mo ngiini ngashingeyi?
2 Osha yela kutya oshigwana shaJehova ohashi ulike olupandu ndoka talu ulikwa momikalo odhindji shaahe shi owala noohapu. (Kol. 3:15, 17) Unene tuu muAprili gwomvula ya za ko, otwa li twa tamununa mo olupandu lwetu omolwomasiloshimpwiyu gaJehova gehupitho mokulonga nuudhiginini muukalele wopaKriste. Aakwathelikokolindjila ya adha pomayuvi, moSouth Africa oya li ya konda noopelesenda 27 poshitsa shopombanda shomumvo gwa piti. Iilongo yimwe mbyono yi li kohi yoshitayimbelewa shaSouth Africa nayo oya lopota kutya oya li yi na iitsa yopombanda iipe muukwathelikokolindjila. Oonkambadhala dhawo, pamwe naandhoka dhaauvithi yalwe yUukwaniilwa, odhe eta iitsa yopombanda iipe moowili, megandjo lyiifo nomomaishunoko. Enyanyu lyetu inali nenepekwa tuu kokumona aakonakonimbimbeli aape omayuvi nosho wo yalwe oyendji ye li pEdhimbuluko!
3 Dhoshili, uushili wetegameno lyetu owe tu inyengitha tu katuke onkatu. Oshi li ngaashi naanaa omuyapostoli Paulus a nyola a ti: “Osho tuu shika tatu [longo nuudhiginini, NW] notatu shi kondjele, oshoka otse twa dhike einekelo lyetu muKalunga omunamwenyo, oonguka Omukulili gwaantu ayehe, ihe unene gwooitaali.” — 1 Tim. 4:10.
4 PEdhimbuluko lyonuumvo, oto ku ulika ngiini eitaalo lyoye momasiloshimpwiyu gaJehova omolwomwenyo? MuAprili gwomvula ya zi ko otwa mwene omwaalu omunene gwaauvithi yUukwaniilwa inaagu monika mo nale moSouth Africa. Mbela itatu vulu nando okukonda po pomwaalu nguka muAprili gwonuumvo? Oshi li tashi vulika okwaadha elalakano lyetu. Ihe omuuvithi kehe, a ninginithwa naangono inaa ninginithwa, ota ka kala a pumbwa okukutha ombinga. Aape oyendji otashi vulika ya kale ya gwana okukutha ombinga. Onkee ano sho to ningi omalongekidho gokulonga nuudhiginini nokukondja muAprili gwonuumvo, dhiladhila omikalo moka to vulu okuladhipika yalwe okulonga pamwe nangoye, mwa kwatelwa aape naamboka kaaye na owino oundji.
5 Kwathela yamwe ya tameke ishewe iilonga yawo: Ngele ou shi yamwe mboka inaaya ya miilonga yomomapya uule womwedhi gumwe nenge mbali, oto vulu oku ya ladhipika noku ya hiya mu ye nayo miilonga yomomapya. Ngele yamwe megongalo taya kala ihaaya longo we momapya, aakuluntugongalo otaya ka ninga oonkambadhala dhi ikalekelwa oku ya talela po noku ya ladhipika ya tameke ishewe muAprili.
6 Atuheni otu na okutsikila okupula ombepo yaJehova yi tu koleke miilonga ye. (Luk. 11:13) Otu na okuninga shike opo tu mone ombepo ndjika? Lesha Oohapu dhaKalunga dha nwethwa mo. (2 Tim. 3:16, 17) Otu na wo ‘okuuva shoka ombepo te shi lombwele omagongalo’ mokukala pokugongala akuhe kwopatano kwokoshiwike. (Eh. 3:6) Ngashingeyi olyo ethimbo ewanawa okukwathela mboka kaaye na ondjigilile noihaaya longo we momapya ya hwepopaleke oondjigilile dhawo dhekonakono nokukala taya gongala aluhe. (Ps. 50:23) Shika otatu shi ningi manga tatu tsikile okukala tatu tala nawa onkalonawa yuupambepo wetu yene. Ihe otapu pulwa sha shi ili.
