Udifa nokuyandja oundombwedi nawanawa

¹ E li “ohamba nomupangeli,” Jesus okwa deula ovahongwa vaye omolwoilonga inene yokuudifa oyo ya li komesho. (Jes. 55:4; Luk. 10:1-12; Oil. 1:8) Omuyapostoli Petrus okwa hokolola oshilonga osho va pewa kuJesus meendjovo edi ta ti: “Ye okwe tu lombwela, tu udifile ovanhu noku va [pa oundombwedi nawanawa kutya, NW] Oye tuu ou Kalunga e mu ninga omutokoli wovanamwenyo nowovafi.” (Oil. 10:42) Oshike sha kwatelwa mokuyandja oundombwedi nawanawa?

² Ohatu dulu okulihonga shihapu mokukonakona oshihopaenenwa shomuyapostoli Paulus. Eshi a ongala novakulunhu veongalo laEfeso, okwe va dimbulukifa ta ti: “Inandi fya ounye oku mu lombwela keshe tuu osho [sha] wapala noku mu longa nopovanhu nomomaumbo fimbo onda [yandja oundombwedi nawanawa kOvajuda, NW] nOvagreka, ve nokulidilulula nokwaalukila kuKalunga nokwiitavela Omwene wetu Jesus Kristus.” Nonande okwa li a shakeneka omayeleko, Paulus okwa kendabala opo a hange vahapu ngaashi tashi dulika nonghundana iwa. Ka li ashike a wanenwa kokuyandja eeshili dopetameko kovapwilikini vaye, ndele okwa kendabala oku va lombwela ‘omhangela aishe yaKalunga.’ Opo a wanife po osho, okwa li e na ehalo okukondja neenghono nokuninga omaliyambo. Natango okwa ti: “Ame kombinga yange ndi he na nasho shomwenyo wange, shamha tuu handi wanifa nehafo okweenda kwange noshilonga eshi nde shi pewa kOmwene Jesus, ndi [yandje oundombwedi nawanawa wonghundana iwa yolune inali longelwa laKalunga, NW].”—Oil. 20:20, 21, 24, 27.

³ Ongahelipi hatu dulu okuhopaenena oshihopaenenwa shaPaulus kunena? (1 Kor. 11:1) Omokukonga ovaneumbo ovo va wana nokuli nonande ohatu shakeneke omayeleko, mokukendabala okuhanga ovanhu vomihoko adishe novomalaka aeshe nonghundana iwa nosho yo mokukwafela nouladi ovo ve na ohokwe. (Mat. 10:12, 13) Osho otashi pula efimbo, eenghendabala nosho yo ohole yokuhola ovanhu.

⁴ Mbela oto dulu okulonga u li omukwafelikokolindjila? Maalitsa naApilili otadi dulu okukala omhito iwa kwoove okuyandja oundombwedi nawanawa mokukufa oukwafelikokolindjila. Kasha li tuu tashi tu omukumo omudo wa ya okumona eshi vahapu va ninga eenghendabala de likalekelwa va kufe oukwafelikokolindjila!

⁵ Omumwameme omunamido 80 e na omaupyakadi oukolele mahapu okwa li a kumikwa ketwomukumo olo la yandjwa kehangano laJehova. Okwa shanga ta ti: “Ola pendula ehalo olo nda kala ndi na momutima wange efimbo lile nola ninga nge ndi kale ndi udite kutya ondi na ashike okukufa oukwafelikokolindjila nande olumwe ngoo vali.” Okwa tokola oku shi ninga muMaalitsa. Okwa ti: “Oshinima shotete osho nda ninga, osha li okukala omutumba nokutala kutya otashi pula shi fike peni. Onde shi kundafana nomonakadona wange molwaashi okwa li handi ka kala nda pumbwa ekwafo laye. Okwa kumwifa nge eshi a ninga eindilo a kufe yo oukwafelikokolindjila.” Momwedi oo, omumwameme oo omunamido okwa longa eevili 52 moukalele. “Onda ilikana kuJehova omafimbo mahapu opo a pepaleke eenghono dange eshi nda li ndi udite nda loloka. Pexulilo lomwedi onda li nda hafa nonda mbilipalelwa, nonda pandula Jehova omafimbo mahapu omolwokukwafela nge. Onda hala okukufa oukwafelikokolindjila natango.” Oshimoniwa shaye shihafifa otashi dulu okutwa vamwe omukumo ovo va hala shili okukufa oukwafelikokolindjila nonande ope na omaupyakadi oukolele a kwata moiti.

