Oohapu dhaJehova odhi na omwenyo
Omanenedhiladhilo okuza membo lyaHesekiel ontopolwa 1:1–24:27
MOMUMVO 613 K.E.N. omupolofeti Jeremia okwa li muJuda tu uvitha nokwaahenuumbanda ehanagulo lyaJerusalem ndyoka lya li li li popepi nembugaleko lyoshilongo shaJuda. Omukwaniilwa gwaBabilonia Nebukadnezzar okwa li a fala nale Aajuda oyendji muupongekwa. Mokati kawo omwa li omugundjuka Daniel nookuume ke yatatu mboka ya li haya longo muuwa waBabilonia. Oyendji yomAajuda mboka ya li muupongekwa oya li ya kala pomulonga Kebar “muBabilonia.” (Hesekiel 1:1-3) Jehova ka li e etha aapongekwa mboka ya kale kaaye na omutumwa. Okwa li a langeke po Hesekiel gwoomvula 30 a ninge omupolofeti.
Embo lyaHesekiel ndyoka lya li lya pu okunyolwa mo 591 K.E.N., otali hokolola ethimbo lyoomvula 22. Okwa li e li nyola nuukeka. Okwa li a nyola omasiku gomahunganeko ge nokwa popi nokuli kondandalunde esiku nomwedhi nosho wo omumvo moka ga hunganekwa. Oshitopolwa shotango shetumwalaka lyaHesekiel (ontopolwa 1-24) otashi popi unene kombinga yetekopo nehanagulo lyaJerusalem. Moshitopolwa oshitiyali (ontopolwa 25-32) omu na oohapu tadhi pangula iigwana mbyoka ya kundukidha Jerusalem, noshitopolwa shahugunina (ontopolwa 33-48) otashi popi kombinga yokutamukulula elongelokalunga lyaJehova. Oshitopolwa shika tashi kundathana omanenedhiladhilo okuza muHesekiel 1:1–24:27, osha kwatela mo omamoniko, omahunganeko niinyandwa yi na ko nasha naashoka sha li tashi ka ningilwa Jerusalem.
“OTANDI KU NINGI OMULANGELI”
(Hesekiel 1:1–19:14)
Konima owala sho Hesekiel a li a pewa oshilonga she, okwa li a mono emoniko ekumithi lyoshipangelapundi shaJehova. Jehova okwa li e mu lombwele a ti: “Otandi ku ningi omulangeli gwoshigwana Israeli. Ou na oku ya londodha nomalondodho tandi ge ku lombwele.” (Hesekiel 3:17) Hesekiel okwa li a lombwelwa a nyande iinyandwa iyali okuulika nkene ekondeka lyaJerusalem lya li tali ka kala nosho wo iilanduliko yalyo. Jehova okwa li a popi shi na ko nasha noshilongo shaJuda okupitila muHesekiel a ti: “Otandi ka tuma egongamwele, li hanagule po omahala mpoka aantu haya saagelele iimenka.” (Hesekiel 6:3) Aakalimo yomoshilongo okwa li e ya lombwele a ti: “Ehulilo otali adha aantu yoye.”—Hesekiel 7:7.
Mo 612 K.E.N., ombepo yaKalunga oya li ya fala Hesekiel memoniko kuJerusalem. Memoniko moka okwa li a mono iinima iinyanyalithi tayi ningilwa motempeli yaKalunga. Sho Jehova a li a tumu omatangakwiita ge gomegulu (ngoka taga thanekwa ‘kaalumentu yahamano’) opo ga tilile ondjahi ye kaashunimonima mboka, oomboka owala ya li ye na “endhindhiliko moshipala” ya li ya hupu po. (Hesekiel 9:2-6) Ihe tango ‘omakala ga hanya,’ sha hala okutya, etumwalaka lyaKalunga lya hanya lyehanagulo, olya li li na okuhalakanithwa noshilando. (Hesekiel 10:2) Nonando aakolokoshi Jehova ‘ote ke ya geelela shoka ya longo,’ okwa li u uvaneke okugongela Aaisraeli mboka ya li ya halakana.—Hesekiel 11:17-21.