7 Omuyapostoli Petrus okwa yelitha kutya Kalunga oha gandja ombepo ye ondjapuki ‘kwaamboka haya vulika kuye.’ (Iil. 5:32) Evuliko lya tya ngaaka olya kwatela mo okupulakena elombwelo “tu uvithile aantu noku ya [pa uunzapo nawanawa, NW].” (Iil. 1:8; 10:42) Onkee ano, nonando oshi li shoshili kutya otwa pumbwa ombepo yaKalunga yi tu nkondopaleke opo tu uvithe, oshi li wo shoshili kutya ngele otatu tameke okuulika ehalo lyetu okunyanyudha Jehova, ote ke tu kwatha nokuli natango. Inatu dhina nando esimano lyokukatuka oonkatu ndhoka dhopetameko dhokukala tatu vulika nehalo!
8 Kwathela aagundjuka: Aavali, omwa mona mbela kutya aanona yeni oya hala okupopya nayalwe kombinga yoshili? Oya ya nale mbela pamwe nane miilonga yomomapya? Oye na mbela eihumbato li shi okuholelwa? Ngele osho, omolwashike tamu kakadhala? Inda kugumwe gwomiilyo yOkomitiye yIilonga yEgongalo, e to tala ngele okanona koye oka gwana okukala ka yalulwa ke li omuuvithi muAprili gwonuumvo. (Tala membo Our Ministry, epandja 99-100.) Kaleni mu shi kutya aanona yeni otaya vulu okukala nombinga momukalo omunene okwiigidha ehambelelo kuJehova pethimbo lyEdhimbuluko lyonuumvo.—Mat. 21:15, 16.
9 Meme gumwe Omukriste muGeorgia, mIilongohangano yaAmerika, okwa ladhipike aluhe okamwanakadhona okashona ka popye nayalwe kombinga yaJehova. Mumvogu, sho okakadhona ka li ka kutha ombinga muukalele pamwe nayina, oka gandja okabroshure Ota pula komulumentu gumwe noke mu yelithile paufupi iikalimo. Okwe ka pula a ti: “Ou na oomvula ngapi?” Oka ti: “Heyali.” Omulumentu okwa li a kumwa oku ka mona taka popi oohapu tadhi ti sha lela. Okwa li e na ekwatathano noshili sho a li omushona ihe ka li e yi taamba ko sha kwata miiti yi kale omukalo gwonkalamwenyo ye. Nziya, ekonakonombimbeli olya tameke okuningwa nomulumentu, omukulukadhi gwe nosho wo okamwanakadhona.
10 Aagundjuka oyendji oye li nale aauvithi, notatu nyanyukilwa okulonga pamwe nayo miilonga yomomapya. Aagundjuka mbaka otaya vulu okwiinyengitha yalwe yepipi lyawo noku ya ladhipika. Ihe Aprili oku li wo ethimbo lyo opala kuukwanegumbo pauhandimwe u koleke uukumwe wawo nou tungwe pambepo mokulonga pamwe miilonga iiyapuki. Omitse dhomaukwanegumbo odhi na okukwatela komeho mwaashika.—Omayel. 24:27, NW.
11 Kwathela aape: Ongiini kombinga yaape mboka ho konakona nayo Ombimbeli? Otaya vulu mbela okuyambidhidha moonkambadhala dhi ikalekelwa dhomuAprili gwonuumvo? Otashi vulika ya popya kutya oya hala okulombwela yalwe shoka yi ilonga sho mwa mana ontopolwa 2, okatendo 22, nenge ontopolwa 11, okatendo 14, membo Ontseyo. Ngele omu li pokumana ko embo, longekidha mu kundathane iinima mbika nawanawa sho tamu ningi ontopolwa 18, okatendo 8, hoka taka ti: “Otashi vulika wa hala okulombwela aakwanezimo lyoye, ookuume nayalwe shoka to ilongo. Dhoshili, shika otashi vulika ngoye we shi ninga nale, ngaashi naanaa Jesus naye a tseyithilile wo yalwe onkundana ombwanawa poompito inaadhi longekidhwa. (Lukas 10:38, 39; Johannes 4:6-15) Ngashingeyi otashi vulika wa hala okuninga oshindji shi vulithe shoka.” Mbela osho shi li ngawo shi na sha naamboka ho konakona nayo?
