Oshigongi shomasiku gatatu otashi ke tu talaleka pambepo
1. Otwa tegelela oku ka mona shike nuumvo poshigongi shoshitopolwa?
1 Jehova ota tsikile nokutalaleka aapiya ye pambepo, omanga aantu muuyuni waSatana taya si ondjala pambepo. (Jes. 58:11) Esiloshimpwiyu limwe ndyoka ha longitha okupitila moshigongi shoshitopolwa. Ongiini tatu vulu okwiilongekidha opo tu ka mone etalaleko lyopambepo poshigongi shomumvo nguka shoka tashi hedha popepi? — Omayel. 21:5.
2. Omalongekidho geni twa pumbwa okuninga?
2 Ngele ino shi ninga natango, tameka okwiilongekidha ngashingeyi nokupula omasiku gefudho kiilonga opo wu ka kale omasiku agehe gatatu poshigongi. Mbela owa yalula ethimbo ndyoka to ka kala wa pumbwa okuya koshigongi esiku kehe opo wu ka thike kuyele nokukala omutumba omanga opolohalama inaayi tameka? Inatu hala nando tu pitililwe po koondya dhopambepo tadhi talaleke ndhoka Jehova e tu longekidhila. (Jes. 65:13, 14) Mbela owa longekidha nale ehala mpoka to ka kala nosho wo olweendo?
3. Omaetopo geni tage ke tu kwathela nosho wo omaukwanegumbo getu ga mone lela uuwanawa mopolohalama?
3 Oshike tashi ke ku kwathela opo omadhiladhilo goye kaaga falwafalwe pethimbo lyomutumba? Ngele otashi vulika, kala ho ka lala kuyele opo wu mone oomposi dha gwana. Kala wa tala komupopi. Tala enyolo kehe mOmbiimbeli yoye. Nyola paufupi iitsa mbyoka ya simana. Oshi li nawa iilyo yomaukwanegumbo yi kale omutumba pamwe opo aavali ya vule okukwathela oyana ya kale taya pulakene. (Omayel. 29:15) Otamu vulu okukundathana iitsa ya simana yopolohalama ongulohi kehe mu li uukwanegumbo. Opo uukwanegumbo weni wu tsikile nokutalalekwa pambepo, nokuli nokonima yoshigongi, otamu vulu okulongitha Esiku lyElongelokalunga lyUukwanegumbo mu tale iitsa yokondandalunde mbyoka mwa pumbwa okutula miilonga.
4. Ongiini tatu vulu okukwathela yalwe megongalo lyetu ya talalekwe pambepo?
4 Kwathela yalwe ya talalekwe: Otwa hala wo yalwe ya talalekwe pambepo. Mbela omu na aauvithi aakokele nosho wo yalwe megongalo mboka ya pumbwa ekwatho ya vule oku ka kala po poshigongi? Mbela oto vulu oku ya kwathela? (1 Joh. 3:17, 18) Aakuluntugongalo, unene tuu aatonateli yoongundu otaya vulu okutala kutya aauvithi mboka oya mona ekwatho.
5. Ongiini tatu vulu okugandja okafo kehiyo lyoshigongi? (Tala oshimpungu pombanda.)
5 Ngaashi hatu shi ningi shito, ohatu tameke noshikonga shokuhiya yalwe koshigongi omanga ku na iiwike itatu. Egongalo oli na okwiitulila po elalakano li gandje uufo wehiyo nokulonga oshitopolwa shalyo oshindji ngaashi tashi vulika. Uufo wehiyo mboka wa hupa po nawu etelelwe koshigongi opo wu longithwe uuna tatu gandja uunzapo wontukuluka. Uuyelele wa gwedhwa po kombinga yaashoka otawu ka gandjwa pethimbo lyopolohalama mEtitano. Uufo wehiyo mboka mu shi kutya uukwanegumbo weni itawu vulu oku wu longitha sho mu li moshilando moka tamu ningilwa oshigongi nawu gandjwe kaayakuli. Ihupithila po okafo kamwe kehiyo, molwaashoka otaka ka longithwa moshipopiwa shahugunina mOsoondaha.
