Oshigongi shOshitopolwa oshi li ethimbo lyokulongelakalunga nenyanyu
1. Iituthi yAaisraeli oya faathana ngiini niigongi yetu yoshitopolwa?
1 Josef, Maria noyana nosho wo yalwe oya li ye na ondjigilile yokuya koshituthi shokomumvo kuJerusalem. Ngele ethimbo ndyoka lya thiki oya li haya thigi po iilonga yawo yesiku kehe nokugandja eitulomo koshituthi shopambepo shoka sha simana noonkondo monkalamwenyo yawo. Poshituthi shoka oya li haya mono ompito yokutedhatedha nokupopya shi na ko nasha nuuwanawa waJehova nokulesha Ompango ye. Oshigoshi shOshishitopolwa shoka tashi landula otashi ke tu pa ompito ya faathana yokulongela Jehova nenyanyu.
2. Oshike tu na okuninga mokwiilongekidhila oshigongi shoshitopolwa shoka twa tegelela?
2 Owa pumbwa okwiilongekidha: Opo Jesus nuukwanegumbo waandjawo ya thike kuJerusalem, oya li haye ende ookilometa 200 lwaampono okuya nokugaluka. Nonando katu shi kutya Josef naMaria oya li ye na aanona yangapi, osha yela kutya oya li haya ningi oonkambadhala yi ilongekidhile olweendo ndoka. Mbela owa ninga omalongekidho wu ka kale omasiku agehe gatatu poshigongi shoshitopolwa shoka twa tegelela? Otashi vulika wa pumbwa okutula mo efudho kiilonga nenge okupopya nomuhona gwoye nenge okulombwela aalongisikola kutya omasiku ngoka aamwoye itaye ke ya kosikola. Mbela owa longekidha nale ehala mpoka to ka kala? Mbela oto vulu okukwathela gumwe megonga lyeni ngoka a pumbwa ekwatho a vule okukala poshigongi? — 1 Joh. 3:17, 18.
3. Omolwashike tatu tile kutya iituthi yAaisraeli oya li ompito ombwanawa yokutungathana?
3 Eendathano tali tungu: Aajuda oya li haya mono ompito yokweendathane nokutungathana naalongelikalunga ooyakwawo piituthi yawo. Jesus nuukwanegumbo waandjawo oya li haya kala ya hala oku ka kala pamwe nookuume kawo mboka ye etha nale. Oya li wo haya nyanyukilwa ompito yokupanga uukuume nAajuda nosho wo naamboka ye ya koshituthi kaaye shi Aajuda mboka taye ende pamwe nayo mondjila okuya nokuza kuJerusalem.
4. Ongiini tatu ku ulika kutya otwa pandula uukumwe wuumwayinathana wopaKriste?
4 Pehala lyoku tu nyanyangidhila uuyelele mboka miileshomwa, omupiya omudhiginini nomunandunge ohe tu longekidhile iigongi yoshitopolwa nelalakano lyokugongala pamwe opo tu tsaathane omukumo nokupulakena kiipopiwa. (Heb. 10:24, 25) Onkee ano, kambadhala wu thike kuyele poshigongi esiku kehe opo wu nyanyukilwe eendathano nayalwe omanga omusika ndjoka hayi tetekele omutumba inaayi tameka. Etelela omwiha gwoye opo kuu ka thige po ehala lyoshigongi pethimbo lyefudhopo wu ka konge iikulya. Kungeyi, oto ka mona ompito yokupopya nokweendathana naantu oyendji. Uukumwe wuumwayinathana wopaKriste owu li omagano ga za kuJehova ngoka tu na okupandula aluhe. — Mika 2:12.
5. Oshike tashi ke tu kwathela tu mone uuwanawa mopolohalama?
5 Ethimbo lyokundungikwa: Jesus okwa li ha yi kiituthi yopambepo omanga e li omunonalela opo i ilonge kombinga yaHe gwomegulu. (Luk. 2:41-49) Oshike tashi ke tu kwathela paumwene nomaukwanegumbo getu tu mone uuwanawa miitopolwa mbyoka tayi ka gandjwa? Uuna iipopiwa tayi gandjwa, natu kale twa kuutumba noinatu kala tatu nongonenathana. Sa oshimpwiyu ongodhi yoye yopeke niilongithomwa iikwawo kaayi ku piyaganeke nosho wo yakweni. Kala wa tala komupopi nokunyola omaidhimbulukitho paufupi. Uukwanegumbo nawu kuutumbe pamwe opo aavali ya mone ngele oyana otaya pulakene ngaa. Longitha ethimbo lyokongulohi wu kundathane nayalwe iipopiwa mbyoka ye ku tunga.
