Oohapu dhaJehova odhi na omwenyo
Omanenedhiladhilo okuza membo lyOontakumandjimbo dhaJeremia
OMUPOLOFETI Jeremia okwa li a mono nkene etumwalaka li na ko nasha nokupangula ndyoka a li a popi uule woomvula 40 dha piti tali gwanithwa. Mbela omupolofeti okwa li u uvite ngiini sho a li a mono kuye mwene ehanagulopo lyoshilando she shoka a li e hole? O-Septuagint yOshigreka mefalomo lyayo kombinga yembo lyOontakumandjimbo otayi ti: “Jeremia okwa li a kuutumba ta lili nokwa nika oluhodhi ti imbi oontakumandjimbo kombinga yaJerusalem.” Embo lyOontakumandjimbo ndyoka lya nyolwa mo 607 K.E.N. omanga omupolofeti Jeremia a li natango ta vulu okudhimbulukwa nawa ekondeka lyaJerusalem lyoomwedhi 18 ndyoka lya li lya landulwa kokufikwa po kwasho, otali popi sha yela kombinga yoluhodhi lwaJeremia. (Jeremia 52:3-5, 12-14) Kapu na oshilando shilwe mondjokonona sha li sha lilwa momukalo tagu etitha ohenda nogu nikitha oluhodhi unene ngaashi Jerusalem.
Embo lyOontakumandjimbo olya thikama po muutewo utano mboka wi imbwa molupe lwomaimbilo. Uutewo wotango une owo omalilo nenge omaimbilo goluhodhi nokatitano oko eindilo nenge egalikano.
“OMEHO GANDJE OGA DHIMEYA KOKULILA”
(Oontakumandjimbo 1:1–2:22)
“Oshilando shoka sha li shu udha aantu, osha si uuwike ngiini! Shoka sha li oshinankondo mokati kiigwana, osha ningi sha fa omuselekadhi. Shoka sha li omunyekadhi mokati kiilongo, osha ningi omudhike gwowala.” Ano Oontakumandjimbo dhomupolofeti Jeremia kombinga yaJerusalem osho dha li dha tameke ngaaka. Omupolofeti okwa li a gandja etompelo kutya omolwashike sha adhika koshiponga shika sho a ti: “OMUWA mwene okwe mu sitha oluhodhi omolwomayono ge ogendjigendji.”—Oontakumandjimbo 1:1, 5.
Jerusalem shoka tashi yelekanithwa nomuselekadhi a silwa omusamane gwe naanona ye, osha li sha pula tashi ti: “Oku na tuu uuwehame u thike puuwehame wandje?” Osha li sha galikana Kalunga kombinga yaatondi yasho tashi ti: “Ya pangulila uukolokoshi wawo; ya ninga ngaashi wa ningile ndje molwoondjo dhandje. Omakemo gandje ogendji, nomutima gwandje otagu alukwa.”—Oontakumandjimbo 1:12, 22.
Jeremia ngoka a li a yemata noonkondo okwa ti: “Omuupyundjahi we [Jehova] a teyagula oonkondo dhaIsraeli. Okwa tindi okukwatha pokuhomona kwomutondi nokwa hwameke muJakob omulilo gwa lilima tagu lungunike ayihe yopopepi.” Omupolofeti okwa li u ulike oluhodhi lwe olunene sho a lili a ti: “Omeho gandje oga dhimeya kokulila, omandjandja gandje otaga nyulukuta, ehuli lyandje olya hililwa pevi.” Nokuli naamboka ya li ya piti po oya li ya kumwa noya pula taya ti: “Oshilando osho tuu shoka kwa tiwa osheopala lyo lyene nenyanyu lyuuyuni auhe?”—Oontakumandjimbo 2:3, 11, 15.
Omapulo gopamanyolo taga yamukulwa:
1:15 (OB-1954)—Ongiini Jehova a li a ‘kolo olupale lwoomviinu lwomuna omukadhona [gwaJuda, NW]’? Mokuhanagula po oshilando shoka shi li ongomukadhona, Aababilonia oya li ya tilehi ombinzi oyindji noonkondo ndjoka ya li ya yelekanithwa nokukolela omandjembele molupale lwoomviinu. Jehova shika okwa kala e shi hunganeka nale nokwe etha shi ningwe, onkee ano otaku vulu okutiwa kutya okwa li e shi ‘kolele molupale lwoomviinu.’