12 Ngoka ho konakona naye okwi itaala Oohapu dhaKalunga? Okwa kala nokutula miilonga omakotampango gOmbimbeli? Okwa kala ha tsitha kumwe onkalamwenyo ye nomithikampango dhopakalunga? Oha kala pokugongala kwegongalo? Okwa hala okulongela Jehova Kalunga? Opo nduno omolwashike itoo mu ladhipike a popye naakuluntugongalo opo ya vule okutala ngele okwa gwana okuninga omuuvithi inaa ninginithwa nokulonga pamwe nangoye muAprili? (Tala embo Our Ministry, epandja 97-99.) Komukalo nguka ye ota vulu okutameka okumona ye mwene nkene ehangano lyaJehova tali ke mu yambidhidha moonkambadhala dhe okulongela Jehova.
13 Dhoshili, aakonakoni yamwe ohaya humu komeho neendelelo ye vule yalwe. Onkee ano metsokumwe nelombwelo lyomUukalele Wetu wUukwaniilwa waJuni 2000 (mOshiingilisa), epandja 4, okatendo 5-6, oyendji oya konakona embo etiyali naantu mboka yu ulika ohokwe petameko ihe oya pumbwa ekwatho lya gwedhwa po opo ya ninge ekwatathano nehangano pailonga yawo. Katu na okuteka omukumo okukala netegameno kutya mboka ye na omitima dhu uka mbaka otaya ka ninga aalongwa yashili yaKristus, “kashi na mbudhi kutya oya kwata ethimbo ele nenge efupi.” (Iil. 26:29) Ihe ngele oomwedhi ndhoka wa konakona noohandimwe ya tya ngaaka odhi shi okuhokololwa kutya odhi li shili “ethimbo ele,” itashi vulika nando mbela Edhimbuluko ndika lyonuumvo li kale ompito ombwanawa kwaangoka ho konakona naye a tameke okuulika mpoka olupandu lwe lu thike okupandula iikulila yaKristus?
14 Nkene taya kwathelwa okukutha ombinga: Otatu ilongo oshindji kombinga yokukwathela mboka ya gwana okutameka okuya miilonga yomomapya mokukonakona nkene Jesus a dheula yalwe. Ina mona owala engathithi lyaantu e ta lombwele aayapostoli ya tameke okupopya. Tango okwa tsu omuthindo nkene iilonga yokuuvitha ya simana, e te ya ladhipikile okukala ye na iikala yokugalikana nopo nduno okwe ya sile oshimpwiyu shi na ko nasha niinima itatu ya simana: ngoka taya longo naye, oshitopolwa netumwalaka. (Mat. 9:35-38; 10:5-7; Mark. 6:7; Luk. 9:2, 6) Oto vulu okuninga sha faathana. Kutya nduno oto kwathele okanona koye, omukonakoni omupe, nenge gumwe ngoka inaa longa iilonga yomomapya uule wethimbo, otashi ka kala she eleka okuninga oonkambadhala dhi ikalekelwa okulalakanena omalalakano taga landula.
15 Tsa omuthindo nkene sha simana: Thindila momuntu esimano lyiilonga yeuvitho. Kala wa nyanyukwa kombinga yayo. Hokolola iimoniwa mbyoka tayi ulike shoka egongalo lya tsakanitha miilonga yomomapya. Ulika ombepo ndjoka Jesus u ulikile muMateus 9:36-38. Ladhipika ngoka opo ta ka ninga omuuvithi nenge ngoka ihaa longo we momapya a galikane kombinga yokukutha ombinga kwe kwopaumwene miilonga yomomapya noku galikanene wo eendonawa lyiilonga muuyuni auhe.
16 Ladhipika omuntu a dhiladhile kombinga yoompito odhindji ndhoka dhi li po okugandja uunzapo: Mu lombwela kutya ota vulu okugongala pamwe nongundu yekonakono lyembo oku ka gandja uunzapo egumbo negumbo. Popya kombinga yokukundathana naakwanezimo nosho wo aashiwikile nenge okupopya naamboka ha longo nayo nenge aanasikola yakwawo pethimbo lyomwiha. Uuna omuntu to ende miiyenditho yaayehe, olundji oto vulu okutameka oonkundathana mokuulika owala ohokwe yopaumwene kaayendi ooyakweni. Uuna otse tatu tameke okupopya nayo tango, shika ohashi tu pe ompito yokugandja uunzapo uuwanawa. Dhoshili, opu na oompito odhindji dhokulombwela yalwe etegameno lyetu “onofu nanofu.” — Eps. 96:2, 3.