6. Oshike tu na okukaleka momadhiladhilo kombinga yomizalo dhetu?
6 Omizalo: Aahalithi aakwiilonga mondjila oya li taya vulu okudhimbulula aavali naamwayina yaJesus nAajuda yalwe mboka ya li molweendo okuya nokuza koshituthi, molwaashoka oya li haya kala ya zala oondjendjelela dhi na oongodhi oombulau koonkotso dhoonguwo dhawo. (Num. 15:37-41) Nonando Oonzapo kadhi na omuzalo gwontumba gwi ilile, odha tseyika kutya ohadhi zala oonguwo dha yela nawa nodho opala. Otu na okukala twi iyopaleka nawa ngele tatu yi nenge tatu zi koshigoni nomanga shi li metifa. Ngele otwa zalulula konima yopolohalama natu zale oonguwo ndhoka tadhi simanekitha Jehova nokukala twa zala okakalata koshigongi. Uuna tatu shi ningi, otatu ka kala twa yooloka ko kwaamboka kaaye shi Oonzapo notashi ka gandja uunzapo kwaamboka taye tu tala.
7. Omolwashike tu na okwiiyamba tu longe piigongi?
7 Aaiyambi oya pumbiwa: Opo oshigongi shi ende nawa, opwa pumbiwa aalongi oyendji. Mbela oto ki iyamba wu kwathele? (Eps. 110:3) Iilonga mbyoka hayi longwa piigongi oyi li iiyapuki notayi gandja uunzapo uuwanawa. Mwene gwehala limwe moka mwa li mwa ningilwa oshigongi okwa li a kumwa kaaiyambi sho tayo opaleke ehala e ta nyola ta ti: “Onda hala oku mu pandula omolwoshinima oshikumithi shoka inaandi mona nando onale. Ohandi uvu kutya Oonzapo dhaJehova ohadhi thigi omahala moka dha li tadhi ningile oshigongi shadho ga yela shi vulithe nokuli sho hadhi ga adha. Ne nehangano lyeni omwo opaleka nawa ehala ndika li kale tali vulu okulongithwa kwaayehe, naamboka ya li tayo opaleke oya li ya nyanyukwa sho taye shi ningi momukalo ngoka inaandi mona nando onale.”
8. Ompito yini yokugandja uunzapo ye egulukila aanashigongi?
8 Ompito yokugandja uunzapo: Oyendji moshilando moka mu na oshigongi otaya ka ndhindhilika kutya omwe ya aataleli po ya zala uukalata woshigongi noyo opala. Shika otashi ke ya ningitha ya kale ya hala okutseya kutya otse oolye naashika otashi ke tu pa ompito yoku ya lombwela kombinga yoshigongi. Okamati koomvula ne oka li ka faalele korestolanda oshileshomwa shoka opo sha piti poshigongi noku shi ulukila omuyakuli. Shika osha li sha gandja ompito opo aakuluntu yako ya hiye omukiintu ngoka koshigongi.
9. Ongiini tatu vulu okuholela olupandu ndoka Jesus nuukwanegumbo waandjawo ya li ye na omolwomagano gopambepo gaJehova?
9 Aajuda mboka ya li ya hala okwiilonga kombinga yaJehova oya li haya kala ya nyanyukilwa okukala piituthi mbyoka ya li haya dhana. (Deut. 16:15) Jesus nuukwanegumbo waandjawo oya li haya kala ya nyanyukilwa okuninga omaiyambo opo ya kale piituthi mbika nokumona uuwanawa muyo. Natse ohatu pandula oshigongi shetu shoshitopolwa notwe shi tala ko shi li omagano ga za kuTate yetu gwomegulu omunahole. (Jak. 1:17) Otu na okutameka ngashingeyi okwiilongekidhila ethimbo ndika lyokomumvo lyokulongela Jehova nenyanyu.
[Oshimpungu pepandja 6, 7]
Omadhimbulukitho gOshigongi shOshitopolwa
◼ Ethimbo lyopolohalama: Opolohalama yoshigongi shoshitopolwa otayi tameke 9:00 gwongula onene. Etitano opolohalama otayi pu 4:15 komatango, mOlyomakaya 4:30 nomOsoondaha 3:20. Ngele omusika ndjoka hayi tetekele omutumba ya tameke, atuheni natu kaleni omutumba opo opolohalama yi tameke momukalo tagu simanekitha Jehova.
◼ Opaakinga: Piigongi ayihe mpoka opaakinga tayi ka kala metonatelo lyaamwatate, iihauto otayi ka thikama momukweyo nopwaahe na ofuto yasha. Molwaashoka olundji oopaakinga inadhi gwana, mboka ye na iihauto otaya vulu okweenda miihauto yooyakwawo opo ku ngambekwe omwaalu gwiihauto.
