Okwoongelwa kwoinima yomeulu noyokombada yedu
“Opahokwe yaye iwa ei, e i pangela muye mwene . . . ta ka kwatakanifa muKristus aishe oyo yomeulu naai yokombada yedu.” — OVAEFESO 1:9, 10.
1. ‘Ohokwe iwa’ yaJehova i na sha neulu nosho yo edu oilipi?
ELALAKANO likumwifi laJehova “Kalunga kombili” olo okuhanganifa oishitwa aishe meshito alishe i kale mombili. (Ovaheberi 13:20) Okwa nwefa mo omuyapostoli Paulus a shange shi na sha ‘nohokwe yaYe iwa i na sha nokukwatakanifa muKristus aishe oyo yomeulu naai yokombada yedu.’ (Ovaefeso 1:9, 10) Oshityalonga osho sha tolokwa “kwatakanifa” momushangwa oo osha hala okutya shike lela? Omuhongwanhu umwe wOmbibeli, J. B. Lightfoot okwa ti: “Outumbulilo oo otau ulike kokuhangana kweshito alishe, noitapa ka kala vali omashindo noinima oyo hai etifa omatukauko, ndele oinima aishe meshito otai ka kwatakanifwa nokuhanganifwa muKristus. Oulunde nefyo, oluhodi nokuhapondola nosho yo emono loixuna otai ka xula po.”
Oinima “oyo yomeulu”
2. Oolyelye ve li oinima “oyo yomeulu” oyo ya pumbwa okwoongelwa?
2 Omuyapostoli Petrus okwa ngonga shi na sha neteelelo likumwifi lOvakriste vashili eshi a shanga a ti: “Paudaneko laye fye hatu teelele eulu lipe nedu lipe omo tamu ka kala ouyuki.” (2 Petrus 3:13) “Eulu lipe” olo la udanekwa momushangwa oo otali ulike kepangelo lipe, Ouhamba wopaMessias. Oinima “oyo yomeulu” ya tumbulwa kuPaulus monhumwafo yaye kOvaefeso otai ongelwa “muKristus.” Otai ulike komuvalu wovanhu wa ngabekwa, waavo va hoololwa va ka pangele pamwe naKristus meulu. (1 Petrus 1:3, 4) Ovanhu ovo ve li Ovakriste ovavaekwa ve fike po 144 000 ova “kulilwa medu,” “va kulilwa movanhu,” opo va ka kale ovafyuululi pamwe naKristus mOuhamba waye womeulu. — Ehololo 5:9, 10; 14:3, 4; 2 Ovakorinto 1:21; Ovaefeso 1:11; 3:6.
3. Omolwashike taku dulu okutiwa kutya ovavaekwa ova ‘tulwa moikwaulu,’ nokuli nofimbo ve li kombada yedu?
3 Ovakriste ovavaekwa ova dalululwa, sha hala kutya, ova vaekwa nomhepo iyapuki ndele tava ningi ovana vaJehova vopamhepo. (Johannes 1:12, 13; 3:5-7) Molwaashi ova tambulwa ko ve li “ovana” vaJehova, kungaha, ove li ovamwaxe vaJesus. (Ovaroma 8:15; Ovaefeso 1:5) Omolwokutalika ko ve li ovamwaxe vaKristus, otava popiwa kutya ova ‘nyumunwa pamwe naye, nova tulwa mumwe naye moikwaulu,’ nokuli nofimbo ve li kombada yedu. (Ovaefeso 1:3; 2:6) Osho osha hala kutya ova tulwa pondodo yopamhepo ya tumbala, molwaashi ova ‘didilikwa muye noshilimbo shomhepo iyapuki, oyo ya li ya udanekwa, oyo ya ninga ombambyona yefyuululo’ lavo olo va tuvikililwa meulu. (Ovaefeso 1:13, 14; Ovakolossi 1:5) Hano osha yela kutya ovavaekwa ovo oinima ‘yomeulu,’ oyo omuvalu wayo we lixwa po wa tulwa po kuJehova wa li u na okwoongelwa.
