Owi ilongekidhila tuu oshituthi shopambepo?

1. Mokulongekidha oshituthi omwa kwatelwa shike?

¹ Oshituthi ohashi pula eilongekidho olindji. Iikulya oyi na okulandwa nokutelekwa nawa opo yi liwe. Aatopoli oye na okulongekidhwa. Natango, ehala mpoka iikulya tayi ka lilwa oli na okulongekidhwa. Aayenda oye na wo okwiilongekidha, unene tuu mboka taya zi kokule. Nonando otashi pula iilonga oyindji, okulya iikulya iitoye notayi tungu pamwe nookuume nonuukwanegumbo, osho unene sha simana. Masiku Oonzapo dhaJehova muuyuni auhe otadhi ka gongala momangathithi omanene nomashona dhi dhane oshituthi shopambepo, shoka shi li oshigongi shoshitopolwa shi na oshipalanyolo “Kaleni mwa tonata.” Omalongekidho gopolohalama oge li nale metifa noge li pokupwa. Atuheni otwa hiywa. Opo tu ka kale po nokutungwa pambepo, otu na wo okwiilongekidha. — Omayel. 21:5.

2. Ngele otwa hala tu kale omasiku agehe poshituthi shoka shopambepo, otu na okuninga shike?

² Mona uuwanawa owundji: Mbela owa ninga nale omalongekidho wu kale omasiku agehe poshituthi shika shopambepo? Ngele osha pumbiwa, lombwela omuhona gwoye kutya oto ka kala poshigongi esiku tashi tameke sigo esiku tashi hulu. Mbela owa longekidha nale osheenditho oku ku fala nehala mpoka to ka kala? Aakuluntugongalo naya shilipaleke kutya aakulupe nosho wo aankundi nayalwe mboka ya pumbwa ekwatho oya silwa oshimpwiyu. — Jer. 23:4; Gal. 6:10.

3. Omolwashike kaatu na okuya koshigongi shopaigwana hoka inaatu hiywa?

³ Miilongo yimwe otamu ka kala iigongi yopaigwana, notu na okutseya kutya opu na omagongalo nosho wo aantu ya za kiilongo yimwe mboka ya hiywa shu ukilila. Mokuninga omalongekidho ngoka, oshitayimbelewa osha yalula nawa kutya aantu ye thike peni ye na okuhiywa, shi ikwatelela kiipundi mbyoka yi li po nosho wo oondunda dhohotela. Ngele aauvithi oya yi koshigongi shopaigwana hoka inaaya hiywa, otashi vulika shi ka udhe sha pitilila.

4. Oshike tashi ke tu kwathela tu ilongekidhile opolohalama kehe siku?

⁴ Ilongekidha wu thike kuyele poshigongi esiku kehe wu konge oshipundi shoye manga opolohalama inaayi tameka. Longitha ominute dhontumba wu tale opolohalama yoye manga omutumba inaagu tameka. Otashi ke ku kwathela wu longekidhe omutima gwoye shi na ko nasha nuuyelele mboka tawu ka gandjwa. (Esra 7:10) Uuna omunashipundi a tseyitha omusika yi tameke, pulakena kuyo nokwiilongekidha wu kale peimbilo lyotango negalikano.

5. Ongiini omaukwanegumbo taga ka mona uuwanawa mopolohalama?

⁵ Uuna uukwanegumbo wa kuutumba pamwe, aavali otaya ka shilipaleka kutya oyana otaya pulakene neitulomo kopolohalama. (Deut. 31:12) Kehe gumwe na landule mOmbiimbeli ye sho omanyolo taga leshwa. Okuninga omaidhimbulukitho paufupi otashi ke ku kwathela wu pulakene nawa. Shoka wa nyola otashi ke ku kwathela wu dhimbulukwe iitsa ya simana yiipopiwa. Mpoka inaashi pumbiwa ka tu na okukala tatu nongonenathana pethimbo lyomutumba nenge tatu endaenda. Ino piyaganeka yalwe nongodhi yopeke pethimbo lyopolohalama. Konima yomutumba kehe, omolwashike itoo kundathana nayalwe shoka wa pandula mopolohalama?