Ombepo yaKalunga oya li ya galulile Hesekiel kuBabilonia. Konima yaashono okwa li a nyanda oshinyandwa shoka tashi thaneke okuya ontuku kwomukwaniilwa Zedekija opamwe naakwashigwana okuza muJerusalem. Aapolofeti aafundja, aalumentu naakiintu nosho wo aalongeli yiikalunga oya li ya pangulwa. Juda osha li sha yelekanithwa nomuti gwomuviinu kaagu na oshilonga shasha. Eyele lyoontsa nomuviinu otali ulike iilanduliko iiwinayi noonkondo mbyoka ya li tayi ka adha Jerusalem sho a kongo ekwatho kuEgipiti. Eyele ndika olya li lya hulu neuvaneko kutya Jehova ‘ota ka tsika okatayi opo ka tsapuka kondundu onde.’ (Hesekiel 17:22) Ihe muJuda omwa li itaamu ka kala we “oondhimbo dhuukwaniilwa.”—Hesekiel 19:14.
Omapulo gopamanyolo taga yamukulwa:
1:4-28—Etemba lyomegulu otali thaneke shike? Etemba otali thaneke oshitopolwa shehangano lyaJehova lyomegulu ndyoka lya thikama po miishitwa iidhiginini yopambepo. Onzo yoonkondo dhalyo oyo ombepo ondjapuki yaJehova. Omulondi gwetemba ngoka ta thaneke Jehova, oku na eadhimo itaali vulu okuyelekwa nasha. Uutamvula uuwanawa otau thaneke kutya ye okwa ngungumana.
1:5-11—Iinamwenyo ine oyo oolye? Hesekiel memoniko lye etiyali lyetemba okwa li a dhimbulula kutya iinamwenyo yi li ine oya li aakerubi. (Hesekiel 10:1-11; 11:22) Memoniko ndika etiyali, okwa li a popi kutya oshipala shontsezi osha fa ‘oshipala shomukerubi.’ (Hesekiel 10:14, OB-1954) Shika oshi li she eleka, molwaashoka ontsezi oyi li endhindhiliko lyoonkondo nomatha naakerubi oyo iishitwa iinankondo yopambepo.
2:6—Omolwashike Hesekiel a li i ithanwa lwiikando ‘omuna gwomuntu’? Jehova okwa li i ithana Hesekiel momukalo nguka opo a dhimbulukithe omupolofeti nguka kutya ye omuntu gwowala, nokungawo okwa li u ulike eyooloko enene ndyoka li li pokati komutumwa gwopantu naKalunga ngoka e li Omugandji gwetumwalaka. Jesus Kristus naye wo okwa li i ithanwa Omuna gwaKalunga lwiikando 80 lwaampono mOmavaangeli, naashika osha li shu ulike sha yela kutya Omuna gwaKalunga okwa li e ya kombanda yevi e li omuntu, ihe hamuntu gwopambepo.
2:9–3:3—Omolwashike ondhinga yembo lyoontakumandjimbo nomahekumuno ya li yi na omulyo omutoye kuHesekiel? Shoka sha li sha ningitha ondhinga yi kale ontoye kuHesekiel osha li iikala ye yi na ko nasha noshilonga she. Hesekiel okwa li a nyanyukilwa okulongela Jehova e li omupolofeti.
4:1-17—Mbela Hesekiel okwa li ngaa a nyanda lela oshinyandwa shoka sha li tashi thaneke ekondeka lyaJerusalem ndyoka lya li tali ke ya? Hesekiel okwa li a pula a pewe sha shi ili shokutelekitha iikulya ye, nokuzimina kwaJehova eindilo lye okwa li ku ulike kutya omupolofeti okwa li a nyanda lela oshinyandwa shika. Okwa li a langele kolumoho lwe omolwoondjo dhuukwaniilwa womazimo omulongo dhuule woomvula 390, okuza petameko lyawo mo 997 K.E.N. sigo opehanagulo lyaJerusalem mo 607 K.E.N. Okwa li a langele kolulyo lwe omolwoondjo dhaJuda dhuule woomvula 40, shoka sha li okuza pethimbo ndyoka Jeremia a li a langekwa po e li omupolofeti mo 647 K.E.N. sigo omo 607 K.E.N. Uule womasiku ngoka agehe 430, Hesekiel okwa li a hupu owala muukulya uushona nomeya, shoka sha li tashi ulike pahunganeko kutya opwa li tapu ka kala ondjala pethimbo lyekondeka lyaJerusalem.