6. Omomikalo dhini tatu vulu okuulika iikala iiwanawa pethimbo lyopolohalama?
6 Iikala iiwanawa ohayi talaleke: Sho tu li pethimbo mpoka aantu oyendji ‘yi ihole’ noka ye na ko nasha nayalwe, itashi ka kala tuu etalaleko enene okukala pamwe nAakriste ooyakwetu mboka taya kambadhala okukala ye na iikala iiwanawa! (2 Tim. 3:2) Ohatu ulike iikala iiwanawa uuna tatu yi metungo lyoshigongi nengungumano nonelandulathano uuna omiyelo dhe egululwa nosho wo mokuyalekela iipundi owala iilyo yomaukwanegumbo getu nenge mboka twe ya pamwe nayo miiyenditho yetu nosho wo aakonakonimbiimbeli yetu. Ohatu pulakene komunashipundi uuna e tu lombwele tu kuutumbe opo tu pulakene komusika ndjoka hayi tetekele omutumba kehe. Sa oshimpwiyu opo ongodhi yoye yopeke niilongithomwa iikwawo kaayi piyaganeke yakweni pethimbo lyomutumba. Oshi li wo nawa ngele itatu popi noitatu tumu omatumwalaka, okukala itaatu li nenge tatu endaenda mehala lyoshigongi nopwaahe na etompelo lyasha pethimbo lyomutumba.
7. Ongiini tatu vulu okutalalekwa nosho wo okutalaleka aamwatate pethimbo lyoshigongi?
7 Eendathano tali talaleke: Iigongi ohayi kala ompito ombwanawa tu nyanyukilwe uukumwe nosho wo uumwayinathana wopaKriste oshinima shoka hashi tu talaleke. (Eps. 133:1-3) Omolwashike itoo katuka oonkatu e to ‘egulula omutima gwoye’ wu tseyathane naamwatate naamwameme mboka ya za komagongalo galwe? (2 Kor. 6:13) Oto vulu okwiitulila po elalakano opo wu tseye omuntu omupe gumwe nenge uukwanegumbo wumwe esiku kehe. Ethimbo lyomuha otali ka kala ompito yo opala oku shi ninga. Etelela omwiha gwoye opo pethimbo lyefudhopo wu vule okunyanyukilwa eendathano nayalwe, pehala lyokuya ishewe wu ka konge iikulya palwe. Shika otashi ke tu pa ompito tu pange uukuume tawu kalelele nayalwe.
8. Omolwashike twa pumbwa okwiiyamba tu longe pethimbo lyoshigongi, nongiini tatu vulu oku shi ninga?
8 Ihatu kala tuu twa talalelwa ngele tatu longo pamwe noitaali ooyakwetu miilonga iiyapuki! Mbela oto vulu okwiiyamba wu kwathele moshikondo shontumba nenge wu kwathele egongalo lyeni uuna li li molufo lwokwopaleka? (Eps. 110:3, KB) Ngele ku na oshinakugwanithwa sha sha, oto vulu okuya kOshikondo shIilonga yOkwiiyamba pehala lyoshigongi. Ngele oshilonga otashi longwa kaantu oyendji, ohashi kala oshipu noshinyanyudha.
9. Omolwashike eihumbato neholokopo lyetu li na okukala ewanawa pethimbo lyoshigongi?
9 Eihumbato lyetu ohali talaleke aatali: Omasiku agehe gatatu otu na okwiihumbata nawa pethimbo lyoshigongi nosho wo konima ngele sha piti mo. Mboka taye tu tala pethimbo sho tu li moshilando moka tamu ningilwa oshigongi naya mone kutya pokati ketu naamboka kaaye shi Oonzapo opu na eyooloko. (1 Pet. 2:12) Otu na okuzala nokwiiyopaleka momukalo tagu simanekitha Jehova pethimbo lyoshigongi, uuna tu li pomahala getu nosho wo uuna tatu yi koongeshefa. (1 Tim. 2:9, 10) Ngele otwa kala twa zala uukalata wetu woshigongi, aatali otaye ke tu ndhindhilika kutya otu li Oonzapo dhaJehova. Shika otashi vulika shi tu pe ompito tu ya lombwele kombinga yoshigongi shetu nenge tu ya pe uunzapo wa gwedhwa po.
10. Ongiini tatu vulu okushilipaleka kutya aaniilonga momahala gaayenda nosho wo moka hamu landithwa iikulya oye na etaloko ewanawa lyoshigongi shetu?
10 Ongiini tatu vulu okulongela kumwe naaniilonga mboka haya longo momahala gaayenda nenge moka hamu landithwa iikulya? Ngele otwa pumbwa ehala lyokukala, natu pule owala ehala lye tu eleka, opo wo yalwe nayo ya vule okumona omahala gokukala. Ngele omahala moka tatu ka kala omu udha pethimbo ndyoka twa hala okuya mo nenge oku ka futa, otu na okuulika eidhidhimiko nosho wo iikala iiwanawa. (Kol. 4:6) Mpoka shi li omukalondjigilile nohashi ningilwa mboka taya yakula momahala gokukala nogokulanditha iikulya natu ya pe olupandu ndoka haya pewa ngele yetu humbatitha ko, yo opaleka omahala getu nosho wo ngele ye tu pe omayakulo galwe.
