Omadhiladhilo goye naga kale ga fa gaKristus
‘Kaleni hamu uvathana pamadhiladhilo gaKristus.’—ROM. 15:5, KB.
1. Omolwashike tu na okukokeka iikala yopamadhiladhilo yaKristus?
“JESUS KRISTUS okwa ti: “Ileni kungame . . . ne mu tseye ndje, oshoka ongame omunambili nomomutima ondi ishonopeka; notamu imonene evululuko.” (Mat. 11:28, 29) Ehiyo ndika lyopambili otali ulike shili iikala yopamadhiladhilo yopahole yaJesus. Kapu na oshiholelwa shomuntu gulwe oshiwanawa ngaashi shaJesus. Nonando ye Omwana gwaKalunga noku na oonkondopangelo odhindji, okwa li e na olukeno nohenda, unene tuu kwaamboka taya mono iihuna.
2. Otatu ka kundathana omaukwatya geni gaJesus?
2 Moshitopolwa shika naashoka tashi landula ko, otatu ki ilonga nkene tu na okukokeka nokuhumitha komeho iikala mbyoka ya fa yaJesus nokuholela ‘omadhiladhilo ge’ monkalamwenyo yetu. (1 Kor. 2:16) Otatu ka konakona unene tuu omaukwatya taga landula: Uunambili neifupipiko lyaJesus, ohenda ye, evuliko lye kuKalunga, omukumo gwe nohole ye yaaluhe.
Ilonga kiikala yombili yaKristus
3. (a) Oshiilongomwa shini sheifupipiko shoka Jesus a longo aalongwa ye? (b) Jesus okwa li i inyenge ngiini sho aalongwa ye ya li ya nyengwa okutonata?
3 Jesus, Omwana gwaKalunga a gwanenena okwa li e ya kombanda yevi nehalo ewanawa okuyakula aantu inaaya gwanenena naalunde. Yamwe yomuyo oye mu dhipaga konima yethimbo. Ihe nonando ongaaka, okwa kala aluhe nenyanyu nokwiipangela. (1 Pet. 2:21-23) ‘Okutala’ koshiholelwa shaJesus otashi vulu oku tu kwathela tu ninge sha faathana uuna tu uvithwa nayi omolwomapuko nokwaahagwanenena kwayalwe. (Heb. 12:2) Jesus okwa li a hiya aalongwa ye ‘yi itsike ondjoko ye’ nokwiilonga kuye. (Mat. 11:29) Oshike taya vulu okwiilonga kuye? Oshinima shimwe, Jesus okwa li omunambili nokwa li hi idhidhimikile omapuko gaalongwa ye. Uusiku manga inaa sa, okwa yogo oompadhi dhawo, nokungawo okwe ya longo oshiilongomwa shokukala ‘nomitima dhi ishonopeka’ shoka inaaya dhimbwa nando. (Lesha Johannes 13:14-17.) Konima sho Petrus, Jakob naJohannes ya li ya nyengwa ‘okukala ya tonata,’ Jesus okwa li e wete uunkundi wawo. Okwa pula a ti: “Simon, oto kotha? . . . Tonateni, mu galikane, mwaa pwile memakelo. Ombepo yomuntu oya hala, ihe onyama onkundi.”—Mark. 14:32-38.
4, 5. Ongiini oshiholelwa shaJesus tashi tu kwathele tu ungaunge nomaunkundi gayalwe?
4 Ohatu inyenge ngiini ngele omwiitaali omukwetu oku na ombepo yethigathanopo, ha geye mbala nenge ihaa taamba ko nziya omayele okuza kaakuluntugongalo nenge ‘komupiya omudhiginini nomunandunge’? (Mat. 24:45-47, KB) Otashi vulika shi kale oshipu kutse okudhimina po aantu yomuuyuni, ihe oshidhigu okudhimina po aamwatate. Ngele ohatu ningilwa nayi nuupu komapuko gayalwe, otwa pumbwa okwiipula tatu ti: “Ongiini tandi vulu okuulika ‘omadhiladhilo gaKristus?’” Dhimbulukwa kutya Jesus ka li a geela aalongwa ye, nonando oya li ye na uunkundi wopambepo.
