Omadhimbulukitho goshigongi shoshitopolwa shomo 2015
Ethimbo lyoshigongi: Ehala lyoshigongi otali ka egululwa lwopo 7:00 yongula. Omusika ndjoka hayi tetekele omutumba otayi ka tameka po 9:00 gwongula omasiku agehe gatatu. Pethimbo ndyoka, atuheni natu kaleni twa kuutumbeni nale, opo opolohalama yi tameke momukalo tagu simanekitha Jehova. Eimbilo lyahugunina negalikano otali ka tameka po 4:35 yokomatango mEtitano nomOlyomakaya, ihe mOsoondaha olwopo 3:25 yokomatango.
‘Tanga Jehova nomaimbilo’: Oshigwana shaKalunga shonale osha li hashi mu tanga nomaimbilo. Omusika oyi li natango oshitopolwa sha simana shelongelokalunga lyashili kunena. (Eps. 28:7) Omutumba gwoshigongi shoshitopolwa shetu kehe ohagu tetekelwa komusika. Omusika ndjoka kayi lile po osima, ihe oya longekidhwa nelalakano tu ilonge mo sha shoka tashi tu kwathele tu longele Jehova. Ngele omunashipundi okwa ti kutya omusika oyi li pokutameka, natu kuutumbeni e tatu pulakeneni. Uuna tatu shi ningi otatu ulike kutya otwa lenga aamwatate naamwameme mboka ye li mongundu yaahiki yiihikomwa yehangano lyetu. Ohaya yi lwaali momumvo kehe koPatterson, moNew York, tayi ifutile yo yene, opo ya ka longekidhe omusika ndjoka ombwanawa. Ngele omusika ya pu ko, kehe gumwe oku na okutanga Jehova moku mu imbila omaimbilo gUukwaniilwa.
Opaakinga: Pomahala agehe giigongi mpoka opaakinga yi li metonatelo lyetu, iiyenditho otayi ka thikama melandulathano shi ikolelela kwaangoka e ya tango, nopwaahe na okufuta. Molwaashoka olundji oopaakinga odha ngambekwa, osheenditho kehe nashi kale shi na aantu ya gwana ngele otashi vulika. Mboka ye na oombapila dhokuhinga dhiilema, oyo owala taya ka pitikwa ya paakinge mehala ndyoka lye ya nuninwa.
Okuyaleka omahala: Uuna omiyelo dhehala lyoshigongi dha patululwa ongula kehe, ino matuka wu ka yaleke omahala ngoka wa hala okukuutumba wa fa to ningi shanamutango nayakweni. Ombepo yeiyambo ohayi tu inyengitha tu pitithe komeho uuwanawa wayalwe. Omolwayo aantu ohaye tu dhimbulula kutya tse Aakriste yashili, nohayi inyengitha aakalipo ya tange Kalunga. (Joh. 13:34, 35; 1 Kor. 13: 4, 5; 1 Pet. 2:12) Omahala otaga vulu owala okukongelwa mboka we ya pamwe nayo mosheenditho shimwe, nenge mboka mu li nayo megumbo limwe nosho wo aakonakonimbiimbeli yoye. Ino tula iinima yoye kiipundi mbyoka inoo yaleka. Shoka otashi ka kwathela yalwe ya mone kutya piipundi mbyoka kapu na aantu. Opu na iipundi yi ikalekelwa ya nuninwa aakokele naamboka kaaye na uukolele. Molwaashoka iipundi mbika oya ngambekwa, omuntu owala gumwe nenge yaali taya vulu okukuutumba po mboka taya ambidhidha omukokele nenge ngoka kee na uukolele.
Oonguwo dha yogoka: Oonguwo dhetu pethimbo lyoshigongi odhi na okukala tadhi opalele nodha yogoka, inadhi kala tadhi ulike omukalo gwokuzala ngoka gu li apuhe muuyuni. (1 Tim. 2:9) Kutya nduno opethimbo lyokukiinyanyudha sho tatu yi moohotela, nenge sho tatu zi mo manga oshigongi inaashi tameka nokonima ngele sha piti mo, natu zale oonguwo tadhi opalele. Kungawo, otatu ka kala tu uvite uuntsa sho twa zala uukalata wetu woshigongi noitatu ka kala twa sa ohoni okugandja uunzapo uuna ompito ya holoka. Eholokopo lyetu nosho wo eihumbato lyetu ewanawa pethimbo tu li piigongi mbyoka twa taalela itali ka nanena owala aanamitima omiwanawa ketumwalaka lyOmbiimbeli ndyoka tali hupitha oomwenyo, ihe otali nyanyudha wo Jehova. — Sef. 3:17.
Uuna tu na iikwaelektronika: Oshi li nawa tu tule oongodhi dhetu dhopeke nosho wo iikwaelektronika yilwe momukalo moka itayi piyaganeke yalwe. Ngele otu na omathano, omashina gokukwata uuvidio nosho wo iikwaelektronika iikwawo natu yi longithe nawa. Katu na okupiyaganeka yalwe nenge tu ya shige kaaya mone ko. Oshi li nawa kaatu tume omatumwalaka nenge oo-email pethimbo lyomutumba mpoka inaashi pumbiwa.
