Kulika alushe olupandu loye lokupandula omafiloshisho aJehova
“Oidiladilwa yoye, Kalunga, oinyenga, shi fike peni! Oitulwakumwe yayo aishe, oihapu unenenene!” — EPSALME 139:17.
1, 2. Omolwashike tu na okukala tu na olupandu shi na sha nEendjovo daKalunga, nomupsalme okwa li a ulika ngahelipi olupandu laye?
OFIMBO otembeli yomuJerusalem ya li tai wapekululwa, omupristeri omukulunhu Hilkia okwa li a mona “embo lomhango yOmwene, oyo ya yandjwa kuMoses.” Nopehe na omalimbililo, embo olo ola li la shangwa kuMoses odikilila, omido 800 lwaapo komesho yefimbo lomupristeri Hilkia. Kasha li tuu shihafifa okumona embo olo! Mbela ohamba itilikalunga Josia oya li i udite ngahelipi eshi ya li ya etelwa embo olo? Oya li ya tunhukwa neenghono. Nopehe na okwoongaonga, oya li ya pula hamushanga Safan e i leshele embo olo lomhango mokule. — 2 Omafimbo 34:14-18.
2 Kunena, ovanhu omamiliyona omayovi otava dulu okulesha Eendjovo daKalunga, Ombibeli aishe ile oitukulwa yayo. Ndele mbela osho osha hala okutya Eendjovo daKalunga inadi fimana vali ngaashi nale? Hasho, nandenande! Ombibeli oi na omadiladilo aKalunga Omunaenghono adishe, oo a shangwa omolwouwa wetu. (2 Timoteus 3:16) Omupsalme David okwa li a holola omaliudo aye e na sha nanghee e uditile Eendjovo daKalunga, a ti: “Oidiladilwa yoye, Kalunga, oinyenga, shi fike peni! Oitulwakumwe yayo aishe, oihapu unenenene!” — Epsalme 139:17.
3. Oshike tashi ulike kutya David okwa li e na oupamhepo muwa?
3 David okwa kala alushe e na olupandu okupandula Jehova, Eendjovo daYe, nosho yo elongekido laYe li na sha nelongelokalunga lashili. David okwa holola omaliudo aye shi na sha nanghee a li e uditile omafiloshisho aJehova momapsalme aye mahapu mahokwifa. Pashihopaenenwa, okwa shanga mEpsalme 27:4 a ti: “Shimwe ashike onde shi ehela kOmwene, nde shi hala unene: ngeno ame ndi kale mongulu yOmwene omafiku ange aeshe, okutala ouwanyenye wOmwene, ndi [shipulule] nawa motembeli yaye.” Outumbulilo wOshiheberi oo wa tolokwa “ndi shipulule nawa” owa hala okutya okudilonga nefimbo, okukonakona, okutala nohokwe, nehafo nonolupandu. Osha yela kutya David okwa li e na oupamhepo muwa, nokwa li e na olupandu linene shi na sha nomafiloshisho aJehova opamhepo, nomolwaasho okwa li ha hafele oshili keshe yopamhepo oyo Jehova a li a holola. Kungaho, David okwe tu tulila po oshihopaenenwa shiwa nokulandula. — Epsalme 19:8-12.
Kala u na olupandu omolwoufembanghenda wokushiiva oshili yOmbibeli
4. Omolwashike Jesus a li a “hafela pombada mOmhepo Iyapuki”?
4 Okudula kwovanhu okuuda ko Ombibeli inaku likolelela kokukala neendunge dihapu ile ehongo lomounyuni, oyo hai ningifa ovanhu va kale ve na ounhwa. Ndele ponhele yaasho, Jehova oye ha kwafele ovalininipiki ile tu tye ovo ve na omitima diwa nove shii omhumbwe yavo yopamhepo opo va ude ko Eendjovo daye, naasho ohe shi ningi omolwefilonghenda laye inali longelwa. (Mateus 5:3, NW; 1 Johannes 5:20) Eshi Jesus a li a dilonga kombinga youshili oo kutya omadina ovanhu vamwe inava wanenena okwa li a shangelwa meulu, “okwa hafela pombada mOmhepo Iyapuki [ndele] ta ti: Handi ku hambelele Tate, Omwene weulu nowedu, osheshi oinima ei we i holeka ovanaendunge novanongo ndele owe i hololela ava va fa ouhanana.” — Lukas 10:17-21.
