Oomwedhi dhEdhimbuluko odhi li ompito ombwanawa yokutamununa mo uukalele wetu!
1. Omolwashike tu na okutamununa mo uukalele wetu momwedhi Maalitsa, Apilili naMei?
1 Mbela oto vulu okutamununa mo uukalele woye moomwedhi dhEdhimbuluko? Aauvithi yamwe mboka haya yi kiilonga ohaya tula mo omafudho opo ya vule okuya muukalele, naanasikola mboka ye li momafudho otaya vulu okulongitha ethimbo ndyoka muukalele. Mo 2 Apilili, otatu ka tameka noshikonga shi ikalekelwa shokuhiya aantu mboka ye na ohokwe kEdhimbuluko ndyoka tali ka kala ko mo 17 Apilili. Otatu ka kala wo tu na esiku lyokugandja iifo li ikalekelwa mOlyomakaya mo 16 Apilili. Opo tu kokeke ohokwe yaamboka ya li pEdhimbuluko, otatu ke ya hiya ishewe ye ye koshipopiwa shi ikalekelwa shoka tashi ka gandjwa mo 25 Apilili. Onkee ano, otu na omatompelo ogendji okutamununa mo uukalele wetu momwedhi Maalitsa, Apilili naMei.
2. Omukalo dhingi okutamununa mo uukalele wetu oguni?
2 Uukwathelikokolindjila: Omukalo dhingi gwokutamununa mo uukalele wetu okukutha uukwathelikokolindjila. Molwaashoka atuheni otwi ipyakidhila, otu na okuninga omalongekidho nomalunduluko gontumba opo tu shi pondole. (Omayel. 21:5) Iinima mbyoka kaayi na unene oshilonga otatu vulu oku yi undulila komeho. (Fil. 1:9-11) Ngele owa lombwele yalwe megongalo kutya owa hala okukutha uukwathelikokolindjila, otashi vulika nayo ya kale ya hala oku shi ninga.
3. Omalongekidho geni uukwanegumbo tawu vulu okuninga po wu tamunune mo uukalele wawo?
3 Pethimho lyEkonakonombiimbeli lyUukwanegumbo tali landula, oshi li nawa okukundathana omalalakano geni mu li uukwanegumbo. (Omayel. 15:22) Ngele uukwanegumbo otawu longele kumwe, yamwe muukwanegumbo otaya ka vula okukutha uukwathelikokolindjila omwedhi gumwe nenge oomwedhi dhontumba. Ongiini ngele omwa mono kutya nani itashi vulika? Uukwanegumbo otawu vulu natango okuninga omalongekidho opo wu tamunune mo uukalele wawo mokulonga kongulohi nenge mokulonga ethimbo ele momahuliloshiwike.
4. Omalaleko nuuyamba geni tatu ka mona mokutamununa mo uukalele wetu moomwedhi dhEdhimbuluko?
4 Jehova iha dhimbwa iilonga yetu mbyoka hatu mu longele nohe tu pandula uuna tatu ningi omaiyambo. (Heb. 6:10) Ohashi tu nyanyudha sho tatu iyambele Jehova nosho wo aantu yalwe. (1 Ondjal. 29:9; Iil. 20:35) Mbela oto vulu okutamununa mo uukalele woye moomwedhi dhEdhimbuluko wu mone enyanyu olindji nomalaleko nuuyamba ngoka haga zi muukalele?