5 Tala koshiholelwa shomuyapostoli Petrus. Sho Jesus e mu lombwele a ze mo mowato e ye kuye te ende kombanda yomeya, Petrus okwe ende kombanda yomeya okanano okashona. Ihe sho a mono ombepo yoshikungulu, okwa tameke okuningina. Mbela Jesus okwa li a geela Petrus e te mu lombwele ta ti: “Onawa sho to ningine! Nashi kale oshiilongomwa kungoye.” Hasho nando. Pehala lyaashono, “Jesus okwa ganeke mbala oshikaha she nokwe mu kwata e ta ti kuye: ‘Omwiitaali ngoye omunkundi, omolwashike wa limbililwa?’” (Mat. 14:28-31) Ngaashi Jesus a li a ganeke oshikaha she nokukwata Petrus, mbela natse otatu vulu okukwathela omumwatate ngoka a nkundipala meitaalo? Shika osho tatu ilongo shili momukalo ngoka Jesus a li u ungaunga nombili naPetrus.
6. Jesus okwa li a longo aayapostoli ye shike kombinga yokukala ya hala esimano?
6 Petrus okwa li wo a kwatelwa moontamanana ndhoka hadhi holoka olundji mokati kaayapostoli kutya olye omukuluntu mokati kawo. Jakob naJohannes oya li ya hala oku ka kuutumba gumwe okolulyo lwaJesus nagumwe okolumoho lwe mUukwaniilwa we. Ihe sho Petrus naayapostoli yamwe ye shi uvu, oya geye. Jesus okwa li e shi kutya iikala mbyoka oya za nayo meputuko moka ya kokela. Okwe ya ithana e ta ti kuyo: “One omu shi shi, aapangeli ohaa lele iigwana, naanenentu ohaye yi pangele pankondo dhawo. Ihe inashi kala ngaaka mokati keni. Ngoka gwomune a hala, a ninge omunene, oye na ninge omuyakuli gweni.” Jesus okwa popi oshiholelwa she mwene a ti: “Oshoka nOmuna gOmuntu ine ya okuyakulwa, ihe okuyakula nokugandja omwenyo gwe, a hupithe oyendji.”—Mat. 20:20-28.
7. Ongiini kehe gumwe gwomutse ta vulu okukaleka po ombili megongalo?
7 Okutala koshiholelwa shaJesus sheifupipiko otashi tu kwathele tu kale ‘aadhinwa’ mokati kaamwatate. (Luk. 9:46-48) Oku shi ninga otashi ka kaleka po uukumwe. Jehova okwa fa he omuvali ngoka e na egumbo enene, nokwa hala oyana ‘ya kale kumwe ye na ombili.’ (Eps. 133:1) Jesus okwa li a galikana kuHe opo Aakriste ayehe yashili ya kale ya hangana a ti: “Uuyuni opo u tseye kutya ongoye owa tuma ndje nou ya hole, ngashika u hole ndje.” (Joh. 17:23) Kungeyi, uuna twa hangana, aantu otaye ke tu dhimbulula kutya otu li aalanduli yaKristus. Opo tu nyanyukilwe uukumwe mboka, otu na okutala ko okwaahagwanenena kwayalwe ngaashi Kristus. Jesus okwa li a dhimine po yalwe nokwa longo kutya ngele ohatu dhimine po yalwe natse otatu ka dhiminwa po wo.—Lesha Mateus 6:14, 15.