5. Omolwashike Jesus a li a ladipika ovahongwa vaye vaha kwate nande okahetengi eeshili dOuhamba odo va li va hololelwa?
5 Konima eshi Jesus a li a ilikana eilikano olo tali di komutima, okwa li a lombwela ovahongwa vaye a ti: “Omesho taa mono ei mwe i tala oku na elao. Osheshi handi mu lombwele, ovaprofeti vahapu neehamba va li va hala okumona ei tamu i tale, vo inave i mona, nokuuda ei tamu i udu, vo inave i uda.” Kungaho, Jesus okwa li a ladipika ovashikuli vaye ovadiinini vaha kwate nande okahetengi eeshili dOuhamba di na ondilo odo va li va hololelwa. Eeshili da tya ngaho kada li da hololelwa omapupi ovapiya vaKalunga onale nosho yo nokuli “ovanaendunge novanongo” vopefimbo laJesus. — Lukas 10:23, 24.
6, 7. (a) Omatomheno elipi tu na okukala nolupandu shi na sha noshili yopamhepo? (b) Eyooloko lilipi li li pokati kelongelokalunga lashili nomalongelokalunga oipupulu?
6 Kunena, otu na omatomheno mahapu okukala nolupandu shi na sha noshili yopamhepo, molwaashi Jehova okwe tu pa eudeko lomoule li na sha nEendjovo daye okupitila ‘momupiya omudiinini nomunaendunge.’ (Mateus 24:45; Daniel 12:10) Omuprofeti Daniel okwa shanga shi na sha nefimbo lexulilo a ti: “Vahapu tave ke u konakona, neendunge tadi ka hapupala.” (Daniel 12:4) Mbela ito dimine kutya eshiivo lokushiiva Jehova ola “hapupala” kunena nonokutya ovapiya vaye ova paluka nawa pamhepo?
7 Oshiwana shaKalunga osha hepuluka neenghono pamhepo, ofimbo Babilon Shinene shi li mengwangwano lopalongelokalunga. Osho oshe linyengifa ovanhu vahapu ovo va li va pukifwa nova kenyanana komalongelokalunga oipupulu va kale tava mbobolokele kelongelokalunga lashili. Ovanhu va tya ngaho ove na oikala ya fa yeedi noinava hala ‘okukwatafana noulunde waBabilon Shinene nokuhangwa komahepeko asho.’ Jehova nosho yo ovapiya vaye otava shivi ovanhu aveshe ovo ve na oikala ya tya ngaho ve uye kelongelokalunga lashili. — Ehololo 18:2-4; 22:17.
Ovanhu ovo ve na olupandu otava mbobolokele motembeli yaKalunga yopamhepo
8, 9. Eendjovo odo di li muHaggai 2:7 otadi wanifwa ngahelipi kunena?
8 Jehova okwa li a xunganeke shi na sha notembeli yaye yopamhepo a ti: “Ohandi ka kakamifa yo oiwana aishe, opo omamona oiwana aishe tae ke uya ndele Ame ohandi ka yadifa otembeli ei noshinge.” (Haggai 2:7) Exunganeko olo likumwifi ola li la wanifwa pefimbo laHaggai, eshi oshixupe shoshiwana shaKalunga shonale sha li sha alukila koshilongo shambulavo nokutungulula otembeli yomuJerusalem. Ndele eendjovo daHaggai otadi wanifwa yo nokunena shi na sha notembeli inene yaJehova yopamhepo.