11. Iimoniwa yini tayi ulike kutya otatu vulu okugandja uunzapo okupitila meihumbato lyetu ewanawa?
11 Eihumbato lyetu ewanawa pethimbo lyoshigongi ohali gumu yalwe ngiini? Omuwiliki gwehala limwe moka mwa li oshigongi okwa popi moshifokundaneki a ti: “Aantu oye na omikalo omiwanawa. Ohatu kala twa nyanyukwa oku ya pa ehala lyetu omumvo kehe.” Omumvo gwa zi ko omulumentu gumwe ngoka kee shi Onzapo okwa li a kanithile ondjato ye yiimaliwa mohotela yimwe moka mwa li mu na aantu ye ya koshigongi. Ondjato oya li ya toolwa kugumwe gwomOonzapo e te yi pe menindjela gwohotela, pamwe naashihe shoka sha li mo. Menindjela okwa lombwele mwene gwondjato a ti: “Owu na elago molwaashoka mohotela omwa li mu udha Oonzapo dhaJehova ndhoka dhi na oshigongi shadho popepi [nohotela]. Andola okwa li hasho, ando otashi vulika ondjato yoye ino yi mona we.”
12. Sho oshigongi shoshitopolwa tashi hedha popepi, otu na okwiitulila po elalakano lini, nomolwashike?
12 Oshigongi shoshitopolwa shonuumvo otashi hedha popepi. Ethimbo olindji noonkambadha dha mana mo odha longithwa opo opolohalama yasho yi kale tayi talaleke. Shi ninga elalakano lyoye wu kale po omasiku agehe gatatu, nokukala wi ilongekidha wu ka pulakene shoka Jehova nehangano lye ye ku longekidhila. Kala wa tokola toko wu talaleke yalwe okupitila miikala yoye iiwanawa, meendathano tali nyanyudha nomeihumbato lyoye ewanawa. Opo ihe ngoye mwene nosho wo yalwe otamu ka kala mu uvite ngaashi omukiintu gumwe ngoka a li a kala poshigongi shoshitopolwa omumvo gwa zi ko ngoka a nyola a ti: “Itandi dhimbulukwa oshiningwanima shimwe shituntula shi vule shika.”
[Oohapu dha simana pepandja 4]
Ngaashi hatu shi ningi shito, ohatu tameke noshikonga shokuhiya yalwe koshigongi omanga ku na iiwike itatu
[Oohapu dha simana pepandja 6]
Otu na okuzala nokwiiyopaleka momukalo tagu simanekitha Jehova pethimbo lyoshigongi, uuna tu li pomahala getu nosho wo uuna tatu yi koongeshefa
[Oohapu dha simana pepandja 7]
Kala wa tokola toko wu talaleke yalwe okupitila miikala yoye iiwanawa, meendathano tali nyanyudha nomeihumbato lyoye ewanawa
[Oshimpungu pepandja 4]
Omadhimbulukitho gOshigongi shOshitopolwa sho 2011
◼ Ethimbo lyopolohalama: Opolohalama yoshigongi oyi li ngaashi tashi landula. Etitano opolohalama otayi tameke po 9:00 sigo 4:15, mOlyomakaya 9:00 sigo 4:30, nomOsoondaha 9:00 sigo 3:05. Ngele omunashipundi okwa tseyitha kutya omusika ndjoka hayi tetekele omutumba otayi ka tameka, atuheni natu kaleni omutumba opo opolohalama yi tameke momukalo tagu simanekitha.
◼ Opaakinga: Pomahala agehe giigongi mpoka opaakinga yi li metonatelo lyetu, iiyenditho otayi ka thikama nopwaahe na okufuta nomelandulathano. Molwaashoka olundji oopaakinga odha ngambekwa, napu longekidhwe ehala mpoka iiyenditho mbyoka tayi e ta owala aantu koshigongi nokushuna tayi thikama.
◼ Omahala gokukala: Aauvithi mboka ya pumbwa omahala gokulala oye na okuudhitha ofooloma yedhina Special Needs Room Request (CO-5) ya kongelwe omahala. Okomitiye yIilonga yEgongalo oyi na okutala ngele aauvithi oya gwanitha po iipumbiwa tayi landula omalombwelo ngoka ge li mofooloma moka nosho wo montumwafo yo 14 Desemba 2010 ndjoka ya nyolelwa olutu aluhe lwaakuluntugongalo. Esiloshimpwiyu ndika otali pewa owala aauvithi mboka ye na edhina ewanawa noyana mboka hayi ihumbata nawa.
◼ Okuyaleka omahala: Omahala gokukuutumba otaga vulu owala okuthigilwa mboka we ya pamwe nayo mosheenditho shimwe nenge mboka mu li nayo megumbo limwe nosho wo aakonakonimbiimbeli yoye. — 1 Kor. 13:5.
