Uupambepo washili ongiini to vulu oku wu mona?
OMUYAPOSTOLI PAULUS okwa nyola a ti: “Okukala pamadhiladhilo guuntu otashi eta eso, ihe okukala mewiliko lyOmbepo otashi eta omwenyo nombili.” (Aaroma 8:6) Noohapu ndhoka omuyapostoli okwa li ta popi kutya okukala omuntu e na uupambepo uuwanawa kashi shi owala oshinima shoka to vulu okuhogolola molwaashoka u shi hole. Pehala lyaashono, oshi li oshinima sha simanenena, molwaashoka otashi ti omwenyo nenge eso. Ihe omeityo lini omuntu e na uupambepo uuwanawa ha mono “omwenyo nombili”? PaMbiimbeli, omuntu a tya ngaaka oha kala e na ombili naye mwene nosho wo naKalunga ngashingeyi nota ka lalekwa nuuyamba nomwenyo gwaaluhe monakuyiwa. (Aaroma 6:23; Aafilippi 4:7) Itashi kumitha sho Jesus a ti: “Aanelago oyo mboka ya tseya ompumbwe yawo yopambepo.”—Mateus 5:3, NW.
Okulesha kwoye oshifo shino otaku ulike kutya ou na ohokwe miinima yopambepo noshi li pandunge oku shi ninga. Ihe omataloko kombinga yoshipalanyolo shika oga yoolokathana noonkondo, onkee ano otashi vulika wi ipule to ti: ‘Uupambepo washili oshike? Nongiini omuntu to vulu oku wu mona?’
“Omadhiladhilo gaKristus”
Kakele kokupopya esimano nomauwanawa gokukala to wilikwa kombepo yaKalunga, omuyapostoli Paulus okwa li e na oshindji okupopya kombinga yuupambepo washili kutya owo shike. Paulus okwa li a yelithile Aakriste yomoshilando shonale Korinto eyooloko pokati komuntu gwopauyuni, sha hala okutya, omuntu ngoka ha landula omahalo gopanyama, nomuntu gwopambepo, sha hala okutya, omuntu ngoka e hole iinima yopambepo. Paulus okwa nyola a ti: “Omuntu gwopauyuni iha taamba shono shOmbepo yaKalunga; oshoka he shi tala osho uugoya.” Mepingathano naashoka, Paulus okwa yelitha kutya omuntu ngoka e na uupambepo uuwanawa oha ndhindhilikwa mokukala e na “omadhiladhilo gaKristus.”—1 Aakorinto 2:14-16, OB-1954.
Okukala u na “omadhiladhilo gaKristus” sho sheneshene otashi ti okukala ‘nomadhiladhilo ga fa gaJesus Kristus.’ (Aaroma 15:5; Aafilippi 2:5, OB-1954) Niitya yimwe, omuntu ngoka e na uupambepo uuwanawa oye ngoka ha dhiladhila ngaashi Jesus nokweenda mondjila ndjoka a li e ende. (1 Petrus 2:21; 4:1) Shi thike ngaa mpoka omuntu ta holele omadhiladhilo gaKristus, opo ngaa pu thike uupambepo we tau kolo nota vulu okumona “omwenyo nombili.”—Aaroma 13:14.
Nkene tatu vulu okutseya “omadhiladhilo gaKristus”
Ihe opo omuntu a kale e na omadhiladhilo gaKristus, tango oku na okukala e ga tseya. Onkee ano onkatu yotango yokukoka pambepo oyo okutseya nkene Jesus ha dhiladhila. Ihe ongiini to vulu okutseya omadhiladhilo gagumwe ngono a li kombanda yevi oomvula 2 000 dha piti? Pashiholelwa, ongiini wi ilonga aantu yomondjokonona yoshilongo sheni? Otashi vulika wa lesha kombinga yawo. Sha faathana, okulesha ondjokonona ya nyolwa yaJesus oku li omukalo gwa simana gwokutseya omadhiladhilo gaKristus.—Johannes 17:3.
