“Omadimbulukifo oye oo enyaku lange”

“Keshe eshi sha shangwa nale, osha shangelwa elongo letu.” — OVAROMA 15:4.

1. Jehova ohe tu dimbulukifa ngahelipi, nomolwashike twa pumbwa omadimbulukifo aye?

JEHOVA oha dimbulukifa oshiwana shaye oikando noikando okupitila momadimbulukifo, opo shi dule okuungaunga nomafininiko momafimbo aa madjuu. Amwe omomadimbulukifo oo ohatu a pewa okupitila melesho lOmbibeli lopaumwene, ofimbo amwe hatu a udu okupitila moipopiwa ile momatyekosha ovamwatate pokwoongala kwopaKriste. Shihapu osho hatu lesha ile hatu udu peemhito da tya ngaho ihashi kala shipe momatwi etu. Ouyelele muhapu oo hatu konakona otashi dulika twe u lesha ile twe u uda nale. Ndele molwaashi ohatu dimbwa noupu, otwa pumbwa alushe okupepaleka omadiladilo etu shi na sha nomalalakano aJehova, eemhango daye nosho yo omahongo aye. Otu na okukala tu na olupandu omolwomadimbulukifo aKalunga. Ohae tu kwafele tu kaleke momadiladilo omatomheno e na sha nokudiinina onghedi yetu yokukalamwenyo kwometilokalunga. Nomolwaasho omushangi wEpsalme 119 okwa imbila Jehova a ti: “[Omadimbulukifo, NW] oye oo enyaku lange.” — Epsalme 119:24.

2, 3. (a) Omolwashike Jehova a shangifa omahokololo e na sha novanhu vopefimbo lOmbibeli opo a diininwe fiyo okunena? (b) Omahokololo opamishangwa elipi hatu ka konakona moshitukulwa eshi?

² Eendjovo daKalunga odi na eenghono, nonande oda shangwa omafelemido mahapu a pita. (Ovaheberi 4:12) Odi na omahokololo e li paushili e na sha novanhu ovo va li ko pefimbo lokushangwa kwado. Nonande eenghedindjikilile nosho yo omataleko ovanhu okwa enda taa lunduluka okudja pefimbo lokushangwa kwOmbibeli, omashongo oo hatu shakeneke monghalamwenyo kunena okwa faafana naao opefimbo lOmbibeli. Omahokololo mahapu oo a shangwa mOmbibeli omolwouwa wetu oku na sha noihopaenenwa tai kumu omutima yovanhu ovo va li ve hole Jehova nove mu longela noudiinini nonande ova li meenghalo didjuu. Omahokololo makwao otae tu londwele shi na sha nelihumbato olo Jehova e tonde. Omahokololo aeshe a tya ngaho, e na sha naavo va longa ouwa nosho yo ovo va longa oilonga ii, okwa shangwa mOmbibeli opo a kale omadimbulukifo kufye. Osho oshi li metwokumwe naasho omuyapostoli Paulus a shanga, eshi a ti: “Keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” — Ovaroma 15:4.

³ Natu taleni komahokololo atatu opamishangwa: okuungaunga kwaDavid naSaul, ehokololo laAnanias naSafira, nosho yo oshiningwanima shaJosef nomukainhu waPotifar. Keshe limwe lomuo otali tu hongo oshilihongomwa sha fimana.

Kala omudiinini komalongekido aKalunga

4, 5. (a) Oshike sha li sha holoka pokati kaDavid nohamba Saul? (b) David okwa li e linyenga ngahelipi koutondwe waSaul?

⁴ Ohamba Saul oya ka pilamena Jehova nokaya li vali ya wana okupangela oshiwana shaYe. Onghee hano, Kalunga okwa li e i ekelashi nokwa li a wilika omuprofeti Samuel a ka vaeke David a ninge ohamba yomonakwiiwa yaIsrael. Eshi David a li a ulika kutya oku li omukwaita omuladi nonghulungu nokwa li ta tangwa koshiwana, Saul okwa li e mu twila ondubo. Nokwa li a kendabala lwoikando okudipaa David. Ndele David okwa xupa oikando aishe oyo, molwaashi Jehova okwa li pamwe naye. — 1 Samuel 18:6-12, 25; 19:10, 11.

