Ohole yaKristus ohayi tu inyengitha tu kale tu hole yalwe
“[Jesus] ngaashi a kala e hole mboka ye ya li muuyuni, okwa li e ya hole sigo opehulilo.”—JOH. 13:1.
1, 2. (a) Ongiini ohole yaJesus ya li ya tongomana? (b) Omaukwatya geni gohole taga ka kundathanwa moshitopolwa shika?
JESUS okwe tu tulila po oshiholelwa kamana shohole. Okupopya kwe, eihumbato lye, elongo lye neso lye lyopayambo nakehe shimwe kombinga ye oya li euliko lyohole ye. Uule wonkalamwenyo ye ayihe ndjoka a li kombanda yevi oku ulukile mboka a tsakaneke ohole naunene tuu aalongwa ye.
2 Oshi li nawa ngele aalanduli yaJesus taya landula oshiholelwa kamana shohole ye. Otashi tu inyengitha wo tu ulukile aamwatate naamwameme ohole ya fa ye nosho wo aantu ayehe. Moshitopolwa shika otatu ilongo mo nkene aakuluntugongalo taya vulu okwiilonga kuJesus opo yu ulukile ohole mboka ya yona, nokuli sha kwata miiti. Otatu ka kundathana wo nkene ohole yaJesus yi inyengitha Aakriste ya kwathele aamwahe mboka taya mono iihuna, ye li miiponga notaye ehama.
3. Nonando Petrus okwa li a ningi epuko enene, Jesus okwa li u ungaunga naye ngiini?
3 Uusiku manga Jesus inaa sa, omuyapostoli Petrus okwe mu idhimbike lwiikando iitatu. (Mark. 14:66-72) Ihe sho Petrus a galuka nenge i iyele ombedhi ngaashi Jesus a li e mu lombwele, Jesus okwe mu dhimine po. Jesus okwa li i inekelele Petrus iinakugwanithwa iinene. (Luk. 22:32; Iil. 2:14; 8:14-17; 10:44, 45) Oshike tatu ilongo kuJesus uuna gumwe a ninga epuko enene?
Tala ko mboka ya yona ngaashi Kristus e ya tala ko
4. Uunake omuntu e na okuulika unene iikala ya fa yaKristus?
4 Oshidhigu noonkondo okuulika iikala ya fa yaKristus uuna gumwe a ninga epuko enene, kutya nduno omuukwanegumbo nenge omegongalo. Shiyemateka, sho onkalelo yiinima yaSatana yi li kunyegenyege, ombepo yuuyuni otayi nwetha mo aantu oyendji ya kale neihumbato lya nyata. Iikala mbyoka ya nyata otayi vulu okunwetha mo aagundjuka nosho wo aakuluntu nokunkundipaleka etokolotoko lyawo okweenda mondjila ya thinana. Methelemimvo lyotango, yamwe oya li ya kondwa mo megongalo lyopaKriste nayamwe oya li ya geelwa. Osha faathana nokunena. (1 Kor. 5:11-13; 1 Tim. 5:20) Ihe ngele aakuluntugongalo mboka tayu ungaunga noshinima otayu ulike ohole ya fa yaKristus, otashi vulu okunwetha mo unene omuyoni a lundulule iikala ye.
5. Ongiini aakuluntugongalo taya vulu okuholela Kristus nokuungaunga naayoni?
5 Ngaashi Jesus, aakuluntugongalo oye na okukala pamithikampango dhaJehova dhuuyuuki ethimbo alihe. Ngele taye shi ningi, nena otayu ulike olukeno, ohenda nohole yaJehova. Uuna gumwe i iyela ombedhi shili nokwa “dhengwa pevi” noku na “omwenyo gwa nyanyagulwa” molwepuko lye, kashi shi oshidhigu kaakuluntugongalo ‘oku mu pukulula nonge.’ (Eps. 34:18, yelekanitha OB-1954; Gal. 6:1) Ihe ongiini ye na okuungaunga nagumwe ngoka i ishi uuntsa noita ulike eiyelombedhi?