Moshinima shaJesus, opu na omahokololo gane gopandjokonona omawanawa taga adhika mOmavaangeli ga nyolwa kuMateus, Markus, Lukas naJohannes. Okulesha omahokololo ngono nuukeka otashi ke ku kwathela wu uve ko nkene Jesus ha dhiladhila, omaiyuvo ge gomeni nosho wo shoka hashi mu inyengitha a katuke oonkatu. Ngele owa kutha ethimbo okutedhatedha kwaashoka wa lesha kombinga yaJesus, oto kala u na ethano momadhiladhilo goye kutya okwa li omuntu a tya ngiini. Nonando owi itala ko nale u li omulanduli gwaKristus, okulesha nokutedhatedha kwa tya ngaaka otaku ke ku kwathela u ‘koke mesilohenda nomokutseya Omuwa gwetu nOmukulili Jesus Kristus.’—2 Petrus 3:18.
Tu na shika momadhiladhilo, natu konakoneni oovelise dhimwe mOmavaangeli tu tale kutya oshike sha ningitha Jesus a kale omuntu e na uupambepo uuwanawa. Opo nduno ipula mwene nkene to vulu okuholela oshiholelwa shono a tula po.—Johannes 13:15.
Uupambepo nosho wo “iiyimati yOmbepo”
Omunyoli gwEvaangeli Lukas okwa ti kutya ombepo ondjapuki yaKalunga oya li ya tililwa Jesus peninginitho nonokutya Jesus okwa li “u udha Ombepo Ondjapuki.” (Lukas 3:21, 22; 4:1) Jesus okwa li wo a thindile maalanduli ye esimano lyokukala taya wilikwa kombepo ondjapuki yaKalunga nenge “oonkondo dhe tadhi longo.” (Genesis 1:2; Lukas 11:9-13) Omolwashike shoka sha simana noonkondo? Omolwaashoka ombepo yaKalunga oyi na oonkondo dhokulundulula omadhiladhilo gomuntu, opo a tameke okukala e na omadhiladhilo ga fa gaKristus. (Aaroma 12:1, 2) Ombepo ondjapuki ohayi imike momuntu uukwatya ngaashi “ohole, enyanyu, ombili, ontalanteni, uukuume, uuwanawa, uudhiginini, engungumano, eidhidhimiko.” Omaukwatya ngoka Ombiimbeli tayi gi ithana “iiyimati yOmbepo,” ohaga ndhindhilikitha omuntu ngoka e na shili uupambepo uuwanawa. (Aagalati 5:22, OB-1954) Osha yela kutya omuntu a tya ngaaka oha wilikwa kombepo yaKalunga.
Jesus okwa li u ulike iiyimati yombepo pethimbo lyuukalele we auhe. Omaukwatya ngaashi ohole, uukuume nuuwanawa oga li gi iwetikile unene tuu momukalo moka a li u ungaunga naambono ya li ya talika ko ye na ondondo yopevi mokati kaantu. (Mateus 9:36) Pashiholelwa, tala oshiningwanima shoka sha hokololwa komuyapostoli Johannes. Otatu lesha taku ti: “Jesus manga a li te ende, okwa mono omulumentu omuposi, nkene tuu a valwa.” Aalongwa yaJesus nayo wo oya li ya mono omulumentu ngoka noya li ye mu tala ko e li omulunde. Oya pula ya ti: “Olye a yono . . . ? Aakuluntu ye nenge oye mwene?” Aashiinda oya li wo haye mu mono, ihe oya li ye mu tala ko e li omuheheli gwowala. Oya li ya pula ya ti: “Omulumentu ngoka haye ngoka a li ha kuutumba ta hehela?” Ihe Jesus okwa li a tala ko omulumentu ngoka omuposi e li gumwe ngoka a pumbwa ekwatho. Okwa li a popi naye nokwe mu aludha.—Johannes 9:1-8.
