Mbela aantu ayehe aawanawa ohaya yi megulu?
KONIMA sho Jesus a li uulalelo we wahugunina pamwe naayapostoli ye manga inaa dhipagwa, okwa li e ya uvanekele ondjambi yokukala ye na ehala megulu. Okwa ti: “Megumbo lyaTate omu na omahala gokukala ogendji. Ando kasha li ngeyi, ando otandi mú lombwele kutya otandi ke mú longekidhila ehala.” (Johannes 14:2) Omolwashike Jesus a li te ke ya pa ehala megulu? Otaya ka ninga mo shike?
Jesus okwa li e na momadhiladhilo okupa aalongwa ye oshilonga shi ikalekelwa. Ongulohi oyo tuu ndjoka okwa ti: “One omwa kala pamwe nangame momamakelo gandje agehe. Ngaashi Tate a pe ndje epitikilo lyokupangela, osho nangame wo otandi mú pe [uukwaniilwa, KB].” (Lukas 22:28, 29) Kalunga okwa li u uvanekele Jesus kutya ota ka kala Omukwaniilwa ngoka ta ka pa aantu shoka ya pumbwa lela, sha hala okutya, epangelo ewanawa. Jesus ota ka hupitha aantu muupyakadhi wawo nokuhanagula po mboka taye ya kengelele. Nonando Jesus ota ka kala e na aapangelwa “sigo okooha dhuuyuni,” oshipangelapundi she otashi ka kala megulu.—Episalomi 72:4, 8; Daniel 7:13, 14.
Ihe Jesus ita ka pangela oye awike. Onkee ano, okwa li u uvanekele aayapostoli ye ehala megulu. Oyo ya li ya hogololwa tango ya ka ‘pangele ombanda yevi ye li aakwaniilwa.’—Ehololo 5:10, NW.
Yangapi taya yi megulu? Ngaashi naanaa mepangelo kehe, aapangeli mUukwaniilwa waKalunga womegulu aashona paku ya yelekanitha naayehe mboka taya ka pangelwa kuwo. Jesus okwa lombwele ayehe mboka taya ka pangela pamwe naye a ti: “Inamu tila, ne oshigunda oshishona! Oshoka Ho okwa hala oku mú pa [uukwaniilwa, KB].” (Lukas 12:32) “Oshigunda oshishona” shika otashi ka kala sha thikama po maantu 144 000. (Ehololo 14:1) Omwaalu ngoka omushona okuyeleka naantu omamiliyona mboka taya ka nyanyukilwa onkalamwenyo kombanda yevi kaayi na ehulilo ye li aapangelwa aavuliki yUukwaniilwa.—Ehololo 21:4.
Onkee ano, haantu ayehe aawanawa haya yi megulu. Omuyapostoli Petrus okwa li a popi sha yela kombinga yomukwaniilwa omwaanawa David, a ti: ‘David ina londa megulu.’ (Iilonga 2:34) Johannes Omuninginithi okwa li omulumentu omwaanawa. Nonando ongaaka, Jesus okwa li a ti kutya ita ka yelwa a pangele e li omukwaniilwa megulu. Okwa ti: “Kaku na nando ogumwe gwomaantu omunene e vule Johannes [Omuninginithi, ihe muukwaniilwa womegulu, NW] ngoka omushuushuka kwaayehe oye e mu vule.”—Mateus 11:11.
Mbela oto ka mona ondjambi ndjoka tayi ka pewa aantu aawanawa?
Omuntu oku na okuninga shike opo a mone ondjambi yokukala kombanda yevi sigo aluhe? Jesus okwa ti: “Kalunga a kala e hole uuyuni, oye a gandja Omwana awike, opo shaa ngoka te mu itaale [nenge “e na eitaalo tali longo muye,” NW], kaa kane, ihe a kale e na omwenyo gwaaluhe.” (Johannes 3:16) Ndhindhilika kutya ohole yaKalunga yokukala e hole uuyuni ohayi mu inyengitha e shi ninge tashi wapa opo ayehe ya vule okumona omwenyo gwaaluhe, ihe oomboka owala ye na “eitaalo tali longo” taya ka mona ondjambi ndjoka.
Eitaalo oli na okukala lya kankamekelwa kontseyo yoshili. (Johannes 17:3) Oto vulu okuulika kutya ngoye omuntu omwaanawa mokwiilonga oshindji kombinga yelalakano lyaJehova li na ko nasha naantu. Owu na okweetha eitaalo mwaashoka wi ilonga li ku inyengithe wu ninge sha. Kala nuushili kutya oto vulu lela okukala nomwenyo sigo aluhe.
[Oshimpungu pepandja 7]
Ombiimbeli otayi ti shike?
Epulo:
Oshike hashi ningilwa aantu aawanawa ngele ya si?
Eyamukulo:
“Aasi itaa tseya sha nando.”—OMUUVITHI 9:5.
Epulo:
Aantu aawanawa oye na etegameno lyonakuyiwa yi li ngiini?
Eyamukulo:
“Ethimbo otali ya, uuna oonakusa ayehe mboka ye li moombila, taa ka uva ewi [lyaJesus]. Oyo notaa ka za mo moombila dhawo.”—JOHANNES 5:28, 29.
Epulo:
Aantu oyendji aawanawa otaya ka kala peni?
Eyamukulo:
“Aayuuki otaa ka thigulula evi e taa kala mo sigo aluhe.”—EPISALOMI 37:29.