17 Ihe otashi vulika tashi ka kala shi li nawa ngele ngoye nomuuvithi omupe tamu ka longa pamwe egumbo negumbo nziya ngaashi tashi vulika. Ngele owa tula po elalakano muAprili u indjipaleke oowili ndhoka ho longo momapya, pula omumwatate ngoka ha longo niitopolwa ngele opu na oshitopolwa tashi opalele. Ngele osho, shika otashi ke ku pa oompito oku shi longa nawa. Pashiholelwa, ngele wa mana okulonga nenge to yi kokugongala nenge komahala galwe, otashi vulika to mono kutya pegumbo mpono wa adhele kaapu na omuntu oshikando sha zile ko nenge mpoka pwa li pu ulikwa ohokwe, opu na omuntu. Enda po ngele otashi opalele. Shika otashi ku uvitha wa tompola sha notashi ke eta wo enyanyu miilonga yomomapya.
18 Ilongekidha etumwalaka lihokitha: Oshi li oshipu kugumwe a kale a hala okukutha ombinga metumwalaka lyUukwaniilwa, ihe shoka sha simana kuye osho okukala e na einekelo momukalo gwe gwoku li popya, unene tuu ngele oku li omupe nenge okwa kala ethimbo ele inaa ya momapya. Ethimbo ndyoka lya longithwa okukwathela aape naamboka ihaaya longo we momapya yi ilongekidhe olyo ethimbo lya longithwa nawa. Okugongala kwoPailonga nokugongala kwiilonga yomomapya otaku vulu okugandja ondungedhiladhilo tayi kwatha, ihe kapu na sha shoka tashi vulu okupingena po eilongekidho lyopaumwene.
19 Ongiini mbela to vulu okukwathela aape yi ilongekidhile iilonga yomomapya? Tameka negandjo lyiifo e to li kaleke epu nefupi. Ya pula ya dhiladhile kombinga yiiningwanima yomoonkundana mbyoka tashi vulika tayi ipulwa nayo kaantu yomoshitopolwa, nopo nduno konga edhiladhilo mushimwe shomiifo iipe ndyoka tali shi popi. Shi idheuleni pamwe e tamu shi longitha momapya nziya ngaashi tashi vulika.
20 Natu longe opo pu vule okukala eindjipalo monakuyiwa: Omvula ya zi ko mboka ya li pEdhimbuluko muuyuni auhe oya li ya konda pomamiliyona 14,8. Omwaalu gwaamboka ya lopota ye li aauvithi ogwa li owala gwa konda pomamiliyona gahamano. Shika otashi ti kutya aantu omamiliyona 8,8 lwaampono oya li ye na ohokwe lela oku ya koprograma ndjika yi ikalekelwa hoka yu uvu limwe lyomomalongo ga simana gOmbimbeli tali fatululwa. Oya tameke okutseya yamwe yomutse paumwene, shoka tashi vulika she ya nyanyudha. Oyendji yomuyo ohaye tu popi nawa, ohaya yambidhidha iilonga yetu yomuuyuni auhe, nohaye tu popile koshipala shayalwe. Ongundu ndjika onene yi lile po eindjipalo enene lyomonakuyiwa. Oshike mbela tatu vulu okuninga oku ya kwathela opo ya hume komeho natango?
21 Omwaalu omunene gwaamboka aape ohagu kala pEdhimbuluko molwashoka ya hiwa paumwene kugumwe gwomutse. Olundji, shika otashi ti kutya maapulakeni oye shi mo nokuli omuntu gumwe. Ngele gumwe ta kala po molwashoka twe mu hiya, otu na oshinakugwanithwa oku mu uvitha a taambwa ko noku mu kwatha a mone uuwanawa wa gwana moprograma. Molwashoka oshinyanga otashi ka kala shu udha unene, mu kwathela a mone ehala lyokukuutumba. Mu pa Ombimbeli e ti imbi pamwe nangoye meimbilo lyoye. Yamukula omapulo kehe tashi vulika te ku pula. Okugandja eitulomo lyohole paumwene kwoye otaku vulu ku kale oshinima sha simana mokukokeka ohokwe kwe. Dhoshili, oshinakugwanithwa shika oshetu atuheni — ngele tatu mono oshipala kaatu shi shi, natu shi ulikile ohole nokukundathana nasho paufupi opo tu tseyathane nayo.
