“Twa topolwa komalaka, ihe otwa hanganithwa kohole”

Ehupitho. Emanguluko. Aantu oya kala uule womathelemimvo ya hala okumanguluka komaupyakadhi nokiimpwiyu. Ongiini tatu vulu okwiidhidhimikila omaupyakadhi gonkalamwenyo? Mbela onatu ka manguluke ko ngaa kugo? Nongele osho, ongiini?

SHIKA osha li sha kundathanwa miipopiwa yopiigongi yiitopolwa yomasiku gatatu yu unganekwa kOonzapo dhaJehova mbyoka ya li ya tameke muMei 2006. Oshipalanyolo shayo osha li “Ehupitho oli li popepi!”

Piigongi omugoyi yomiigongi mbika opwa li aantu omayuvi ya za kiilongo yi ili noyi ili. Oya li ya ningwa muJuli naAuguste 2006, muPrague, oshilandopangelo shoRepablika yaTsehi; muBratislava, oshilandopangelo shaSlovakia; muChorzow naPoznan, muPoole;a niilando itano yaNdowishi—Dortmund, Frankfurt, Hamburg, Leipzig naMunich. Aakalipo ayehe piigongi mbika sho ya yalulwa oya li ya konda 313 000.

Iigongi oya li mombepo yini? Iikundaneki oya li ya kundaneke shike kombinga yayo? Aakalipo oya li yu uvite ngiini konima yokukala puyo?

Omalongekidho

Aanashigongi mboka ya za kiilongo yilwe nosho wo Oonzapo dhomoshitopolwa odha li dha tegamena nenyanyu iigongi mbika molwaashoka oya li ye shi kutya otashi ka kala ompito yokutungwa pambepo yaa shi okudhimbiwa. Okulongekidhila mboka ya za kiilongo yilwe omahala gokulala ga gwana osha li sha pula iilonga oyindji. Pashiholelwa, Oonzapo dhOkupoole odha li dha gandja omahala gokulala momagumbo gadho kwaamboka ya li ye ya koshigongi shomuChorzow ya za kuEuropa lyokUuzilo ye thike konyala po 13 000. Yamwe yomwaamboka ya li ye ya koshigongi shoka oya li ya za kiilongo ngaashi Armenia, Belarus, Estonia, Georgia, Iilongohangano, Kazakhstan, Kyrgyzstan, Latvia, Lithuania, Moldova, Rusia, Tajikistan, Turkmenistan, Ukraine naUzbekistan.

Aanashigongi oyendji mboka ya za kiilongo yilwe oya li ya tameke okwiilongekidhila olweendo lwawo kuyele manga ku na oomwedhi dhontumba. Tatiana omuuvithi gwevaangeli gwethimbo lyu udha muKamchatka, oshimpokovi shaRusia sha gama kuuzilolundume lwaJapan, okwa li a tameke okupungulila olweendo lwe iimaliwa kuyele manga ku na omvula oshigongi shi thike. Omumwameme nguka okwa li e na okweenda ookilometa 10 500 lwaampono. Tango, okwa li a tuka nondhila oowili 5; opo nduno okwa li e ende meshina lyokolutenda omasiku gatatu lwaampono; nolwahugunina okwe ende oowili 30 mombesa tayi yi kuChorzow.

Aantu omayuvi oya li yi iyamba okwoopaleka uupale mpoka tapu ningilwa iigongi nomidhingoloko dhawo opo wu kale omahala tago opalele okuningilwa iigongi yopakalunga. (Deuteronomium 23:14) Okutumbula po owala oshiholelwa shimwe, muLeipzig Oonzapo dhamo odha li dha longo iilonga iiwanawa yokwoopaleka okapale, nodha li dhu uvaneke oku shi ninga ishewe konima yoshigongi. Oshizemo, ooyene yokapale oya li ya ti kutya inashi pumbiwa we okufuta iimaliwa mbyoka hayi futwa shito omolwokwoopaleka okapale.

Omahiyo

Omagongalo muuyuni auhe oga li ga hiya aantu kIigongi “Ehupitho oli li popepi!” Mboka ya li taya ka kala piigongi mbika yi ikalekelwa oya li ya kutha ombinga moshikonga shika shokuhiya aantu nuulaadhi. Oya li ya tsikile okuhiya aantu sigo okongulohi kwa toka yesiku lya tetekela oshigongi. Mbela uulaadhi wawo owa li ngaa wa zi iizemo iiwanawa?

