‘Uvitha nawa onkundana ombwanawa’
1. Onkundana ombwanawa yini hatu uvitha?
1 Otu na uuthembahenda ‘wokuuvitha nawa onkundana ombwanawa kombinga yesilohenda lyaKalunga’ muuyuni mbuka onkundana ombwanawa ya pumba. (Iil. 20:24, yelekanitha NW.) Shoka osha kwatela mo okutseyithila aantu kutya ‘omasiku gahugunina’ otaga ka pingenwa po masiku kuuyuni uupe wuuyuuki waJehova, moka ‘iikulu tayi ka kala ya hula po.’ (2 Tim. 3:1-5, OB-1954; Eh. 21:4) Pethimbo mpoka itapu ka kala we uuwehame. (Jes. 33:24) Oonakusa yetu aaholike otaya ka yumuka notaya ka hangana ishewe noyaandjawo nonookuume kawo. (Joh. 5:28, 29) Uuyuni auhe otawu ka ningwa oparadisa ombwanawa. (Jes. 65:21-23) Mbika oyo owala yimwe yomiinima mbyoka ya kwatelwa monkundana ombwanawa ndjoka hatu uvitha.
2. Omolwashike Maalitsa, Apilili naMei dhi li oomwedhi dhi li nawa noonkondo nokuuvitha onkundana ombwanawa?
2 MuMaalitsa, Apilili naMei otatu ka kala tu na ompito yi li nawa yokuuvitha onkundana ndjoka ombwanawa. Moomwedhi ndhika miitopolwa oyindji yuuyuni onkalo yombepo ohayi kala yi li nawa, ko ihaku toko mbala nomuntu oto vulu okulonga ethimbo ele muukalele. Kakele kaashono, Edhimbuluko ndyoka li li oshiningwanima sha simanenena momumvo, otali ka dhanwa muuyuni auhe ngele etango lya ningine mOlyomakaya, momasiku 22 gaMaalitsa. Ngashingeyi olyo ethimbo lyokutameka okuninga omalongekidho okulonga oshindji muukalele.
3. Oshike tashi ke tu kwathela tu longe oshindji muukalele tu li uukwanegumbo?
3 Kutha uukwathelikokolindjila: Mbela oto vulu okutula iinima yoye melandulathano opo wu kuthe uukwathelikokolindjila omwedhi gumwe, oomwedhi mbali nenge adhihe ndatu? Omolwashike itaamu shi kundathana pekonakono lyeni lyuukwanegumbo tali landula? Ngele tamu longele kumwe, oshilyo shimwe nenge yi vulithe po muukwanegumbo otayi vulu okukutha uukwathelikokolindjila. (Omayel. 15:22) Shi tuleni megalikano notamu ka mona nkene Jehova ta laleke nuuyamba oonkambadhala dheni. (Omayel. 16:3) Nonando kapu na gumwe muukwanegumbo ta vulu okukutha uukwathelikokolindjila, oshilyo kehe shawo otashi vulu okwiitulila po elalakano lyontumba okulonga oshindji muukalele, sho tashi longo pamwe naamboka ya kutha uukwathelikokolindjila.
4. Ongiini tatu vulu okutula iinima yetu melandulathano opo tu kuthe uukwathelikokolindjila ngele ohatu longo?
4 Ngele oho longo, elandulathano ewanawa otali vulu oku ku kwathela wu kuthe uukwathelikokolindjila. Oto vulu wu longithe ethimbo lyoye lyomwiha okuuvitha. Nenge oto vulu wu mone oshitopolwa shoye shopaumwene popepi negumbo lyaandjeni nenge popepi niilonga mpono ho longo opo wu longe po uule wethimbo lyontumba muukalele manga inoo tameka iilonga nenge ngele wa zimbuka. Oto vulu wo okumona ethimbo lya gwedhwa po mokuundulila iilonga mbyono inaayi simana unene komwedhi tagu ya nomokulonga muukalele esiku alihe momahuliloshiwike. Yamwe oya li ya kutha esiku limwe nenge omasiku gaali gefudho opo ye ga longithe po miilonga yomomapya.