⁵ Oule womido, onghalo oyo okwa li ya fininika David a kale onhauki. Eshi pa li pa holoka omhito oyo ngeno David a li ta dulu okudipaa Saul, ookaume kaDavid ova li ve mu ladipika a dipae Saul, tava ti kutya Jehova okwa li a yandja Saul momake aye. Ndelenee David okwa li a anya oku shi ninga, omolwoudiinini waye kuJehova nomolwaashi okwa li a fimaneka ondodo yaSaul e li ohamba yaIsrael ya vaekwa. Mbela Jehova haye a li a nangeka po Saul e li ohamba yaIsrael? Jehova okwa li yo te ke mu kufa po pondodo oyo pefimbo laye la wapala. David okwa li e shii kutya kasha li oshinakuwanifwa shaye okukatukila Saul onghatu. Konima eshi David a ninga ngaashi ta dulu opo a loteke ehandu laSaul, okwe uya pexulifodiladilo a ti: “Omwene te ke mu denga, ile efiku laye lefyo tali ke uya ile ta ka ya molwoodi ndee ta dipawa! Omwene na amene nge, ame ndi ha kume neke lange omuvaekwa wOmwene!” — 1 Samuel 24:3-15; 26:7-20.

6. Omolwashike ehokololo laDavid naSaul lihokwifa kufye?

⁶ Mehokololo olo omu na oshilihongomwa sha fimanenena. Mbela ope na omafimbo amwe oo ho lipula kutya omolwashike omaupyakadi onhumba haa holoka po meongalo lopaKriste? Otashi dulika pa kale Omukriste wonhumba te lihumbata monghedi inai wapala. Elihumbato laye otashi dulika kali fi enyono la kwata moiti, ndele ohali ku kenyananeke. Mbela ou na okuungaunga ngahelipi noshinima osho? Omolwokunakonasha kwoye kwopaKriste nomolwoudiinini woye kuJehova, oto dulu oku ka popya nombili nOmukriste a tya ngaho, nelalakano lokukandula po oupyakadi oo. Ongahelipi ngeenge inamu dula okukandula po oupyakadi oo? Oto dulu okweefela oinima oyo momake aJehova, ngaashi David a li a ninga, ngeenge owa ninga eenghendabala ngaashi to dulu ndele inape uya elunduluko.

7. Mokutala koshihopaenenwa shaDavid, otu na okuungaunga ngahelipi noutondwe ile ouhenouyuki oo hatu ningilwa?

⁷ Otashi dulika to ningilwa ouhenouyuki ile ho shakeneke outondwe wopalongelokalunga. Oshi na oupu u kale ito dulu okuninga po sha lela. Eenghalo da tya ngaho otashi dulika di kale didjuu neenghono okulididimikila, ndele onghedi omo David a ungaunga nouhenouyuki otai tu hongo oshilihongomwa sha fimanenena. Omapsalme taa kumu omutima oo a shangwa kuDavid kae na sha ashike nokwiilikana kwaye kuKalunga tashi di komutima opo aha findwe keemhangela daSaul, ndele otaa holola yo oudiinini waye kuKalunga nosho yo omalipulo aye shi na sha nokufimanekifwa kwedina laKalunga. (Epsalme 18:2-7, 26-28, 31-33, 49-51; 57:2-12) David okwa kala omudiinini kuKalunga nonande okwa kala ta ningilwa ouhenouyuki kuSaul oule womido. Nafye otu na okukala ovadiinini kuJehova nokehangano laye, kashi na nee mbudi kutya ohatu ningilwa ouhenouyuki wa tya ngahelipi ile kutya vamwe otava ningi shike. Natu kale twa shilipalekwa kutya Jehova oku wete filufilu eenghalo omo tu li. — Epsalme 86:2.

