Jehova oha kala a hafa ngeenge to dulika kuye

‘Kala u neendunge, omumwange, hafifa omutima wange.’ — OMAYELETUMBULO 27:11.

1. Omhepo noikala ilipi i li apeshe mounyuni kunena?

OMHEPO yemanguluko nosho yo oikala yokuhadulika oi li apeshe mounyuni kunena. Omuyapostoli Paulus okwa yelifa kutya omolwashike onghalo i li ngaho monhumwafo yaye oyo kwa li a shangela Ovakriste vokuEfeso a ti: “Mwa endaaenda nale panghedi yefimbo lounyuni eli noyomupangeli weenghonopangelo domomhepo nokutya, pamhepo yomupangeli ou ta longo paife movana vokuhadulika.” (Ovaefeso 2:1, 2) Heeno, Satana Ondiaboli, oo e li ‘omupangeli weenghonopangelo domomhepo’ okwa nwefa mo ounyuni aushe nomhepo yokuhadulika. Okwa li ta nwefa mo ovanhu mefelemido lotete nokwa twikila okunwefa mo ovanhu neenghono unene tuu eshi a umbwa mo meulu pefimbo lOita yotete yOunyuni lwaapo. — Ehololo 12:9.

2, 3. Omolwashike tu na okudulika kuJehova?

² Tu li Ovakriste, otu shii kutya otu na okudulika kuJehova Kalunga nehalo liwa molwaashi oye Omushiti wetu, Omufilishisho weemwenyo detu, Omupangeli wetu omunahole nOmuxupifi wetu. (Epsalme 148:5, 6; Oilonga 4:24; Ovakolossi 1:13; Ehololo 4:11) Ovaisrael vopefimbo laMoses ova li ve shii kutya Jehova oku li Omuyandjimwenyo nOmuxupifi wavo. Nomolwaasho Moses a li e va lombwela a ti: ‘Kaleni hano mu noshisho nye mu ninge Omwene Kalunga keni ngaashi e mu lombwela.’ (Deuteronomion 5:32) Osha yela kutya Ovaisrael ova li ve na okudulika kuJehova. Ndele nande ongaho, konima yefimbo lixupi Ovaisrael ova li va nyona kuKalunga kavo oo va li ve na okudulika kuye.

³ Okudulika kwetu kOmushiti weshito alishe okwa fimana shi fike peni? Kalunga okwa li a lombwela omuprofeti Samuel a lombwele ohamba Saul kutya: ‘Okudulika oku dule etomenoyambo.’ (1 Samuel 15:22, 23) Omolwashike mbela okudulika ku dule etomenoyambo?

Omeityo lilipi ‘okudulika ku dule etomenoyambo’?

4. Omeityo lilipi hatu dulu okupa sha Jehova?

⁴ Molwaashi Jehova oye e tu shita, keshe eshi tu na oshaye. Ngeenge osho ngaho, mbela otu na ngoo osho hatu dulu oku mu pa? Heeno, ohatu dulu oku mu pa oshinima shi na ondilo inene. Oshinima osho oshike mbela? Enyamukulo ohatu li hange mekumaido lOmbibeli olo tali ti: “[Kala] u neendunge, omumwange, hafifa omutima wange, opo nee handi dulu okunyamukula [ou ta lundile nge, NW].” (Omayeletumbulo 27:11) Heeno ohatu yandje sha kuKalunga, mokukala hatu dulika kuye. Nonande otu li meenghalo da yoolokafana, mokukala hatu dulika kuKalunga ohatu ka ulika kutya Satana Ondiaboli okwa popya oipupulu inyanyalifi eshi a ti kutya ovanhu itava ka kala ovadiinini kuKalunga ngeenge ve li momayeleko. Kau fi tuu oufembanghenda mukumwifi okunyaneka pomutenya oipupulu yaSatana!