5:1-3—Oshike sha li oshindhindhilikwedhi shi na ko nasha nokukutha kwaHesekiel omafufu gomoshitopolwa ngoka a li e na okuhalakanithila mombepo noku ga dhingila momigoyo dhoonguwo dhe? Shika osha li tashi ulike kutya oshihupe shAajuda osha li tashi ka shuna kuJuda nokutameka ishewe okulongela Kalunga kashili konima yoomvula 70 dhembugaleko lyoshilongo.—Hesekiel 11:17-20.
17:1-24 (Yelekanitha OB-1954.)—Oontsa oonene mbali odho oolye nongiini ondungu yomusendeli ya li ya tewa ko, nolye “okatayi opo ka tsapuka” hoka ka li ka tsikwa kuJehova? Oontsa ndhoka mbali otadhi thaneke aapangeli yaBabilonia naEgipiti. Ontsa yotango oya li ya nambele kondungu yomusendeli, ngoka tagu thaneke omupangeli a za mezimo lyaDavid. Ontsa ndjika oya li ya teya ko ondungu yomusendeli mokupingena po omukwaniilwa Jojakin gwaJuda naZedekija. Nonando Zedekija okwa li a ningi egano lyokukala omudhiginini muJehova, okwa li a ka konga ekwatho kontsa yilwe, omupangeli gwaEgipiti, ihe shika inashi kwatha sha. Okwa li ta ka falwa muupika nokusila muBabilonia. Jehova okwa li wo a teya ko “okatayi opo ka tsapuka,” hoka taka thaneke omukwaniilwa gwopaMesiasa. Okatayi hoka oka li ka tsikwa ‘kondundu ondeendeka,’ sha hala okutya, kondundu yaSioni yomegulu hoka taka ka ninga “omusendeli gwo opala” ngoka okupitila muko evi alihe tali ka lalekwa nuuyamba.—Ehololo 14:1.
Iiyilongomwa kutse:
2:6-8; 3:8, 9 18-21. Katu na okutilithwa kaakolokoshi nenge okweetha oku ya tseyithila etumwalaka lyaKalunga ndyoka lya kwatela mo oku ya londodha. Uuna twa taalelwa kokwaahenakonasha nenge komapataneko, otwa pumbwa okukala twa kola ngaashi emanya lyondiamande. Ihe otu na okukala twa kotoka opo twaaha kale nomitima dha kukuta nokaatu na ohenda. Jesus okwa li u uvitile aantu olukeno mboka a li u uvithile, natse wo otu na okukala hatu inyengithwa kolukeno tu uvithile yalwe.—Mateus 9:36.
3:15. Konima sho Hesekiel a li a pewa oshilonga she, okwa li a yi a ka kale puTel-Abib “omasiku gaheyali” a kumwa, ta tedhatedha etumwalaka ndyoka a li e na okuuvitha. Mbela tse katu na okulongitha ethimbo okukonakona nuudhiginini nosho wo okutedhatedha opo tu uve ko ooshili dhomuule dhopambepo?
4:1–5:4. Hesekiel okwa li a pumbwa a kale omwiifupipiki nomulaadhi opo a nyande iinyandwa iyali yopahunganeko. Natse wo otwa pumbwa okukala aaifupipiki naalaadhi mokugwanitha po kehe oshilonga shoka twa pewa kuKalunga.