22 Okukala pEdhimbuluko otaku vulu shili okunwetha mo okudhiladhila kwomuntu. Oshili kutya ye okwe ya kokugongala otashi vulika shi ulike kutya ina mona palwe shoka ta kongo nonokutya tse otatu mu pe sha shoka e uvite sha simana oku shi konakona nawanawa. Efatululo kombinga yesiloshimpwiyu ekumithi lyiikulila otashi vulika li kale edhigu komuntu ngoka kee na euvoko lyohole yaJehova inaayi ngambekwa. Otashi vulika a mone meendelelo kutya otu ili—otu li aanashili, aanambili, aanahole notu na esimaneko. Oshinyanga shetu kashi na sha sha fa shoka tashi vulika a mona moongeleka moka mu na iihongwathano nosho wo omilandulwakalo itaadhi ti sha. Aape otaya ka mona mbala kutya aapulakeni oyo aantu ya za moondondo adhihe dhonkalamwenyo nonokutya ihamu umbwa ongalo. Iinima ayihe mbika otayi vulu okukala yi na oonkondo tadhi yi inyengitha ya galuke.
23 Konima yEdhimbuluko, gumwe oku na okukala a sa oshimpwiyu okuninga eishunoko tali kwathele komuntu kehe omupe ngoka a li po. Ngele owa hiya aape, ou na oshinakugwanithwa shi ikalekelwa. Manga inaaya ya, ya lombwela kutya pOshinyanga shUukwaniilwa ohapu ningwa okugongala kulwe. Popya oshipalanyole shoshipopiwa shomontaneho tashi landula. Ya tseyithila mpoka hapu ningilwa Ekonakono lyEmbo lyEgongalo ndyoka li li popepi nayo nosho wo ethimbo. Konima yethimbo, ya pa embo The Greatest Man, e to ya tseyithile kutya shoka tashi ka kundathanwa oshiwike shomasiku 16 Aprili osho ontopolwa 103-105.
24 Ninga elongekidho oku ya talela po kegumbo lyawo. Shilipaleka kutya oye na okabroshure Ota pula nembo Ontseyo, ndyoka tali ke ya tseyithila omalongo ga simana gOmbimbeli. Ngele kaye na nale ekonakono, ninga nayo ekonakonombimbeli. Ya lombwela ya leshe okabroshure Jehovah’s Witnesses—Who Are They? What Do They Believe?, hoka taka fatulula sha yela nkene tatu longo tu li ehangano. Ya hiya ye ye ya tale ovidio yetu Our Whole Association of Brothers. Ninga elongekidho ya tseyathane nayalwe megongalo. Moomwedhi tadhi ya, kala nekwatathano naamboka aape; ya hiya kokugongala uuna omutonatelishikandjo ta talele po nenge uuna mu na oshigongi shopashikandjo nenge oshigongi shesiku lyi ikalekelwa. Ya pa ompito kehe yu ulike kutya oye na “iikala iiwanawa kombinga yomwenyo gwaaluhe”! — Iil. 13:48, NW.
25 Shoka aakuluntugongalo taya vulu okuninga: Omupondo gwoonkambadhala dha kola muukalele muAprili nguno otadhi ka kala dhi ikolelela unene tuu kaakuluntugongalo. Ngele ngoye omukwatelikomeho gwekonakono lyembo, ninga elandulathano lyiinima mbyoka to vulu okuninga opo u kwathele kehe gumwe mongundu yekonakono lyembo lyeni a kuthe ombinga miilonga mbika yi ikalekelwa. Opu na mbela yamwe ye li kongundu yeni mboka aagundjuka, aape, haya faula, nenge ihaaya longo we momapya? Tala ngele aavali, aakokolindjila, nenge aauvithi yalwe oya katuka onkatu tango oku ya kwathela. Gandja ekwatho kehe lyopaumwene to vulu okugandja. Omumwameme gumwe ngoka a li inaa ya miilonga yomomapya uule woomvula mbali okwa longo oowili dhi vulithe 50 miilonga yomomapya muAprili gwomumvogu. Oshike she mu kwathele? Okwa ti kutya osha li omatalelopo taga tungu gokulitha ga ningwa kaakuluntugongalo.