6. Ompito yi ikalekelwa yini tu na poshigongi shoshitopolwa, nongiini tatu vulu oku yi nyanyukilwa nawa?

⁶ Poshigongi shoshitopolwa otu na ompito yokunyanyukilwa eendathano pamwe naamwatate naamwameme shoka ihaashi ningwa muuyuni. (Eps. 133:1-3; Mark. 10:29, 30) Omolwashike itoo ningi oonkambadhala opo mu tseyathane naamboka ya kuutumba popepi nangoye nokukundathana nayo pethimbo lyomwiha? Oshi li nawa okweetelela omwiha nokukala pehala lyoshigongi shi vulithe okuya kositola yiikulya. Shilipaleka kutya ompito ndjoka yokutsaathana omukumo itayi ku pitilile po. — Rom. 1:11, 12.

7. Otu na okwiilongekidha ngiini kombinga yoonguwo ndhoka tatu ka zala?

⁷ Omizalo: Ndhindhilika kutya Jehova okwa li a lombwele Aaisraeli ya tungile oondjendjelela koonkotso dhomizalo dhawo, nongodhi ombulau kondjendjelela kehe. (Num. 15:37-41) Shika osha li ondhimbulutho kutya yo oye li oshigwana sha yapulilwa Jehova. Kunena, okuzala nawa poshigongi otashi ke tu yoolola ko kuuyuni mbuka. Otashi ka gandja uunzapo kwaamboka taye tu mono ngele oshigongi sha piti mo. Onkee ano, owu na okudhiladhila komeho yethimbo kombinga yoonguwo ndhoka to ka zala.

8. Ongiini tatu vulu okuuvithila yalwe manga tu li moshilando moka mu na oshigongi?

⁸ Gandja uunzapo: Otatu vulu okwiilongekidha tu ka gandja uunzapo manga tu li moshilando moka mu na oshigongi. Omumwatate gumwe nomukulukadhi gwe oya li ya yi korestolanda yimwe konima yoshigongi e ta pula omuyakuli a ti: “Mbela owa mona aantu oyendji ya zala uukalata wa fa wetu?” Omuyakuli okwa ti kutya okwe ya mona nokwa li ti ipula kutya uukalata owashike. Shika osha li sha fala moonkundathana, nomumwatate okwa hiya omuyakuli ngoka koshigongi.

9. Ongiini tatu vulu okuulika olupandu kuJehova ngoka e tu hiya koshigongi?

⁹ Nonando aamwatate oyo taya ka gandja iipopiwa ayihe, nokuninga omapulapulo nosho wo omauliko, Tate yetu gwomegulu Jehova, oye Omulongekidhi gwoshituthi shika shokomumvo shopambepo. (Jes. 65:13, 14) Otatu ka ulika olupandu kungoka e tu hiya, uuna tatu kala poshigongi omasiku agehe nokulya oondya dhopambepo ndhoka dha longekidhwa. Mbela owi ilongekidha nale wu ka kale po?

[Oshimpungu pepandja 6]

Omadhimbulukitho gOshigongi shOshitopolwa

◼ Ethimbo lyopolohalama: Opolohalama yoshigongi shoshitopolwa oyi li ngaashi tashi landula: Etitano otayi tameke po 9:00 sigo 4:15, Olyomakaya 9:00 sigo 4:30 nOsoondaha 9:00 sigo 3:30. Opolohalama yoshigongi shopaigwana oyi li ngaashi tashi landula: Etine otayi tameke po 1:20 sigo 4:30, Etitano 9:00 sigo 4:40, Olyomakaya 9:00 sigo 4:15 nOsoondaha 9:00 sigo 3:50. Ngele omusika ndjoka hayi tetekele omutumba ya tameke, atuheni natu kaleni omutumba opo opolohalama yi tameke momukalo tagu simanekitha Jehova.