8. Eendombwedi daJehova muMosambike oda li de linyenga ngahelipi eshi oudiinini wado kuJehova wa li tau yelekwa?

⁸ Ovakriste vopefimbo letu vomuMosambike ove tu tulila po oshihopaenenwa shiwa shi na sha nokukala ovadiinini kuJehova pefimbo lomayeleko. Mo 1984, omikunda davo oda li hadi ponokelwa lwoikando kongudu yovanamapove ya homata, oyo ya li hai pumine momaumbo avo nokukufa mo oiniwe yavo, noku a xwika po, nokudipaa ovanamikunda. Ovakriste ovo vashili kava li naanaa ve na osho tava dulu okuninga po opo ve liamene komaponokelo oo. Ovanamikunda ovo ova li tava fininikwa va ninge ovakwaita vongudu oyo ile ve i yambidide meenghedi dimwe di lili. Eendombwedi daJehova oda li de shi anya omolwokudiinina onghatu yado yopaKriste yokuhenombinga. Osho osha li sha handukifa neenghono ongudu yovanamapove. Nonande Eendombwedi 30 oda li da dipaelwa momakuyunguto oo, osho kasha li sha ningifa Eendombwedi dikwao di efe po oudiinini wado kuJehova.a Ngaashi David, Eendombwedi odo oda li de lididimikila ouhenouyuki oo, nohauxuuninwa oda ninga ovafindani.

Edimbulukifo tali londwele

9, 10. (a) Ouwa ulipi hatu mono moihopaenenwa imwe yopamishangwa? (b) Ananias naSafira ova li va katuka onghatu ya puka ilipi?

⁹ Omahokololo amwe oo e li mOmishangwa oku li omadimbulukifo taa londwele shi na sha nelihumbato olo tu na okuhenuka. Doshili, Ombibeli oi na omahokololo mahapu e na sha noohandimwe ovo va li va nyona ndele tava mono oilanduliko inyikifa oluhodi, nokuli naavo va li ovapiya vaKalunga. (1 Ovakorinto 10:11) Oshihopaenenwa shimwe oshi na sha novalihomboli vamwe, Ananias naSafira, ovo va li oilyo yeongalo lopaKriste lomefelemudo lotete, olo la li muJerusalem.

¹⁰ Konima yOpentekoste yomo 33 O.P., opa li pa holoka omhumbwe yokuyambidida painiwe ovaitaveli vape ovo va li va fyaala muJerusalem, opo va dule okuhafela eendafano novayapostoli. Oilyo imwe yeongalo olo oya li ya landifa po oiniwe yayo opo i ninge omayambidido e na sha nokufila oshisho ovaitaveli ovo vape. (Oilonga 2:41-45) Ananias naSafira ova li va landifa po epya lavo ndele tava twala imwe yomoimaliwa oyo kovayapostoli, tava ti kutya ova eta oimaliwa aishe oyo va mona eshi va landifa po epya lavo. Ananias naSafira ova li tava dulu okutokola vo vene kutya otava yandje shi fike peni, ndele kava li ve na elinyengotomheno la yuka, nova li va popya oipupulu. Ova li va hala okulimonikifa va fa ve na oikala iwa nonokutya ova li ve na omhepo yeliyambo, ndelenee ova li ovakengeleledi. Omhepo iyapuki oya li ye linyengifa omuyapostoli Petrus a nyaneke pomutenya oukengeleledi noihelele yavo, nohauxuuninwa Jehova okwe va dipaa. — Oilonga 5:1-10.

11, 12. (a) Omadimbulukifo elipi hatu hange mOmishangwa e na sha nokukala ovanashili? (b) Omauwa elipi hatu dulu okumona omolwokukala ovanashili?

¹¹ Ngeenge ohatu kala tu na eamo lokupopya oipupulu opo tu pandike kovanhu, osho sha ningilwa Ananias naSafira nashi kale elondwelo kufye. Otashi dulika tu fufye ovanhu vakwetu, ndele itatu dulu nandenande okufufya Jehova. (Ovaheberi 4:13) Omishangwa ode tu kumaida lwoikando tu kale hatu lombwelafana oshili, molwaashi ovanaipupulu itava ka ya mo mounyuni mupe wouyuki. (Omayeletumbulo 14:2; Ehololo 21:8; 22:15) Etomheno kutya omolwashike tuhe na okupopya oipupulu ola yela: Satana Ondiaboli oye ta xumifa komesho oipupulu yoludi keshe. — Johannes 8:44.