⁶ Omumwatate oo kwa li a kufwa moilonga ine shi teelela okwa longifa omhito oyo nokukufa oukwafelikokolindjila. Momukokomoko womwedi, okwa li e udite ouladi omolwoilonga yokuudifa nokwa li a tameka ekonakonombibeli lipe momwedi oo. Eshi a diladila koshimoniwa shaye, okwa ti: “Kawa li tuu omwedi muwa!” Ka li tuu a hafa omolwokukala e na ewiliko nekwafo laJehova! Heeno, Jehova okwa lokifila omumwatate oo omanangeko noupuna mahapu omolweenghendabala da wedwa po odo omumwatate a ninga moukalele note ke ku ningila sha faafana.—Mal. 3:10.

⁷ Kuvahapu, oukwafelikokolindjila kau fi mupu. Ndelenee nonande ove na oinakuwanifwa yoilonga yokulikongela omboloto noyoukwaneumbo nosho yo omashongo opaumwene, omuvalu muhapu wovamwatate novamwameme owa li wa dula oku shi ninga. Okuyandja oundombwedi nawanawa luhapu okwa kwatela mo okuyamba po efimbo neenghono detu da ngabekwa, ndele omanangeko noupuna kae fi okuyelekwa.—Omayel. 10:22.

⁸ Maalitsa naApilili oo omafimbo taa wapalele okukufa oukwafelikokolindjila. Omu na omaxuliloshivike atano muMaalitsa. Okulongifa omhito oyo nosho yo okulongifa eevili dokonguloshi otashi ke shi ninga tashi shiiva kuvamwe ovo hava longo efiku keshe va kufe oukwafelikokolindjila. Natango, oto dulu okulongifa omhito yomafudo momwedi Apilili. Vamwe otashi dulika va kale ve li mefudo lofikola nosho yo loilonga yokulikongela omboloto, osho tashi dulu oku va kwafela va wanife po oshiteelelwa sheevili 50. Natango, Efiku lOifo le likalekelwa ola tulwa po mOlomakaya, 5 Apilili. Opo u ninge elandulafano leevili 50 moukalele muMaalitsa ile muApilili, ito dulu mbela okulongifa limwe lomomaetepo omalandulafano oukwafelikokolindjila oo e li moshitukulwa eshi? Kundafana elandulafano loye navamwe; okukundafana kwoye otashi dulu oku va ladipika va ye pamwe naave moukalele. Ngeenge ito dulu okukufa oukwafelikokolindjila, tula po elalakano lokondadalunde li na sha neemwedi odo nokuyambidida ovo tava dulu okukokola ondjila. Ninga omalongekido paife opo u hapupalife okuudifa kwoye muMaalitsa naApilili.

⁹ Ulika olupandu omolwEdimbuluko: Omudo keshe pefimbo lEdimbuluko, olupandu omolwekulilo ohali linyengifa omayovi a ‘longife nawa efimbo’ a ninge ovakwafelikokolindjila. (Ef. 5:15, 16) MoSouth Africa omudo wa ya, omwa li ovakwafelikokolindjila 8 104 muMaalitsa, nomuApilili omwa li 4 929. Osho osha ninga oupokati wo 6 516 momwedi keshe womeemwedi odo mbali. Yelekanifa osho nomuvalu woupokati 1 600 waavo va kufa oukwafelikokolindjila meemwedi odo da pita domudo woilonga wa pita. (MuBotswana omudo wa ya, omwa li ovakwafelikokolindjila 120 muMaalitsa, nomuApilili omwa li 78, Lesoto 160 no 203, Namibia 145 no 71, St. Helena 14 no 4 nomuSwaziland 219 no 139.) Efimbo eli lEdimbuluko oli li yo omhito iwa nokuulika olupandu letu lashili omolwekuliloyambo laKristus mokuhapupalifa oilonga yetu moukalele womomapya.

