Megulu omu li ngiini?
AANTU yamwe ohaya dhiladhila kutya itashi wapa omuntu a tseye kutya megulu omu li ngiini molwaashoka kapu na ngoka a zile mo e tu lombwele kombinga yamo. Otashi vulika ya dhimbwa kutya Jesus okwa ti: “Onda za megulu.” (Johannes 6:38) Okwa li wo a lombwele aawiliki yamwe yomalongelokalunga a ti: “Ne omwa za huka kevi, ihe ngame onda za kombanda.” (Johannes 8:23) Jesus okwa li a popi shike shi na ko nasha negulu?
Jesus okwa li a koleke kutya egulu omo moka Jehova a kala. Okwa li i ithana Kalunga ‘Tate yomegulu.’ (Mateus 12:50) Ihe Jesus okwa li a longitha oshitya ‘egulu’ meityo li vule pulimwe. Pashiholelwa, okwa li a popi ewangandjo li li ‘egulu’ sho a ti: “Taleni oondhila dhokegulu.” (Mateus 6:26) Kakele kaashono, Jehova okwa kala pombanda puule kokule newangandjo. Ombiimbeli otayi ti: “Owa shitwa kungoka a kuutumba koshipangelapundi mookathele mwi handiyaka yeyalelo.”—Jesaja 40:22.
Mbela ‘Tate yomegulu’ oha kala mokati koonyothi? Ewangandjo lyo lyenelyene ohali ithanwa “egulu” mOmanyolo Omayapuki. Pashiholelwa, omupisalomi gumwe okwa nyola a ti: “Ngele te tala kegulu ndyoka we li shiti, komwedhi noonyothi mbyoka we yi uthile omahala gayo—omuntu omushike, sho ho mu dhimbulukwa?”—Episalomi 8:3, 4.
Aawe, Jehova Kalunga ke na okukala mewangandjo ndyoka a shita ngaashi naanaa omuhongi gwiipilangi itaa vulu okukala moskopa ndjoka a ninga. Onkee ano, sho omukwaniilwa Salomo a yapulile Jehova otempeli muJerusalem, okwa li a ti: “OMUWA, ndishi ito vulu okukala shili kombanda yevi? Eeno, negulu nomagulu inage ku gwanena, ano otempeli ndjika nde yi ku tungile, oto gwana mo ngiini?” (1 Aakwaniilwa 8:27) Ngele Jehova iha kala mewangandjo, egulu oshike moka a kala?
Nonando aantu oya konakona egulu lyo lyenelyene nomathano gokutala kokule nayamwe oya li ya ya mo mewangandjo, shoka Ombiimbeli ya popya otashi tsikile okukala shoshili: “Kaku na omuntu a mono Kalunga nando olumwe.” (Johannes 1:18) Jesus okwa li a yelitha kutya omolwashike omuntu itaa vulu okumona Kalunga sho a ti: “Kalunga oye Ombepo.”—Johannes 4:24.
Olutu lwopambepo olu vule kokule olutu lwopanyama. Olutu lwopambepo inalu tungwa po kiinima ngaashi onyama nombinzi mbyoka hayi monika nenge hayi vulu okugumwa. Onkee ano, sho Jesus a ti okwa li a kala naHe “megulu,” okwa hala okutya, okwa li a kala nonkalamwenyo ya dhenga mbanda yi vule okukalamwenyo akuhe kwiinima yokombanda yevi. (Johannes 17:5; Aafilippi 3:20, 21) Ehala ndika moka Jesus a li a kala naHe e li ombepo, oondyoka Ombiimbeli hayi li ithana “egulu.” Olya fa peni? Oshike hashi ningwa moka?
