Eihumbato ndyoka tali simanekitha Kalunga
1. Omolwashike Oonzapo dhaJehova hadhi kala dhi iwetikile uuna dhi li moshilando moka tamu ningilwa oshigongi?
1 Uuna tatu yi koshigongi shoshitopolwa, ayehe ohaya kala ye shi wete. Miilando oyindji moka hamu ningilwa iigongi, iikundaneki yomoshitopolwa ohayi tseyithile aakwashigwana kutya omo tu li moshitopolwa. Olundji oohotela noorestolanda ohadhi kala dhu udha aakalipo poshigongi, naantu ohaya koneke kutya moshitopolwa omu na aatalelipo oyendji ya zala uukalata woshigongi. Mpaka otapu landula omaetopo gamwe ngoka tage ke tu kwathela tu simanekithe Kalunga neihumbato lyetu ewanawa sho tu li moshilando moka tamu ningilwa oshigongi. — 1 Pet. 2:12.
2. Otatu ka simanekitha ngiini Kalunga mokuzala oonguwo dha yogoka sho tu li moshilando moka tamu ningilwa oshigongi?
2 Oonguwo dha yogoka: Ohashi fuula aatali sho hatu zala nawa uuna tu li poshigongi. Ihe omukalo moka tatu zala pomathimbo galwe, ngaashi sho tatu thiki pohotela, uuna tatu li porestolanda, uuna tatu yi koositola nosho tuu, otashi vulika gu gume unene omukalo moka aantu ye tu tala ko. Nonando itatu ka zala twa fa tatu yi kokugongala poompito ndhoka, otatu ka zala oonguwo dha yogoka pehala lyokuzala oonguwo inaadhi opala. Aantu oye na okukala ye wete eyooloko pokati ketu naamboka ihaaya longele Kalunga. (Rom. 12:2) Oshikwawo, otu na okuzala uukalata wetu woshigongi, molwaashoka otawu ka ningitha aantu ya tseye kutya otu na oshigongi, otawu ke tu pa oompito dhokuuvitha notawu ke tu kwathela tu dhimbululathane.
3. Ongiini tatu vulu okukala twa ngungumana nokuulika omikalo omiwanawa?
3 Engungumano nomikalo omiwanawa: Muuyuni mbuka moka aantu yi ihole yo yene noihaaya pandula, ohashi talaleke aantu, unene tuu mboka haya longo poohotela nomoorestolanda, okumona nkene twa ngungumana notu na omikalo omiwanawa. (2 Tim. 3:1-5) Uuna tatu yaleke omahala gokukuutumba nenge tu li momukweyo gwokumona oshileshomwa oshipe, inatu kala owala tatu dhiladhila kuuwanawa wetu yene, ihe nowooyakwetu wo. (1 Kor. 10:23, 24) Konima yoshigongi she shotango, omulumentu gumwe okwa ti: “Itandi dhimbulukwa nando oshimwe shomiipopiwa mbyoka ya gandjwa esiku ndyoka, ihe eihumbato lyOonzapo olya li lya fuula ndje noonkondo.”
4. Omolwashike tu na okwiiyamba tu kwathele poshigongi ngele oonkalo dhetu otadhi shi pitike?
4 Aaiyambi yehalo ewanawa: Aakriste yashili oya tseyikila ombepo yawo yeiyambo. (Eps. 110:3) Mbela ito vulu okwiiyamba wu kwathele poshigongi? Poshigongi shimwe, aamwatate naamwameme 600 oya li yi iyamba ya kwathele mokwoopaleka ehala manga oshigongi inaashi tameka. Mboka haya longo pehala mpoka oya ti: “Inatu mona nale oshinima sha tya nge. Oshidhigu okwiitaala kutya aantu ayehe mbaka aaiyambi.” Otwa tegelela oshigongi shoshitopolwa shomo 2013 nondjuulukwe nosho wo ompito ndjoka tatu ka kala tu na okupulakena, okulongwa kuKalunga noku mu simanekitha.
[Oshimpungu pepandja 3-6]
Omadhimbulukitho goshigongi shoshitopolwa sho 2013
◼ Ethimbo lyoshigongi: Omusika ndjoka hayi tetekele omutumba otayi ka tameka 9:00 omasiku agehe gatatu. Pethimbo ndyoka atuheni natu kaleni omutumba opo opolohalama yi tameke momukalo tagu simanekitha. MEtitano nomOlyomakaya opolohalama otayi hulu po 4:30 komatango, nomOsoondaha opo 3:15 komatango.