Okwoongelwa kwoinima yomeulu
4. Onaini nongahelipi okwoongelwa kwoinima “oyo yomeulu” kwa hovela?
4 Metwokumwe ‘nelelo’ laJehova ile onghedi yaye yokuunganeka oinima, okwoongelwa kwoinima ‘oyo yomeulu’ okwa hovela eshi ‘efimbo lako la li la fika.’ (Ovaefeso 1:10) Okwoongelwa oko okwa hovela pOpentekoste mo 33 O.P. Mefiku olo, ovayapostoli nosho yo ovahongwa vonhumba, ovalumenhu novakainhu, ova li va tililwa omhepo iyapuki. (Oilonga 1:13-15; 2:1-4) Osho osha li sha yandja oumbangi kutya ehangano lipe ola li la hovela okulonga, naasho osha li edidiliko lokutotwa po kweongalo lopaKriste nosho yo okudalwa kwoshiwana shipe, Israel shopamhepo ile ‘Israel yaKalunga.’ — Ovagalati 6:16; Ovaheberi 9:15; 12:23, 24.
5. Omolwashike Jehova a li a tota po ‘oshiwana’ shipe shi pingene po Israel shopambelela?
5 Ehangano lOmhango olo la li la ningwa naIsrael shopambelela kala li la etifa po “ouhamba wovapristeri noshiwana shiyapuki,” osho shi na oku ka longela Jehova meulu fiyo alushe. (Exodus 19:5, 6) Jesus okwa li a lombwela ovawiliki velongelokalunga lOshijuda a ti: “Ouhamba waKalunga otau mu kufwa ndele tau pewa ovanhu, hava imike oiimati yawo.” (Mateus 21:43) Israel shopamhepo, Ovakriste ovavaekwa ovo ve li oilyo yehangano lipe, ovo va pewa Ouhamba waKalunga. Omuyapostoli Petrus okwa li a shangela Ovakriste ovo a ti: “Nye epata la hoololwa nongudu youpristeri pauhamba noshiwana shiyapuki novana vaye mwene, mu hepaulule oilonga ya fimana yaau e mu ifana mo momulaulu, mu ye mouyelele waye tau kumifa. Onye ava kamwa li oshiwana nale, ndelenee paife mwa ninga oshiwana shaKalunga.” (1 Petrus 2:9, 10) Jehova okwa li a xulifa po ehangano olo a ningile naIsrael shopambelela. (Ovaheberi 8:7-13) Ngaashi Jesus a li a xunganeka, Israel shopambelela osha li sha kufwa oufembanghenda wokukala oshitukulwa shOuhamba wopaMessias ndele tau yandjwa koilyo yaIsrael shopamhepo oyo i li 144 000. — Ehololo 7:4-8.
Oilyo yehangano lOuhamba
6, 7. Ehangano le likalekelwa lilipi Jesus a li a ninga novamwaxe ovavaekwa nomhepo, notali ti shike kuvo?
6 Moufiku oo Jesus a li a dika po Edimbuluko lefyo laye, okwa li a lombwela ovayapostoli vaye ovadiinini a ti: “Onye tuu ava mwa kala puame momayeleko ange, [nohandi ningi ehangano nanye, ngaashi Tate a ninga naame ehangano, molwouhamba, NW], mu shiive okulya nokunwa poshililo shange, nokukala omutumba komalukalwa nokutokola omapata omulongo naavali aIsrael.” (Lukas 22:28-30) Apa Jesus okwa li ta popi shi na sha nehangano le likalekelwa olo a li a ninga novamwaxe ovavaekwa nomhepo ovo ve li 144 000, ovo ve na okukala ‘ovadiinini fiyo kefyo’ nokukala ‘ovafindani.’ — Ehololo 2:10; 3:21.
7 Ovavaekwa ovo ve li omuvalu wa ngabekwa kave na nande eteelelo lokukala nomwenyo waalushe kombada yedu ve li ovanhu vombelela nohonde. Otava ka pangela pamwe naKristus meulu ve li komalukalwapangelo nokutokola ovanhu. (Ehololo 20:4, 6) Paife natu konakoneni omishangwa dikwao odo tadi popi ashike shi na sha novavaekwa notadi ulike kutya omolwashike ‘eedi dimwe’ ihadi kufa ombinga mokulya nokunwa omadidiliko e na sha nEdimbuluko. — Johannes 10:16, OB-1986.
8. Mokukufa ombinga mokulya omungome, ovavaekwa otava ulike shike? (Tala oshimhungu pepandja 15.)
8 Ovavaekwa ohava hepekwa ngaashi Kristus a li a hepekwa nove lilongekidila okudipawa ngaashi ye. E li umwe womuvo, Paulus okwa popya kutya okwa li e lilongekida okuninga eliyambo keshe opo a ‘likole Kristus, nokushiiva eenghono denyumuko laye nokukala pamwe naye momauyahame aye.’ Heeno, Paulus okwa li a hala ‘okufa Kristus mokufya kwaye.’ (Ovafilippi 3:8, 10) Ovakriste vahapu ovavaekwa ohave lididimikile “omahepeko a kwata moiti ngaashi oo Jesus a li a pita muo,” ofimbo ve li momalutu opambelela. — 2 Ovakorinto 4:10, NW.