Ehala moka mu na iilonga yinyanyudha
Ombiimbeli oya hokolola egulu li li ehala moka tamu longwa iilonga oyindji. Oya tumbula iishitwa yopambepo iidhiginini omamiliyona mbyoka ya kala moka. (Daniel 7:9, 10) Kehe oshishitwa shika oshi na uukwatya wa tongomana. Otu shi shi ngiini? Miishitwa ayihe yomeshito, kamu na iinamwenyo iyali ya faathana lelalela, onkee ano otatu vulu okukala nuushili kutya megulu namo omu na wo iishitwa inaayi faathana. Oshindhindhilikwedhi osho kutya iishitwa ayihe mbika yomegulu yi na omaukwatya ga yoolokathana ohayi longele kumwe, nokungawo otashi gandja ekondjithathano naantu yokombanda yevi mboka ihaaya longele kumwe nuupu.
Ndhindhilika nkene Ombiimbeli tayi hokolola omaipyakidhilo gomegulu. Otayi ti: “Hambeleleni OMUWA, ne aayengeli oofule naanankondo, mbo hamu fala omalombwelo ge nohamu vulika koohapu dhe. Hambeleleni OMUWA, ne oonakukala megulu; aapiya ye amuhe mbo hamu gwanitha ehalo lye.” (Episalomi 103:20, 21) Ano megulu otamu longwa iilonga oyindji. Otatu vulu okukala nuushili kutya otamu longwa iilonga tayi nyanyudha.
Aayengeli oye na ondjokonona onde miilonga yinyanyudha mbyoka ya li ya tameke nale manga evi inaali shitwa. Pamanyolo, sho Jehova a shiti evi, aayengeli ‘oyi imbi noya ligola kenyanyu.’ (Job 38:4, 7) Gumwe gwomoyanamati yaKalunga yomegulu okwa li nokuli e na uuthembahenda wokulonga pamwe naKalunga mokushita iinima ayihe yilwe. (Aakolossa 1:15-17) Ehokololo ndika tali hokitha lyiilonga yinyanyudha megulu otali vulu okupendutha omapulo momadhiladhilo goye kombinga yegulu naantu.
Mbela aantu oya shitwa nelalakano lyokuya megulu?
Molwaashoka aayengeli oya li taya longele Kalunga megulu manga evi inaali shitwa, osha yela kutya omulumentu nomukiintu gwotango kaya li ya shitwa yu udhithe egulu. Pehala lyaashono, Kalunga okwa li a lombwele aaihokani yotango a ti: ‘Valathaneni, ne mu indjipale nokuudhitha evi alihe.’ (Genesis 1:28; Iilonga 17:26) Adam oye omushitwa gwotango gwokombanda yevi, ngoka a li ta vulu okutseya Kalunga noku mu longela nuudhiginini. Okwa li e na okukala he yaantu mboka egumbo lyawo li li evi. “Egulu lyokombandambanda olyo ehala lyOMUWA mwene, ihe evi okwe li pe aana yaantu.”—Episalomi 115:16.
Olundji aantu ihaya kala ya hala okusa, molwaashoka eso kali shi oshinima shopaunshitwe. Kalunga okwa li a lombwele Adam kombinga yeso li li owala egeelo lyokwaahavulika. Ando Adam okwa vulikile, ando ina sa nando.—Genesis 2:17; Aaroma 5:12.
Ano itashi kumitha sho Kalunga inaa lombwela sha Adam kombinga yokuya megulu. Onkee ano, evi inali nuninwa li kale ehala lyokumakela aantu opo ya talike ngele oya gwana okuya megulu. Omuntu okwa li a shitwa a kale nomwenyo sigo aluhe kombanda yevi, nelalakano lyaKalunga ndyoka otali ka gwanithwa natango. Ombiimbeli otayi uvaneke kutya “aayuuki otaa ka thigulula evi e taa kala mo sigo aluhe.” (Episalomi 37:29) Osha yela kutya aantu kaya li ya shitwa nelalakano lyokuya megulu. Omolwashike nduno Jesus a li u uvanekele aayapostoli ye omwenyo gwomegulu? Mbela Jesus okwa li a hala okutya aantu ayehe aawanawa otaya yi megulu?