2:1—Ongiini ‘esimano lyaIsraeli lyomegulu lya li lyu umbilwa pevi’? Molwaashoka ‘egulu oli li pombanda puule li vule evi,’ iinima mbyoka yopombanda inaayi simana, ethimbo limwe ohayi thanekwa ‘nokuumbilwa pevi.’ “Esimano lyaIsraeli,” sha hala okutya, eadhimo noonkondo ndhoka sha li shi na omanga Jehova a li e shi hokwa, olya li lyu umbilwa pevi sho Jerusalem sha li sha hanagulwa po nosho wo sho Juda sha li sha mbugalekwa.—Jesaja 55:9.
2:1, 6 (Yelekanitha OB-1954.)—Mbela “oshilyatelo shokoompadhi” dhaJehova nosho wo “etsali” lye oshike? Omupisalomi gumwe okwi imbi a ti: “Ileni, tu yeni kongulu yOMUWA; ileni, tu tseni oongolo poompadhi dhe.” (Episalomi 132:7) Onkee ano “oshilyatelo shokoompadhi” shoka tashi popiwa mOontakumandjimbo 2:1 otashi ulike kehala lyaJehova lyokugalikanena nenge otempeli ye. Aababilonia oya li ya “fike po otempeli” yaJehova ya fa taya fike etsali lyowala nenge ondunda yowala ndjoka yi li moshikunino.—Jeremia 52:12, 13.
2:17—“Oohapu” dhini Jehova a li a gwanitha kombinga yaJerusalem? Osha yela kutya oohapu ndhika oondhoka dhomuLevitikus 26:17 ndhoka tadhi ti: “Otandi mú pilukile e tamu ka sindika, naamboka ye mú tonde, otaye ke mú pangela. Otamu ka haluka tamu pwapwauka ko kwaa na ngo te mú tidha.”
Iiyilongomwa kutse:
1:1-9. Jerusalem okwa li a lili omahodhi omapyu uusiku auhe, nomahodhi ge oga li taga pononoka koompanda dhe. Omiyelo dhasho odha li dha tewa po naayambi yasho otaa tsu omazima. Oyana aakadhona oya li ya yemata naye mwene okwa li a lulilwa. Omolwashike? Omolwaashoka Jerusalem osha li sha yono nokuyonenena. Onyata yasho oya kakatela koohulukweya dhasho. Iilanduliko yokuyona ihayi eta enyanyu, ihe okulila, okutsa omazima, eyeme nokululilwa.
1:18 (OB-1954). Mokugeyela aayoni, Jehova oha ningi aluhe shoka shu uka noshi li mondjila.
2:20. Aaisraeli oya li ya londodhwa kutya ngele itaya pulakene ewi lyaJehova, otaya ka tulwa omutima, shoka sha li sha kwatela mo okulya ‘onyama yoyana aamati naakadhona.’ (Deuteronomium 28:15, 45, 53) Inashi nika tuu uusama okuhogolola okwaavulika kuKalunga!
“INO THITIKA OKUTSI KWOYE, KWAA UVE OMAGALIKANO GANDJE”
(Oontakumandjimbo 3:1–5:22)
Ontopolwa onti-3 yOontakumandjimbo otayi popi oshigwana shaIsraeli sha fa shi li “omuntu.” Nonando omuntu ngoka okwa li a mono omaupyakadhi, okwa li i imbi a ti: “OMUWA oye omwaanawa kwaamboka ye mu inekela, komwenyo ngoka tagu mu kongo.” Mokugalikana Kalunga kashili, okwi indile a ti: “Ou uvite onkugo yandje tayi ti: ‘Ino thitika okutsi kwoye, kwaa uve omagalikano gandje.’” Mokupula Jehova opo a tale omasheko okuza kaatondi ye, okwa ti: “OMUWA, shi ya futila, ngaashi ye shi ilongele.”—Oontakumandjimbo 3:1, 25, 56, 64.
Jeremia okwa li a popi omaiyuvo ge agehe ge na ko nasha niizemo iiwinayi yekondeka lyaJerusalem uule woomwedhi 18 e ta lili ta ti: “Omayonagulo gomuna omukadhona, oshigwana shandje, ge vule ngeyaka gaSodom. Sodom sha hanagulwa po ombadhilila, inaashi gumwa nando koshikaha shomuntu.” (OB-1954) Okwa li a tsikile ko a ti: “Aanelago oyo mboka ya si kegongamwele, oyo aahwepo ye vule mboka ya si kondjala, oomboka ya gunda taa thinonoka kompumbwe yiilya yomomapya.”—Oontakumandjimbo 4:6, 9.
