Iigongi yetu yoshitopolwa ohayi gandja uunzapo wa kola kombinga yoshili
1. Iituthi yokomumvo oya li hayi pe Aaisraeli ompito yokutedhatedha nokukundathana kombinga yiinima yopambepo ya simana yini?
1 Aaisraeli yonale oya li haya gongala lutatu momumvo ya tyapule iituthi yokomumvo. Nonando aalumentu owala ya li ya tegelelwa ya kale po piituthi mbika, olundji aanegumbo ayehe oya li haya yi kuJerusalem ya ka tyapule iigongi mbika. (Deut. 16:15, 16) Iigongi mbika oya li hayi ya pe ompito yokutedhatedha nokukundathana kombinga yiinima yopambepo ya simana. Yimwe yomiinima mbika oyini? Shimwe osho kutya Jehova oku hole okugandja noku li Omugandji omunahole. (Deut. 15:4, 5) Oshikwawo osho kutya otatu vulu oku mu inekela e tu wilike noku tu gamene. (Deut. 32:9, 10) Aaisraeli oya li wo haya vulu okutedhatedha kombinga yankene ye na okuulika uuyuuki waJehova, molwaashoka oye li oshigwana sha humbata edhina lye. (Deut. 7:6, 11) Kunena iigongi yetu yoshitopolwa mbyoka hayi ningwa omumvo kehe, ohayi tu etele wo uuwanawa.
2. Oshigongi otashi ka gandja uuyelele wuni kombinga yoshili?
2 Piigongi ohapu gandjwa uuyelele wu na ko nasha noshili: Piigongi yetu yoshitopolwa ohatu pulakene kiipopiwa, kiinyandwa, komauliko nokomapulapulo ngoka haga gandja uuyelele kombinga yoshili ya simanenena yOmbiimbeli. (Joh. 17:17) Opwa ningwa nale omalongekidho ogendji ge na ko nasha noshigongi tashi landula. Ehangano lyaJehova otali ningi omalongekidho, opo oshigongi shoka shi vule okukwathela aantu muuyuni auhe moompumbwe dhawo. (Mat. 24:45-47) Mbela owa halelela oku ka mona nokuuva shoka tashi ka popiwa po?
3. Otu na okuninga shike ngele otwa hala okumona uuwanawa poshigongi?
3 Otatu ka mona owala uuwanawa ngele poshigongi otwa kala po omasiku agehe gatatu, tatu pulakene twi itula mo. Pula omugandji gwoye gwiilonga e ku pe efudho, ngele ino shi ninga natango. Kala ho lala kuyele ongulohi kehe pethimbo lyoshigongi, opo wu ka kale to gandja eitulomo. Oyendji oya mona kutya ngele oya kala ya tala komupopi nokunyola paufupi iitsa ya simana, ohaya kala taya gandja nawa eitulomo. Ino etha ongodhi yoye yopeke yi ku piyaganeke nenge yi piyaganeke yalwe. Kambadhala waa kale to popi nenge to tumu omatumwalaka mongodhi. Ino kala to li nenge to nu pethimbo lyomutumba, kakele owala ngele opu na ompumbwe yopaunamiti nenge ngele ku na uupyu unene.
4. Aavali otaya vulu okukwathela aanona yawo ngiini ya mone uuwanawa moshigongi?
4 Momumvo kehe omutiheyali, ano omumvo gwEsabati, sho Aaisraeli ya li haya gongala ya pulakene sho Ompango tayi leshwa pOshituthi shomatsali giihwa iitalala, oya li haye ya “naanona” yawo, ‘opo shaa ngoka te yi uvu, i ilonge’ okutila OMUWA. (Deut. 31:12) Ohashi tsu omukumo okumona aanegumbo ayehe ya kuutumba pamwe poshigongi naanona ya tonata taya pulakene yi itula mo. Omolwashike itaamu kundathana ongulohi kehe iitsa mbyoka mwa li mwa nyanyukilwa unene? Ombiimbeli otayi ti kutya “uugoya wa kanyatela momwenyo gwomumati,” onkee ano, aavali kaye na okulela aanona yawo “ondembula,” ihe oye na oku ya tonatela nawa pethimbo lyomwiha naasho ye li kohotela, mwa kwatelwa nokuli naanona mboka ye na oomvula omulongo nasha. — Omayel. 22:15; 29:15.
