Ovadali, hongeni ounona veni va kale ve hole Jehova
“Ngaashi oikuti i li meke lofule, ovana ovamati osho tava kala mounyasha wavo.” — EPSALME 127:4.
1, 2. Omeityo lilipi ounona ve li ngaashi “oikuti i li meke lofule”?
NGEENGE omuumbi wouta wanangongo a hala okuyasha oshishonekwa shaye, oha lukile nawa oshikuti shaye mofipa nokunana ndele ta umbu. Nonande oku na okunana outa waye neenghono, oha shoneke nefimbo oshishonekwa shaye nelalakano opo e shi yashe. Mbela ota ka yasha ngoo oshishonekwa shaye? Ope na oinima ihapu oyo tai ufa kutya ota ka yasha oshishonekwa shaye ile hasho, ngaashi ounghulungu waye, onghalo yomhepo nosho yo oukwatya woshikuti shaye.
2 Ohamba Salomo oya ti kutya ounona ova fa “oikuti i li meke lofule.” (Epsalme 127:4) Natu tale nghee efaafanifo olo tali dulu okulongifwa shi na sha nounona. Opo omuumbi wouta wanangongo a yashe oshishonekwa shaye, ke na okukwata olule. Sha faafana, ovadali ove na efimbo lixupi elela lokutekula ounona vavo va kale ve hole Jehova nomutima aushe. Moule womido dinini, ounona ohava kulu ndele tava di mo momaumbo ovadali vavo. (Mateus 19:5) Mbela otava ka yasha ngoo oishonekwa yavo, sha hala okutya, ounona vavo otava ka twikila ngoo okukala ve hole Kalunga noku mu longela ngeenge ova ka kala vehe li vali novadali vavo? Ope na oinima ihapu oyo tai ufa kutya osho tashi ka kala ngaho ile hasho. Itatu yomuyo oyo ounghulungu wovadali, omudingonoko omo tamu kulile ounona nosho yo onghedi omo “oikuti,” sha hala okutya, ounona tave linyenge koutekuduliko oo tava pewa. Natu konakoneni oinima oyo kooshimwe. Tete ohatu ka konakona amwe omomaukwatya oo e na okukala e niwe komudali onghulungu.
Ovadali ve na ounghulungu ohava tulile po ounona vavo oshihopaenenwa shiwa
3. Omolwashike ovadali ve na okutula moilonga osho hava hongo?
3 Jesus okwa tulila po ovadali oshihopaenenwa molwaashi okwa li ha tula moilonga osho a li ta hongo. (Johannes 13:15) Mepingafano naasho, okwa li a tokola Ovafarisai ovo va li hava lombwele ovanhu va ninge sha ndele vo kava li have shi ningi. (Mateus 23:3) Opo ovadali va kwafele ounona vavo va kale ve hole Jehova, ove na okukala hava tula moilonga osho hava hongo. Ngaashi ashike outa uhe na ofipa uhe na oshilonga shasha, ovadali navo itava ka pondola ngeenge ihava tula moilonga osho hava hongo. — 1 Johannes 3:18.
4. Ovadali ove na okulipula omapulo elipi, nomolwashike?
4 Omolwashike oshihopaenenwa shovadali sha fimanenena? Ngaashi ashike ovakulunhu tava dulu okukala ve hole Kalunga mokuhopaenena oshihopaenenwa shaJesus, ounona navo otava dulu okukala ve hole Kalunga mokulandula oshihopaenenwa shiwa shovadali vavo. Ookaume vokaana otava dulu oku ka nwefwa mo ka kale ke na eenghedi diwa ile ‘va nyone po eenghedi dako diwa.’ (1 Ovakorinto 15:33) Ounona ohave lihongo oinima noupu ofimbo vanini, pefimbo opo hava kala unene tuu novadali vavo. Molwaashi ovadali ohava kala ookaume kavo kopofingo, ove na oupu okunwefa mo okukalamwenyo kwavo. Onghee hano, ovadali ove na okulipula kutya: ‘Mbela ondi li kaume a tya ngahelipi? Mbela oshihopaenenwa shange otashi kwafele ngoo okaana kange ka kale ke na eenghedi diwa? Oshihopaenenwa shilipi handi tulile po ounona vange shi na sha noinima ya fimanenena, ngaashi eilikano nosho yo ekonakonombibeli?’