7:4, 9, OB-1954; 8:18; 9:5, 10. Inatu pumbwa okutala neho lyohenda mboka taya ka pangulwa kuKalunga nenge okukala tu yu uvitile olukeno.
7:19. Iimaliwa itayi ka kala yi na ongushu yasha uuna Jehova ta ka pangula uuyuni mbuka.
8:5-18. Uushunimonima ohau yono po ekwatathano lyomuntu naKalunga. “Koohapu dhomokana [omushunimonima, NW] ta tula mukwawo moshiponga.” (Omayeletumbulo 11:9) Oshi li pandunge opo twaaha kale nando nedhiladhilo lyokupulakena kaashunimonima.
9:3-6. Okukala twa ndhindhilikwa otashi ti kutya otu li aapiya yaKalunga yi igandja noya ninginithwa notu na uuntu wopaKriste, naashika osha simanenena opo tu vule oku ka hupa “muudhigu uunene.” (Mateus 24:21) Aakriste aagwayekwa mboka taya thanekwa komulumentu e na okakende kohinga otaya kwatele komeho iilonga yokundhindhilika aantu, sha hala okutya, iilonga yokuuvitha Uukwaniilwa nokuninga aantu aalongwa. Ngele otwa hala okukaleka po endhindhiliko lyetu, nena otu na oku ya kwathela nuulaadhi miilonga mbika.
12:26-28. Hesekiel okwa li a lombwelwa a lombwele nokuli mboka ya li taya sheke etumwalaka lye ta ti: “Kapu na nando ohapu [yaJehova] tayi gwile pevi.” Otu na okuninga ngaashi tatu vulu opo tu kwathele yalwe ya kale ye na einekelo muJehova omanga inaa hanagula po uuyuni mbuka.
14:12-23. Oshi li oshinakugwanithwa shakehe gumwe pauhandimwe opo a ka hupithwe. Kapu na gumwe ngoka ta vulu oku shi tu ningila.—Aaroma 14:12.
18:1-29. Kehe gumwe gwomutse oku na okuhumbata iilanduliko yiilonga ye.
“OMAKULUKUMA, OMAKULUKUMA! OTANDI NINGI OSHILANDO OMAKULUKUMA”
(Hesekiel 20:1–24:27)
Momumvo omutiheyali gwuupongekwa, mo 611 K.E.N., aawiliki yaIsraeli yamwe oya li ye ya kuHesekiel ‘ye mu pule ehalo lyaKalunga.’ Okwa li e ya lombwele ondjokonona onde yuunashipotha waIsraeli nokwe ya londodha kutya ‘Jehova ote ke ya pweyela mo egongamwele lye.’ (Hesekiel 20:1; 21:3) Jehova okwa li a lombwele omuleli gwaIsraeli (Zedekija) ta ti: “Ihula oshishani, kutha ko egala. Itashi ka kala we ngaaka. Omufupi ota nenepekwa, nomunene ota fupipikwa. Omakulukuma, omakulukuma! Otandi ningi oshilando omakulukuma. Ihe shika itashi ningwa, sigo ngoka tandi hogolola [Jesus Kristus] a geele oshilando, a thiki. Nena otandi shi mu pe.”—Hesekiel 21:26, 27.
Jerusalem osha li sha pewa ombedhi omolwuulunde washo. Uusama waOhola (Israeli) nowaOholiba (Juda) owa li wa tulwa pomutenya. Ohola okwa li a gandjwa nale “kaaholi ye Aayassur mboka e ya hole unene.” (Hesekiel 23:9) Ehanagulo lyaOholiba olya li popepi. Ekondeka lyuule woomwedhi 18 lyaJerusalem olya li lya tameke mo 609 K.E.N. Lwahugunina sho oshilando sha sindwa, Aajuda oya li taya ka kala ya kumwa noonkondo noya li taya ka kala itaaya vulu okuulika oluhodhi lwawo. Hesekiel ka li e na okulombwela mboka ya li muupongekwa etumwalaka lyaKalunga sigo “ontauki” tayi mu hokololele kutya oshilando osha hanagulwa po.—Hesekiel 24:26, 27.