5. Eihumbato lyetu ewanawa uuna tu li pohotela otali simanekitha ngiini oshili?
5 Eihumbato lyetu ewanawa ohali simanekitha oshili: Eihumbato lyetu ewanawa manga tu li moshilando moka tamu ningilwa oshigongi ohali simanekitha oshili. (Tit. 2:10) Mboka haya longo moohotela ohaye shi nongele ngele ohatu landula omilandu dhohotela, ngele otu na eidhidhimiko nohatu popi nawa nayo. (Kol. 4:6) Omumvo gwa zi ko, sho aamwatate yokoshitayimbelewa ya li taya kundathana nomuunganeki gwiinima yokukongela ohotela yontumba ookastoma, okwe ya lombwele a ti: “Otu hole okutaamba aantu yeni mohotela yetu, molwaashoka aanambili. Ohayi ihumbata nawa, ohaya simaneke aluhe aaniilonga yetu nosho wo ehala lyetu.”
6. Ongiini tatu vulu okusimanekitha oshili momukalo moka twa zala sho tu li moshilando moka tamu ningilwa oshigongi?
6 Uukalata woshigongi mboka hatu zala ihawu tseyitha owala oshigongi noku tu ndhindhilikitha kaanashigongi ooyakwetu, ihe ohawu gandja wo uunzapo kaatali. Aantu moshilando moka tamu ningilwa oshigongi otaye ke shi mona mo kutya ayehe mboka ya zala uukalata woshigongi oya zala nawa, omizalo dhi shi okutalwa. Inaya zala oonguwo inaadhi silwa oshimpwiyu nenge tadhi kokele momilalo ngaashi aakuuyuni. (1 Tim. 2:9, 10) Onkee ano, otu na okukala twa zala nawa sho tu li moshilando moka tamu ningilwa oshigongi, nokuli naasho tatu thiki pohotela. Ngele otwe ya twa zala okotse nokambindja, itashi ku ulika esimaneko. Nonando oshigongi otashi ka ningilwa pokapale, omizalo dhetu nadhi kale tadhi ulike esimaneko. Konima yoshigongi ngele otwi ihula tu ye korestolanda, inatu zala oonguwo inaadhi opala, molwaashoka natango otu li aanashigongi.
7. Ongiini tatu vulu okunyanyukilwa uukumwe wetu wopaKriste pethimbo lyoshigongi?
7 Piituthi yokomumvo, Aaisraeli oya li haya nyanyukilwa oonkundathana tadhi tungu naagalikani ooyakwawo mboka ya za kiitopolwa yilwe naashika osha li hashi humitha komeho uukumwe. (Iil. 2:1, 5) Uumwayinathana wetu wopaKriste wa dhenga mbanda ohawu imonikila piigongi yetu yoshitopolwa. Uumwayinathana mbuka ohawu fuula oyendji. (Eps. 133:1) Etelela sha shokulya pomwiha, pehala lyoku ka landa iikulya pethimbo lyefudhopo, opo wu vule okutsakanena nokukundathana naamwatate naamwameme mboka ya kuutumba popepi nangoye.
8. Omatompelo geni tu na gokwiiyamba tu kwathele piigongi, ngele oonkalo dhetu otadhi tu pitike?
8 Oyendji ohaya kala ya kumwa sho iigongi yetu yu unganekwa nawa noyi li melandulathano, unene tuu ngele oyu uvu kutya iilonga ayihe ohayi longwa owala kaaiyambi. Mbela ito vulu ‘okukwathela’ nehalo ewanawa poshigongi? (Eps. 110:3) Olundji aanegumbo ayehe ohayi iyamba ya ka longe koshigongi, opo ya dheule oyana ya kale ye na ehalo lyokukwathela yalwe. Ngele iho kala wa mangulukila aantu, okulonga poshigongi oshinima oshiwanawa, molwaashoka otashi ke ku kwathela wu endathane naamboka ye ya koshigongi. Omumwameme gumwe okwa ti: “Kanda li ndi shi po aantu oyendji poshigongi, kakele owala kaantu yaandjetu nokookuume taya yalulwa. Ihe sho nda kwathele mokwoopaleka, onda li nda tsakaneke aamwatate naamwameme oyendji. Osha li tashi nyanyudha unene.” Ngele otwe egulula omitima dhetu e tatu kala wo naamboka kaaye shi nale ookuume ketu sho tatu kwathele poshigongi, otashi ke tu etela enyanyu olindji. (2 Kor. 6:12, 13) Ngele ino shi ninga nale, pula aakuluntugongalo kutya owu na okuninga shike, opo wu vule oku ka kwathela.