8. Oshike tatu ilongo moshiholelwa shaapiya yaKalunga mboka ye mu longela ethimbo ele?
8 Otatu vulu wo okwiilonga oshindji mokuholela eitaalo lyaamboka ya kala omimvo odhindji taya holele Kristus. Ngaashi Jesus, aapiya yaKalunga mboka ohayi idhidhimikile okwaahagwanenena kwayalwe. Aapiya mboka oye shi kutya okukala ye na olukeno ngaashi Kristus ihaku tu kwathele owala ‘tu humbate omitenge dhaankundi,’ ihe ohashi kwatele po wo uukumwe. Shimwe natango, ohashi kwathele egongalo alihe li kale niikala yomadhiladhilo ya fa yaKristus. Oya hala aamwahe ya kale niikala ya fa mbyoka omuyapostoli Paulus a li a hala Aakriste muRoma ya kale ye na sho a ti: “Kalunga, ngoka oluthithiya lweidhidhimiko nolwomukumo, ne mú pe oonkondo, mu kale mu na euvathano mokati keni mokulandula oshiholelwa shaJesus Kristus, opo ne amuhe kumwe mu hambelele Kalunga, He yOmuwa gwetu Jesus Kristus.” (Rom. 15:1, 5, 6) Ohashi simanekitha shili Jehova uuna tatu mu longele twa hangana.
9. Omolwashike twa pumbwa ombepo ondjapuki tu holele Jesus?
9 Jesus okwa faathanitha ‘eishonopeko’ nuunambili nenge olukeno ndoka lu li oshiyimati shombepo ondjapuki yaKalunga. Onkee ano, otwa pumbwa ombepo ondjapuki yaJehova nokukonakona oshiholelwa shaJesus opo tu vule oku mu holela nawa. Otu na okugalikana Kalunga e tu pe ombepo ondjapuki nokukambadhala okwiimika iiyimati yawo ngaashi “ohole, enyanyu, ombili, ontalanteni, ohenda, uuwanawa, eitaalo, olukeno neipangelomwene.” (Gal. 5:22, 23, NW) Mokulandula oshiholelwa sheifupipiko nolukeno ndoka Jesus a li u ulike, otatu ka nyanyudha Tate gwomegulu, Jehova.
Jesus okwa li u ungaunga nayalwe nohenda
10. Ongiini Jesus a li u ulike ohenda?
10 Ohenda nayo oyi li oshiyimati shombepo ondjapuki. Jesus okwa li hu ungaunga aluhe nayalwe nohenda. Ayehe mboka ya li nehalo shili oku mu mona, okwe ya “taamba nenyanyu” nenge nohenda. (Lesha Lukas 9:11.) Oshike tatu vulu okwiilonga mohenda ndjoka Jesus a li u ulike? Omuntu ngoka e na ohenda oye omunambili, ha popi nelaka etalala noha yaalele yalwe. Jesus osho a li ngaaka. Okwa li u uvitile aantu ohenda, “oshoka oya li ya hepekwa noya loloka ya fa oonzi dhaa na omusita.”—Mat. 9:35, 36.
11, 12. (a) Hokolola nkene Jesus a li u ulike olukeno. (b) Moshiholelwa shika otatu ilongo mo shike?
11 Ohenda nolukeno lwaJesus oye mu inyengitha a kwathele aantu. Tala koshiholelwa shimwe. Opwa li pu na omukiintu a ala uuvu wetiko lyombinzi uule woomvula 12. Okwa li e shi kutya paMpango yaMoses kehe ngoka te mu gumu ota ka kala a nyata noita vulu okukutha ombinga miinima yopalongelokalunga. (Lev. 15:25-27) Ihe nonando ongaaka, okupopiwa kwaJesus nomukalo ngoka a li u ungaunga naantu oya ningitha omukiintu ngoka a kale a tompwa kutya Jesus ota vulu oku mu aludha. Omukiintu okwa ti: “Shampa tuu tandi gumu koonguwo dhe, nena otandi aluka.” Okwa li e na uulaadhi oku shi ninga, nopethimbo opo tuu mpoka okwa li e shi dhimbulula kutya okwa aluka.
12 Jesus okwa li a dhimbulula kutya opu na gumwe e mu gumu nokwa lengalenga koombinga adhihe a tale ngoka e shi ningi. Otashi vulika omukiintu a li a tila okugandwa molwaashoka okwa yona Ompango, onkee okwa tsu oongolo koshipala shaJesus, a tila ta kakama nokwe mu lombwele oshili ayihe. Mbela Jesus okwa li u ula nayi omukiintu ngoka ta mono iihuna? Aawe nando. Okwa ti kuye: “Mumwandje, eitaalo lyoye lye ku aludha. Inda nombili.” (Mark. 5:25-34) Omukiintu ngoka ka li tuu a talalelwa sho a lombwelwa oohapu ndhoka dhohenda!