9. Omungome wopEdimbuluko otau faneke olutu la tya ngahelipi?
9 Eshi Jesus a li ta diki po Ouvalelo wOmwene, okwa li a popya shi na sha nomungome a ti: “Owo olutu lange.” (Markus 14:22) Okwa li ta ulike kolutu laye lo vene, olo la li poku ka yahamekwa nokumonifwa oixuna. Omungome uhe na onhafi okwa li wa yeleka okufaneka olutu laJesus. Omolwashike mbela? Omolwaashi mOmbibeli onhafi omafimbo amwe ohai ulike koulunde ile koukolokoshi. (Mateus 16:4, 11, 12; 1 Ovakorinto 5:6-8) Jesus okwa li a wanenena nomolwaasho olutu laye lopanhu kala li li na oulunde. Okwa yamba po olutu laye la wanenena li li ekuliloyambo. (Ovaheberi 7:26; 1 Johannes 2:2) Ekuliloyambo laye otali etele ouwa Ovakriste aveshe ovadiinini, kutya nee ove na eteelelo lokuya meulu ile oloku ka kala nomwenyo waalushe moparadisa kombada yedu. — Johannes 6:51.
10. Omeityo lilipi ovo hava kufa ombinga mokunwa omaviinyu pEdimbuluko hava ‘kwatakanifwa nohonde yaKristus’?
10 Paulus okwa popya shi na sha nomaviinyu oo haa nuwa pEdimbuluko kOvakriste ovavaekwa, a ti: “Eholo lepuniko eli hatu li nangeke noupuna, [kali] fi hamba ekwatafano nohonde yaKristus?” (1 Ovakorinto 10:16) Omeityo lilipi ovo hava kufa ombinga mokunwa omaviinyu hava ‘kwatakanifwa nohonde yaKristus’? Osha yela kutya ihava dana onghandangala mokukulila ovanhu vakwao, molwaashi navo ova pumbwa ekulilo. Omanyono avo ohaa dimwa po nova yukipalifwa va ka mone omwenyo meulu, pakanghameno leitavelo lavo meenghono dokukulila dohonde yaKristus. (Ovaroma 5:8, 9; Titus 3:4-7) Ovafyuululi pamwe naKristus ovo 144 000 ova ‘yapulwa,’ sha hala kutya, ova yoololwa ko koulunde ile va yelifwa okupitila mohonde yaKristus ya tika opo va kale “ovayapuki.” (Ovaheberi 10:29; Daniel 7:18, 27; Ovaefeso 2:19) Heeno, okupitila mohonde yaye ya tika, Kristus okwa ‘kulilila Kalunga [ovavaekwa] mukeshe oludi nelaka novanhu noiwana, ndele te va ningile Kalunga ouhamba novapristeri, notava ka kala nokupangela kombada yedu.’ — Ehololo 5:9, 10.
11. Mokunwa omaviinyu pEdimbuluko, ovavaekwa ohava ulike shike?
11 Eshi Jesus a li a dika po Edimbuluko lefyo laye, okwa li a pa ovayapostoli vaye ovadiinini eholo lomaviinyu ndele ta ti: “Nweni mo amushe; osheshi olo ohonde yange, ohonde yehangano, tai tilwashi [omolwavahapu] oyokudima po omatimba.” (Mateus 26:27, 28) Ngaashi ashike ohonde yeemhedi noyoikombo ya li ya koleka ehangano lOmhango pokati kaKalunga noshiwana shaIsrael, ohonde yaJesus okwa li ya koleka ehangano lipe olo Jehova a ninga naIsrael shopamhepo, olo la hovela okulonga pOpentekoste mo 33 O.P. (Exodus 24:5-8; Lukas 22:20; Ovaheberi 9:14, 15) Mokunwa omaviinyu oo taa faneke “ohonde yehangano,” ovavaekwa ohava ulike kutya ove li oilyo yehangano lipe notava mono ouwa mulo.
