Omapulo Gopambiimbeli Taga Yamukulwa
Oolye taya yi megulu, nomolwashike?
Aantu omamiliyona oye na etegameno kutya ngele ya si otaya yi megulu. Jesus okwa ti aayapostoli ye aadhiginini omo taya ka kala. Manga inaa sa, okwa li e yu uvanekele kutya ote ke ya longekidhila ehala puHe. — Lesha Johannes 14:2.
Omolwashike aantu yokombanda yevi taya ka yumudhwa ya ka kale nomwenyo megulu? Otaya ka ninga mo shike? Jesus okwa li a lombwele aayapostoli ye kutya otaya ka ninga aakwaniilwa. Otaya ka pangela ombanda yevi. — Lesha Lukas 22:28-30; Ehololo 5:10.
Mbela aantu ayehe aawanawa otaya yi megulu?
Miilongo oyindji aantu owala aashona haya pangele. Molwaashoka mboka Jesus ta ka yumudha ya ka kale nomwenyo megulu otaya ka pangela ombanda yevi, osha yela kutya omwaalu gwawo omushona gwowala. (Lukas 12:32) Ombiimbeli otayi popi kondandalunde kutya yangapi taya ka pangela pamwe naJesus. — Lesha Ehololo 14:1.
Jesus okwa longekidhila aalanduli ye yamwe omahala megulu. Mbela owu shi kutya otaya ka ninga mo shike?
Mboka taya yi megulu hayo owala taya ka mona ondjambi. Aalelwa aadhiginini yUukwaniilwa waJesus otaya ka nyanyukilwa omwenyo sigo aluhe meviparadisa. (Johannes 3:16) Mboka taya ka hupa po pehanagulo lyuuyuni mbuka wa kolokosha otaya ka kala mOparadisa. Yalwe otaya ka yumudhwa, opo ya ka kale mo. — Lesha Episalomi 37:29; Johannes 5:28, 29.