5. Ongiini to vulu okukwathela aakulupe nenge mboka kaaye na uukolele ya kuthe uukwathelikokolindjila?
5 Ngele owu li omunamimvo nenge ku na uukolele, oto vulu okukutha uukwathelikokolindjila mokulonga owala ethimbo efupi kehe esiku muukalele. Pula Jehova e ku pe ‘oonkondo ndhoka kaadhi li mutse yene, ihe odhi li muKalunga.’ (2 Kor. 4:7) Omumwameme gumwe ngoka e na oomvula 106 okwa li a kutha uukwathelikokolindjila. Kekwatho lyaapambele ye Aakriste nosho wo yamwe megongalo, okwa li u uvitha egumbo negumbo, a ningi omaishunoko, a yi kaakonakonimbiimbeli pamwe nayalwe nokwa kutha wo ombinga miilonga yilwe yuukalele. Okwa li a kwathele aantu omulongo ya tameke okukonakona Ombiimbeli. Ota ti: “Ngele tandi dhiladhila kuuthembahenda uukumithi mboka nda li ndi na okulonga ndi li omukwathelikokolindjila, omutima gwandje ohagu kala gu udha ohole nolupandu okupandula Jehova, Omwana nosho wo ehangano lye. Onda hala lela okutya ‘tangi Jehova.’ ”
6. Ongiini omugundjuka ngoka a ninginithwa e li natango mosikola ta vulu okukutha uukwathelikokolindjila?
6 Ngele owu li omugundjuka a ninginithwa e li natango mosikola, otashi vulika nangoye to vulu okukutha uukwathelikokolindjila. Ngaashi owala mboka haya longo, nangoye oto vulu okulongitha unene omahuliloshiwike okulonga muukalele. Omasiku gamwe oto vulu okukala ho yi momapya uule wethimbo lyontumba manga osikola inaayi hita nenge konima ngele ya piti mo. Mbela opu na efudho lyosikola ndyoka to vulu okulongitha wu kuthe ombinga muukalele? Ngele owa hala okukutha uukwathelikokolindjila, popya naavali yoye kombinga yaashoka.
7. Oshike aakuluntugongalo taya vulu okuninga opo ya ladhipike egongalo li kale li na ombepo ya hwama okuya muukalele moomwedhi ndhoka dhi ikalekelwa?
7 Ladhipikeni egongalo: Aakuluntugongalo otaya vulu okuninga oshindji mokuladhipika egongalo li kale lya hwama okupitila miiholelwa yawo. (1 Pet. 5:2, 3) Otaya vulu okuninga omalongekidho ga gwedhwa po giilonga yomomapya kwaambono taya vulu okuya muukalele ongula onene, konima yosikola nenge konima yiilonga. Omutonateli gwiilonga oku na okusa oshimpwiyu opo aauvithi mboka ya pyokoka ya kwatele komeho omalongekidho ngoka nopu kale oshitopolwa sha gwana mpoka tapu ka longwa. Oku na wo okusa oshimpwiyu pu kale iifo niileshomwa ya gwana pethimbo lyoomwedhi ndhoka dhomaipyakidhilo gi ikalekelwa.
8. Oshike tatu ilongo moshimoniwa shegongalo limwe?
8 Megongalo limwe, aakuluntugongalo oya li ya ladhipike egongalo uule woomwedhi dhontumba komeho yethimbo li kuthe uukwathelikokolindjila. Oya kala nokutseyithila egongalo oshiwike kehe kutya aauvithi yangapi ya kutha uukwathelikokolindjila. Shika osha li sha shilipaleke mboka ye na ehalo okulonga oshindji muukalele kutya otapu ka kala oyendji mboka taya ka longa pamwe nayo. Opwa li pwa ningwa omalongekidho ga gwedhwa po okuya miilonga yomomapya ongula onene nosho wo kongulohi. Oshizemo, aauvithi 53 oya li ya kutha uukwathelikokolindjila muApilili, konyala etata lyegongalo.
9. Omolwashike ethimbo lyokomeho nokonima yEdhimbuluko li li ewanawa kwaamboka opo ya ningi aauvithi okutameka okuuvitha onkundana ombwanawa?