13. (a) Iikala yaJesus oya li ya yooloka ko ngiini kwaambyoka yAafarisayi? (b) Jesus okwa li u ungaunga ngiini naanona?
13 Kristus ka li a fa Aafarisayi yomitse omikukutu mboka ya li ya longitha oonkondopangelo dhawo okuthindila aantu yalwe kongudhi. (Mat. 23:4) Mepingathano naashoka, okwa longo yalwe nohenda noneidhidhimiko oondjila dhaJehova. Jesus okwa li e hole lela aalanduli ye nohu ungaunga aluhe nayo nohenda. Okwa li shili kuume kawo kopothingo. (Omayel. 17:17; Joh. 15:11-15) Osha li oshipu kaanona okukala puJesus, naye wo okwa li a manguluka okukala mokati kawo. Nonando okwa li i ipyakidhila, okwa kongo ethimbo opo a kale naanona. Oshikando shimwe sho aalongwa ya li taya popi kombinga yesimano ngaashi ndyoka lyaawiliki yomalongelokalunga, oya li ya kambadhala okukeelela aantu mboka yaahe ete aanona kuJesus e ya gume. Jesus ka li e uvitile aalongwa ye ombili. Okwa ti kuyo: ‘Etheni uunona, u ye kungame. Inamu u keelela ko, oshoka Uukwaniilwa waKalunga owaamboka ye u fa.’ Opo e ya longe oshiilongomwa, okwa li a thikameke okanona mokati kawo e ta ti: ‘Ongame tandi mú lombwele: Oongoka itaa taamba Uukwaniilwa waKalunga ongokanona, oye ita yi mo muwo.’—Mark. 10:13-15, yelekanitha KB.
14. Uuwanawa washike aanona haya mono uuna taya pewa eitulomo?
14 Dhiladhila owala nkene aanona mboka ya li yu uvite konima yethimbo sho ya ningi aasamane naakulukadhi nokudhimbulukwa nkene Jesus Kristus ‘a li e ya papatele momaako ge e te ya yambeke.’ (Mark. 10:16) Kunena ngele aakuluntugongalo nayalwe tayu ulukile aanona ohole yashili, aanona otaye ke shi dhimbulukwa monakuyiwa. Sha simanenena osho kutya aanona mboka haya ulukilwa ohole yashili megongalo ohaye shi mono kutya ombepo yaJehova oyi li mokati koshigwana she.
Kala wu na ohenda muuyuni mbuka waahe na ohenda
15. Omolwashike kaatu na okukala twa kumwa sho aantu kaaye na ohenda kunena?
15 Aantu oyendji oye wete kutya kaaye na ethimbo okuulukila yalwe ohenda. Onkee ano, esiku nesiku aalongeli yaJehova oya taalelwa kombepo yuuyuni kosikola, kiilonga, uuna ye li molweendo nongele ye li muukalele. Nonando iikala yokwaahe na ohenda ohayi tu yemateke, kayi na oku tu kumitha. Jehova okwa nwetha mo Paulus e tu londodhe kutya ‘momasiku ngaka gahugunina’ Aakriste yashili otaya ka kala mokati kaamboka ‘yi ihole noyaa na olukeno nohenda.’—2 Tim. 3:1-3, yelekanitha OB-1954.