9 Fiyo opapa, oku na ovanhu omamiliyona ovo ve uya nale motembeli yaKalunga yopafaneko, omo have mu ilikana “momhepo nomoshili.” Kakele kaasho, omudo keshe ope na natango “omamona oiwana aishe” omayovi omafele oo taa mbobolokele motembeli oyo. (Johannes 4:23, 24) Pashihopaenenwa, olaporta yomounyuni aushe yomudo woilonga 2006 otai ulike kutya momudo oo omwa li mwa ninginifwa ovanhu 248 327. Osho osha hala okutya mefiku keshe omwa li mwa ninginifwa oupokati wovanhu 680. Ohole yavo yokuhola oshili nehalo lavo lokulongela Jehova ve li ovaudifi vOuhamba otai yandje oumbangi kutya okwe va nanena shili kuye. — Johannes 6:44, 65.
10, 11. Hokolola oshimoniwa osho tashi ulike nghee ovanhu hava kulike olupandu lavo okupandula oshili yOmbibeli.
10 Ovanamitimadiwa vahapu ova nanenwa koshili eshi va mona “[etongoko] pokati kovayuki novadinikalunga, pokati kaau ha longele Kalunga naau ihe mu longele.” (Malakia 3:18) Diladila koshimoniwa shaWayne naVirginia, ovalihomboli ovo va li oilyo yongeleka yOvaprotestante. Ovalihomboli ovo ova li ve na omalipulo mahapu, ndele kava li va mona omanyamukulo komapulo avo. Ova li ve tonde oita nova li va lyalyakana nova nyemata eshi va li va mona ovafita tava nangeke noupuna ovakwaita nosho yo oilwifo yavo. Eshi ovalihomboli ovo va ninga ovanamido, ova li ve udite vehe niwe ko nasha navo koilyo yongeleka yavo, nonande Virginia okwa kala omido dihapu ha longo ofikola yOsoondaxa. Ova hokolola tava ti: “Kapa li pe na nande oumwe oo a li e na ko nasha nonghalonawa yetu yopamhepo. Ongeleka ohai kala ashike tai tu pula oimaliwa. Otwa li tu udite lela tu li mekano.” Ovalihomboli ovo ova li nokuli va ngwangwana neenghono eshi ongeleka yavo ya li ya tambula ko oushenge.
11 Lwopokati opo, okatekulu kavo oka li ka ninga Ondombwedi yaJehova, opo nee omona wavo naye okwa ka ninga Ondombwedi. Nonande Wayne naVirginia ova li ve shi handuka potete, lwanima ova ka lundulula oikala yavo ndele tava tambula ko ekonakonombibeli. Wayne okwa hokolola a ti: “Moule ashike weemwedi nhatu, otwa li twe lihonga shihapu kombinga yOmbibeli shi dulife pwaasho twe lihonga omido 70 nasha da pita. Katwa li tu shii nande onale kutya edina laKalunga oJehova, nokatwa li tu shii sha shi na sha nOuhamba nEduparadisa.” Konima yefimbo lixupi, ovalihomboli ovo ovanamitimadiwa ova li va hovela okukala hava kala pokwoongala kwopaKriste nokukufa ombinga moukalele. Virginia okwa ti: “Otwa li twa hala okulombwela keshe umwe oshili.” Ovalihomboli ovo ve na omido 80 nasha ova ninginifwa mo 2005. Ova ti: “Otu udite ouumbo eshi tu li oshitukulwa shoulikumwe wOvakriste vashili.”