Omapulo gopamanyolo taga yamukulwa:
21:3—“Egongamwele” ndyoka Jehova a li a pweya mo olyo shike? “Egongamwele” ndyoka Jehova a li a longitha okupangula Jerusalem naJuda olyo omukwaniilwa Nebukadnezzar gwaBabilonia pamwe nomatangakwiita ge. Otashi vulika wo lya li lya kwatela mo oshitopolwa shehangano lyaJehova lyomegulu lya thikama po miishitwa iinankondo yopambepo.
24:6-14—Iikogo mbyoka ya li ya kakatela mombiga otayi thaneke shike? Jerusalem shoka sha li mekondeka osha li sha faathanithwa nombiga. Iikogo mbyoka yi li mo otayi thaneke omikalo dha nyata dhoshilando ndhoka dha li hadhi longwa musho, ngaashi okwaahenuuyogoki, uuholume netikombinzi. Uunene wokwaahenuuyogoki kwasho owa li wu ulikwa mefaathanitho nombiga yi li owala sho ya li ya tulwa pomakala yi lungune ya geta opo iikogo ayihe yi pye ko, ihe inayi pya ko.
Iiyilongomwa kutse:
20:1, 49. Eyamukulo lyaawiliki yaIsraeli olyu ulike kutya oya li ya limbilikwa kwaashoka Hesekiel a li a popi. Ihe katu na nando okukala twa limbililwa omalondodho gaKalunga.
21:18-22. Nonando Nebukadnezzar okwa li ha anekele, Jehova oye a li a shilipaleke kutya omupangeli omupagani okwa li ta ka ponokela Jerusalem. Shika otashi ulike kutya nokuli oompwidhuli itadhi vulu oku ya moshipala aapanguli aakalelipo yaJehova ya gwanithe elalakano lye.
22:6-16. Jehova oku tonde okulundila, uuholume, elongithonayi lyoonkondopangelo nokutaamba oombumbo. Otu na okukala twa tokolatoko okuyanda omayono ga tya ngaaka.
23:5-49. Uukuume wopapolotika mboka wa li wa pangwa kAaisraeli nokAajuda niigwana yilwe owe ya fala mokulongela iikalunga yiigwana mbyoka. Natu kotokeleni okupanga uukuume naakuuyuni hoka taku vulu okuyona po eitaalo lyetu.—Jakob 4:4.
Etumwalaka li na omwenyo noli na oonkondo
Moontopolwa 24 dhotango dhembo lyOmbiimbeli lyaHesekiel itatu ilongo mo tuu iiyilongomwa ya dhenga mbanda! Omakotampango ngoka ga popiwa mo otagu ulike shoka hashi ningitha omuntu kaa hokiwe kuKalunga, nkene tatu vulu okumona esilohenda lye nomolwashike tu na okulondodha aakolokoshi. Ehunganeko li na ko nasha nehanagulo lyaJerusalem otali ulike sha yela kutya Jehova oku li Kalunga ngoka ha ‘lombwele aantu iinima iipeepeka, manga inaayi ningwa.’—Jesaja 42:9.
Omahunganeko ngaashi ngoka ga nyolwa muHesekiel 17:22-24 nosho wo 21:26, 27 oga li tagu ulike kedhikopo lyUukwaniilwa wopaMesiasa megulu. Masiku, okupitila mUukwaniilwa mbuka ehalo lyaKalunga otali ka gwanithwa kombanda yevi. (Mateus 6:9, 10) Otatu vulu okutegelela omalaleko nuuyamba gUukwaniilwa mbuka tu na eitaalo lya kola nuushili kutya otage ke ya. Eeno, “oohapu dhaKalunga odhi na omwenyo nodhi na oonkondo.”—Aahebeli 4:12.
[Ethano pepandja 12]
Etemba lyomegulu otali thaneke shike?
[Ethano pepandja 14]
Okukutha ombinga nuulaadhi miilonga yeuvitho otashi tu kwathele tu kaleke po “endhindhiliko” lyetu