16. Ongiini tatu vulu okuhumitha komeho ohole ya fa yaKristus megongalo?
16 Ihe mepingathano naashika, onkalo megongalo lyopaKriste lyashili ohayi talaleke moku yi yelekanitha naandjoka yokwaahe na ohenda muuyuni. Uuna tatu holele Jesus, kehe gumwe gwomutse ota vulu okukaleka po onkalo ndjoka yombili megongalo. Ongiini tatu vulu oku shi ninga? Opo tu yi kaleke po, otwa pumbwa okukwathela nokutsa omukumo mboka kaaye na uukolele nenge ye li moonkalo oondhigu megongalo. Nonando omaupyakadhi ngoka kage shi omape, otagi ki indjipala ‘momasiku gahugunina.’ Aakriste yonale oya li wo ya mono iihuna komaupyakadhi ga faathana. Ihe kunena otwa pumbwa okukwatha aamwatate unene okuyelekanitha nAakriste mboka yonale. Pashiholelwa, Paulus okwa kumagidha Aakriste ya ‘tse aambanda omukumo, ya ambidhidhe aankundi nokwiidhidhimikila ayehe.’ (1 Tes. 5:14) Opo tu shi ninge, otu na okutula miilonga ohole ya fa yaKristus.
17, 18. Omomikalo dhini tatu vulu okuholela ohenda yaJesus?
17 Tu li Aakriste, otu na oshinakugwanithwa ‘shokutaamba aamwatate nohenda,’ okukala nayo ngaashi Jesus a li a kala naantu, nokukala tu na ko nasha naamboka tu shi nawa omimvo odhindji naamboka inaatu tsakaneka nale. (3 Joh. 5-8) Ngaashi owala Jesus a li a katuka oonkatu okuulukila yalwe olukeno, natse otu na okukala hatu talaleke yalwe aluhe.—Jes. 32:2; Mat. 11:28-30.
18 Kehe gumwe ota vulu okuulika ohenda mokukala e na ko nasha nuuwanawa wayalwe. Natu konge oompito nkene tatu vulu oku shi ninga. Paulus ote tu ladhipike ta ti: “Kaleni mu na ohole yaamwayinathana, ne mu lalakanene okusimanekathana.” (Rom. 12:10) Shoka osha hala okutya tu landule oshiholelwa shaKristus okuulukila yalwe shili ohole nohenda nokwiilonga oku yu ulukila “ohole kaayi na uufudhime.” (2 Kor. 6:6) Paulus okwa hokolola ohole ndjoka ya fa yaKristus a ti: “Ohole ohayi idhidhimikile ayihe noyi na olukeno. Ohole ihayi si efupa, ihayi tuwalala.” (1 Kor. 13:4) Pehala lyokukala tu nine aamwatate naamwameme, otwa pumbwa okupulakena kekumagidho ndyoka tali ti: “Kalathaneni mu na uukuume nolukeno. Silathaneni ohenda, nokudhiminathana po oondjo, ngashika naanaa Kalunga e mú dhimine po oondjo dheni molwaKristus.”—Ef. 4:32.
19. Uuwanawa washike hawu zi mokuulika ohenda ya fa yaKristus?
19 Oonkambadhala dhetu okukokeka nokuulika ohenda ya fa yaKristus ethimbo kehe nomonkalo kehe otashi tu etele uuwanawa. Otashi ka kwathela wo opo ombepo yaJehova yi kale megongalo nokukwathela kehe gumwe i imike iiyimati yombepo. Natango ishewe, ngele otatu landula oshiholelwa shaJesus nokukwathela yalwe ya ninge sha faathana, otashi ka nyanyudha Kalunga sho tatu mu longele twa hangana. Onkee ano, natu kambadhale aluhe okuulika uunambili nohenda ngaashi Jesus mokuungaunga nayalwe.
Oto vulu okuyelitha?
• Ongiini Jesus a li u ulike kutya ye ‘omunambili nomomutima okwi ishonopeka’?
• Ongiini Jesus a li u ulike ohenda?
• Omomikalo dhimwe dhini tatu vulu okuulika uunambili nohenda ya fa yaKristus muuyuni mbuka inaawu gwanenena?
[Ethano pepandja 11]
Mbela otatu ka kwathela omumwatate ngoka e na eitaalo tali tengatenga ngaashi lyaPetrus?
[Ethano pepandja 13]
Ongiini to vulu okukwathela egongalo opo li kale ehala lyombili?