Natu panduleni eshi hatu kwafelwa tu kale twa ‘wana okulonga oshilonga keshe shiwa’
12. Ekwafo lilipi Jehova ha yandje kovapiya vaye, notu na okuninga shike opo tu mone ouwa mekwafo olo?
12 Jehova oha kwafele alushe ovapiya vaye opo va dule okulonga ehalo laye. Pashihopaenenwa, okwa li a pa Noa omalombwelo okondadalunde nokwa yela e na sha nanghee a li e na okutunga ongulu yomomeva. Oilonga oyo yokutunga oya li i na okupwa pefimbo, nosho sha ningwa. Oshike sha li sha kwafela Noa a mane oilonga oyo pefimbo? Okwa li ‘a ninga naanaa ngaashi Kalunga a tonga.’ (Genesis 6:14-22) Nokunena Jehova oha kwafele ovapiya vaye va kale va wana filufilu okulonga ehalo laye. Oilonga yetu ya fimanenena oyo okuudifa onghundana iwa yOuhamba waKalunga wa dikwa po nosho yo okukwafela ovanamitimadiwa va ninge ovahongwa vaJesus Kristus. Ndelenee opo tu pondole moilonga oyo, otu na okudulika, ngaashi ashike Noa naye a li a pondola omolweduliko. Otu na okudulika kewiliko laJehova olo ta yandje okupitila mEendjovo daye nomehangano laye. — Mateus 24:14; 28:19, 20.
13. Jehova ohe tu deula okupitila mushike?
13 Opo tu pondole moilonga oyo yokuudifa nokuninga ovanhu ovahongwa, otu na okulihonga “okulongifa nawa” oshilongifo shetu sha fimanenena, Eendjovo daKalunga, odo di “shii kulonga nokukumaida nokupukulula nokutekula mouyuki, omunhu womuKalunga opo a kale a wana nokwa wanenena oshilonga keshe shiwa.” (2 Timoteus 2:15; 3:16, 17, yelekanifa NW.) Ngaashi sha li mefelemudo lotete, nokunena Jehova ohe tu pe edeulo tali ti sha okupitila meongalo lopaKriste. Kunena, ohatu ongala momaongalo 99 770 mounyuni aushe, omo hatu kala tu na okwoongala kwOfikola yOukalele woPauteokratika nosho yo Okwoongala kwoPailonga oshivike keshe, oko kwa nuninwa oku tu kwafela shi na sha noukalele. Mbela oho ulike ngoo olupandu loye shi na sha nokwoongala oko kwa fimana mokukala puko nopehe na okufaula nokutula moilonga osho ho lihongo puko? — Ovaheberi 10:24, 25, OB-1986.
14. Ovapiya vaJehova ohava ulike ngahelipi kutya ove na olupandu omolwoufembanghenda woku mu longela? (Kwatela mo omatyekosha e na sha nomusholondodo oo u li pepandja 27-30.)
14 Ovapiya vaKalunga omamiliyona mounyuni aushe ohava pandula edeulo olo va mona nohave shi ulike mokulonga noudiinini moukalele. Pashihopaenenwa, momudo woilonga 2006, ovaudifi vOuhamba 6 741 444 ova longa eevili 1 333 966-199 meembinga adishe doukalele, mwa kwatelwa okuninga omakonakonombibeli opeumbo 6 286-618. Omivalu odo odi li ashike dimwe domomivalu odo di li molaporta yoilonga yomounyuni aushe odo tadi tu omukumo. Ohatu ku ladipike u konakone nawa olaporta oyo opo i ku twe omukumo, ngaashi ashike ovamwatate vomefelemudo lotete va li va tuwa omukumo eshi va li va uda kombinga yokutamunuka mo kwoilonga yokuudifa pefimbo lavo. — Oilonga 1:15; 2:5-11, 41, 47; 4:4; 6:7.
15. Omolwashike tuhe na okuteka omukumo shi na sha noilonga oyo hatu longele Jehova nomutima aushe?
15 Oilonga yokuudifa oyo tai fimanekifa Kalunga omudo keshe otai ulike kutya ovapiya vaye ove na olupandu linene omolwoufembanghenda wokukala ve mu shii nowokuyandja oundombwedi u na sha nedina laye. (Jesaja 43:10) Omahambeleloyambo ovamwatate novamwameme ovanamido ile aavo tava ehama otaa faafanifwa nouhaulapa vomufiyekadi oo a li a pandulwa kuJesus. Ndele inatu dimbwa nande kutya Jehova oha pandula neenghono adishe aveshe ovo tave mu longele nomutima aushe, kashi na nee mbudi kutya otava longo shi fike peni. Omona waye naye ohe shi pandula neenghono. — Lukas 21:1-4; Ovagalati 6:4.