Mokatewo okati-5 aakalimo yomuJerusalem otaya popiwa ya fa taya popi. Otaya ti: “OMUWA, dhimbulukwa shoka twa ningilwa; tu tala u mone ehutuko lyetu.” Sho ya li taya hokolola oluhodhi lwawo, oya li yi indile ya ti: “OMUWA, ongoye to kala po sigo aluhe, oshipangelapundi shoye otashi kala okuza omapipi nomapipi. Tu galulila kungoye, OMUWA, notatu galukile ko. Pepaleka omasiku getu ngaashika muushitonale.”—Oontakumandjimbo 5:1, 19, 21.
Omapulo gopamanyolo taga yamukulwa:
3:16—Uutumbulilo “omayego gandje okwe ga teyagulitha omawe” owa hala okutya ngiini? Embo limwe otali ti: “Sho Aajuda ya li mondjila taya falwa muupongekwa, oya li ya thiminikwa opo ya telekele iikwiila yawo moshilambo sha fulwa mevi, shoka sha li sha ningitha opo iikwiila yawo yi kale yi na omawe.” Okulya iikwiila ya tya ngaaka osha li tashi vulu okuteya mo omayego gomuntu mokana.
4:3, 10—Omolwashike Jeremia a li a yelekanitha “aakiintu yoshigwana” she ‘noompo dhomombuga’? Job 39:16 ota ti kutya ompo ohayi “ningile uumpogona wayo onyanya, wa fa waa shi wayo.” Pashiholelwa, konima ngele omayi ga tendulwa, ompo onkiintu ohayi thigi po uumpogona wayo e tayi yi noompo dhilwe oonkiintu, omanga ndjoka ondumentu oyo tayi u sile oshimpwiyu. Oshike hashi ningwa po ngele dha adhika koshiponga? Ompo onkiintu nondumentu ohadhi fadhuka po e tadhi thigi po uumpogona wadho. Pethimbo lyekondeka lyaBabilonia, ondjala muJerusalem oya li ya geya noonkondo shoka sha li sha ningitha aakiintu mboka shito oyo ye na ohenda ya ninge omaluvalo gawo onyanya, ngaashi oompo dhomombuga. Shika osha li sha yooloka ko thiluthilu kesiloshimpwiyu ndyoka ookaandje haa sile nalyo oyana oshimpwiyu.
5:7—Mbela Jehova oha geyele aanona omolwoondjo dhoohe? Aawe, Jehova iha geyele aantu shu ukilila omolwoondjo dhoohekulululwa. Ombiimbeli otayi ti: “Kehe gumwe gwomutse ote ki ihokolola koshipala shaKalunga polwe mwene.” (Aaroma 14:12) Ihe iilanduliko yomayono otayi vulu okukala po nomaluvalo ngoka taga landula ko otaga vulu okumona iihuna omolwayo. Pashiholelwa, sho Aaisraeli yonale ya li ya longele iimenka, osha li she shi ningi oshidhigu nokuli kAaisraeli aadhiginini mboka ya li ya landula ko opo ya dhiginine ondjila yuuyuuki.—Eksodus 20:5.
Iiyilongomwa kutse:
3:8, 43, 44. Pethimbo lyuudhigu mboka wa li wa adha Jerusalem, Jehova okwa li a tindi okupulakena kokukugagana kwaakalimo yasho mboka ya li ya pumbwa ekwatho. Omolwashike? Omolwaashoka aantu oya li inaaya hala okuvulika noya li inaayi iyela ombedhi. Ngele otwa hala Jehova a yamukule omagalikano getu, otu na okuvulika kuye.—Omayeletumbulo 28:9.
3:20. Jehova “Omupangeliawike kombanda yevi alihe” okwa simanenena, ihe oha nyongama “a tale egulu nokombanda yevi.” (Episalomi 83:18; 113:6) Jeremia okwa li e shi shi nawa kutya Omunankondoadhihe oku na ehalo opo i ifupipike omolwaantu, shoka tashi ti kutya okuthika pondondo yawo opo e ya ladhipike. Inatu pandula tuu sho Kalunga kashili kee shi owala Omunankondoadhihe nomunandunge a shiga ko, ihe oku li wo omwiifupipiki!