9. Ongiini tatu vulu okuhiya aantu koshigongi?
9 Hiya yalwe ye ye yu uve oshili: Sho ku na iiwike itatu oshigongi shetu shi tameke, otatu ka ninga oshikonga shokuhiya aantu koshigongi shoka ngaashi twa kala noku shi ninga omimvo dha piti. Omagongalo oge na okuninga oonkambadhala ga mane ko oshitopolwa shago nokafo kehiyo. (Tala okampungu “Ongiini tatu vulu okugandja okafo kehiyo?”) Uufo mboka tawu ka hupa po wu eteleleni koshigongi. Otawu ka longithwa kaakalipo okugandja uunzapo wontukuluka manga ye li moshilando moka oshigongi tashi ningilwa.
10. Hokolola iimoniwa mbyoka tayi ulike kutya iikonga yokomumvo yokuhiya aantu ohayi pondola.
10 Mbela iikonga mbino yokomumvo ohayi pondola ngaa sha? Poshigongi shimwe, omuyakuli gumwe okwa li a kongele aaihokani yamwe mpoka ye na okukala omutumba. Oye mu lombwele kutya oya li ya pewa okafo kehiyo noya li “ye wete taka hokitha.” Oya li ya hingi ookilometa 320, opo ya kale po poshigongi. Omumwameme gulwe ngoka a li ta longo egumbo negumbo okwa li a gandja okafo kehiyo komulumentu gumwe ngoka a li a hala okuuva oshindji kombinga yoshigongi. Omumwameme okwa li e mu yelithile kombinga yokafo kehiyo. Konima yomasiku gontumba omumwameme okwa li a tsakanene poshigongi nomulumentu nguka e li nakuume ke, ye na shimwe shomiileshomwa mbyoka opo ya piti poshigongi mpoka.
11. Omolwashike sha simana okukala piigongi yoshitopolwa yokomumvo?
11 Iituthi yokomumvo oya li esiloshimpwiyu lyaJehova lyopahole okukwathela Aaisraeli ‘ye mu longele nevuliko nonuudhiginini.’ (Jos. 24:14) Sha faathana, ngele otwa kala hatu kala piigongi yetu yoshitopolwa omumvo kehe, otashi ke tu kwathela ‘tu kale moshili,’ niigongi mbika oyi li wo oshitopolwa sha simanenena shelongelokalunga lyetu. (3 Joh. 3) Jehova na yambeke oonkambadhala ndhoka ayehe mboka ye hole oshili taya ningi, opo ya ka kale poshigongi noya ka mone uuwanawa owindji.
[Oohapu dha simana pepandja 3]
Eihumbato lyetu ewanawa manga tu li moshilando moka tamu ningilwa oshigongi ohali simanekitha oshili
[Oohapu dha simana pepandja 4]
Sho ku na iiwike itatu oshigongi shi tameke, otatu ka ninga oshikonga shokuhiya aantu koshigongi
[Oshimpungu pepandja 5]
Omadhimbulukitho goshigongi shoshitopolwa sho 2012
◼ Ethimbo lyoshigongi: Opolohalama yoshigongi otayi ka tameka po 9:00 gwongula omasiku agehe gatatu. Omiyelo otadhi ke eguluka okuza po 7:00 yongula. Ngele omunashipundi okwa tseyitha kutya omusika ndjoka hayi tetekele omutumba otayi ka tameka, atuheni natu kaleni omutumba opo opolohalama yi tameke momukalo tagu simanekitha. MEtitano nomOlyomakaya opolohalama otayi hulu po 4:35 komatango, nomOsoondaha opo 3:20 komatango.
◼ Opaakinga: Pomahala agehe giigongi mpoka opaakinga yi li metonatelo lyetu, iiyenditho otayi ka thikama nopwaahe na okufuta nomelandulathano shi ikolelela kwaangoka e ya tango. Molwaashoka olundji oopaakinga odha ngambekwa, aantu otaya ladhipikwa ya longithe osheenditho shimwe ngele otashi vulika.
◼ Omahala gokukala: Aauvithi mboka ya pumbwa omahala gokulala oye na okuudhitha ofooloma yedhina Special Needs Room Request (CO-5) ya kongelwe omahala. Okomitiye yIilonga yEgongalo oyi na okutala ngele aauvithi oya gwanitha po iitegelelwa, taya landula omalombwelo ngoka ge li mofooloma moka nosho wo montumwafo yo 14 Desemba 2010 ndjoka ya li ya nyolelwa olutu lwaakuluntugongalo. Omahala gokulala otaga kongelwa owala aauvithi mboka ye na edhina ewanawa noyana mboka hayi ihumbata nawa.