16. Kalunga okwe tu pa oikwafifo yokuhonga ilipi momido opo da di ko?
16 Kakele kokudeulilwa oukalele, Jehova ohe tu pe oikwafifo yokuhonga ya denga mbada okupitila mehangano laye. Momido omilongo opo da di ko, otwa pewa omambo ngaashi: Oshili oyo tai twala komwenyo waalushe, Ove oto dulu okukala nomwenyo fiyo alushe mOparadisa kombada yedu, Eshiivo olo tali twala komwenyo waalushe nosho yo embo lipe Ombibeli otai hongo lela shike? Ovo ve na shili olupandu shi na sha noilongifo oyo ohave i longifa nawa moukalele.
Longifa nawa embo Ombibeli otai hongo
17, 18. (a) Oshike u hole okudivilika moukalele ngeenge to longifa embo Ombibeli otai hongo? (b) Omupashukilishikandjo umwe okwa ti shike kombinga yembo Ombibeli otai hongo?
17 Embo olo Ombibeli otai hongo lela shike? oli na omatukulwa 19 nosho yo oiwedelwako oyo tai yelifa nawa oikundafanwa yonhumba. Ola shangwa monghedi ipu nokuudiwa ko, nomolwaasho oli li ekwafo linene moukalele. Pashihopaenenwa, etukulwa 12 oli na oshipalanyole tashi ti, “Onghedi yokukalamwenyo oyo tai hafifa Kalunga.” Etukulwa olo otali yelifa nghee omukonakonimbibeli ta dulu okupanga oukaume naKalunga, oshinima osho ovanhu vahapu ihava diladila kusho ile ve wete itashi shiiva. (Jakob 2:23) Ovanhu ohave linyenge ngahelipi kembo olo?
18 Omupashukilishikandjo umwe muAustralia okwa popya kombinga yembo olo, Ombibeli otai hongo, a ti kutya “ohali hokwifa neenghono ovaneumbo va kale va hala eenghundafana.” Okwa weda ko a ti kutya embo olo olipu nokulongifa, nomolwaasho ola “kwafela ovaudifi vahapu vOuhamba va kale ve na omukumo nehafo moukalele. Onghee hano, vamwe ohave li ifana Oshingoli.”
19-21. Hokolola oimoniwa yonhumba oyo tai ulike kutya embo Ombibeli otai hongo otali tu kwafele shili tu pondole moukalele.
19 Omukainhu umwe muGuyana okwa li a lombwela omukokolindjila oo a li e uya peumbo lavo, a ti: “Owa tumwa lela kuKalunga.” Omukainhu oo okwa li opo ashike a fiwa po kohonda yaye, ndele ta fyaala po nounona vavo vavali vanini. Omukokolindjila oo okwa li a pandja petukulwa lo-1 lembo Ombibeli otai hongo nokulesha mokule okatendo 11, oko ke li koshi yokapalanyole “Kalunga oku udite ngahelipi shi na sha nokuhenouyuki oko hatu ningilwa?” Omukokolindjila okwa ti: “Oitwa oyo i li mokatendo oko oya li ya kuma omukainhu oo neenghono. Ohaluka, omukainhu oo okwa fikama ndele ta i konima yofitola yaye ndele ta lili neenghono.” Omukainhu oo okwa tambula ko ekonakonombibeli, a kale ta konakona nomumwameme oo e li moshitukulwa shavo, nota twikile okuninga exumokomesho.