6. Aakuluntugongalo oye na okuhenuka shike uuna tayu ungaunga naayoni, nomolwashike?
6 Uuna omuyoni ta tindi omayele gopamanyolo nenge ta kambadhala okupa yalwe uusama omolweyono lye, otashi vulu okugeyitha aakuluntugongalo nayalwe. Otashi vulika ya kale ya hala okupopya omaiyuvo gawo kombinga yoonkatu niikala yanakuyona molwaashoka oye shi nale nkene ye ehameka aantu. Ihe ondjahi ohayi etitha oshiponga noitayi ulike “omadhiladhilo gaKristus.” (1 Kor. 2:16; lesha Jakob 1:19, 20.) Jesus okwa li a londodha yamwe shu ukilila, ihe ina popya nando olumwe shoka sha nika uutondwe nenge tashi ehameke. (1 Pet. 2:23) Pehala lyaashono, okwa li he etha omuyoni i iyele ombedhi nokugalukila ye mwene kuJehova. Eeno, etompelo lya simanenena sho Jesus e ya kombanda yevi ‘okuhupitha aalunde.’—1 Tim. 1:15.
7, 8. Oshike shi na okuwilika aakuluntugongalo mokuungaunga niinima yopampangu?
7 Ongiini oshiholelwa shaJesus shi na okunwetha mo iikala yetu ngele tashi ya pwaamboka ye na okupewa egeeloputudho kegongalo? Dhimbulukwa kutya elongekidho lyompangu ndyoka li li pamanyolo olya nuninwa okugamena egongalo nokwiinyengitha omuyoni i iyele ombedhi. (2 Kor. 2:6-8) Ohashi yemateke okumona yamwe mboka inaa iyela ombedhi noye na okukondwa mo megongalo, ihe ohashi nyanyudha omutima okumona kutya oyendji yomuyo ohaya galukile kuJehova nokegongalo lye. Uuna aakuluntugongalo tayu ulike iikala ya fa yaKristus, otaye shi ningi oshipu komuyoni a lundulule omutima gwe nokugalukila kegongalo. Monakuyiwa, otashi vulika aayoni mboka ya dhimbulukwe kutya aakuluntugongalo oya li yu ungaunga nayo nesimaneko nosho wo nohole ya fa yaKristus, nonando itaya ka dhimbulukwa omapukululo agehe gopamanyolo ngoka ya pewa.
8 Onkee ano, aakuluntugongalo oye na okuulika “iiyimati yOmbepo,” unene tuu ohole ya fa yaKristus, nonando omuyoni ina hala okutaamba ko epukululo lyopamanyolo. (Gal. 5:22, 23) Kaye na okweendelela okukonda mo omuyoni megongalo. Oye na okuulika kutya oya hala omuyoni a galukile kuJehova. Kungeyi, ngele konima omuyoni okwa lundulula omutima gwe, ngaashi oyendji haya ningi, otashi vulika a ka pandule Jehova unene nosho wo “omagano” ngoka ge li aakuluntugongalo, mboka ye shi ningi oshipu kuye a galukile kegongalo.—Ef. 4:8, 11, 12.