¹² Okukala ovanashili otaku tu etele omauwa mahapu. Amwe omuo ongaashi, okukala neliudo la yela nosho yo okukala nehafo omolwokukala twe lineekelwa kuvamwe. Luhapu, Ovakriste ohava mono oilonga ile ve i kaleke po omolwokukala kwavo ovanashili. Kakele kaasho, ouwa wa denga mbada u na sha nokukala ovanashili oo okukaleka po ekwatafano letu naKalunga Omunaenghono adishe. — Epsalme 15:1, 2.

Diinina oukoshoki wopaenghedi

13. Eshongo lilipi Josef kwa li a shakeneka, nokwa li a ungaunga nalo ngahelipi?

¹³ Josef, omonamati watatekulululwa Jakob, okwa li a landifwa po moupika ofimbo a li e na omido 17. Hauxuuninwa, okwa ka kala ta longele oukwaneumbo waPotifar, elenga lomombala yaEgipti. Ofimbo Josef a li ta longele oukwaneumbo oo, omukainhu waPotifar okwa li e mu hokwa nokwa li a hala va ye naye moluhaelo. Efiku nefiku, okwa kala ta kondjifa omulumenhu oo omunyasha noku na ondjelo iwa, ta ti: “Ila, tu nangale.” Josef okwa li kokule noukwaneumbo waxe nokwa li moshilongo omo ehe shiivike mo. Okwa li ta dulu okuya noupu moluhaelo nomukainhu oo nopehe na oo te shi shiiva. Ndele hauxuuninwa eshi omukainhu waPotifar a kwata Josef e mu kondjife va nangale naye, Josef okwe linyeka mo ndele tai onhapo. — Genesis 37:2, 18-28; 39:1-12.

14, 15. (a) Omolwashike ehokololo li na sha naJosef lihokwifa kufye? (b) Omolwashike omukainhu umwe Omukriste a li a hafa omolwokupwilikina komadimbulukifo aKalunga?

¹⁴ Josef okwa li a tekulwa moukwaneumbo hau tila Kalunga nokwa li e shii kutya omilele oda ngabekelwa ashike mohombo, pokati komulumenhu nomukainhu waye. Okwa pula a ti: “Ndi dule ngahelipi okuninga owii u fike opo nokunyona kuKalunga?” Otashi dulika Josef e uya pexulifodiladilo olo omolweshiivo laye li na sha nomufikamhango oo Kalunga a li a dika po muEden kutya ohombo oyomulumenhu ashike umwe nomukainhu umwe. (Genesis 2:24) Kunena, ovapiya vaKalunga otava dulu okumona ouwa mokukaleka momadiladilo onghedi omo Josef a li a ungaunga nonghalo omo a li. Moilongo imwe, ovanhu ova tala ko okuya momilele omunhu ina hombola ku li oshinima inashi kwata moiti, nomolwaasho ovanyasha ovo hava anye okuya moluhaelo ohava kala tava shekwa koomakula vavo. Okuya momilele kondje yohombo oku li apeshe mounyuni. Onghee hano, ehokololo olo laJosef oli li edimbulukifo kufye li li pefimbo. Fiyo okunena eli, Kalunga okwa tala ko oluhaelo nenyonohombo i li omanyono a kwata moiti. (Ovaheberi 13:4) Vahapu ovo va li va ya moluhaelo ova dimina kutya osha puka filufilu okuninga ngaho. Imwe yomoilanduliko inyikifa oluhodi oyo hai etifwa koluhaelo ongaashi, okulishundula, okukala neliudo li udite etimba, oukodi, okuninga omadimo nosho yo okukwatwa komikifi odo hadi tandavele okupitila momilele. Ngaashi ashike Omishangwa de tu londwela, omunhu oo tai moluhaelo “ota nyono kolutu laye mwene.” — 1 Ovakorinto 5:9-12; 6:18; Omayeletumbulo 6:23-29, 32.