Oshiningwanima shika otashi ku lombwele shike shi na ko nasha nomadhiladhilo gaKristus? Shotango, Jesus ka li a dhina mboka ya talika ko ye na ondondo yopevi, ihe okwa li u ungaunga nayo nolukeno. Oshitiyali, okwa li a katuka onkatu okukwathela yalwe. Mbela ngoye oto dhiladhila kutya oho landula oshiholelwa shika sha tulwa po kuJesus? Mbela ngoye oho tala ko aantu ngaashi Jesus a li e shi ningi, oku ya kwathela mpoka sha pumbiwa okuhwepopaleka onkalamwenyo yawo noya kale ye na etegameno lyonakuyiwa? Nenge oho ningile owala uuwanawa mboka ya simana nokukala wa dhina mboka inaaya simana? Ngele oho tala ko aantu ngaashi Jesus, oto ningi nawa mokulandula oshiholelwa she.—Episalomi 72:12-14.
Uupambepo uuwanawa negalikano
Omahokololo gomOmavaangeli otagu ulike kutya olundji Jesus okwa li ha galikana kuKalunga. (Markus 1:35; Lukas 5:16; 22:41) Jesus pethimbo lyuukalele we kombanda yevi, okwa li i itulile po ethimbo lyokugalikana. Omulongwa Mateus okwa nyola a ti: “Sho [Jesus] e ya laleke, okwa londo kondundu oye awike, opo a galikane.” (Mateus 14:23) Jesus okwa li a nkondopalekwa koompito ndhoka dhokupopya naHe gwomegulu megalikano meimweneneno. (Mateus 26:36-44) Kunena, aantu mboka haya wilikwa kombepo yaKalunga ohaya kongo oompito dhokupopya naye, ye shi kutya otashi koleke ekwatathano lyawo nOmushiti notashi ya kwathele ya kale ya fa Kristus mokudhiladhila kwawo.
Olundji Jesus okwa li ha longitha ethimbo ele mokugalikana. (Johannes 17:1-26) Pashiholelwa, manga inaa hogolola aalumentu 12 mboka ya li taya ka ninga aayapostoli ye, Jesus ‘okwa li a londo kondundu, a ka galikane, nokwa kala ko uusiku auhe ta galikana Kalunga.’ (Lukas 6:12) Nonando inashi pumbiwa okukala uusiku auhe to galikana, mboka taya wilikwa kombepo yaKalunga ohaya landula oshiholelwa shaJesus. Manga inaaya ninga omatokolo ga kwata miiti monkalamwenyo, ohaya longitha ethimbo lya gwana okugalikana Kalunga, taya pula ewiliko lyombepo ondjapuki mokuninga omatokolo ngono taga koleke uupambepo wawo.
Jesus momagalikano ge okwa li a galikana a mana mo shono natse tu na okuninga momagalikano getu. Tala kwaashono Lukas a nyola kombinga yankene Jesus a li a galikana kongulohi manga inaa sa, sho a ti: ‘Oye okwa adhika kuuwehame uunene nokwa galikana a mana mo. Omazigudhe ngoka ga zi muye, oga li ga fa omata gombinzi noga ndondele pevi.’ (Lukas 22:44) Sho Jesus a li a taalelwa kemakelo enene monkalamwenyo ye yokombanda yevi, okwa li a galikana ‘a mana mo,’ negalikano lye olya li lya yamukulwa. (Aahebeli 5:7) Aantu mboka haya wilikwa kombepo yaKalunga ohaya landula oshiholelwa shaJesus. Ngele ya taalelwa komamakelo omadhigu noonkondo, ohaya galikana ya “mana mo” kuKalunga ya pewe ombepo ondjapuki, ewiliko nosho wo ekwatho.
Molwaashoka osha yela kutya Jesus okwa li ha galikana olundji, itashi kumitha sho aalongwa ye ya li ya hala oku mu holela mwaashoka. Onkee ano oya li ye mu pula ya ti: “Omuwa, tu longa okugalikana.” (Lukas 11:1) Sha faathana kunena, mbono ya lenga iinima yopambepo noya hala okuwilikwa kombepo ondjapuki yaKalunga ohaya landula oshiholelwa shaJesus momukalo moka haya galikana Kalunga. Uupambepo washili negalikano ohayi endele pamwe.