5. Okuhadulika kwetu ohaku kumu ngahelipi Omushiti? Shi yelifa.

⁵ Kalunga oha kumwa komatokolo oo hatu ningi. Ohashi mu kumu ngahelipi? Oha kala a nyemata ngeenge itatu dulika kuye. (Epsalme 78:40, 41) Natu tye nee ngeno omunaudu woshuuka okwa efa po okukala ha li oikulya i na oukolele oyo a li a ufilwa kundokotola ndele ta kala ta li oikulya oyo inai mu wapalela. Mbela ndokotola waye omunahole ota ka kala e udite ngahelipi? Ohatu dulu okukala noushili kutya Jehova oha kala a nyemata ngeenge ovanhu itava dulika kuye, molwaashi oku shii kutya ohatu ka mona oilanduliko ii ngeenge otwa kala itatu dulika komalombwelo aye oo a nuninwa oku tu etela ouwa monghalamwenyo.

6. Oshike tashi ke tu kwafela tu kale hatu dulika kuKalunga?

⁶ Oshike tashi ke tu kwafela tu kale hatu dulika pauhandimwe? Osha yuka okwiilikana Kalunga e tu pe “omutima u neduliko” ngaashi ohamba Salomo ya li ya ninga. Salomo okwa li a ilikana a pewe omutima u na eduliko opo a dule ‘okutongola ouwa nowii’ eshi ta pangele Ovaisrael vakwao. (1 Eehamba 3:9) Otwa pumbwa “omutima u neduliko” opo tu dule okutongola pokati kouwa nowii mounyuni omu ovanhu vahapu ihava dulika. Opo tu kulike “omutima u neduliko,” Kalunga okwe tu pa Eendjovo daye, Ombibeli, oikwafifo yokukonakona Ombibeli, okwoongala kwopaKriste nosho yo ovakulunhuongalo ovo tava file oshisho eongalo. Mbela ohatu longifa ngoo nawa omafiloshisho a tya ngaho opahole?

7. Omolwashike okudulika kuJehova kwa fimanenena ku dule omayambo?

⁷ Dimbuluka kutya Jehova okwa li a lombwela oshiwana shaye shonale shaIsrael kutya okudulika okwa fimanenena ku dule omayambo oinamwenyo. (Omayeletumbulo 21:3, 27; Hosea 6:6; Mateus 12:7) Ndele mbela omolwashike omayambo a li inaa fimanenena ngeenge Jehova oye kwa li a lombwela oshiwana shaye shi yambe omayambo a tya ngaho? Mbela oshike tashi linyengifa omunhu oo ta yambe eyambo? Mbela ote shi ningi ngoo nelalakano lokuhafifa Kalunga? Ile ota landula ashike onghedindjikilile yonhumba? Ngeenge omulongelikalunga okwa hala shili okuhafifa Kalunga, ota ka dulika koipango yaye aishe. Kalunga ina pumbwa omayambo oinamwenyo, ndelenee ohatu mu pe sha shi na ondilo eshi hatu dulika kuye.

Oshihopaenenwa osho shi li elondwelo kufye

8. Omolwashike Kalunga a li a ekelashi Saul e li ohamba?

⁸ Ehokololo lOmbibeli li na sha nohamba Saul otali divilike kutya osha fimanenena okudulika. Eshi Saul a hovela okupangela okwa li omulininipiki, ‘nomuxupi momesho aye mwene.’ Ndele nande ongaho, konima yefimbo okwa ka kwatwa kounhwa nokwa li a tomhafana monghedi ya puka. (1 Samuel 10:21, 22; 15:17) Pomhito imwe, Saul okwa li e na oku ka lwifa Ovafilisti, ndele Samuel okwa li e mu lombwela e mu teelele opo e uye a ningile Jehova exwikiloyambo noku mu lombwele osho e na okuninga. Ndelenee Samuel ka li e uya pefimbo olo Saul a li e mu teelela, novanhu ova li tava i onhapo. Eshi Saul a mona ovanhu tava i onhapo, okwa “yamba exwikiloyambo,” naasho osha li sha handukifa Jehova. Eshi Samuel e ke uya kuSaul, Saul okwe lipopila omolwokuhadulika kwaye a ti kutya molwaashi Samuel ine uya pefimbo, okwe “lipameka” ndele ta yambe exwikiloyambo opo ngeno Jehova e mu file onghenda. Ohamba Saul oya li i wete exwikiloyambo la fimanenena li dule okudulika kelombwelo olo a lombwelwa a teelele Samuel e uye a yambe eyambo. Samuel okwa li e mu lombwela a ti: “Wa ninga nai, ino diinina oshipango shOmwene Kalunga koye, osho ye eshi ku lombwela.” Jehova okwa li a ekelashi Saul e li ohamba omolwokuhadulika kwaye. — 1 Samuel 10:8; 13:5-13.

