Mbela oshi na ngaa uuwanawa washa okukala omudhiginini?

KARL,a omukalelipo gwehangano ekwashilipaleki okwa ti: “Oho futu unene iimaliwa oyindji ekwashilipaleko lyoye li na ko nasha nuukolele. Ngele owa tembukile kehangano lyetu, oto ka hupitha oo-euro 15 [N$120] momwedhi, ndhoka dhi li nokuli iimaliwa oyindji.”

Jens okwa yamukula a ti: “Osho. Ihe nonando ongaaka, onda kala ndi na ekwashilipaleko lyandje li na ko nasha nuukolele mehangano olyo tuu ndyoka uule woomvula odhindji. Olya kala hali kwathele ndje unene, nonda hala okukala omudhiginini kulyo.”

Karl okwa yamukula a ti: “Uudhiginini ou li uukwatya uuwanawa. Ihe nonando ongaaka, okukala omudhiginini otaku ku kotha iimaliwa oyindji!”

Karl okwa li e li mondjila. Olundji okukala omudhiginini kugumwe i ili otashi vulu oku ku kotha iimaliwa. Otashi ku pula wo ethimbo noonkondo, nosha kwatela mo omaiyuvo goye. Mbela oshi na ngaa uuwanawa washa okukala omudhiginini?

Nonando owa pandulwa koyendji, ihaye u tula naanaa miilonga

Mekonakono limwe lya ningwa moNdowishi kEhangano lyOkukonakona Omadhiladhilo lyaAllensbach, oopersenda 96 dhaamboka ya li ya pulwa, odha ti kutya uudhiginini ou li uukwatya uuwanawa. Ekonakono etiyali lyaAllensbach lya ningwa mokati kaantu yoomvula 18-24 olya li lyu ulike kutya 2 yomaantu 3 mboka ya li ya pulwa oya li ya tala ko uudhiginini u li oshinima shoshinanena, sha hala okutya, oya li ye u tala ko u holike.

Nonando uudhiginini owa pandulwa koyendji, iinima ohayi ende shi ili ngele tashi ya pokukala omudhiginini. Pashiholelwa, miilongo oyindji yomuEuropa, aaihokani nenge iilyo yuukwanegumbo olundji ihayi ulikilathana naanaa uudhiginini. Ookuume olundji ohaya kala kaaye ninathane uudhiginini. Nuudhiginini mboka nale wa li wa tula kumwe omugandji gwiilonga nomuniilonga gwe nenge ongeshefa naalandi yayo konyala owa kana po. Omolwashike?

Omathimbo gamwe omolwokweendelela kwonkalamwenyo aantu kaye na we ethimbo nenge oonkondo dhopamaiyuvo okwiigandja komakwatathano ngoka taga pula uudhiginini. Aantu mboka ya li ya yematekwa komakwatathano gopantu otashi vulika ngashingeyi ya tila okukala aadhiginini nando oko komuntu gumwe. Yalwe otashi vulika ya hala onkalamwenyo yokukala mpaka nena nongula oye li mpeyaka ndjoka itaayi pula uudhiginini.

Kutya nduno etompelo olini, uudhiginini owo uukwatya wa pandulwa koyendji ihe ihaye u tula naanaa miilonga. Onkee ano, opwa holoka omapulo ngaka taga pula taga ti: Mbela oshi na ngaa uuwanawa washa okukala omudhiginini? Ngele osho, okulye tu na ongunga yokukala aadhiginini, nomomikalo dhini? Okukala omudhiginini oku na uuwanawa uni?

[Enyolo lyopevi]

[Oohapu dha simana pepandja 3]

Uudhiginini owo uukwatya wa pandulwa koyendji ihe ihaye u tula naanaa miilonga