Ovadali ovo ve na ounghulungu ohava ilikana pamwe nounona vavo
5. Ounona otava dulu okulihonga shike momailikano ovadali vavo?
5 Ounona voye otava dulu okulihonga shihapu kombinga yaJehova mokupwilikina komailikano oye. Ngeenge tava pwilikine kunghee to pandula Kalunga pefimbo lokulya nosho yo ngeenge to ilikana pomafimbo ekonakonombibeli leni, mbela otava ka fika pexulifodiladilo lilipi? Otave ke lihonga kutya Jehova ohe tu file oshisho palutu nohe tu hongo eeshili dopamhepo, nomolwaasho tu na oku mu pandula. Oilihongomwa oyo oya fimanenena. — Jakob 1:17.
6. Ongahelipi ovadali tava dulu okukwafela ounona vavo va kale ve shii kutya Jehova oku va hole pauhandimwe?
6 Ngeenge oho ilikana pamwe noukwaneumbo woye shihe fi ashike ngeenge tamu li ile tamu ningi ekonakonombibeli loukwaneumbo oto ka pondola neenghono. Oto ka pondola yo ngeenge owa kala ho tumbula meilikano loye oinima yokondadalunde oyo ye ku kuma nosho yo oyo ya kuma ounona voye. Oto ka kwafela ounona voye va kale ve udite kutya Jehova oku li oshitukulwa shoukwaneumbo weni, sha hala okutya, ohe mu file oshisho pauhandimwe. (Ovaefeso 6:18; 1 Petrus 5:6, 7) Xe umwe omudali okwa ti: “Okudja ngoo eshi okamonakadona ketu ka dalwa, otwa kala hatu ilikana pamwe nako. Eshi ka kula, otwa kala hatu ilikana kombinga yekwatafano navamwe nosho yo oinima imwe oyo ye ka kuma. Fiyo osheshi ka ka hombolwa, ka pa li hapa piti efiku inatu ilikana pamwe.” Mbela naave ito dulu okukala ho ilikana pamwe nounona voye? Mbela ito dulu oku va kwafela va taleko Jehova e li Kaume kavo oo he va file oshisho palutu, pamhepo nosho yo pamaliudo? — Ovafilippi 4:6, 7.
7. Ovadali ova pumbwa okushiiva shike opo omailikano avo a kale okondadalunde?
7 Opo omailikano oye a kale okondadalunde, owa pumbwa okushiiva osho tashi ningwa monghalamwenyo younona voye. Xe umwe omudali oo a tekula ounona vavali okwa ti: “Pexulilo loshivike keshe, onda li handi lipula omapulo avali kutya: ‘Oshike mbela sha li omalipulo ounona vange oshivike eshi? Oinima tai tungu ilipi ya ningwa monghalamwenyo yavo?’ ” Ovadali, mbela itamu dulu okulipula omapulo oo, opo nee tamu tumbula omanyamukulo oo mwa mona ngeenge tamu ilikana pamwe nounona veni? Ngeenge omwa ningi ngaho, otamu ka honga ounona veni va kale hava ilikana kuJehova, Omuudi womailikano, nokukala yo ve mu hole. — Epsalme 65:3.
Ovadali ovo ve na ounghulungu ohava ladipike ounona vavo va kale ve na onghedindjikilile iwa yokukonakona Ombibeli
8. Omolwashike ovadali ve na okukwafela ounona vavo va kale ve na onghedindjikilile yokukonakona Eendjovo daKalunga?
8 Ongahelipi onghedi omo ovadali hava popi shi na sha nekonakonombibeli tai dulu okunwefa mo ekwatafano lokaana naKalunga? Opo ovanhu vonhumba va kale ve na ekwatafano la kola notali kalelele, ove na okukala hava kundafana nosho yo okupwilikinafana. Onghedi imwe omo hatu pwilikine kuJehova oyo okukonakona Ombibeli hatu longifa oishangomwa oyo hai yandjwa ‘komupiya omudiinini nomunaendunge.’ (Mateus 24:45-47; Omayeletumbulo 4:1, 2) Onghee hano, opo ovadali va kwafele ounona vavo va kale ve na ekwatafano lopofingo naJehova notali kalelele, ove na oku va ladipika va kale ve na onghedindjikilile yokukonakona Eendjovo daKalunga.