9. Ongahelipi Saul a li a ulika kutya iha dulika kuKalunga?

⁹ Mbela Saul okwa li e lihonga oshilihongomwa moshimoniwa osho? Hasho nandenande! Lwanima, Jehova okwa li a lombwela Saul a ka hanaune po filufilu oshiwana shOvamaalek osho sha ponokelele Israel nopehe na etomheno lasha. Saul kali nokuli e na okuxupifa oinamwenyo. Saul okwa li a dulika kuJehova ‘mokutaataa Ovaamalek okudja kuHavila fiyo okombinga yaSur.’ Eshi Samuel a li a ka shakeneka ohamba Saul, oya li ya hafa omolwefindano, ndele tai ti: “Ove u nangekwe noupuna kOmwene. Ame nda wanifa ondjovo yOmwene.” Ndele, mepingafano nomalombwelo a yela oo va li va pewa, Saul novakwaita vaye ova li va xupifa ohamba Agag “needi diwelela unene neengobe nado diwa kanini noudjona naashishe eshi shiwa.” Saul okwa li e liyukipalifa omolwokuhadulika kwaye a ti: “Ovakwaita ova xupifa eedi neengobe diwelela ve di yambele Omwene Kalunga koye.” — 1 Samuel 15:1-15.

10. Oshilihongomwa shilipi Saul a dopa okulihonga?

¹⁰ Samuel okwa li a lombwela Saul eshi va xupifa oimuna yOvaamalek a ti: “Omwene a hokwa ngeno omaxwikiloyambo nomatomenoyambo ngaashi a hokwa eduliko okudulika kondaka yOmwene? Tala okudulika ku dule [etomenoyambo] nokuuda ku dule omaakadi eedi deenhwedi.” (1 Samuel 15:22) Molwaashi Jehova okwa li a popya kutya oimuna oyo oi na okuhanaunwa po, otashi ulike kutya kali te ke i hokwa ngeenge ya yambwa omayambo.

Dulikeni moinima aishe

11, 12. (a) Jehova oha tale ko ngahelipi eenghendabala odo hatu ningi opo tu mu hafife? (b) Ongahelipi omunhu ta dulu okulifufya kutya ota longo ehalo laKalunga ofimbo ita dulika kuye nandenande?

¹¹ Ihashi hafifa tuu Jehova okumona ovapiya vaye ovadiinini va kanyatela oudiinini nonande ope na omahepeko, tava udifa Ouhamba nonande ovanhu vamwe itava pwilikine nohava kala pokwoongala kwopaKriste nonande ove na oudjuu wopamaxupilo! Okudulika kwetu momalipyakidilo e na sha noinima yopamhepo ya tya ngaho ohaku hafifa omutima waJehova. Jehova okwa lenga oilonga oyo hatu mu longele ngeenge ohatu shi ningi omolwohole yoku mu hola. Ovanhu otashi dulika vaha didilike oilonga yetu youdiinini, ndele Kalunga oha didilike omayambo etu taa di komutima. — Mateus 6:4.

¹² Ndele opo tu hafife Kalunga filufilu, otu na okudulika meembinga adishe dokukalamwenyo kwetu. Inatu diladila nande kutya ohatu dulu okulipwililikila oiteelelwa imwe yaKalunga fye hatu wanifa po ashike imwe. Pashihopaenenwa, omunhu otashi dulika e lifufye kutya ngeenge okwa kala ta wanifa po oiteelelwa imwe yaKalunga nonande itashi di komutima, ita ka handukilwa kuKalunga ngeenge okwa i moluhaelo ile ngeenge a nyono omanyono amwe a kwata moiti. Okudiladila kwa tya ngaho okwa puka. — Ovagalati 6:7, 8.