Ulika ohole ya fa yaKristus pethimbo lyehulilo
9. Gandja oshiholelwa nkene Jesus a li u ulukile aalongwa ye ohole.
9 Lukas okwa nyola oshiholelwa dhingi nkene Jesus a li u ulikile aantu ohole. Jesus okwa li e shi kutya etangakwiita lyaRoma otali ka kondeka Jerusalem shoka sha li pokuhanagulwa po, li keelele aantu kaaya ze mo nokwa londodha aalongwa ye a ti: “Uuna tamu mono, Jerusalem sha kondekwa komatanga gaakwiita, tseyeni kutya oshi li popepi nokuhanagulwa po.” Oshike ye na okuninga? Jesus okwe ya pe omalombwelo gokondandalunde noga yela a ti: “Nena ayehe mboka ye li muJudea, naa tembukile koondundu; naamboka ye li moshilando sho shene, naa fadhuke po; naamboka taa adhika kondje yasho, inaa galukila mo. Oshoka ngaka ogo omasiku ngoka Kalunga ta geele Aaisraeli, opo Omanyolo ga tsakanithwe.” (Luk. 21:20-22) Konima sho etangakwiita lyaRoma lya kondeke Jerusalem mo 66 E.N., aalongwa aavuliki oya li ya ningi ngaashi ya lombwelwa.
10, 11. Sho tatu ilongekidhile “uudhigu uunene,” oshike tatu ilongo moshiholelwa shAakriste yonale sho ya li ya zi muJerusalem?
10 Pethimbo sho taya zi muJerusalem, Aakriste oya li ye na okuulukilathana ohole ya fa ndjoka Kristus a li e ya ulukile. Shoka ye na oya li ye na oku shi topolelathana. Kakele owala kehanagulo lyaJerusalem, ehunganeko lyaJesus olya li tali popi sha shoka tashi ka ningwa monakuyiwa. Okwa hunganeke a ti: “Omasiku ngoka otaku ka kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we.” (Mat. 24:17, 18, 21) Natse wo otashi vulika tu ka mone iihuna nenge tu ka kale noompumbwe dhopalutu komeho nopethimbo ‘lyuudhigu unene’ mboka tawu ya. Ihe ngele otu na iikala ya fa yaKristus, otashi ke tu kwathela tu idhidhimike.
11 Pethimbo ndyoka otatu ka pumbwa okulandula oshiholelwa shaJesus shokwaaihola tse yene. Moshinima shika, Paulus okwa ti: “Kehe gumwe gwomutse no opalele mukwawo omoluuwanawa wamukwawo ngoka noku mu kokitha meitaalo. Oshoka Kristus ini iyopalela ye mwene . . . Kalunga, ngoka oluthithiya lweidhidhimiko nolwomukumo, ne mú pe oonkondo, mu kale mu na euvathano mokati keni mokulandula oshiholelwa shaJesus Kristus.”—Rom. 15:2, 3, 5.
12. Otwa pumbwa okukokeka ohole ya tya ngiini ngashingeyi, nomolwashike?
12 Petrus ngoka a li u ulukilwa ohole kuJesus, okwa ladhipike wo Aakriste ya kale ‘ye hole ooitaali ooyakwawo yaa na uufudhime nokuvulika koshili.’ Oye na okukala ‘ye holathane lelalela nomwenyo aguhe.’ (1 Pet. 1:22) Kunena, otu na okukokeka uukwatya mboka wa fa waKristus shi vulithe nale, molwaashoka omathiminiko goshigwana shaKalunga otage ende tagi indjipala. Inatu tula nando einekelo lyetu miinima yuuyuni mbuka wa kulupa nokawu shi okwiinekelwa, ngaashi tu shi wete nawa megwo pevi lyeliko lyuuyuni ndyoka opo lya ningwa. (Lesha 1 Johannes 2:15-17.) Pehala lyaashono, sho ehulilo tali hedha popi unene, otwa pumbwa okukala popepi naJehova nosho wo naamwatate nokupanga uukuume washili niilyo yegongalo. Omayele gaPaulus otaga ti: “Kaleni mu na ohole yaamwayinathana, ne mu lalakanene okusimanekathana.” (Rom. 12:10) Petrus okwe shi tsu omuthindo natango a ti: “Komeho gaayihe holathaneni nomwenyo aguhe, oshoka ohole ohayi siikile omayono ogendji.”—1 Pet. 4:8.
13-15. Ongiini aamwatate yamwe yu ulike iikala ya fa yaKristus konima sho pwa holoka iikungulu?