¹⁵ Jenny,b oo e li Ondombwedi yaJehova inai hombolwa, okwa li a pandula omadimbulukifo aJehova. Omulumenhu umwe e na ondjelo iwa, oo hava longo pamwe naye, okwa li e mu hala. Eshi omulumenhu oo a mona kutya Jenny ine mu hala, okwa kala ta ningi eenghendabala da wedwa po opo e mu hokwife. Jenny okwa dimina a ti: “Osha li eshongo kwaame okudiinina oukoshoki wopaenghedi, molwaashi okuhokiwa komunhu woukashike kookanhu wa yooloka ohashi ningifa omunhu a kale e udite a fa e holike.” Ndele Jenny okwa li e shi mona mo kutya omulumenhu oo okwa li ashike a hala okuhaela naye ngaashi a ninga novakainhu vamwe ve lili. Eshi Jenny a li e udite ta tyololoka shi na sha netokolotoko laye lokuhaitavela omulumenhu oo, okwa ilikana kuJehova e mu kwafele opo aha itavele omulumenhu oo. Jenny okwa didilika kutya oinima oyo a li e lihonga mokukonakona Ombibeli noishangomwa yopaKriste oya li ngaashi omadimbulukifo kuye oo e mu ladipika a kale a lungama. Limwe lomomadimbulukifo oo ola li ehokololo li na sha naJosef nomukainhu waPotifar. Jenny okwa weda ko a ti: “Eshi nda kala handi lidimbulukifa shi na sha nohole yange yokuhola Jehova, onda li ndi udite kutya inandi pumbwa okutila kutya ohandi ka ninga owii u fike opo ndele handi nyono kuJehova.”

Pwilikina komadimbulukifo aKalunga!

16. Ongahelipi hatu dulu okumona ouwa mokukonakona nomokudilonga shi na sha nomahokololo oohandimwe oo e li mOmbibeli?

¹⁶ Okukala tu udite ko kutya omolwashike Jehova e tu tuvikilila omahokololo onhumba mOmishangwa otaku ke tu kwafela tu kale twa lenga omifikamhango daye. Oshiwa okulipula kutya: Mbela oshike hatu lihongo momahokololo oo? Omaukwatya elipi ile oikala ilipi yovanhu vomomahokololo Ombibeli twa pumbwa okuhopaenena ile okuhenuka? Eendjovo daKalunga odi na omahokololo e na sha novanhu vahapu. Aveshe ovo ve hole ehongo lopakalunga ove na okukala va hokwa ounongo tau xupifa eemwenyo, mwa kwatelwa oilihongomwa oyo ye likolelela koihopaenenwa yovanhu ovo va popiwa mOmbibeli. Oshungonangelo ohai nyanyangida oitukulwa i na sha nomahokololo oohandimwe oo tae tu hongo oilihongomwa ya fimana. Omolwashike ito shi ningi elalakano loye okukala ho konakona oitukulwa ya tya ngaho?

17. Oho kala u udite ngahelipi shi na sha nomadimbulukifo aJehova, nomolwashike?

¹⁷ Katu na tuu olupandu omolwokunakonasha kwopahole kwaJehova shi na sha naavo tava kendabala okulonga ehalo laye! Ovanhu vopefimbo lOmbibeli navo kava li va wanenena ngaashi ashike fye. Ndele nande ongaho, ohatu dulu okulihonga shihapu moimoniwa yavo oyo ya shangwa mOmbibeli. Mokupwilikina komadimbulukifo aJehova, ohatu ka henuka okuninga omapuko a kwata moiti nohatu ka hopaenena oihopaenenwa iwa yaavo va li ovayuki. Ngeenge otwa kala hatu ningi ngaho, ohatu ka imba ngaashi omushangi wEpsalme 119, oo a imba a ti: ‘Ovanelao ovava, tava diinine omadimbulukifo aJehova, ndee tave mu kongo nomutima aushe. Omwenyo wange otau diinine omadimbulukifo oye, ndele ndi a hole nghi na ekonda.’ — Epsalme 119:2, 167, yelekanifa NW.

[Omashangelo opedu]

[Efano pepandja 18]

Omolwashike David a li a anya okweefa Saul a dipawe?

[Efano pepandja 19]

Oshike hatu lihongo mehokololo li na sha naAnanias naSafira?

[Efano pepandja 20]

Oshike sha li she linyengifa Josef a anye okuya moluhaelo eshi a li ta kondjifwa komukainhu waPotifar?

[Efano pepandja 21]

Oto nyamukula ngahelipi?

• Oshike hatu lihongo monghedi omo David a li a ungaunga naSaul?

• Oshike hatu lihongo mehokololo li na sha naAnanias naSafira?

• Omolwashike ehokololo li na sha naJosef lihokwifa kufye kunena?