Onzapo yokuPoole yedhina Bogdan oya li ya tsakanene nomulumentu omukulupe ngoka a li a hala okukala poshigongi, ihe okwa li a popi kutya iimaliwa mbyoka ha mono yoponzela inayi gwana okufuta olweendo lwookilometa 120 okuya kuChorzow. Opwa li pwa monika kutya mombesa ndjoka ya li ya hehelwa kegongalo lyaampono otamu ka kala ehala kaali na omuntu. Bogdan ota ti: “Otwa li twa lombwele omulumentu ngoka kutya ota vulu okuya natse inaa futa ngele okwe ya kehala hoka tatu londele po 5:30 ethimbo lyongula.” Omulumentu ngoka okwa li e shi zimine nokwa li a yi koshigongi. Konima yethimbo okwa li a nyolele aamwatate ta ti: “Konima yokukala kwandje poshigongi shika onda tokola toko okukala omulumentu e li hwepo.”

MuPrague omulumentu gumwe ngoka a li a kala muyimwe yomoohotela ndhoka dha li tadhi longithwa kaanashigongi mboka ya za kuBritania okwa li a lombwele aanashigongi ongulohi yimwe kutya naye opo a li poshigongi esiku ndyoka. Oshike sha li she mu inyengitha a kale po? Omulumentu ngoka ota ti kutya konima yokuhiywa kaauvithi omulongo ya yoolokathana mboka ya li ye mu tsakaneke mepandaanda lyoshilando, okwa li e uvite kutya oku na owala okuya. Okwa li a kumwa noonkondo nokwa li a halelela okwiilonga oshindji.—1 Timoteus 2:3, 4.

Opolohalama tayi tungu yelongo lyopambepo

Opolohalama oya li ya kundathana nkene omaupyakadhi gi ili nogi ili ge na okuungaungwa nago. Omayele ga yela nawa gOpamanyolo oga li ga yelitha nkene omaupyakadhi taga vulu okukandulwa po nenge nkene taga vulu okwiidhidhimikilwa.

Oohandimwe mboka ya li ye na omaupyakadhi ge na ko nasha nuukulupe, okwaahenuukolele, ya silwa aaholike nenge omaupyakadhi galwe gopaumwene oya li ya mono eladhipiko okuza mOmbiimbeli oku ya kwathela ya kale ye na etaloko li li nawa monkalamwenyo. (Episalomi 72:12-14) Aaihokani nosho wo aavali oya li ya pulakene omayele gOmbiimbeli kombinga yankene ye na okukala ye na ondjokana yi uvite elago nosho wo nkene ye na okuputudha aanona yawo nomupondo. (Omuuvithi 4:12; Aaefeso 5:22, 25; Aakolossa 3:21) Aakriste aagundjuka mboka ya taalelwa kethininiko lyoomakula yawo kosikola ihe ohaya mono omayele gopandunge okuza mOohapu dhaKalunga pegumbo nomegongalo, oya li ya mono omayele taga longo nkene ye na okuungaunga nomathininiko okuza kookuume kawo nonkene ye na ‘okuyanda uuhalu womuugundjuka.’—2 Timoteus 2:22.

Uumwayinathana washili wopaigwana

Oonzapo dhaJehova ohadhi mono aluhe omayele omawanawa gopamanyolo pokugongala kwadho. (2 Timoteus 3:16) Ihe iigongi mbyoka oya li yi ikalekelwa, molwaashoka opwa li pwa kala aantu yiigwana yi ili noyi ili. Iigongi ayihe yi ikalekelwa oya li ya yi na opolohalama ya faathana yelongo lyopambepo momalaka ogendji. Esiku kehe iilyo yolutuwiliki lwOonzapo dhaJehova oya li ya gandja iipopiwa, noolopota okuza kiilongo yilwe odha li dha ningi iigongi mbika yi kale yihokitha noonkondo. Iipopiwa mbika nosho wo oolopota oya li ya tolokwa momalaka ga yoolokathana gaantu mboka ya li po omolwuuwanawa wawo.

Aamwatate naamwameme yokiilongo yilwe oya li ye na ehalo lyokutsakanena. Omumwatate gumwe okwa li a ti: “Eyooloko lyomalaka kalya li nando lye eta lela uupyakadhi washa. Mepingathano naashono, olya ningi oshigongi shi kale mombepo ombwanawa. Aanashigongi oya li ya za momaputuko ga yoolokathana, ihe ayehe oya li ya hanganithwa keitaalo limwe alike.” Aakaliposhigongi shoka sha li sha ningilwa puMunich oya li ye shi popi momukalo nguka ya ti: “Twa topolwa komalaka, ihe otwa hanganithwa kohole.” Kutya nduno oya za peni nohaya popi elaka lini, mboka ya li po oya li ya mono kutya oye li nookuume kashili, aamwahe naamwayinathana yopambepo.—Sakaria 8:23.