◼ Omahala gokulala: Aauvithi mboka ya pumbwa omahala gokulala oye na okuudhitha ofooloma yedhina Special Needs Room Request (CO-5) ya kongelwe omahala. Okomitiye yIilonga yEgongalo oyi na okutala ngele aauvithi oya gwanitha po iipumbiwa mokulongitha omalombwelo ngoka ge li mofooloma moka nosho wo montumwafo yo 15 Juli 2009 ndjoka ya nyolelwa olutu aluhe lwaakuluntugongalo. Esiloshimpwiyu ndika otali pewa owala aauvithi mboka ye na edhina ewanawa nosho wo aanona yawo mboka hayi ihumbata nawa.
◼ Okuyaleka omahala: Omahala gokukuutumba otaga vulu owala okuthigilwa mboka we ya pamwe nayo mosheenditho shimwe nenge mboka mu li nayo megumbo limwe nosho wo aakonakonimbiimbeli yoye. — 1 Kor. 13:5.
◼ Omwiha: Etelela omwiha gwoye opo kuu ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokutalaleka iinima hoka taka vulu okutulwa kohi yoshipundi shoye. Oondjato oonene dhokutalaleka iinima dhomaukwanegumbo odhi na okutulwa pehala mpoka tamu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.
◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho giilonga yeuvitho muuyuni auhe pOshinyanga shUukwaniilwa nenge koshigongi. Ngele owa hala okuyambidhidha notyeke, shilipaleka nOkomitiye yOshigongi kutya openi wu na oku yi tuma.
◼ Iiponga nekwatho lyomeulumompumbwe lyopaunamiti: Uuna pwa holoka ompumbwe ye endelela yopaunamiti, lombwela omuyakuli ngoka e li popepi a lombwele nziya oshikondo shEkwatho lyOtango lyOpaunamiti opo aaniilonga mboka ya pyokoka ya gandje ekwatho noya tale kutya onkalo oya kwata miiti shi thike peni.
◼ Oongaku: Omumvo kehe ohapu holoka iiponga mbyoka hayi etithwa koongaku. Oshi li nawa okuzala oongaku ndhoka to vulu okulonda nadho ootalapa nokweenda wa manguluka.
◼ Okukwatela uungalo: Uuna to kwata shoka tashi ningwa poshigongi ino tula iilongitho yoye kwaambyoka yoshigongi, noku na okupiyaganeka yalwe sho to shi ningi.
◼ Uutemba wokulonga aanona okweenda niipundi hayi gonywa: Uutemba mboka niipundi mbyoka hayi gonywa kayi na okweetwa mehala lyoshigongi. Ihe uutemba wokukuutumba aanona ya mangelwa mo owa pitikwa okukala ontega naavali.
◼ Omagadhi gokwiishasha: Iigongi oyindji ohayi ningilwa momahala kaage na omakende nohamu longithwa owala omashina gokugandja ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
◼ Ofooloma yokulandula omuntu: Ofooloma hayi ithanwa Please Follow Up (S-43) oyi na okulongithwa okugandja uuyelele kombinga yakehe ngoka u ulika ohokwe sho a pewa uunzapo wontukuluka pethimbo lyoshigongi. Omuuvithi kehe ne etelele yimwe nenge mbali koshigongi. Oofooloma ndhoka dhu udhithwa odhi na okugandjwa pondunda yomambo nenge kuamushanga gwegongalo lyeni ngele wa galuka koshigongi. — Tala Uukalele Wetu wUukwaniilwa waNovomba 2009, epandja 4.
◼ Oorestolanda: Simanekitha edhina lyaJehova mokwiihumbata nawa poorestolanda. Pomahala gamwe oshi li omukalondjigilile okugandja olupandu lwokamaliwa koopelesenda 10 sigo 15.
◼ Iilonga yokwiiyamba: Otatu ka kala twa nyanyukilwa shoka tatu ka mona poshigongi, ihe otatu ka kala twa nyanyukwa unene ngele tatu iyamba tu kwathele miilonga mbyoka tayi ka kala po. (Iil. 20:35) Kehe ngoka a hala okwiiyamba ota vulu okuya koshikondo ‘shiilonga yokwiiyamba’ poshigongi. Aanona mboka ye li kohi yoomvula 16 nayo otaya vulu okukwathela ngele otaya wilikwa komuvali, komutonateli nenge komukuluntu gwontumba.
◼ Omaimbilo: Oshi li nawa ngele omagongalo tagi idheula omaimbilo goshigongi komeho yethimbo. Omaimbilo gEtitano 118, 18, 113, 91, 88 no 75. GOlyomakaya 92, 85, 60, 65, 69 no 48. GOsoondaha 51, 63, 106, 16, 49 neti- 2.