9 Kwathela yalwe yu uvithe: Uuna mboka aape nosho wo aagundjuka taya ningi aauvithi, oshi li nawa ngele taya longo pamwe momapya naauvithi mboka ya pyokoka. Ompito ndjoka ohayi holoka unene komeho nokonima yEdhimbuluko sho oyendji megongalo haya longo oshindji miilonga yuukalele. Mbela owu na omukonakonimbiimbeli ta humu komeho ngoka e etha iinima mbyoka itaayi tsu kumwe nomithikampango dhuuyuuki dhaJehova? Mbela owu na aanona ye na eihumbato ewanawa notaya humu komeho ihe kaye shi natango aauvithi? Tseyithila gumwe gwomaakuluntugongalo ngele mboka ya tumbulwa metetekelo oya popya kutya oya hala okuninga aauvithi inaaya ninginithwa nowu wete kutya oya gwana. Omutonateli omuunganeki ota ka ninga omalongekidho opo aakuluntugongalo yaali ya kundathane nokanona koye pamwe nangoye nenge nomukonakoni gwoye pamwe nangoye.
10. Oshike aakuluntugongalo taya vulu okuninga opo ya kwathele mboka ihaaya yi we momapya?
10 Oomwedhi tadhi landula otadhi ka kala wo ethimbo ewanawa kwaamboka ihaaya yi we miilonga yomomapya ya tameke ishewe okulonga pamwe negongalo. Aatonateli yekonakono lyembo naakuluntugongalo yalwe oye na okuninga oonkambadhala dha mana mo okutalela po aantu mboka noku ya hiya ya longe pamwe nayo muukalele. Ngele oya kala ethimbo ele ihaaya yi we momapya, aakuluntugongalo yaali oye na tango okupopya nayo opo ya tale ngele oya gwana okukala tayu uvitha ishewe. — km (kOshiingilisa) 11/00, epandja eti-3.
11. Oshike osho euliko enenenene ‘lyesilohenda lyaKalunga’?
11 Ilongekidhileni Edhimbuluko: Iikulila oyo euliko enenenene ‘lyesilohenda lyaKalunga.’ (Iil. 20:24) Aantu omamiliyona mboka ye na olupandu muuyuni auhe otaya ka gongala pamwe mOlyomakaya, momasiku 22 gaMaalitsa, konima ngele etango lya ningine, opo ya dhane Edhimbuluko lyeso lyaKristus. Otwa hala okuhiya nokukwathela aantu ayehe mboka ye na omitima dhu uka ye ye koshiningwanima shika sha simana shoka tashi gandja uunzapo kombinga yesilohenda lyaJehova ndyoka e tu nine.
12. Oolye tu na okuhiya kEdhimbuluko?
12 Ninga omusholondondo gwaamboka wa hala okuhiya. Kapu na omalimbililo kutya oto ka kwatela mo aapambele, aashiinda, mboka ho longo pamwe nayo nenge aanasikola ooyakweni, aakonakonimbiimbeli yoye yonale noyongashingeyi naayehe mboka ho talele po. Ngele yamwe yomwaamboka wa hiya oye na omapulo kombinga yEdhimbuluko, oto vulu oku ya kwathela to longitha oshitopolwa shoshigwedhelwako shi na ko nasha nUulalelo wOmuwa pepandja 206-208 lyembo Omalongo gOmbiimbeli. Shoka otashi ke egulula nokuli ompito yokutameka ekonakono lyOmbiimbeli, molwaashoka otashi ke ku pa ompito okuyelithila omuntu embo ndyoka hatu longitha okuninga omakonakono gOmbiimbeli.
13. Jehova okwa li a laleke nuuyamba ngiini oonkambadhala dhaauvithi yaali mboka ya li ya hiya yalwe kEdhimbuluko?
13 Omumwameme gumwe okwa li a ningi omusholondondo gwomaukwanegumbo 48 ngoka a hala okuhiya. Sho e ga hiya, okwa li a ndhindhilike pomadhina gawo nokwa nyola po esiku e ga hiya. Ka li tuu a nyanyukwa sho aantu 26 yomwaamboka a li a hiya ya li ye ya kEdhimbuluko! Omumwatate ngoka e na ositola okwa li a hiya omuniilonga gwe ngoka a li nale omusita. Omulumentu ngoka okwa li e ya nokonima okwa ti: “Ondi ilonga oshindji kombinga yOmbiimbeli mowili yimwe shi vulithe pwaashoka nda li ndi ilonga muule woomvula 30 ndhoka nda kala mOngeleka yaKatoolika.” Nziya konima yEdhimbuluko, okwa zimine ekonakonombiimbeli membo Omalongo gOmbiimbeli.