13 Oonzapo dhaJehova odha tseyika nawa muuyuni auhe kutya ohadhi tula shili miilonga ohole ya fa yaKristus. Tala sho dhimwe dha li dhi iyamba okukwathela sho iikungulu yombepo ya hanagula po iitopolwa iinene kuumbugantu wIilongohangano yaAmerika mo 2005. Oonzapo dhi vulithe 20 000 odhi iyamba mokuthiga po omagumbo gadho omawanawa niilonga mbyoka hayi futu nawa dhi ka kwathele aamwahe mboka ya dhengwa koshikungulu.
14 Moshitopolwa shimwe, omakuthikuthi gomeya gefuta oga li ga yi oshinano shookilometa 80 moshilando, nomeya oga li ge na uule wopombanda woometa 10. Sho omeya ga shuna kefuta, omagumbo ogendji nomatungo oga li ga hanagulwa po thiluthilu. Oonzapo okuza kiilongo ya yoolokathana odhi iyamba nodhe etelele iilongitho yokutunga koshitopolwa shoka. Odha li dhi na ehalo okulonga oshilonga kehe shoka sha pumbiwa. Aamwameme yaali aamwayinathana, yo aaselekadhi oya li ya longele iinima yawo mohauto yekangwa nokwiidhenga ondjila yuule wu vule ookilometa 3 000 oku ka kwathela. Gumwe gwomuyo okwa kala moshitopolwa moka, ta kwathele natango okomitiye yokugandja ekwatho moshitopolwa shoka nota longo wo e li omukokolindjila gwondjigilile.
15 Omagumbo ge vulithe 5 600 gOonzapo nogaantu yalwe oga li ga tungululwa nokulongululwa. Oonzapo moshitopolwa odha li dhi uvite ngiini mokuulukilwa ohole ndjoka inaayi monika nale? Omumwameme gumwe ngoka egumbo lye lya hanagulwa po okwa li ha zi mokakalafana hoka ke na oontongo nesiga ndyoka itaali longo. Ihe aamwatate oye mu tungile egumbo lye mu eleka, lyo ewanawa. Omumwameme ngoka okwa li a lili kenyanyu omanga a thikama komeho yegumbo lye epe ndyoka ewanawa nokupandula Jehova naamwatate. Oonzapo dhimwe moshitopolwa moka odha kala momahala moka dha tulwa pakathimbo uule womumvo gumwe nenge dhi vulithe po konima sho omagumbo gadho ga tungululwa. Omolwashike? Odhe shi ningi opo aamwatate mboka taya longo miilonga yokukwatha ya kale momagumbo gadho. Kashi shi tuu oshiholelwa oshiwanawa shokuulika iikala ya fa yaKristus!
Ulika iikala ya fa yaKristus ngele to ungaunga naamboka taye ehama
16, 17. Omomikalo dhini tatu vulu okuulika kutya otu na iikala ya fa yaKristus ngele tatu ungaunga naamboka taye ehama?
16 Haatuhe hatu mono iihuna omolwiiponga yopaunshitwe. Ihe kehe gumwe oku na uunkundi wopalutu mboka tawu mu hepeke nenge tawu hepeke iilyo yuukwanegumbo we. Jesus okwe tu tulila po oshiholelwa nkene tu na okuungaunga naamboka taye ehama. Okwa li ha kala e yu uvitile ohenda omolwohole ye. Sho engathithi lyaantu lye eta kuye mboka taye ehama, ‘okwa aludha ayehe mboka ya li taa alukwa.’—Mat. 8:16; 14:14.
17 Aakriste ihaaya aludha aantu paikumithalonga kunena, ihe ngaashi Jesus, ohayu ulukile mboka taye ehama olukeno. Ohaye shi ulike ngiini? Aakuluntugongalo ohaya ulike kutya oye na iikala ya fa yaKristus mokulongekidha opo mboka taye ehama megongalo ya kwathelwe nokutala nkene ekwatho ndyoka tali gandjwa. Shika ohaye shi ningi mokulandula ekotampango ndyoka li li muMateus 25:39, 40.a (Lesha.)