Oohapu dholupandu

Onkalo yombepo pethimbo lyiigongi muPoole oya li yi li emakelo kiikala neidhidhimiko lyaanashigongi mboka ya za kiilongo yilwe. Hamolwaashoka owala omvula ya li tayi loko ethimbo alihe, ihe omolwaashoka kwa li kwa talala, shi thike poograte dhoCelsius 14 lwaampono. Omumwatate ngoka a li a za kIilongohangano okwa li a ti: “Okwa li taku lokwa nokwa li kwa talala noonkondo inaandi shi mona nando onale pethimbo lyoshigongi, niipopiwa owala iishona nda li ndu uvu ko. Ihe ombepo yuumwayinathana wopashigwana oya li onkumithi itaashi vulu okwiitaalwa, nosho wo eyakulo lyaayenda lyi ikalekelwa olya li itaali vulu okupingenwa po nasha. Oshigongi shika osha li itaashi vulu okudhimbiwa.”

Oshinima shoka sha li itaashi ka dhimbiwa kaakaliposhigongi aapopi yOshipoole osha li etseyitho lyegandjo lyembo Insight on the Scriptures mOshipoole, ondjambi ombwanawa noonkondo molwokwiidhidhimikila kwawo uutalala nomvula. Egandjo lyoshileshomwa oshipe Live With Jehovah’s Day in Mind olya li wo lye eta enyanyu pIigongi ayihe “Ehupitho oli li popepi!”

Oyendji mboka ya li po otaya dhimbulukwa oshigongi shoka netompelo lyontumba nolyongandi. Kristina omumwameme gwokuTsehi ngoka a li i iyamba okuthindikila olweendo lwongundu yaanashigongi ya za kombanda yomafuta mboka ya li ye li mombesa ota ti: “Sho twa li tatu lalekathana omumwameme gumwe okwa li i ithana ndje e ta papatele ndje nokwa ti: ‘Tangi unene sho mwe tu sile oshimpwiyu nawa. Omwa li mwe tu etele iikulya pomitumba dhetu nomwe tu pe nokuli omeya gokunwa. Otwa pandula unene eiyambo lyeni lyohole.’” Okwa li ta popi shi na ko nasha nelongekidho lyomwiha ndyoka lya li lya ningilwa aanashigongi mboka ya za kombanda yomafuta. Omumwatate gumwe okwa li a yelitha a ti: “Oya li iilonga mbyoka inaatu yi longa nando onale. Oya li ya kwatela mo okweetela aantu 6 500 lwaampono omwiha esiku kehe. Osha li shinyanyudha okumona nkene aantu oyendji, mwa kwatelwa aanona ya li yi iyamba okukwathela.”

Omumwameme gumwe ngoka a li a yi koshigongi koChorzow a za kUkraine okwa ti: “Otwa li twi inyengithwa noonkondo kohole, kesiloshimpwiyu nokeyakulo lyaayenda ndyoka twa li twa yakulwa nalyo kooitaali ooyakwetu. Katu na iitya okupopya olupandu lwetu.” Annika e na oomvula hetatu a za kOsoomi okwa li a nyolele koshitayimbelewa shOonzapo dhaJehova muPoole a ti: “Oshigongi osha li nokuli oshiwanawa noonkondo inaandi shi mona nando onale. Inashi dhenga mbanda tuu okukala mehangano lyaJehova, molwaashoka moka omuntu oha kala e na ookuume muuyuni auhe!”—Episalomi 133:1.

Omatyokosha okuza kaatali

Manga iigongi inaayi tameka, opwa li pwa longekidhwa omalweendo gokuulukila yamwe yomaanashigongi mboka ya za kiilongo yilwe omahala gamwe moshilongo. Moshitopolwa shokuushayi waBavarian, aanashigongi mboka oya li ya thikama pIinyanga yUukwaniilwa mpoka ya li ya hambelelwa kOonzapo dhomoshitopolwa. Gumwe ngoka a li tu ulukile ongundu yaanashigongi mboka omahala moshilongo kee shi Onzapo okwa li a kumithwa noonkondo keuliko ndika lyohole yuumwayinathana. Omunashigongi gumwe okwa li a kundaneke ta ti: “Mombesa sho twa li tatu shuna kohotela yetu, ngoka a li te tu ulukile omahala okwa li a popi kutya otwa li twa yooloka ko noonkondo koongundu dhilwe dhaatalelipo. Okwa li a ti kutya otwa li twa zala nawa naayehe oya li ya longele kumwe naamboka ya li ye tu kwatele komeho nonokutya kapwa li omatukano nevundakano lyasha. Okwa li wo a kumwa sho a mono nkene aantu inaaya tseyathana nando onale ya panga nziya uukuume uuwanawa.”