26 Aakuluntugongalo naayakuligongalo oye na okulongela kumwe okushilipaleka kutya opu na oshitopolwa sha gwana niifo niileshomwa ya gwana omolwomwedhi ngoka tagu ya. Otapu vulu mbela okuningwa omalongekidho ga gwedhwa po giilonga yomomapya? Ngele osho, tseyitha kutya opu na omalongekidho gi ikalekelwa. Unene tuu momagalikano goye gomontaneho nogopaumwene, galikana Jehova a laleke nuuyamba omwedhi gwetu gwokulonga oshindji miilonga yUukwaniilwa. — Rom. 15:30, 31; 2 Tess. 3:1.
27 Aprili gwomumvogu megongalo li li moNorth Carolina, aakuluntugongalo oya li ya ladhipike shili pu longwe oshindji miilonga yomomapya. Pokugongala kwoshiwike kehe, oya li ya pula aauvithi ya tale pagalikano ngele itaya vulu okwiinyolitha muukwathelikokolindjila. Pompito kehe, aakuluntugongalo naayakuligongalo ayehe oya li ya popi nuulaadhi kombinga yokuninga Aprili omwedhi gwa dhenga mbanda inaashi monika nando onale. Oshilanduliko, oopelesenda 58 dhaauvithi, mwa kwatelwa aakuluntugongalo ayehe naayakuligongalo, oya li ya kokola ondjila omwedhi ngoka!
28 Enyanyu lyokukala u na mo ombinga yu udha: Omalaleko nuuyamba ‘gokulonga nuudhiginini nokukondja’ muukalele ogeni? (1 Tim. 4:10, NW) Shi na ko nasha niilonga yuulaadhi wegongalo lyawo muAprili gwomumvogu, aakuluntugongalo ya tumbulwa metetekelo oya nyola: “Aamwatate naamwameme olundji ohaya popi kombinga yankene ye holathane unene noyuukumwe uunene mboka ye uvitilathane okuza sho ya tameke okulonga oshindji miilonga yomomapya.”
29 Omumwatate omugundjuka gumwe oshilema okwa li a hala okukutha ombinga miilonga yi ikalekelwa yaAprili gwomumvogu. Okupitila melongekidho lyuukeka nokekwatho lyayina naamwahe naamwameme yopambepo, okwa nyanyukilwa omwedhi tagu eta po sha e li omukwathelikokolindjila. Okwa li mbela e uvite ngiini? Okwa ti: “Oshikando shotango monkalamwenyo yandje, ndi uvite nda fa kaandi shi oshilema.”
30 Kapu na omalimbililo kutya Jehova oha laleke nuuyamba uunene mboka taya simaneke uuthemba wawo wokupopya kombinga yUukwaniilwa we. (Eps. 145:11, 12, KB) Manga tatu dhimbulukwa eso lyOmuwa gwetu, otu uvite ko kutya omalaleko nuuyamba geigandjo lyometilokalunga otaga ka kala nokuli ga ha noonkondo monakuyiwa. Omuyapostoli Paulus okwa li a halelela ondjambi yomwenyo gwaaluhe. Ihe okwa li a tseya kutya shika kasha li oshinima shoka ta vulu okutegelela owala pwaahe na okuninga sha. Okwa nyola: “Nosho tuu shika tandi shi [longele nuudhiginini, NW] nokukondja ku thike poonkondo dhe, tadhi longitha ndje shili.” (Kol. 1:29) Jehova okupitila muJesus, okwa pe Paulus oonkondo a mane iilonga tayi hupitha omwenyo, nOta vulu oku shi tu ningila wo nena. Nangoye mbela oto ke shi ningilwa wo muAprili nguno?
[Oshimpungu pepandja 3]
Ngoye oto vulu okuladhipika lye u uvithe muAprili?
Okanona koye?
Omukonakonimbimbeli?
Ogumwe ngoka ihaa yi we miilonga yomomapya?