Omapulo ga za kaaleshi
Jesus okwa li a hala okutya shike sho a lombwele Nikodemus ta ti: “Kape na nando ogumwe a yile megulu kakele kOmuna gwOmuntu, ngoka a zi megulu”?—Johannes 3:13.
Ethimbo ndyono Jesus okwa li kombanda yevi noka li a londa natango nenge a shuna megulu. Ihe shoka tu shi kombinga yaJesus noshikalimo shoohapu dhe otashi vulu oku tu kwathela opo tu uve ko eityo lyadho.
Jesus okwa “zi megulu” moka a li a kala pamwe naHe mehala moka hamu kala iishitwa yopambepo, ihe pethimbo lyu uthwa, omwenyo gwe ogwa li gwa lundululilwa moshivalelo shaMaria, shoka sha li she etitha opo a valwe e li omuntu. (Lukas 1:30-35; Aagalati 4:4; Aahebeli 2:9, 14, 17) Konima yeso lye, Jesus okwa li ta ka yumudhwa e li oshishitwa shopambepo nokushuna a ka kale pamwe naJehova. Onkee ano, manga inaa sa, okwa li a galikana a ti: “Tate, adhimitha ndje montaneho yoye ngashingeyi neadhimo olyo tuu ndyoka nda li ndi na pungoye, uuyuni manga inaau shitwa.”—Johannes 17:5; Aaroma 6:4, 9; Aahebeli 9:24; 1 Petrus 3:18.
Sho Jesus a li ta popi naNikodemus ngoka a li Omufarisayi nomulongimpango muIsraeli, ka li a shuna natango megulu. Kapwa li pu na omuntu gulwe a sa ngoka a ya megulu, mehala moka hamu kala iishitwa yopambepo. Jesus okwa ti kutya Johannes Omuninginithi okwa li omupolofeti gwaKalunga omunene e vule yakwawo, ihe “mOshilongo shegulu ngoka omushuushuka kwaayehe oye e mu vule.” (Mathew 11:11) Omuyapostoli Petrus naye okwa li e shi yelitha kutya nokuli nomukwaniilwa omudhiginini David okwa sa, ihe oku li natango mombila; ina londa megulu. (Iilonga 2:29, 34) Opwa li etompelo kutya omolwashike mboka ya li ya si tango kuJesus, ngaashi David naJohannes Omuninginithi nosho wo aalumentu yalwe ooitaali, inaaya ya megulu. Oya si manga Jesus inee egulula ondjila nenge inee shi ninga tashi wapa opo aantu ya yumudhilwe omwenyo gwomegulu. Omuyapostoli Paulus okwa nyola kutya Jesus oku li ngaashi omutetekeli oku tu ‘egululila osheelo oshipe shi na omwenyo’ shokuya megulu.—Aahebeli 6:19, 20; 9:24; 10:19, 20.
Molwaashoka Jesus ka li a sa natango noka li a yumudhwa, mbela okwa li a hala okutya shike sho a lombwele Nikodemus a ti: “Kape na nando ogumwe a yile megulu kakele kOmuna gwOmuntu, ngoka a zi megulu”? (Johannes 3:13) Tu taleni koshikalimo shoshitopolwa nenge kwaashoka Jesus a li ta popi naNikodemus.
Sho omupangeli ngoka Omujuda a li e ya kuJesus uusiku, Jesus okwe mu lombwele a ti: “Ngame otandi ku lombwele oshili: Omuntu ngele ita valululwa, ita vulu okumona [uukwaniilwa waKalunga, KB].” (Johannes 3:3) Nikodemus okwa li e mu pula a ti: ‘Shika tashi wapa ngiini? Omuntu ota vulu ngiini okuvalululwa ishewe?’ Ka li u uvite ko elongo ndyoka lyopakalunga lyokukala mUukwaniilwa waKalunga. Mbela opwa li omukalo gumwe moka a li ta vulu okwiilonga kombinga yoshinima shika? Pataloko lyopantu, kasha li tashi vulika. Kapwa li nando omuntu a li ta vulu oku mu longa kombinga yasho, molwaashoka kapwa li gumwe a li megulu, onkee ano kapwa li ngoka ta vulu okuyelitha kombinga yokuya mUukwaniilwa. Ihe ngoka a li owala te shi vulu oJesus. Oye a li ta vulu okulonga Nikodemus nosho wo yalwe molwaashoka ye okwa za megulu nokwa li a gwana okulonga aantu kombinga yiinima mbyoka.
Epulo ndyoka lya kankamena kovelise ndjika otali yelitha oshinima shimwe sha simana shi na ko nasha nokukonakona Oohapu dhaKalunga. Kashi li pandunge okukala twa limbililwa kenyolo lyontumba molwaashoka owala tali monika lya fa edhigu okuuviwa ko. Shoka Ombiimbeli tayi popi pehala limwe oshi na okuyelekanithwa nuuyelele mboka tau adhika momanyolo galwe noshi na okukala tashi tsu kumwe nago. Natango, olundji oshikalimo shoshitopolwa, sha hala okutya, onkalo moka mwa li mu liwe nenge oshinima shoka sha li tashi kundathanwa, otashi ke tu kwathela okumona eityo lyopandunge komanyolo ngoka taga limbilike.