13. Ongahelipi okudulika kwetu kuKalunga taku dulu okuyelekwa ngeenge tu li ofye atuke?

¹³ Onghee hano, ohatu dulu okulipula pauhandimwe kutya: ‘Mbela ohandi dulika ngoo kuJehova mukeshe osho handi ningi efiku keshe, nokuli nomoinima yopaumwene?’ Jesus okwa ti: “Ou ha kala omudiinini moinini, ye omudiinini nomuei ihapu, ndele ou ke fi omuyuki moinima inini, ye ke fi omuyuki nomuei ihapu yo.” (Lukas 16:10) Mbela ohatu ‘ende ngoo nomitima di na oudiinini,’ nokuli nongeenge tu li ‘momaumbo etu’ omo vamwe vehe tu wete? (Epsalme 101:2, yelekanifa NW.) Doshili, oudiinini wetu otau dulu okuyelekwa ofimbo tu li momaumbo etu. Moilongo ihapu omo eekombiyuta da sha momaumbo, oshipu okutala omafano a nyata. Momido opo da di ko, omunhu kali ta dulu okutala omafano a tya ngaho ngeenge ina ya keenhele oko haku ulikwa omafano oluhaelo. Mbela ohatu ka dulika ngoo keendjovo daJesus odo tadi ti: “Okeshe tuu ou ta tale omukainhu nokahalu, oye okwe mu haela momutima waye”? Mbela ohatu ka henuka filufilu okutala omafano oipala? (Mateus 5:28; Job 31:1, 9, 10; Epsalme 119:37; Omayeletumbulo 6:24, 25; Ovaefeso 5:3-5) Ongahelipi shi na sha nokutala eeprograma doko-TV odo hadi ulike elongifo leenghono? Mbela ohatu hopaenene ngoo Kalunga ketu oo omwenyo waye ‘tau tondo ou e hole owii, [ile tu tye “elongifo leenghono,” NW]’? (Epsalme 11:5) Ongahelipi shi na sha nokulongifa oikolwifa sha pitilila ngeenge omunhu e li oye aeke? Ombibeli oya tokola oukolwe, ndele otai londwele yo Ovakriste vaha kale nondjikilile yokunwa ‘oikunwa ihapu.’ — Titus 2:3; Lukas 21:34, 35; 1 Timoteus 3:3.

14. Omeenghedi dilipi hatu dulu okuulika kutya ohatu dulika kuKalunga ngeenge tashi uya poinima i na sha noimaliwa?

¹⁴ Otwa pumbwa okukala twa lungama ngeenge hatu ungaunga noinima oyo ya kwatela mo oimaliwa. Pashihopaenenwa, mbela ohatu ka kufa ombinga meemhangela dokulimonena oimaliwa mefimbo lixupi odo tashi dulika da kwatela mo enyokomo? Mbela ohatu kala tu na eamo lokukengelela opo tu henuke okufuta oifendela? Ile ponhele yaasho ohatu kendabala noudiinini okudulika koshipango osho tashi ti: “Yandjeni kuaveshe eshi mu nokuyandja: efendelo kuou e nokupewa efendelo”? — Ovaroma 13:7.

Ohatu dulika kuJehova molwaashi otu mu hole

15. Omolwashike hatu dulika koipango yaJehova?

¹⁵ Okudulika keemhango daKalunga ohaku eta omanangeko noupuna. Pashihopaenenwa, ohatu dulu okuhenuka omikifi donhumba mokukala nonghalamwenyo ya koshoka, mokufimaneka ouyapuki wohonde nosho yo okuhenuka okushila omakaya. Kakele kaasho, mokukala metwokumwe noshili yOmbibeli meembinga dikwao donghalamwenyo ohatu ka mona ouwa monghedi yopamaxupilo, yopanghalafano nosho yo monghalamwenyo youkwaneumbo. (Jesaja 48:17) Omauwa aeshe a tya ngaho opalutu ohatu dulu oku a tala ko e li omanangeko noupuna oo a etifwa kokudulika keemhango daKalunga. Ndele etomheno la fimanenena molwaashi hatu dulika kuKalunga ololo kutya otu mu hole. Ihatu mu longele omolwomatomheno okulihola mwene. (Job 1:9-11; 2:4, 5) Kalunga okwe tu shita nemanguluko lokuhoolola oo twa hala okudulika kuye. Otwa hoolola okudulika kuJehova molwaashi otwa hala oku mu hafifa notwa hala okulonga eshi sha yuka. — Ovaroma 6:16, 17; 1 Johannes 5:3.