¹⁰ Eshi 16 Apilili taa ehene popepi, diladila osho Edimbuluko tali ti kwoove. Diladila koiningwanima oyo ya twala fiyo okefyo laKristus nosho yo komadiladilo oo a li e mu lipulifa unene. Diladila yo kehafo olo la li la tulikilwa Jesus nonghee le mu kwafela e lididimikile okuningwa nai oko. Diladila kondodo yaye paife e li Omutwe weongalo, ta pashukile oilonga yokuudifa noyokuninga ovanhu ovahongwa. (1 Kor. 11:3; Heb. 12:2; Eh. 14:14-16) Opo nee ulika olupandu loye kwaaishe oyo Kristus a ninga mokukufa ombinga pauyadi moilonga yokuudifa ngaashi eenghalo doye tadi shi pitike.

¹¹ Ladipika vamwe va yandje oundombwedi nawanawa: Mokukufa ombinga moilonga youkwafelikokolindjila, ovakulunhuongalo novayakuliongalo ove na omhito iwa okuladipika vamwe. Eshi tava longo novaudifi moukalele womomapya nosho yo eshi tava ningi omatalelepo oufita, ove na eemhito diwa paumwene okukwafela vamwe va kufe ombinga iyadi moilonga oyo ye likalekelwa. Atusheni natu ninge oilonga oyo ye likalekelwa oshinima sheilikano, nokungaha ohatu pameke eenghendabala detu da hangana mokuyandja oundombwedi nawanawa.

¹² Ofimbo ovakulunhuongalo novayakuliongalo aveshe tava ka longela kumwe nomalongekido eongalo omolwehapupalo loilonga momwedi Maalitsa naApilili, omupashukili woilonga oye unene e na okuninga omalongekido e li nawa omolwoilonga yevangeli. Oku na okuunganeka shi na sha neenhele dokuningila omalongekido oilonga yomomapya nomafiku nosho yo omafimbo oo taa wapalele ovaudifi vahapu noinima oyo oi na okushiivifwa oikando ihapu. Omalongekido otaa dulu okuningwa opo ku shakenwe pomafimbo e lili noku lili mefiku, naasho otashi yandje omhito kwaaveshe meongalo va kufe ombinga meenghedi dokuyandja oundombwedi di lili noku lili. Odo otadi dulu okukwatela mo okulonga moitukulwa yomangeshefelo, okuyandja oundombwedi momapandavanda, okuya eumbo neumbo, okuninga omalishuneko nosho yo okuyandja oundombwedi mongodi. Natango, oku na okulongekida oishangomwa noifo ihapu nosho yo oitukulwa i kale i li po meemwedi odo.

¹³ Osho tashi ka yandjwa muMaalitsa embo Ontseyo, nelalakano lokutameka omakonakonombibeli. Omaetepo mawa okuyandja embo Ontseyo oku li mokawedwamo mokafo Uukalele wetu wUukwaniilwa waJanuali 2002. Osho tashi ka yandjwa muApilili oifo yOshungonangelo noAwake! Kendabala okulongifa omaetepo e li ‘Mwaasho to ka tya shi na sha noifo.’ Atusheni otu na okukufa efimbo tu lilongekide nawa opo tu yandje oundombwedi nawanawa.

¹⁴ Inatu nangekwa tuu noupuna okulonga koshi yewiliko lOmutwe weongalo, Kristus Jesus, nosho yo okukala noufembanghenda wokutukula onghundana iwa navamwe! Eshi omwedi Maalitsa naApilili tadi ehene popepi, natu kendabale natango oku di ninga eemwedi da denga mbada kufye inashi monika nande onale eshi hatu dulika kelombwelo laKristus lokuudifa nokuyandja oundombwedi nawanawa.

[Oshimhungu pepandja 2]

Omalandulafano e lili noku lili oukwafelikokolindjila muMaalitsa naApilili 2003

Efiku Eevili

Omaandaxa 1 2 — — 2 —

Etivali 1 — 3 — — —

Etitatu 1 2 — 5 — —

Etine 1 — 3 — — —

Etitano 1 2 — — — —

Olomakaya 5 4 3 5 6 7

Osoondaxa 2 2 3 2 2 3

Maalitsa 56 56 54 55 50 50

Apilili 50 50 51 53 — —

Mbela limwe lomomalandulafano oo oli li nawa kwoove?