◼ Okuyaleka omahala: Omahala gokukuutumba otaga vulu owala okuthigilwa mboka we ya pamwe nayo mosheenditho shimwe nenge mboka mu li nayo megumbo limwe nosho wo aakonakonimbiimbeli yoye. — 1 Kor. 13:5.
◼ Omwiha: Etelela omwiha gwoye opo kuu ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokukaleka iinima ya talala hoka taka vulu okutulwa kohi yoshipundi shoye. Oondjato oonene dhokukaleka iinima ya talala odhi na okutulwa pehala mpoka tamu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.
◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho giilonga yeuvitho muuyuni auhe poshigongi. Ngele owa hala okuyambidhidha notyeke, nyola ko “Christian Congregation of Jehovah’s Witnesses of Namibia.”
◼ Iiponga nekwatho lyomeendelelo lyopaunamiti: Uuna pwa holoka ompumbwe ye endelela yopaunamiti, lombwela omuyakuli ngoka e li popepi a lombwele nziya oshikondo shEkwatho lyOtango lyOpaunamiti, opo aaniilonga mboka ya pyokoka ya gandje ekwatho noya tale kutya onkalo oya kwata miiti shi thike peni.
◼ Omiti dhokupanga: Ngele owu na omiti we dhi pewa kundohotola ndhoka ho longitha, etelela dha gwana, molwaashoka pehala lyoshigongi itadhi ka kala po. Oonane dhoowenda ndhoka hadhi longithwa kwaamboka ye na uuvu wosuuka, nadhi ekelwehi momukalo moka dhi na okweekelwahi, ihe inadhi ekelwahi moondoloma dhiiyagaya poshigongi nenge pohotela, molwaashoka odha nika oshiponga.
◼ Oongaku: Omumvo kehe ohapu holoka iiponga mbyoka hayi etithwa koongaku. Oshi li nawa okuzala oongaku ndhoka to vulu okweenda nadho kootalapa nenge pomilondo nosho tuu.
◼ Uutemba waanona: Uutemba mboka kawu na okweetwa mehala lyoshigongi. Ihe uupundi wokukuutumba aanona ya mangelwa mo owa pitikwa okukala wa mangelwa koshipundi ontega naavali.
◼ Omagadhi gokwiishasha: Iigongi oyindji ohayi ningilwa momahala ngoka kaage na omakende nohamu longithwa owala omashina gokugandja ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
◼ Ofooloma hayi ithanwa Please Follow Up (S-43): Ofooloma ndjika oyi na okulongithwa okugandja uuyelele kombinga yakehe ngoka u ulika ohokwe sho a pewa uunzapo wontukuluka pethimbo lyoshigongi. Omuuvithi kehe ne etelele yimwe nenge mbali koshigongi. Oofooloma ndhoka dhu udhithwa odhi na okugandjwa pondunda yomambo nenge kuamushanga gwegongalo ngele wa galuka koshigongi. — Tala Uukalele Wetu wUukwaniilwa waMei 2011, epandja 3.
◼ Oorestolanda: Simanekitha edhina lyaJehova mokwiihumbata nawa poorestolanda. Pomahala gamwe oshi li omukalondjigilile okugandja olupandu lwokamaliwa koopelesenda 10 sigo 15 kwaangoka e mu yakula.
◼ Iilonga yOkwiiyamba: Kehe ngoka a hala iilonga yokwiiyamba na ye kOshikondo shIilonga yOkwiiyamba poshigongi. Aanona mboka ye li meni lyoomvula 16 nayo otaya vulu okukwathela poshigongi taya longo metonatelo lyaavali nenge lyaatekuli yawo nenge lyaakuluntu yalwe ngele oya pewa epitikilo kugumwe gwomaavali.
◼ Omaimbilo: Omagongalo otaga vulu okwiilongekidha komeho yethimbo omaimbilo ngoka taga ka imbwa poshigongi. Omaimbilo gomEtitano: 52, 57, 113, 106, 116 nosho wo 98. MOlyomakaya: 96, 68, 58, 67, 95 nosho wo 89. MOsoondaha: 110, 61, 134, 73, 36 nosho wo 49.
[Oshimpungu pepandja 4]
Ongiini tatu vulu okugandja okafo kehiyo?
Opo tu mane ko oshitopolwa shetu, otwa pumbwa okupopya owala paufupi. Otatu vulu okutya: “Otatu gandja okafo haka kehiyo lyoshigongi shoka tashi ka ningwa muuyuni auhe. Koye oko haka. Muko omu na uuyelele wa gwedhwa po kombinga yoshigongi.” Popya nehwamo. Uuna to gandja okafo kehiyo momahuliloshiwike, mpoka tashi opalele gandja wo iifo.