Omwiha: Etelela omwiha gwoye, opo kuu ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokukaleka iinima ya talala hoka taka vulu okutulwa kohi yoshipundi shoye. Oondjato oonene dhokukaleka iinima ya talala odhi na okutulwa pehala mpoka tamu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.
Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho giilonga yeuvitho muuyuni awuhe poshigongi. Ngele owa hala okuyambidhidha notyeke, nyola ko “Christian Congregation of Jehovah’s Witnesses of Namibia.” Iigongi oyindji otayi ka taamba wo omayambidhidho ngoka taga ningwa nuukalata wombaanga.
Omiti: Ngele owu na omiti we dhi pewa kundohotola, etelela dha gwana, molwaashoka pehala lyoshigongi itadhi ka kala po. Oonane dhoowenda ndhoka hadhi longithwa kwaamboka ye na uuvu wosuuka, nadhi ekelwehi momukalo moka dhi na okweekelwahi, ihe inadhi ekelwahi moondoloma dhiiyagaya poshigongi nenge pohotela, molwaashoka odha nika oshiponga.
Okuyanda iiponga: Kaleka momadhiladhilo oonkalo ndhoka tadhi vulu okuthenenukitha omuntu nenge oku mu hata po. Omumvo kehe ohapu holoka iiponga mbyoka hayi etithwa koongaku, unene tuu ootyookola. Oshi li nawa okuzala oongaku ndhoka to vulu okweenda nadho kootalapa nenge pomilondo nosho tuu.
Uutemba waanona niipundi hayi tonywa: Uutemba mboka niipundi hayi tonywa kayi na okweetwa mehala lyoshigongi. Ihe uupundi wokukuutumba aanona ya mangelwa mo owa pitikwa okukala wa mangelwa koshipundi ontega naavali.
Omagadhi gokwiishasha: Iigongi oyindji ohayi ningilwa momahala ngoka kaage na omakende, ihe omu na owala omashina ngoka hage eta mo ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
Oorestolanda: Simanekitha edhina lyaJehova mokwiihumbata nawa poorestolanda. Natu zale momukalo ngoka tagu opalele aakalele Aakriste. Natu gandje olupandu lwokamaliwa pomahala mpoka shi li omukalondjigilile.
Omahala gokulala: Ngele oto ka lala mohotela, nenge mehala kehe ndyoka omuntu ho futu wu kale mo, kaleka iinima tayi landula momadhiladhilo:
Ino pula wu longekidhilwe oondunda ndhoka itoo ka longitha. Ngoye ino kala mo naantu ya pitilila pomwaalu ngoka gu uthwa.
Ngele owa longekidhilwa nale ehala ino lundulula euvathano ndyoka, kakele shila ngele pwa holoka omaimbo gasha. Uuna pu na omaimbo lombwela ooyene yehala nziyanziya, opo ya vule okutula po yalwe mboka taya kongo omahala. (Mat. 5:37)
Ngele owi inyolitha to longitha okakalata, omahala gamwe ohashi vulika ga kale ga kwata iimaliwa mbyoka yi li ko kuu yi longithe. Ohashi ningwa opo iimaliwa mbyoka yi li ko yi fute ehala lyokulala, iinima mbyoka hayi vulu okuteka nosho wo tuu ngele pwa holoka oshiponga sha sha pethimbo sho wu li mehala ndyoka. Onkee ano, ito ka longitha okakalata koye manga ino futa iimaliwa ya gwana po.
Gandja olupandu lwokamaliwa kaaniilonga yomoohotela nosho wo mboka hayo opaleke ngele oshi li omukalondjigilile moshilongo sheni uuna ye ku humbatitha ko.
Telekela owala mondunda ndjono hamu telekelwa nenge pomahala mpoka shu uthwa okuningilwa.
Ino hepeka iikulya yoshuumbululwa, okoothiwa nenge kehe ngaa eyakulo ndyoka hali pewa aayenda mehala moka.
Uuna wu li naaniilonga yomehala ndyoka, ulika iiyimati yombepo ethimbo kehe. Ohaya yakula aatalelipo oyendji, notaye ke ku pandula ngele owu li omunambili, omwiidhidhimiki nowu na ondjele.
Aavali oye na okukala taya tonatele oyana kaaya dhane pomapaya, puundama wokumbwinda, pomahala mpoka hapu thikilwa, moondunda moka mu na iinima yokwiidheula nosho tuu.
Uuna uupyakadhi wa holoka pehala mpoka wu li, lombwela Oshikondo shomahala gokukala wu kwathelwe.
Iilonga yOkwiiyamba: Kehe ngoka a hala okwiiyamba na ye kOshikondo shIilonga yOkwiiyamba poshigongi. Aanona mboka ye li meni lyoomvula 16, nayo otaya vulu okukwathela poshigongi taya longo metonatelo lyaavali, nenge lyaatekuli yawo nenge lyaakuluntu yalwe ngele oya pewa epitikilo kugumwe gwomaavali.