9. Ongahelipi ounona tava dulu okukwafelwa va kale ve na onghedindjikilile iwa yokukonakona Ombibeli?
9 Ongahelipi ounona tava dulu okukwafelwa va kale ve na onghedindjikilile iwa yokukonakona Ombibeli? Natango, ovadali ove na oku va honga okupitila moshihopaenenwa shavo shiwa. Mbela ounona voye ohava mono ngoo to lesha Ombibeli paumwene ondjikilile noku i konakona? Otashi dulika u lipule kutya openi to dulu okuhanga efimbo lokulesha nokukonakona Ombibeli ngeenge owe lipyakidila nokufila oshisho ounona voye. Ndele lipula kutya: ‘Mbela ounona vange ohava mono handi tale o-TV efiku keshe?’ Ngeenge osho shi li ngaho, mbela ito dulu okuninipika efimbo olo ho tale o-TV ndele to li longifa mokukonakona Ombibeli paumwene opo u va tulile po oshihopaenena shiwa?
10, 11. Omolwashike ovadali ve na okukala ve na ekonakonombibeli loukwaneumbo londjikilile?
10 Onghedi imwe tai longo omo ovadali tava dulu okuhonga ounona vavo va kale hava pwilikine kuJehova oyo okukala neenghundafana dOmbibeli doukwaneumbo dondjikilile. (Jesaja 30:21) Vamwe otashi dulika ve lipule kutya: ‘Omolwashike ounona va pumbwa ekonakono loukwaneumbo ngeenge ovadali vavo ohava i navo kokwoongala nopehe na okufaula?’ Ope na omatomheno mahapu mawa e na sha naasho. Jehova okwa pa ovadali oshinakuwanifwa sha fimanenena shokuhonga ounona vavo. (Omayeletumbulo 1:8; Ovaefeso 6:4) Ekonakonombibeli loukwaneumbo ohali hongo ounona kutya okulongela Kalunga kaku fi ashike oshinima hashi ningwa ondjikilile moipafi, ndele oku li yo oshinima shopaumwene shoukwaneumbo. — Deuteronomion 6:6-9.
11 Natango, ekonakono loukwaneumbo olo hali ningwa monghedi iwa otali dulu okukwafela ovadali va mone kutya ounona vavo otava diladila ngahelipi kombinga yoinima yopamhepo nosho yo yopaenghedi. Pashihopaenenwa, ngeenge ounona ovanini natango, ovadali otava dulu okulongifa Embo Lyandje lyOmahokololo gOmbimbeli.a Mehokololo keshe lembo olo, ovadali otava dulu okupula ounona vavo va popye omadiladilo avo. Okutomhafana tava longifa omishangwa odo di li membo olo, ovadali otava dulu okukwafela ounona vavo va kale ve na eenghono dokukoneka opo ‘va dule okutongola ouwa nowii.’ — Ovaheberi 5:14.
12. Ongahelipi ovadali tava dulu okuninga ekonakono loukwaneumbo li kale tali wapalele eemhumbwe dokaana keshe, noshike hashi mu kwafele mu pondole moshinima osho?
12 Eshi ounona voye tava kulu, ekonakonombibeli nali kale tali wapalele eemhumbwe davo. Didilika nghee ovalihomboli vonhumba va li va kwafela ounona vavo vomido omulongo nasha va diladile shi na sha naashi va li va pula va ye koshivilo shofikola shondanisha. Xe okwa ti: “Otwa li twa lombwela ounona vetu kutya pekonakono loukwaneumbo tali landula, ohatu ka longifa ominute donhumba okukundafana kombinga yoshinima osho. Ame nomukulukadi wange ohatu ka kala twa fa ofye ounona, novanakadona vetu otava ka kala va fa ovo ovadali. Ounona ova li ve na okutokola kutya olyelye a li ngeno ta ka kala xe ile ina, nova li ve na okukonga omauyelele e na sha noshinima osho nosho yo okuyandja omayele.” Oshidjemo osha li shike? Xe okwa ti: “Otwa li twa kumwa kunghee ounona vetu va li va dula okuyoolola pokati kaasho shi li mondjila naasho sha puka eshi va li tave tu yelifile omauyelele e likolelela kOmbibeli kutya omolwashike sha li shihe li pandunge okuya kondanisha. Natango otwa li twa kuminwa omaetepo oo va li ve tu pa e na sha naasho hatu dulu okuninga po ponhele yokuya kondanisha. Osho osha li she tu kwafela tu mone kutya otava diladila ngahelipi nosho yo osho va hala.” Oshoshili kutya otashi pula oudiinini nosho yo okudiladila nawa opo ovadali va kale hava ningi ekonakonombibeli loukwaneumbo pandjikilile notali wapalele eemhumbwe da keshe umwe, ndele oidjemo ohai kala iwa neenghono. — Omayeletumbulo 23:15.