Uupambepo neuvitho lyonkundana ombwanawa
MEvaangeli lyaMarkus, otatu adha mo ehokololo moka Jesus a li a aludha aavu oyendji nokwa li e shi ningi sigo omokati kuusiku. Ongulangula yesiku lya landula ko sho a li ta galikana oye awike, aayapostoli ye oya li ye ya kuye noye mu lombwele kutya aantu oyendji oya li taye mu kongo, tashi vulika ya li ya hala okwaaludhwa. Ihe Jesus okwa li e ya lombwele a ti: ‘Tu yeni momikunda dhopuushiinda, opo ndi uvithile mo wo.’ Opo nduno Jesus okwa yelitha kutya omolwashike, sho a ti: “Oshoka osho tuu shika nde shi endela.” (Markus 1:32-38; Lukas 4:43) Nando okwaaludha aantu okwa li kwa simana kuJesus, okuuvitha onkundana ombwanawa yUukwaniilwa waKalunga okwa li oshilonga sha simanenena kuye.—Markus 1:14, 15.
Kunena, okulombwela yalwe kombinga yUukwaniilwa waKalunga oshi li natango endhindhiliko tali ndhindhilikitha mbono ye na omadhiladhilo gaKristus. Jesus okwa li a pe ayehe mbono ya hala okukala aalanduli ye elombwelo ndyoka tali ti: “Indeni ano, ka ningeni aantu ayehe aalongwa yandje, . . . ne mu ya longe okudhiginina ayihe mbyoka nde yi mú lombwele.” (Mateus 28:19, 20) Niishewe, Jesus okwa li a hunganeke a ti: “Elaka ndika etoye [lyuukwaniilwa, KB] otali ka uvithilwa aantu ayehe, li ningile iigwana ayihe uunzapo; notaku ya ihe ehulilo.” (Mateus 24:14) Molwaashono Oohapu dhaKalunga otadhi ulike kutya iilonga yokuuvitha otayi longwa koonkondo dhombepo ondjapuki, okukutha ombinga muyo nuulaadhi oku li endhindhiliko lyuupambepo washili.—Iilonga 1:8.
Okuuvithila aantu muuyuni auhe etumwalaka lyUukwaniilwa otaku pula oonkambadhala dhu unganekwa dhaantu omamiliyona. (Johannes 17:20, 21) Mboka taya kutha ombinga miilonga mbika kaye na okukala owala ye na uupambepo uuwanawa, ihe oye na wo okukala yu unganekwa nawa muuyuni auhe. Mbela oto vulu okudhimbulula mo aantu mbono taya landula oshinkoti shaKristus nokuuvitha onkundana ombwanawa yUukwaniilwa muuyuni auhe?
Mbela owa gwanitha po iitegelelwa mbyoka ya popiwa metetekelo?
Dhoshili, opu na omaukwatya galwe ngoka taga dhimbululitha omuntu ngoka e na uupambepo washili, ihe mbela ngoye iitegelelwa mbyoka ya popiwa metetekelo owe yi gwanitha po? Opo u shi mone, ipula mwene to ti: ‘Ohandi lesha mbela Oohapu dhaKalunga, Ombiimbeli pandjigilile nokutedhatedha kwaashoka nda lesha? Mbela ohandi imike iiyimati yombepo monkalamwenyo yandje? Mbela ohandi galikana pandjigilile? Mbela ohandi kala nda hala okweendathana naantu mbono hayu uvitha onkundana ombwanawa yUukwaniilwa waKalunga muuyuni auhe?
Eikonakono lyashili lyopaumwene otali ku kwathele u mone kutya uupambepo woye owa kola shi thike peni. Otatu ku ladhipike u katuke oonkatu dha pumbiwa ngashingeyi opo “omwenyo nombili” yi kale oshipewa shoye.—Aaroma 8:6; Mateus 7:13, 14; 2 Petrus 1:5-11.
[oshimpungu/Omathano pepandja 5]
OMANDHINDHILIKO GUUPAMBEPO UUWANAWA
◆ Okukala u hole Oohapu dhaKalunga
◆ Okwiimika iiyimati yombepo
◆ Okugalikana Kalunga pandjigilile notashi zi komutima
◆ Okuuvithila yalwe onkundana ombwanawa yUukwaniilwa