◼ Omwiha: Etelela omwiha gwoye opo ku ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokutalaleka iinima hoka taka vulu okutulwa kohi yoshipundi shoye. Oondjato oonene dhokutalaleka iinima dhomaukwanegumbo odhi na okutulwa pehala mpoka tamu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.
◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho kiilonga yeuvitho muuyuni auhe pOshinyanga shUukwaniilwa nenge poshigongi. Ngele owa hala okuyambidhidha notyeke, shilipaleka nOkomitiye yOshigongi kutya oto yi tumu ko-account yini.
◼ Iiponga nekwatho lyomeendelelo lyopaunamiti: Uuna pwa holoka ompumbwe ye endelela yopaunamiti, lombwela omuyakuli ngoka e li popepi a lombwele nziya oshikondo shEkwatho lyOtango lyOpaunamiti opo aaniilonga mboka ya pyokoka ya gandje ekwatho noya tale kutya onkalo oya kwata miiti shi thike peni.
◼ Omiti dhokupanga: Ngele owu na omiti we dhi pewa kundohotola ndhoka ho longitha, etelela dha gwana molwaashoka pehala lyoshigongi itadhi ka kala po.
◼ Oongaku: Omumvo kehe ohapu holoka iiponga mbyoka hayi etithwa koongaku. Oshi li nawa okuzala oongaku ndhoka to vulu okulonda nadho ootalapa nokweenda wa manguluka.
◼ Okukwatela uungalo: Uuna to kwata shoka tashi ningwa poshigongi ino tula iilongitho yoye kwaambyoka yoshigongi, na ku na okupiyaganeka yalwe sho to shi ningi.
◼ Uutemba wokulonga aanona okweenda: Uutemba mboka kawu na okweetwa mehala lyoshigongi. Ihe uutemba mboka wokukuutumba aanona ya mangelwa mo owa pitikwa okukala ontega naavali.
◼ Omagadhi gokwiishasha: Iigongi oyindji ohayi ningilwa momahala ngoka kaage na omakende nohamu longithwa owala omashina gokugandja ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
◼ Oofooloma dhokulandula omuntu: Ofooloma hayi ithanwa Please Follow Up (S-43) oyi na okulongithwa okugandja uuyelele kombinga yakehe ngoka u ulika ohokwe sho a pewa uunzapo wontukuluka pethimbo lyoshigongi. Omuuvithi kehe ne etelele yimwe nenge mbali koshigongi. Oofooloma ndhoka dhu udhithwa odhi na okugandjwa pondunda yomambo nenge kuamushanga gwegongalo ngele wa galuka koshigongi. — Tala Uukalele Wetu wUukwaniilwa waNovomba 2009, ep. 4.
◼ Oorestolanda: Simanekitha edhina lyaJehova mokwiihumbata nawa poorestolanda. Pomahala gamwe oshi li omukalondjigilile okugandja olupandu lwokamaliwa koopersenda 10 sigo 15, shi ikolelela keyakulo.
◼ Iilonga yOkwiiyambo: Okukala poshigongi otaku ke tu etela enyanyu enene, unene tuu ngele otwa kutha ombinga miilonga yokwiiyamba. (Iil. 20:35) Kehe ngoka a hala iilonga yokwiiyamba na ye kOshikondo shIilonga yOkwiiyamba poshigongi. Aanona mboka ye li meni lyoomvula 16 nayo otaya vulu okukwathela poshigongi taya longo metonatelo lyaavali nenge lyaatekuli yawo nenge lyaakuluntu yamwe ngele oya pewa epitikilo kugumwe gwomaavali.
◼ Omaimbilo: Omagongalo otaga vulu okwiilongekidha komeho yethimbo omaimbilo ngoka taga ka imbwa poshigongi. Omaimbilo gomEtitano: 5, 18, 31, 30, 86, nosho wo 19. MOlyomakaya: 93, 40, 59, 24, 89, nosho wo 134. MOsoondaha: 109, 99, 133, 69, 64 nosho wo 2.
[Oshimpungu pepandja 5]
Ongiini tatu vulu okugandja okafo kehiyo?
Opo tu longe oshitopolwa oshinene, otu na okupopya paufupi. Konima yepopitho otatu vulu tu tye: “Otwi ipyakidhila nokuhiya aantu koshigongi shoka tashi ka dhanwa muuyuni auhe. Taamba okafo koye. Muko omu na uuyelele wa gwedhwa po kombinga yoshigongi.” Okafo kehiyo oke na ethano tali hokitha komeho yako, onkee ano sho to ka gandja ethano nali kale lya taalela komunegumbo. Popya nehwamo. Uuna to gandja okafo kehiyo momahuliloshiwike, mpoka tashi opalele gandja wo iifo.