Ngoye oto ka kutha ngaa uukwathelikokolindjila?
1. Omolwashike ethimbo lyoomwedhi dhEdhimbuluko ethimbo ewanawa nokutamununa mo uukalele wetu?
1 Ethimbo lyoomwedhi dhEdhimbuluko ethimbo ewanawa okutamununa mo uukalele wetu. Olyo ethimbo lyokutedhatedha kombinga yohole onene yaJehova sho e tu pe Omwana e tu kulile. (Joh. 3:16) Otwa pandula noonkondo shoka Jehova e tu ningila naashika ohashi tu ningitha tu kale twa hala okutseyithila yalwe kombinga yaJehova nokombinga yaashoka ta ningile aantu. (Jes. 12:4, 5; Luk. 6:45) Ndika olyo wo ethimbo moka hatu kala tu na oshikonga shi ikalekelwa shokuhiya aashiwikile naantu yalwe moshitopolwa ye ye ya dhane pamwe natse Edhimbuluko. Konima yEdhimbuluko ohatu ningi oonkambadhala tu kokeke ohokwe yaamboka ya li po. Mbela oto ka tamununa mo uukalele woye mokukutha uukwathelikokolindjila muMaalitsa, Apilili nenge muMei?
2. Omolwashike omwedhi gwaMaalitsa omwedhi omwaanawa nokukutha uukwathelikokolindjila?
2 Maalitsa nagu kale omwedhi gwi ikalekelwa kungoye: Omwedhi gwaMaalitsa otagu kala omwedhi omwaanawelela nokukutha uukwathelikokolindjila. Mboka taye ku udhitha ofooloma otaya vulu okuhogolola kutya otaya ka longa oowili 30 nenge 50. Ngele omutonatelishikandjo ota talele po egongalo lyeni muMaalitsa, aakwathelikokolindjila ayehe otaya vulu okukala po pokugongala akuhe kwaakokolindjila yondjigilile naakokolindjila yi ikalekelwa. Oshikonga shokuhiya aantu kEdhimbuluko, ndyoka tali ka kala ko mEtiyali, 26 Maalitsa 2013, otashi ka kutha ethimbo ele shi vulithe oomvula dha piti notashi ka tameka me 1 Maalitsa. Oshikwawo, Maalitsa oku na omahuliloshiwike gatano gi ihwa po. Omolwashike itoo tala ngele nangoye oto vulu okuninga omwedhi nguka omwedhi gwi ikalekelwa nuumvo?
3. Ongiini tatu vulu okuninga omalongekidho tu tamunune mo uukalele wetu?
3 Ninga omalongekidho ngashingeyi: Ngashingeyi olyo ethimbo lyokutalulula elandulathano lyoye wu tale kutya openi wu na okuninga omalunduluko wu vule okukutha uukwathelikokolindjila. Osha simana aanegumbo ya longele kumwe moshinima shika. Onkee ano, mEsiku lyElongelokalunga lyUukwanegumbo, kundathaneni omalalakano ngoka mwa hala okwiitulila po e tamu nyola elandulathano ndyoka tamu ka landula. (Omayel. 15:22) Ngele ito vulu okukutha uukwathelikokolindjila, ino teka omukumo. Mbela ito vulu nando okulundulula elandulathano lyoye wu kale ho longo ethimbo ele momapya uuna wa ya mo? Mbela ito vulu okulonga momapya esiku lya gwedhwa po moshiwike?
4. Otatu ka mona uuwanawa washike ngele otwa tamununa mo uukalele wetu muMaalitsa, Apilili nomuMei?
4 Sho tatu ka tamununa mo uukalele wetu muMaalitsa, Apilili nomuMei, otatu ka gwedha ko kenyanyu lyetu ndyoka hatu kala tu na uuna tatu longele Jehova nuuna tatu gandja kuyalwe. (Joh. 4:34; Iil. 20:35) Noshinima sha simana ooshino kutya eiyambo lyetu otali ka nyanyudha Jehova. — Omayel. 27:11.