3:21-26, 28-33. Ongiini tatu vulu okwiidhidhimika nonando tatu mono iihuna yamemememe? Jeremia ote tu lombwele ta ti kutya katu na okudhimbwa kutya Jehova omunahole noku li wo omunahenda a shiga ko. Otu na wo okudhimbulukwa kutya okukala kwetu tu na omwenyo oshi li etompelo lya gwana lyokukala inaatu teka omukumo nonokutya otwa pumbwa okukala tu na eidhidhimiko notwa tegelela twa mwena itaatu nyenyeta ehupitho ndyoka tali zi kuJehova. Ihe nando ongaaka natu “mbwike okana [ketu] montsi,” sha hala okutya, natu taambe ko omaupyakadhi neifupipiko nokuzimina kutya shoka Kalunga e etha shi ningwe okwe shi pitika netompelo ewanawa.
3:27. Omamakelo ngoka tage tu adha muugundjuka wetu ge na ko nasha neitaalo lyetu otashi vulika taga ka kwatela mo uudhigu nokushekwa. Oshi li sho “opala omulumentu a humbate ondjoko okuza kuugundjuka we.” Omolwashike? Omolwaashoka okwiilonga okuhumbata ondjoko yokumona iihuna omanga u li omugundjuka ohashi ningi omuntu a kale i ilongekidha okuungaunga nomaupyakadhi ngele a koko.
3:39-42. Okukala tatu “keme” uuna tatu mono iihuna omolwuulunde wetu kashi li pandunge. Pehala lyokukala tatu keme molwaashoka tatu teya iilanduliko yomapuko getu, ‘natu konakoneni oondjila dhetu, tu dhi simonone, tu galukile kOMUWA.’ Oshi li pandunge ngele tatu iyele ombedhi nokwoopaleka oondjila dhetu.
Kala wi inekela muJehova
Embo lyOmbiimbeli lyOontakumandjimbo otali holola nkene Jehova a li a tala ko Jerusalem noshilongo shaJuda konima sho Aababilonia ya li ya fike po oshilando noku shi thiga kaashi na aantu. Omapopyo ngoka taga zimine oondjo dhaantu ga nyolwa membo ndyoka otage shi ulike sha yela kutya pataloko lyaJehova, oshigwana osha li sha adhika koshiponga molwaashoka sha yono. Omaimbilo gomembo ndika lya nwethwa mo oge na wo oohapu ndhoka tadhi popi einekelo muJehova nosho wo ehalo okugalukila mondjila yu uka. Nonando ngaka hago ga li omadhiladhilo gaantu oyendji yopethimbo lyaJeremia, oohapu ndhika odhi lile po aantu yopethimbo lye nosho wo oshihupe shaamboka ya li yi iyele ombedhi.
Etaloko lyaJehova li na ko nasha nonkalo yaJerusalem ngaashi lya popiwa membo lyOontakumandjimbo otali tu longo iiyilongomwa iyali ya simanenena. Shotango osho kutya ehanagulo lyaJerusalem nosho wo embugaleko lyaJuda oshi li eladhipiko kutse tu kale hatu vulika kuJehova noshi li wo elondodho opo kaatu ipwililike ehalo lyaKalunga. (1 Aakorinto 10:11) Oshiilongomwa oshitiyali otatu shi ilongo moshiholelwa shaJeremia. (Aaroma 15:4) Nonando omupolofeti ngoka okwa li a nika oluhodhi noonkondo nokwa li e li monkalo ndjoka tayi monika ya fa kaayi na etegameno lyasha, okwa li a kongo ehupitho kuJehova. Inashi simanenena tuu tu tule einekelo lyetu alihe muJehova nomOohapu dhe noku mu ninga einekelo lyetu!—Aahebeli 4:12.
[Ethano pepandja 9]
Omupolofeti Jeremia okwa li a mono nkene etumwalaka lye li na ko nasha nepangulo tali gwanithwa
[Ethano pepandja 10]
Eitaalo lyOonzapo ndhika dhokuKorea olya li lya makelwa shi na ko nasha nokwaahenombinga kwadho miinima yopapolotika