12. Ovavaekwa ohava ninginifwa ngahelipi mefyo laKristus?
12 Ovavaekwa ohava dimbulukifwa yo shi na sha noshinima shimwe vali. Jesus okwa li a lombwela ovahongwa vaye ovadiinini a ti: “Eholo eli handi nu, nanye otamu ke li nwa yo, neninginifo olo handi ninginifwa, nanye omu na yo okuninginifwa mulo.” (Markus 10:38, 39, NW) Konima yefimbo, omuyapostoli Paulus okwa li a popya shi na sha ‘nokuninginifwa kwOvakriste mefyo laKristus.’ (Ovaroma 6:3, yelekanifa NW.) Onghalamwenyo yovavaekwa oi li onghalamwenyo yeliyambo. Efyo lavo olopayambo, molwaashi ova yamba po eteelelo lokukala nomwenyo waalushe kombada yedu. Okuninginifwa kwOvakriste ovavaekwa mefyo laKristus ohaku pu ngeenge va fi ve li ovadiinini ndele tava nyumunwa ve li oishitwa yopamhepo va ka ‘pangele pamwe’ naKristus meulu. — 2 Timoteus 2:10-12; Ovaroma 6:5; 1 Ovakorinto 15:42-44, 50.
Okukufa ombinga mokulya nokunwa omadidiliko Edimbuluko
13. Omolwashike ovo ve na eteelelo loku ka kala kombada yedu ihava kufa ombinga mokulya nokunwa omadidiliko pEdimbuluko, ndele omolwashike hava kala po?
13 Molwaashi okukufa ombinga mokulya omungome nokunwa omaviinyu pEdimbuluko okwa kwatela mo aishe oyo ya popiwa metetekelo, osha yela kutya itashi ka kala sha wapala kwaavo ve na eteelelo loku ka kala kombada yedu okukufa ombinga mokulya nokunwa omadidiliko pEdimbuluko. Ovo ve na eteelelo loku ka kala kombada yedu ove shi shii kutya vo kave fi oilyo yolutu laKristus ya vaekwa, nokave li oilyo yehangano lipe olo Jehova a ninga naavo tava ka pangela pamwe naJesus Kristus. Molwaashi “eholo” otali faneke ehangano lipe, oilyo yehangano olo oyo ashike i na okukufa ombinga mokulya nokunwa omadidiliko pEdimbuluko. Ovo ve na eteelelo loku ka kala nomwenyo waalushe kombada yedu ve li ovanhu va wanenena koshi yepangelo lOuhamba ihava ninginifwa mefyo laJesus nokave na eifano loku ka pangela pamwe naye meulu. Onghee hano, osha yela kutya itashi ka kala sha wapala nandenande kuvo okukufa ombinga mokulya nokunwa omadidiliko pEdimbuluko. Nonande ihava kufa ombinga mokulya nokunwa omadidiliko pEdimbuluko, ohava kala po ve li ovatali nefimaneko. Ohava pandula Jehova shi na sha naashishe osho e va ningila okupitila mOmona waye, mwa kwatelwa okudima po omatimba avo pakanghameno lohonde yaKristus ya tika.
14. Ongahelipi ovavaekwa hava pamekwa pamhepo mokulya omungome nokunwa omaviinyu pEdimbuluko?
14 Okudidilikwa kwaxuuninwa kwomuvalu munini wOvakriste ovo ve na eifano loku ka pangela pamwe naKristus meulu oku li pokuxula po. Ofimbo va teelela exulilo lokukalamwenyo kwavo kwokombada yedu kweliyambo, ovavaekwa ohava pamekwa pamhepo mokukufa ombinga mokulya nokunwa omadidiliko Edimbuluko. Ohava kala ve udite ve li moukumwe novamwaxe nosho yo ovamwaina ovo ve li oilyo ikwao yolutu laKristus. Okulya omungome nokunwa omaviinyu pEdimbuluko ohaku va dimbulukifa oshinakuwanifwa shavo shokukala ovadiinini fiyo okefyo. — 2 Petrus 1:10, 11.
Okwoongelwa kwoinima “yokombada yedu”
15. Oolyelye va ongelwa ve limange kumwe nOvakriste ovavaekwa?
15 Okudja mo 1930 nasha, omuvalu munene ‘weedi dimwe’ odo di na eteelelo loku ka kala nomwenyo waalushe kombada yedu owe limanga kumwe ‘nokangudu’ kovavaekwa. (Johannes 10:16, OB-1986; Lukas 12:32; Sakaria 8:23) Ova ninga ovayambididi ovadiinini vovamwaxe vaKristus, tave va yambidida moilonga yokuudifa “evangeli eli louhamba” li ningile oiwana aishe ondombwedi. (Mateus 24:14; 25:40) Omolwokuninga ngaho, otava ka talwa ko kuKristus ve li “eedi” daye odo tadi ka kala da hokiwa kuye notadi ka amekwa “kolulyo” laye eshi te uya okutokola oiwana. (Mateus 25:33-36, 46) Omolweitavelo lavo mohonde yaKristus, otava ka kala ‘mongudu inene,’ oyo tai ka xupa “moudjuu munene.” — Ehololo 7:9-14, yelekanifa NW.
