Ethimbo ndika lyEdhimbuluko nali kale ethimbo lyenyanyu kungoye!
1. Omomukalo guni to vulu okukala wa nyanyukwa noonkondo pethimbo lyEdhimbuluko?
1 Mbela owa hala okukala wa nyanyukwa noonkondo muMaalitsa, Apilili naMei? Omukalo gumwe moka to vulu oku shi ninga omokutamununa mo uukalele woye, nenge wu kuthe uukwathelikokolindjila ngele otashi wapa. Shika otashi ka gwedha ko ngiini kenyanyu lyoye?
2. Enyanyu lyetu otali ki indjipala ngiini ngele otwa tamununa mo uukalele wetu?
2 Indjipaleka enyanyu lyoye: Jehova okwe tu shita tu kale hatu nyanyukilwa oku mu longela notu kale hatu kala twa mbilipalelwa sho tatu gwanitha po ompumbwe yetu yopambepo. (Mat. 5:3) Okwe tu shita wo tu kale hatu nyanyukwa uuna tatu gandja kuyalwe. (Iil. 20:35) Sho tu li muukalele otu na ompito yokulongela Kalunga noyokukwathela aantu. Osha yela kutya ngele otwa tamununa mo uukalele wetu, nena otatu ka kala twa nyanyukwa noonkondo. Oshikwawo, ngele ohatu uvitha nuudhiginini, otatu ka kala twa pyokoka. Sho tatu ende tatu pyokoka, otashi ke tu kwathela tu kale tu na omukumo sho tatu uvitha noitatu ka kala nuumbanda. Otatu ka mona wo oompito odhindji okugandja uunzapo nokutameka omakonakonombiimbeli. Ayihe mbika ohayi tu kwathele tu nyanyukilwe uukalele.
3. Omolwashike shi li nawa okukutha uukwathelikokolindjila muMaalitsa naApilili?
3 Oomwedhi Maalitsa naApilili otadhi ka kala ethimbo ewanawa okukutha uukwathelikokolindjila, oshoka otatu vulu okuhogolola okulonga oowili 30 nenge 50. Oshikwawo, mOlyomakaya yo 22 Maalitsa sigo esiku lyEdhimbuluko mOmaandaha mo 14 Apilili, otatu ka kutha ombinga moshikonga shokuhiya ayehe kEdhimbuluko. Megongalo otamu ka kala enyanyu shili sho oyendji taya ka “longa muukumwe,” opo ya mane ko oshitopolwa shawo. — Sef. 3:9, NW.
4. Oshike wu na okuninga, ngele owa hala okukutha uukwathelikokolindjila?
4 Ilongekidha ngashingeyi: Ngele ino ilongekidha natango, ninga oonkambadhala opo wu tale ngele oto vulu okuninga omalunduluko momaipyakidhilo goye, opo wu vule okutamununa mo uukalele woye omwedhi gumwe nenge oomwedhi dhontumba. Galikana wo kuJehova. (Jak. 1:5) Popya kombinga yaashoka noyaandjeni nenge nayalwe megongalo. (Omayel. 15:22) Otashi vulika wu ka mone kutya nonando ku na uukolele nenge wu na omaipyakidhilo ogendji, nangoye oto vulu okumona enyanyu ndyoka hali zi mokukutha uukwathelikokolindjila.
5. Ngele otwa tamununa mo uukalele wetu pethimbo ndika lyEdhimbuluko, oshike tashi ka ningwa po?
5 Jehova okwa hala aapiya ye ya kale ya nyanyukwa. (Eps. 32:11) Sho tatu longo nuudhiginini tu tamunune mo uukalele wetu pethimbo lyEdhimbuluko, itatu ki indjipaleka owala enyanyu lyetu, ihe otatu ka nyanyudha wo Tate yetu gwomegulu. — Omayel. 23:24; 27:11.