Omumwatate gumwe ngoka a li a longo kOshikondo shOmauyelele poshigongi shomuPrague ota ti: “Ongula yOsoondaha, omunambelewa omukuluntu gwaapolisi mboka ya li taya tonatele oshigongi okwa li e ya kutse. Okwa li a mono kutya poshigongi opu na ombili nokwa ti kutya ke na po iilonga yasha. Okwa li wo a popi kutya aakali yomoshitopolwa shoka shi li pomudhingoloko gwokapale oya pula kutya oshigongi oshashike. Sho a popi kutya oshOonzapo dhaJehova, oya li ya kumwa sho omunambelewa ngoka a li e ya lombwele a ti: ‘Aantu ando oya li hayi ihumbata ngaashi Oonzapo dhaJehova, ando opolisi inayi pumbiwa we.’”

Oyendji oya hupithwa nale

Oohapu dhaKalunga, Ombiimbeli odhi li ngaashi ontopa pokati komaputuko notadhi hanganitha Aakriste mombili nomuukumwe. (Aaroma 14:19; Aaefeso 4:22-24; Aafilippi 4:7) Shika oshu ulikwa kiigongi yi ikalekelwa yi na oshipalanyolo “Ehupitho oli li popepi!” Oonzapo dhaJehova odha hupithwa nale momaupyakadhi ogendji ngoka taga hepeke uuyuni mbuka. Gamwe gomomaupyakadhi ngoka aantu ye na kunena ngaashi okakombo noludhi kopamihoko nuupwidhi, konyala kage mo we mokati kOonzapo dhaJehova nodha tegelela ethimbo sho uuyuni auhe tau ka kala wa manguluka komaupyakadhi ngoka.

Mboka ya li piigongi mbika oya mona kuyo yene uukumwe mboka u li mokati kOonzapo dha za kiilongo ya yoolokathana nomomaputuko gi ili nogi ili. Shika osha li shi iwetikile noonkondo pehulilo lyiigongi. Adhihe odha li dha hakele omake, dha papatele ookuume kadho aape nodha li tadhi thaneke omathano gahugunina. (1 Aakorinto 1:10; 1 Petrus 2:17) Aanashigongi mboka ya za kiilongo yilwe oya li ya nyanyukwa noye na uushili kutya ehupitho okuhupithwa momaupyakadhi agehe nomiimpwiyu ayihe oli li popepi noya li ya galukile komagumbo nokomagongalo gawo ye na etokolotoko lya pepalekwa okukala ya dhiginina “ohapu yomwenyo” yaKalunga.—Aafilippi 2:15, 16.

[Enyolo lyopevi]

[oshimpungu/Ethano pepandja 10]

Omalaka 26 oga li ga popiwa ga fa elaka limwe alike

Piigongi ayihe yi li omugoyi iipopiwa ayihe oya li ya gandjwa melaka lyomoshitopolwa. Pethimbo lyiigongi muNdowishi, iipopiwa oya li ya gandjwa wo momalaka galwe 18. MuDortmund iipopiwa oya li wo ya gandjwa mOshiarabia, Oshifarsi, Oshiputu, Oshispania nOshirusia; muFrankfurt omOshiingilisa, Oshifulaanisa nOshiserbia/Oshicroatia; muHamburg omOshindeene, Oshiholanda, Oshiswedeni nOshitamil; muLeipzig omOshikiina, Oshipoole nOshituriki; nomuMunich omOshigreka, Oshiitalia nomelaka lyokuudhika lyOshindowishi. Poshigongi shomuPrague iipopiwa ayihe oya li ya gandjwa mOshitsehi, mOshiingilisa nomOshirusia. MuBratislava iipopiwa oya li ya gandjwa mOshiingilisa, mOshihongaria, mOshislovakia nomelaka lyokuudhika lyOshislovakia. MuChorzow oya li ya gandjwa momalaka ngaashi Oshipoole, Oshirusia, Oshiukraine nomelaka lyokuudhika lyOshipoole. MuPoznan, oya li ya gandjwa mOshipoole nOshisoomi.

Omalaka agehe kumwe 26. Dhoshili, mboka ya li piigongi mbika oya li ya topolwa komalaka, ihe oya li ya hangana mohole.

[Ethano pepandja 9]

Aanashigongi Aacroatia mboka ya li muFrankfurt oya li ya nyanyukwa okupewa melaka lyawo Ombiimbeli hayi ithanwa “New World Translation”