16. Oolyelye tava ka kwatelwa moinima “yokombada yedu,” notava ka pewa ngahelipi omhito yokuninga ‘ovana vaKalunga’?
16 Ngeenge okudidilikwa kwaxuuninwa kwo 144 000 okwa pu, “eemhepo” dehanauno otadi ka efuwa di hanaune po onghalelo yaSatana youkolokoshi. (Ehololo 7:1-4) Otapa ka kala omuvalu muhapu wovanhu ovo tava ka nyumunwa, oo tau ke limbwanga mumwe nongudu inene pefimbo lEpangelo lOmido Eyovi laKristus novapangeli pamwe naye ve li eehamba novapristeri. (Ehololo 20:12, 13) Ovanhu ovo otava ka pewa omhito yokuninga ovapangelwa vokombada yedu tava kalelele vOhamba yopaMessias, Kristus Jesus. Pexulilo lEpangelo lOmido Eyovi, oinima aishe oyo “yokombada yedu” otai ka efelwa meyeleko laxuuninwa. Ovo tava ka kala ovadiinini otava ka tambulwa ko ve li ‘ovana vaKalunga’ vokombada yedu. — Ovaefeso 1:10; Ovaroma 8:21; Ehololo 20:7, 8.
17. Elalakano laJehova otali ka wanifwa po ngahelipi?
17 Ngaashi sha yelifwa metetekelo, Jehova ota ka wanifa po elalakano laye ‘lokukwatakanifa muKristus aishe oyo yomeulu naai yokombada yedu’ okupitila ‘melelo’ laye lopandunge ile onghedi yaye yokuunganeka oinima. Oishitwa aishe oinaendunge meulu nokombada yedu otai ka hanganifwa mombili notai ka kala tai dulika nehafo kepangelo li li pauyuki lOmunamalalakano Munenenene, Jehova.
18. Ovavaekwa nosho yo oovakwao veedi dimwe otava ka mona ouwa ngahelipi mokukala pEdimbuluko?
18 Itashi ka kala tuu tashi tu omukumo koshixupe shinini shovavaekwa nokomamiliyona oovakwao veedi dimwe okwoongala pamwe mo 12 Aprili 2006! Otava ka dana Edimbuluko lefyo laKristus, ngaashi ashike a li a lombwela ovahongwa vaye a ti: “Shi ningeni okudimbulukwa nge.” (Lukas 22:19) Aveshe ovo tava ka kala pEdimbuluko ove na okudimbulukwa osho Jehova e va ningila okupitila mOmona waye omuholike, Kristus Jesus.
Omapulo eendululo
• Jehova okwa lalakanena shike shi na sha noinima yomeulu noyokombada yedu?
• Oolyelye ve li oinima “oyo yomeulu,” nova kala tava ongelwa ngahelipi?
• Oolyelye ve li oinima “yokombada yedu,” nove na eteelelo lilipi?
[Efano pepandja 15]
‘Olutu laKristus’
[Efano pepandja 15]
Eshi Paulus a li ta kundafana shi na sha neityo lonhumba li na sha nokulya omungome kwovamwaxe vaKristus ovavaekwa nomhepo, mo 1 Ovakorinto 10:16, 17, okwa tumbula ‘olutu’ meityo le likalekelwa. Okwa ti: “Omungome ou hatu u pambula, kau fi ekwatafano nolutu laKristus? Osheshi omungome oumwe, nosho fye vahapu olutu limwe; osheshi ofyeni atusheni twa tambula komungome ou umwe.” Ngeenge Ovakriste ovavaekwa tava kufa ombinga mokulya omungome wEdimbuluko, otava ulike kutya ova hangana noilyo ikwao yeongalo lovavaekwa, olo tali faafanifwa nolutu olo Kristus e li Omutwe walo. — Mateus 23:10; 1 Ovakorinto 12:12, 13, 18.
[Omafano pepandja 15]
Omolwashike ovavaekwa ovo aveke hava kufa ombinga mokulya omungome nokunwa omaviinyu pEdimbuluko?
[Efano pepandja 17]
Oishitwa aishe meulu nokombada yedu otai ka hanganifwa okupitila melelo laJehova