16, 17. (a) Ongahelipi Jesus a li a ulika kutya oha dulika kuKalunga omolwohole? (b) Ongahelipi hatu dulu okuhopaenena Jesus?

¹⁶ Jesus okwa li ha dulika kuJehova molwaashi okwa li e mu hole tashi di komutima. Nokungaho, okwe tu tulila po oshihopaenenwa sha wanenena shi na sha nokudulika. (Johannes 8:28, 29) Eshi a li kombada yedu, okwa li e “lilonga eduliko okouyahame ou e u humbata.” (Ovaheberi 5:8, 9) Mbela okwe shi ninga ngahelipi? Jesus ‘okwe lininipika Ye mwene a dulika fiyo omefyo, heeno, fiyo mefyo [komuti womahepeko, NW].’ (Ovafilippi 2:7, 8) Nonande Jesus okwa li ha dulika ofimbo a li meulu, okudulika kwaye okwa li kwa yelekwa eshi a li kombada yedu. Ohatu dulu okukala noushili kutya Jesus okwa wana filufilu okukala Omupristeri Omukulunhu wovamwaxe vopamhepo nosho yo waaveshe ovo ve na eitavelo tali longo muye. — Ovaheberi 4:15; 1 Johannes 2:1, 2.

¹⁷ Ongahelipi shi na sha nafye? Ohatu dulu okuhopaenena Jesus mokukala twa pitifa komesho okudulika kuKalunga. (1 Petrus 2:21) Ohatu dulu okukala twa hafa eshi ohole yetu yokuhola Kalunga tai tu linyengifa tu longe osho Jehova e tu lombwela, nokuli nopomafimbo opo hatu yelekwa tu nyone. (Ovaroma 7:18-20) Okudulika kuKalunga okwa kwatela mo okudulika nehalo liwa kewiliko laavo tava kwatele komesho melongelokalunga lashili, nonande inava wanenena. (Ovaheberi 13:17) Okudulika koipango yaKalunga ngeenge tu li ofye atuke oku na ondilo momesho aye.

18, 19. Okudulika kwetu kuKalunga nomutima aushe ohaku eta oidjemo ilipi?

¹⁸ Kunena, okudulika kwetu kuJehova otashi dulika taku tu pula tu lididimikile omahepeko opo tu kanyatele oudiinini. (Oilonga 5:29) Okudulika koshipango shaJehova shokuudifila ovanhu noku va honga otashi tu pula yo tu lididimike fiyo okexulilo longhalelo ei yoinima. (Mateus 24:13, 14; 28:19, 20) Otwa pumbwa elididimiko opo tu twikile okukala hatu ongala pamwe novamwatate, nonande otwa wililwa po koisho yonghalamwenyo. Kalunga ketu omunahole oku wete filufilu eenghendabala detu odo hatu ningi opo tu dulike meenghalo da tya ngaho. Ndele opo tu dulike kuKalunga filufilu, otu na okufinda eamo letu lokuhawanenena nokweefa okulonga owii, ndele hatu kulike ohole yokulonga osho shiwa. — Ovaroma 12:9.

¹⁹ Ngeenge ohatu longele Jehova omolwohole nomolwolupandu tali di komutima, ‘ote ke tu pa ondjabi.’ (Ovaheberi 11:6) Oshoshili kutya Jehova oha hokwa omayambo a wapala, ndele oha kala unene a hafa ngeenge hatu dulika kuye omolwohole. — Omayeletumbulo 3:1, 2.

Oto nyamukula ngahelipi?

• Omeityo lilipi hatu dulu okupa sha Jehova?

• Omapuko elipi Saul a li a ninga?

• Ongahelipi to dulu okuulika kutya owa itavela kutya okudulika oku dule omatomenoyambo?

• Oshike hashi ku linyengifa u dulike kuJehova?

[Omafano pepandja 22]

Mbela oho dulika ngoo koipango yaKalunga ngeenge u li oove auke?