◼ Opaakinga: Pomahala agehe giigongi mpoka opaakinga yi li metonatelo lyetu, iiyenditho otayi ka thikama nopwaahe na okufuta nomelandulathano shi ikolelela kwaangoka e ya tango. Molwaashoka olundji oopaakinga odha ngambekwa, aantu otaya ladhipikwa ya longithe osheenditho shimwe ngele otashi vulika.
◼ Omahala gokukala: Aauvithi mboka ya pumbwa omahala gokulala oye na okuudhitha ofooloma yedhina Special Needs Room Request (CO-5) ya kongelwe. Okomitiye yIilonga yEgongalo oyi na okutala ngele aauvithi oya gwanitha po iitegelelwa, taya landula omalombwelo ngoka ge li mofooloma moka nosho wo montumwafo yo 14 Desemba 2010 ndjoka ya li ya nyolelwa olutu lwaakuluntugongalo. Omahala otaga kongelwa owala aauvithi mboka ye na edhina ewanawa noyana mboka hayi ihumbata nawa.
◼ Okuyaleka omahala: Omahala gokukuutumba otaga vulu owala okuthigilwa mboka we ya pamwe nayo mosheenditho shimwe nenge mboka mu li nayo megumbo limwe nosho wo aakonakonimbiimbeli yoye. Iipundi ya nuninwa aakokele naamboka kaaye na uukolele oya ngambekwa notashi vulika aanegumbo ayehe kaaya vule okukuutumba nayo. Alikana iipundi mbika nayi thigilwe po aakokele, mboka kaaye na uukolele naamboka taye ya kwathele. — 1 Kor. 13:5.
◼ Omwiha: Etelela omwiha gwoye opo kuu ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokukaleka iinima ya talala hoka taka vulu okutulwa kohi yoshipundi shoye. Oondjato oonene dhokukaleka iinima ya talala odhi na okutulwa pehala mpoka tamu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.
◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho giilonga yeuvitho muuyuni auhe poshigongi. Ngele owa hala okuyambidhidha notyeke, nyola ko “Christian Congregation of Jehovah’s Witnesses of Namibia.” Iigongi oyindji otayi ka taamba omayambidhidho ngoka taga ningwa nuukalata wombaanga.
◼ Omiti dhokupanga: Ngele owu na omiti we dhi pewa kundohotola ndhoka ho longitha, etelela dha gwana, molwaashoka pehala lyoshigongi itadhi ka kala po. Oonane dhoowenda ndhoka hadhi longithwa kwaamboka ye na uuvu wosuuka, nadhi ekelwehi momukalo moka dhi na okweekelwahi, ihe inadhi ekelwahi moondoloma dhiiyagaya poshigongi nenge pohotela, molwaashoka odha nika oshiponga.
◼ Oongaku: Omumvo kehe ohapu holoka iiponga mbyoka hayi etithwa koongaku. Oshi li nawa okuzala oongaku ndhoka to vulu okweenda nadho kootalapa nenge pomilondo nosho tuu.
◼ Uutemba waanona: Uutemba mboka kawu na okweetwa mehala lyoshigongi. Ihe uupundi wokukuutumba aanona ya mangelwa mo owa pitikwa okukala wa mangelwa koshipundi ontega naavali.
◼ Omagadhi gokwiishasha: Iigongi oyindji ohayi ningilwa momahala ngoka kaage na omakende nohamu longithwa owala omashina gokugandja ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
◼ Ofooloma hayi ithanwa Please Follow Up (S-43): Ofooloma ndjika oyi na okulongithwa okugandja uuyelele kombinga yakehe ngoka u ulika ohokwe sho a pewa uunzapo wontukuluka pethimbo lyoshigongi. Oofooloma ndhoka dhu udhithwa odhi na okugandjwa pondunda yomambo nenge kuamushanga gwegongalo ngele wa galuka koshigongi.
◼ Oorestolanda: Simanekitha edhina lyaJehova mokwiihumbata nawa poorestolanda. Natu zale momukalo ngoka tagu opalele omukalele Omukriste. Pomahala gamwe oshi li omukalondjigilile okugandja olupandu lwokamaliwa koopelesenda 10 sigo 15 kwaangoka e mu yakula.
◼ Iilonga yOkwiiyamba: Kehe ngoka a okwiiyamba na ye kOshikondo shIilonga yOkwiiyamba poshigongi. Aanona mboka ye li meni lyoomvula 16 nayo otaya vulu okukwathela poshigongi taya longo metonatelo lyaavali nenge lyaatekuli yawo nenge lyaakuluntu yalwe ngele oya pewa epitikilo kugumwe gwomaavali.