20 José wokuSpania okwa li a filwa omukainhu waye moshiponga shohauto. Okwa li a hovela okulongifa oingangamwifi opo ngeno a hekeleke omwenyo waye nokwa li yo a konga ekwafo kovaxungimwenyo. Ndele ovaxungimwenyo va tya ngaho kava li va dula okunyamukula epulo olo José a kala te lipula nalo unene; epulo olo kutya: “Omolwashike Kalunga a efa omukainhu wange a fye?” Efiku limwe, José okwa li a shakena naFrancesc oo a li hava longo naye mofeema imwe. Francesc okwa li e mu pula va kundafane etukulwa 11 lembo Ombibeli otai hongo, olo li na oshipalanyole tashi ti: “Omolwashike Kalunga a efa okumona oixuna ku kale po?” José okwa li a kumwa neenghono komayelifilo opamishangwa oo e li metukulwa olo nosho yo kefaneko olo li na sha nomhata pokati komuhongifikola nomunafikola. José okwa ka hovela okukala ha konakona Ombibeli a mana mo, okwa ile koshoongalele shopashikandjo, nopaife oha i kokwoongala kOlupale lOuhamba olo li li moshitukulwa shavo.
21 Omunangeshefa wokuPoland womido 40, wedina Roman, okwa kala alushe a fimaneka Eendjovo daKalunga. Ndele molwaashi okwa kala e lipyakidila neenghono noilonga yaye, ka li a ninga exumokomesho lididilikwedi eshi a kala ta konakona Ombibeli. Ndele nande ongaho, okwa li a ya koshoongalele shoshitukulwa oko embo Ombibeli otai hongo la li la yandjwa. Embo olo ola li le mu kwafela a ninge exumokomesho lididilikwedi. Okwa hokolola a ti: “Embo eli ola kwatakanifa nawa omahovelohongo aeshe Ombibeli.” Paife Roman oha konakona Ombibeli pandjikilile nota xumu nawa komesho.
Twikila okukulika olupandu loye
22, 23. Ongahelipi hatu dulu okuulika kutya otu na olupandu shi na sha neteelelo letu?
22 Ngaashi sha li sha yelifwa poshoongalele shoshitukulwa “Exupifo oli li popepi!” Ovakriste ova teelela nondjuulufi “exupifo laalushe” olo la udanekwa kuKalunga nola shilipalekwa omolwohonde yaJesus Kristus ya tika. Onghedi ya denga mbada omo hatu dulu okuulika olupandu letu linene omolweteelelo olo li na ondilo oyo okweefa po ‘oilonga ya fya nokulongela Kalunga omunamwenyo.’ — Ovaheberi 9:12, 14.
23 Oshinima shikumwifi neenghono eshi ovaudifi vOuhamba ve dule pomamiliyona ahamano tava twikile noudiinini okulongela Kalunga mounyuni ou tau xwaxwameke oikala yokulihola mwene. Osho otashi ulike kutya ovapiya vaJehova ova lenga neenghono oufembanghenda wavo woku mu longela, nove shii kutya ‘oshilonga shavo kashi fi shoshimha.’ Onghee hano, natu kulikeni alushe olupandu letu okupandula Jehova! — 1 Ovakorinto 15:58; Epsalme 110:3.
Oto nyamukula ngahelipi?
• Oshike hatu lihongo komupsalme ngeenge tashi uya pokukala nolupandu lokupandula Kalunga nosho yo omafiloshisho aYe opamhepo?
• Eendjovo odo di li muHaggai 2:7 otadi wanifwa ngahelipi kunena?
• Jehova ohe tu kwafele ngahelipi tu kale twa wana filufilu oku mu longela?
• Ongahelipi to dulu okuulika olupandu loye okupandula Jehova omolwouwa waye?
[Omafano pepandja 31]
Jehova ohe tu deula tu kale twa wana filufilu okulonga ehalo laye nohe tu pe oikwafifo yokuhonga ya denga mbada