◼ Opaakinga: Pomahala agehe giigongi, omahala gokuthikama iihauto otaga ka kala metonatelo niiyenditho otayi ka thikama momukweyo mpoka tayi ulukilwa. Molwaashoka olundji oopaakinga odha ngambekwa, napu longekidhwe ehala mpoka iiyenditho mbyoka tayi e ta owala aantu koshigongi nokushuna tayi thikama.

◼ Omahala gokukala: Aauvithi mboka ya pumbwa omahala gokulala oye na okuudhitha ofooloma yedhina Room Request ya kongelwe omahala. Okomitiye yIilonga yEgongalo oyi na okutala ngele aauvithi oya gwanitha po iipumbiwa mokulongitha omalombwelo ngoka ge li mofooloma moka nosho wo montumwafo yo 15 Juli 2009 ndjoka ya nyolelwa olutu aluhe lwaakuluntugongalo. Esiloshimpwiyu ndika otali pewa owala aauvithi mboka ye na edhina ewanawa nosho wo aanona yawo mboka hayi ihumbata nawa.

◼ Okuyaleka omahala: Omahala gokukuutumba otaga vulu owala okuthigilwa mboka we ya pamwe nayo mosheenditho shimwe nenge mboka mu li nayo megumbo limwe.

◼ Omwiha: Etelela omwiha gwoye opo ku ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokutalaleka iinima hoka taka vulu okutulwa kohi yoshipundi shoye. Oondjato oonene dhokutalaleka iinima dhomaukwanegumbo odhi na okutulwa pehala mpoka ta mu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.

◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho kiilonga yeuvitho muuyuni auhe pOshinyanga shUukwaniilwa nenge poshigongi. Ngele owa hala okuyambidhidha notyeke, shilipaleka nOkomitiye yOshigongi kutya openi wu na oku yi tuma.

◼ Iiponga nekwatho lyomeendelelo lyopaunamiti: Aamwatate mboka haya gandja ekwatho lyotango lyopaunamiti ohaya dhengelwa ongodhi muunima wa nathangwa. Uuna pwa holoka ompumbwe ye endelela yopaunamiti, lombwela omuyakuli ngoka e li popepi a lombwele nziya oshikondo shEkwatho lyOtango lyOpaunamiti opo aaniilonga mboka ya pyokoka ya gandje ekwatho noya tale kutya onkalo oya kwata miiti shi thike peni.

◼ Oongaku: Omumvo kehe ohapu holoka iiponga mbyoka hayi etithwa koongaku. Oshi li nawa okuzala oongaku ndhoka to vulu o◼ Okukwatela uungalo: Uuna to kwata shoka tashi ningwa poshigongi ino tula iilongitho yoye kwaambyoka yoshigongi, na ku na okupiyaganeka yalwe sho to shi ningi.

◼ Uutemba wokulonga aanona okweenda niipundi hayi gonywa: Uutemba mboka niipundi mbyoka hayi gonywa kayi na okweetwa mehala lyoshigongi. Ihe uutemba mboka wokukuutumba aanona ya mangelwa mo owa pitikwa okukala ontega naavali.

◼ Omagadhi gokwiishasha: Iigongi yimwe ohayi ningilwa momahala ngoka kaage na omakende nohamu longithwa owala omashina gokugandja ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.

◼ Oofooloma dhokulandula omuntu: Ofooloma hayi ithanwa Please Follow Up (S-43) oyi na okulongithwa okugandja uuyelele kombinga yakehe ngoka u ulika ohokwe sho a pewa uunzapo wontukuluka pethimbo lyoshigongi. Omuuvithi kehe ne etelele yimwe nenge mbali koshigongi. Oofooloma ndhoka dhu udhithwa odhi na okugandjwa pondunda yomambo nenge kuamushanga gwegongalo ngele wa galuka koshigongi. — Tala Uukalele wUukwaniilwa waFebuluali 2005 (wOshiingilisa), epandja 6.

◼ Oorestolanda: Simanekitha edhina lyaJehova mokwiihumbata nawa poorestolanda. Pomahala ogendji oshi li omukalondjigilile okugandja olupandu lwokamaliwa koopersenda 10 sigo 15, shi ikolelela keyakulo.