Moukwaneumbo namu kale ombili
13, 14. (a) Ongahelipi ovadali tava dulu okukaleka po ombili moukwaneumbo? (b) Ngeenge ovadali ova kala hava dimine omapuko avo otava ka mona oidjemo iwa ilipi?
13 Oshikuti oshi na oupu shi yashe oshishonekwa ngeenge omuumbi wouta wanangongo okwa shoneke noku shi umba fimbo pehe na omapiyaano. Sha faafana, ounona oshi na oupu ve lihonge okukala ve hole Jehova ngeenge ovadali vavo ova kaleke po ombili moukwaneumbo. Jakob okwa ti: “[Oiimati] youyuki ohai kunwa mombili kuava hava ningi ombili.” (Jakob 3:18) Ongahelipi ovadali tava dulu okukaleka po ombili moukwaneumbo? Ovalihomboli ova pumbwa okukala ve na ekwatafano lopahombo la kola. Ovalihomboli ovo ve holafane nohava fimanekafana ove na omhito iwa okuhonga ounona vavo va kale ve hole Jehova nosho yo ovanhu vakwao noku va fimaneka. (Ovagalati 6:7; Ovaefeso 5:33) Ohole nefimaneko ohai xumifa komesho ombili. Ovalihomboli ovo ve na ombili ohava dulu okuungaunga noupu nomaupyakadi oo tashi dulika a holoke moukwaneumbo.
14 Ngaashi ashike ovalihomboli inava wanenena, omaukwaneumbo aeshe kombada yedu nao inaa wanenena. Ovadali omafimbo amwe otashi dulika va dope okuulika omaukwatya oshiimati shomhepo ngeenge tava ungaunga nounona vavo. (Ovagalati 5:22) Ngeenge osho osha ningwa, ovadali ove na okuninga po shike? Ngeenge ova dimine kutya ova ninga epuko, mbela otashi ka ningifa ounona vavo va kale inave va fimaneka vali? Konakona oshihopaenenwa shomuyapostoli Paulus. Okwa li ngaashi xe wopamhepo kovanhu vahapu vopefimbo laye. (1 Ovakorinto 4:15) Ndele okwa li a dimina moipafi kutya okwa li ha ningi omapuko. (Ovaroma 7:21-25) Ndele nande ongaho, elininipiko laye nosho yo okupopya kwaye oshili oye tu ningifa tu kale twe mu fimaneka. Nonande Paulus okwa li ha ningi omapuko, okwa li a ladipika eongalo lokuKorinto a ti: “Kaleni ovahopaeleli vange ngaashi aame omuhopaeleli waKristus.” (1 Ovakorinto 11:1) Ngeenge nanye omwa kala hamu dimine omapuko eni, ounona veni otave ke mu dimina po noupu.
15, 16. Omolwashike ovadali ve na okuhonga ounona vavo va kale ve hole Ovakriste vakwao, nongahelipi tava dulu oku va honga?