14. Oshikonga shini tashi ka ningwa muuyuni auhe okutameka mesiku lyo 1 lyaMaalitsa?
14 Oshikonga: Okutameka mOlyomakaya mesiku lyo 1 lyaMaalitsa sigo omomasiku 22 gaMaalitsa, otapu ka gandjwa uufo wehiyo lyi ikalekelwa muuyuni auhe okuhiya aantu kEdhimbuluko. Atuheni natu kutheni ombinga pakuudha moshikonga shika sha simana. Oshi li nawa okupa omunegumbo paumwene okafo kehiyo pehala lyoku ka thiga pomweelo. Ihe ngele oshitopolwa sheni oshinene, aakuluntugongalo otaya vulu okutokola kutya uufo wehiyo otawu vulu okuthigwa pehala li li nawa pomagumbo mpoka kaapu na aantu. Momahuliloshiwike otatu ka gandja wo iifo iipe.
15. Oshike tatu vulu okutya uuna tatu hiya aantu kEdhimbuluko?
15 Molwaashoka ethimbo lyokugandja uufo wehiyo olya ngambekwa, oshi li nawa okupopya paufupi. Popya wo nombili nonuulaadhi. Oto vulu okutya: “Otwa hala tu ku hiye koshiningwanima shika sha simana shono tashi ka kala ko momasiku 22 gaMaalitsa. Okafo koye kehiyo oko haka. Uuyelele auhe omo wu li.” Otashi vulika omunegumbo e na omapulo. Nenge otashi vulika okafo kehiyo e ka taambe ko e ta popi nokuli kutya ota ka holoka. Ndhindhilika mboka yu ulike ohokwe e to ya lombwele kutya oto galuka.
16. Oshimoniwa shini tashi ulike kutya oshikonga shokuhiya aantu yomoshitopolwa kEdhimbuluko osha simana?
16 Omvula ya zi ko omukwiita gumwe okwa li a adha okafo take mu hiya kEdhimbuluko kohi yomweelo gwegumbo lye. Okwa li a tokola okuya, ihe okwa li e na okupewa epitikilo kushisande gwe. Sho u ulukile shisande okafo kehiyo, shisande okwa li a mwena po nopo nduno okwa ti kutya aavali ye Oonzapo nokwa li ha kala pokugongala pamwe nayo. Shisande ka li owala a gandja epitikilo komukwiita a ye kEdhimbuluko, ihe okwa li wo a yi pamwe naye.
17. Ongiini tatu ulike kutya inatu hepitha esilohenda lyaKalunga?
17 Ulika olupandu: Sho Edhimbuluko lyomo 2008 tali hedha popepi, kehe gumwe gwomutse na dhiladhile nkene Jehova e tu sile ohenda. Omuyapostoli Paulus okwa nyola a ti: “Otatu mu kumagidha mwaa hepithe esilohenda lyaKalunga ndyoka mwe li taamba.” (2 Kor. 6:1) Ongiini tatu ulike kutya inatu hepitha esilohenda lyaKalunga? Paulus okwa nyola a ti: “Ihe moshinima kehe shoka tatu shi ningi, otatu ulike kutya otse aayakuli yaKalunga.” (2 Kor. 6:4) Onkee ano, otatu ulike olupandu lwetu omolwomagano ngoka twa pewa kuJehova okupitila meihumbato lyetu ewanawa nomokuuvitha nuulaadhi onkundana ombwanawa. Pethimbo lyokomeho nokonima yEdhimbuluko ndika otatu ka kala tu na ishewe ompito yi li nawa okulonga oshindji muukalele nokuuvitha nawa onkundana ombwanawa.
[Oshimpungu pepandja 3]
Oolye taya vulu okukutha uukwathelikokolindjila?
◼ Omaukwanegumbo
◼ Mboka haya longo
◼ Mboka kaaye na uukolele nosho wo aakulupe
◼ Mboka ye li mosikola
[Oshimpungu pepandja 4]
Ngele tatu gandja uufo wehiyo lyEdhimbuluko:
◼ Popya paufupi nonuulaadhi
◼ Ndhindhilika mboka yu ulika ohokwe nokushuna kuyo
◼ Gandja iifo momahuliloshiwike