Etaloko lyaantu li na ko nasha nokuya megulu
ETEGAMENO lyokuya megulu kali shi tuu lihokitha kaantu oyendji! Aantu oyendji, mwa kwatelwa Aamoslema, Aahindu, Aabuddha, iilyo yoongeleka dhUukwakriste nokuli noyendji mboka kaaye na ko nasha nomalongelokalunga, oyi itaala kutya otaya ka kala nomwenyo konima yeso. Olundji aantu ohaya dhiladhila kutya egulu olyo ehala lyuuwanawa nenyanyu moka aantu taya vulu okumona epepelelo kokumona iihuna kwawo nokuhanganithwa ishewe “naamboka ye hole ya sa.” Ihe nonando aantu oyendji oya hala okuya megulu, kapu na ngoka a hala okusa a ye mo. Omolwashike shi li ngeyi?
Ando otwa li twa shitwa nelalakano lyokusa nokuya megulu, mbela ando aantu oyendji inaya hala okusa, ngaashi naanaa okanona ka hala okukoka nenge omugundjuka a hala okuhokana? Ihe konyala aantu oyendji inaya hala okusa.
Nonando ongaaka, aasita ohaya ti kutya konima yolweendo lwetu olufupi kombanda yevi, aniwa ohatu yi megulu moka twa shitilwa oku ka kala. Pashiholelwa, ngoka a li nale omubisofi omukuluntu Theodore Edgar Cardinal McCarrick, gwomuWashington, D.C., muAmerika okwa tile: “Inatu shitilwa onkalamwenyo ndjika. Otwa shitwa nelalakano lyokukala megulu.” Sha faathana, ngoka a li nale omupresidende gwEhangano lyAaevangeliste muAmerika okwa tile: “Elalakano lyomwenyo olyo okusimaneka Kalunga nokuya megulu, molwaashoka egulu olyo egumbo lyetu.”
Mboka yi itaala kutya konima yeso omuntu oha ka kala nomwenyo megulu, oya kankamekela eitaalo lyawo kuuyelele inaawu gwana. George Barna, omupresidende gwehangano ndyoka hali konakona omadhiladhilo gaantu kombinga yomalongelokalunga, okwa li a mono kutya aantu oyendji ‘omadhiladhilo gawo kombinga yomwenyo konima yeso’ oye ga mono ‘moonzo dhi ili nodhi ili, ngaashi mookino, moomusika nomomambo.’ Omusita gwongeleka yaEpiskopalia muFlorida shomuAmerika, okwa tile: “Katu shi sha kombinga yegulu kakele kaashono kutya megulu omo moka Kalunga a kala.”
Ihe egulu olyo oshinima sha simana shoka sha popiwa mOmbiimbeli. Oohapu dhaKalunga otadhi ti kutya megulu omu li ngiini? Mbela omuntu okwa shitwa nelalakano lyokukala megulu? Ngele aantu ohaya yi megulu, otaya ka ninga mo shike?
[Oohapu dha simana pepandja 3]
Omolwashike aantu oyendji ya hala okuya megulu, ihe aashona ya hala okusa ya ye mo?