15 Oshike vali ovadali tava dulu okuninga po opo va kaleke po ombili moukwaneumbo omo ounona tava dulu okukulika ohole yokuhola Jehova? Omuyapostoli Johannes okwa ti: “Ngenge pe na ou ta ti: Ame ondi hole Kalunga, ndee ta tondo omumwaxe, ye omunaipupulu. Osheshi ou e he hole omumwaxe, nande e mu wete, oye ita dulu okuhola Kalunga e he mu wete.” (1 Johannes 4:20, 21) Onghee hano, ngeenge to hongo ounona voye va kale ve hole Ovakriste vakwao, oto va hongo okukala ve hole Kalunga. Ovadali ove na okulipula kutya: ‘Mbela ngeenge handi popi kombinga yeongalo ohandi popi monghedi tai tungu ile ohandi kembaula?’ Oto dulu oku shi mona mo ngahelipi? Pwilikina nawa osho ounona voye hava popi kombinga yokwoongala nosho yo yOvakriste meongalo. Otashi dulika u ude tava popi oinima ya yukila kwaayo ho popi momapopyo avo.
16 Ovadali otava dulu okuninga po shike opo va kwafele ounona vavo va kale ve hole Ovakriste vakwao? Peter, xe yovanamati vavali veedula omulongo nasha, okwa ti: “Okudja eshi ovanamati vetu va li ovanyasha, otwa li hatu shivi luhapu Ovakriste va pyokoka pamhepo va kale have uya okulya pamwe nafye nokuhafela pamwe, nokwa li hatu shi hafele neenghono. Ovanamati vetu ova kula tava endafana novanhu ovo ve hole Jehova nova mona kutya oku mu longela oku li onghedi iwa yokukalamwenyo.” Dennis, oo e na ovanakadona vatano, okwa ti: “Otwa li hatu ladipike ovanakadona vetu va pange oukaume novakokolindjila ovanamido meongalo, nongeenge twa li tu na omhito otwa li hatu shivi ovapashukili ovaendi nosho yo ovakainhu vavo.” Mbela naave ito dulu okukatuka onghatu u kwafele ounona voye va kale ve wete kutya eongalo oli li oshitukulwa shoukwaneumbo weni? — Markus 10:29, 30.
Oinakuwanifwa younona
17. Xuuninwa ounona ove na okuninga etokolo lilipi?
17 Diladila natango kombinga yefaneko li na sha nomuumbi wouta wanangongo. Nonande okukale e na ounghulungu, oshi na oupu aha yashe oshishonekwa shaye ngeenge oshikuti osho ta umbifa osha endama. Ovadali ove na okukendabala noudiinini va yukililife oikuti oyo ya endama, sha hala okutya, okukendabala okuyukifa omadiladilo a puka ounona vavo. Ndele hauxuuninwa ounona ove na okutokola vo vene kutya otava efa va vyulwe kounyuni ou ile otava efa Jehova a ‘lalakanife omalila’ avo. — Omayeletumbulo 3:5, 6; Ovaroma 12:2.
18. Omatokolo ounona otaa dulu ngahelipi oku kuma vamwe?
18 Nonande ovadali ove na oshinakuwanifwa sha fimana shokutekula ounona vavo “meduliko nomekumaido lOmwene,” ounona ovo vene tava ka tokola kutya otava ka kala ovanhu va tya ngahelipi ngeenge va kulu. (Ovaefeso 6:4) Nomolwaasho ounona ove na okulipula kutya: ‘Mbela ohandi tambula ko ngoo outeku wopahole oo handi pewa kovadali vange?’ Ngeenge osho tamu ningi ngaho, omwa hoolola oku ka enda mondjila ya denga mbada monghalamwenyo. Otamu ka hafifa neenghono ovadali veni, naasho sha fimanenena otamu ka hafifa omutima waJehova. — Omayeletumbulo 27:11.
[Eshangelo lopedu]
a La nyanyangidwa kEendombwedi daJehova.
Oto dimbuluka?
• Ongahelipi ovadali tava dulu okutulila po ounona vavo oshihopaenenwa shiwa shi na sha nokwiilikana nosho yo okukonakona Ombibeli?
• Ongahelipi ovadali tava dulu okukaleka po ombili moukwaneumbo?
• Ounona ove na okuninga etokolo lilipi, nongahelipi etokolo lavo tali dulu oku kuma vamwe?
[Efano pepandja 30]
Mbela oho tulile po ounona voye oshihopaenenwa shiwa shi na sha nokukonakona Ombibeli paumwene?
[Efano pepandja 31]
Oukwaneumbo u na ombili ohau kala wa hafa