18. Ongiini aamwameme yaali ya li yu ulukile omumwameme ohole yashili, noshizemo osha li shike?
18 Nonando katu li aakuluntugongalo, otatu vulu okuningila yalwe uuwanawa. Omumwameme Charlene okwa li e na okankela mepipi lyomimvo 44, nokwa li a lombwelwa kutya oku na ko omasiku omulongo a se. Aamwameme yaali Sharon naNicolette, oya li ya mono ompumbwe ye nankene omusamane gwe ta mono iihuna moku mu sila oshimpwiyu noyi iyamba oku mu kwathela ethimbo alihe sigo omeso lye. Charlene okwa li a kala nomwenyo iiwike ihamano, naamwameme mboka oye mu ulukile ohole sigo omeso lye. Sharon okwa ti: “Ohashi kala oshidhigu uuna wu shi shi kutya omuntu ita aluka. Ihe nonando ongaaka, Jehova okwe tu pe omukumo. Onkalo ndjoka oye tu ningitha tu hedhe popepi naye.” Omusamane gwaCharlene okwa ti: “Itandi ka dhimbwa nando onteni nekwatho okuza kaamwameme mboka. Einyengotompelo lyawo lya yela niikala yawo iiwanawa oye shi ningi oshipu kuCharlene ngoka a li omudhiginini i idhidhimike noya kwathele ndje opo ndi pepelelwe palutu nopamaiyuvo. Otandi ke ya pandula sigo aluhe. Ombepo yawo yeiyambo oya koleke eitaalo lyandje muJehova nohole yuumwayinathana.”
19, 20. (a) Otwi ilonga omaukwatya giikala yaJesus geni? (b) Owa tokola toko okuninga shike?
19 Miitopolwa iitatu mbika ya landulathana, otwi ilonga mo omaukwatya gaJesus nonkene tatu vulu okudhiladhila nokuholela iikala ye. Otu na okukala ‘aanambili nonomitima dhi ishonopeka,’ ngaashi Jesus a li. (Mat. 11:29) Natse wo natu kambadhale okuungaunga nayalwe nolukeno, nonando otu wete okwaahagwanenena nomaunkundi gawo. Natu kale tu na omukumo okugwanitha po iitegelelwa ayihe yaJehova, nonando otwa taalelwa komamakelo.
20 Lwahugunina, natu ulukile aamwatate ayehe ohole ya fa yaKristus, ngaashi e shi ningi “sigo opehulilo.” Ohole ya tya ngaaka otayi tu dhimbululitha kutya otu li aalanduli yaJesus yashili. (Joh. 13:1, 34, 35) Eeno, natu ‘kale tu holathane.’ (Heb. 13:1) Inatu etha oku shi ninga! Longitha onkalamwenyo yoye okutanga Jehova nokukwathela yalwe. Jehova ota ka yambeka oonkambadhala dhoye.
[Enyolo lyopevi]
a Tala oshitopolwa shi li mOshungolangelo yOshiingilisa yo 15 Kotoba 1986, epandja 15-21.
Oto vulu okuyelitha?
• Ongiini aakuluntugongalo taya vulu okuulika iikala ya fa yaKristus shi na ko nasha naamboka ya yona?
• Omolwashike okuholela ohole yaKristus sha simanenena pethimbo ndika lyehulilo?
• Ongiini tatu vulu okuulika iikala ya fa yaKristus mokuungaunga naamboka taye ehama?
[Ethano pepandja 19]
Aakuluntugongalo oya hala aayoni ya galukile kuJehova
[Ethano pepandja 21]
Aakriste mboka ya li ya thigi po Jerusalem oyu ulike ngiini iikala ya fa yaKristus?
[Ethano pepandja 22]
Oonzapo dhaJehova odha tseyika kutya ohadhi tula miilonga ohole ya fa yaKristus