“Diinina oukalele oo wa pewa kOmwene”

‘Diinina oukalele oo wa pewa kOmwene, opo u u wanife shili.’ — KOL. 4:17, yelekanifa NW.

1, 2. Ovakriste ove na oshinakuwanifwa shokulondwela ovanhu shilipi?

OTU NA oshinakuwanifwa sha kwata moiti shokulondwela ovanhu ovo ve li momudingonoko wetu. Omatokolo oo ovanhu tava ningi kunena oo taa ka ufa kutya otava ka xupa pefimbo ‘loudjuu munene’ ile hasho. (Eh. 7:14, NW) Omushangi a nwefwa mo wembo lOmayeletumbulo okwa ti: “Xupifa ava hava twalwa kokufya, naava hava pungaukile koshidipaelo, va kanghameka.” Kadi fi tuu eendjovo dididilikwedi! Ngeenge itatu londwele ovanhu shi na sha nehoololo olo ve na okuninga paife, ohatu ka kala tu na etimba lohonde. Omayeletumbulo oo tuu oo okwa twikila ko a ti: “Ove ngenge to ti: ‘Tala, twa li inatu shi shiiva’, Ye, ou ha konakona omutima, ine shi didilika? Naau ta nangele omwenyo woye, e shi shii. Ndele Ye ota pe omunhu pailonga yaye.” Hano osha yela kutya ovapiya vaJehova itava dulu okutya kutya ‘inava shiiva’ oshiponga osho ovanhu va taalela. — Omayel. 24:11, 12.

² Jehova okwa lenga eemwenyo dovanhu, nomolwaasho ota ladipike ovapiya vaye va ninge eenghendabala da mana mo ngaashi tava dulu opo va xupife eemwenyo dihapu. Omukalele waKalunga keshe oku na okuudifila vamwe etumwalaka lexupifo olo tali hangwa mEendjovo daKalunga. Otu na oshinakuwanifwa sha fa shomunangeli oo ha londwele ovanhu ngeenge e wete oshiponga. Inatu hala oku ka kala tu na etimba lohonde yovanhu ovo tava ka fya. (Hes. 33:1-7) Onghee hano, osha fimanenena okutwikila ‘okuudifa ondjovo.’ — Lesha 2 Timoteus 4:1, 2, 5.

3. Oikundafanwa ilipi hatu ka kundafana moshitukulwa eshi nosho yo moitukulwa ivali oyo tai landula?

³ Moshitukulwa eshi oto ke lihonga nghee to dulu okufinda omashongo oo ho shakeneke moshilonga shoye shokuxupifa eemwenyo nosho yo nghee to dulu okukwafela ovanhu vahapu. Moshitukulwa tashi landula oto ke lihonga nghee to dulu okukulika ounghulungu wokuhonga eeshili dOmbibeli da fimanenena. Oshitukulwa oshititatu sha pambafana noitukulwa oyo otashi ka hokolola oimoniwa tai tu omukumo oyo ovaudifi vOuhamba tava hafele mounyuni aushe. Ndele fimbo inatu kundafana oilihongomwa oyo, natu ka konakoneni kutya omolwashike omafimbo oo tu li muo madjuu.

Omolwashike ovanhu vahapu vehe na eteelelo?

4, 5. Ovanhu otava hangwa koiningwanima ilipi, navahapu ohave linyenge ngahelipi?

⁴ Oiningwanima younyuni otai ulike kutya otu li lela ‘pexulilo longhalelo yoinima.’ Ovanhu otava hangwa koiningwanima nokeenghalo odo Jesus nosho yo ovahongwa vaye va popya kutya otadi ka didilikifa ‘omafiku axuuninwa.’ Ovanhu ova hangwa ‘kefeto lokudala,’ olo la kwatela mo oita, ondjala, omakakamo edu nosho yo omaupyakadi amwe e lili noku lili. Ovanhu vahapu kave na omhango, ove lihole vovene, noihava tila Kalunga. Ovanhu ovo tava kendabala okudulika komifikamhango dOmbibeli, navo ove li ‘momafimbo madjuu.’ — Mat. 24:3, 6-8, 12, yelekanifa NW; 2 Tim. 3:1-5.

⁵ Ovanhu vahapu kave shii eityo lolelalela loiningwanima oyo tai ningwa mounyuni. Osho osha ningifa ovanhu vahapu va kale tave lipula shi na sha neameno lavo nosho yo lomaukwaneumbo avo. Ovanhu vahapu ohava yahamekwa kokufilwa ovaholike vavo nosho yo koiponga inene oyo hai va hange. Ovanhu va tya ngaho kave na eteelelo la sha molwaashi kave na eshiivo lashili kutya omolwashike oinima ya tya ngaho tai ningwa nonokutya openi tapa dulu okuhangwa ekandulepo. — Ef. 2:12.

6. Omolwashike ‘Babilon Shinene’ inashi dula okukwafela ovalanduli vasho?

⁶ ‘Babilon Shinene,’ ouhamba wounyuni womalongelokalunga oipupulu, inashi dula lela okukwafela ovanhu pamhepo. Mepingafano naasho, osha ngwangwanifa ovanhu vahapu pamhepo okupitila ‘momaviinyu oumbwada washo.’ Natango, molwaashi omalongelokalunga oipupulu oku li ngaashi ombwada, otaa hongaula nokunwefa mo ‘eehamba dokedu,’ taa longifa omahongo oipupulu nosho yo oumhulile opo va ningife ovanhu vahapu va kale tava dulika kovapangeli. Kungaho, omalongelokalunga oipupulu okwa kwata ko ovanhu, ndele nande ongaho, ihaa hongo oshili yopalongelokalunga. — Eh. 17:1, 2, 5; 18:23.

7. Ovanhu vahapu otava ende mondjila ilipi, ndele ongahelipi vamwe tava dulu okukwafelwa?

⁷ Jesus okwa tile kutya ovanhu vahapu otava ka enda mondjila ya mbwalangadja oyo tai twala kehanauno. (Mat. 7:13, 14) Ovanhu vamwe otava ende mondjila oyo ya mbwalangadja molwaashi otave lipwililikile osho Ombibeli tai hongo. Ndele vamwe otava ende mondjila oyo molwaashi va pukifwa ile va twikifwa noinava hongwa lela osho Jehova a hala va ninge. Otashi dulika ngeno vamwe ova lundulula onghedi yavo yokukalamwenyo ngeno ova hongelwe omahongo ashili Ombibeli. Ndele ovo ve li natango muBabilon Shinene notava anye okutambula ko omifikamhango dOmbibeli, itava ka xupa ‘poudjuu munene.’ — Eh. 7:14, NW.

Twikila okuudifa ‘nopehe na okweefa’

8, 9. Ovakriste vomefelemudo lotete ova li ve linyenga ngahelipi eshi va li va shakeneka omapataneko, nomolwashike?

⁸ Jesus okwa ti kutya ovahongwa vaye otava ka udifa onghundana iwa yOuhamba nokuninga ovanhu ovahongwa. (Mat. 28:19, 20) Onghee hano, Ovakriste vashili ove shii kutya okukufa ombinga moilonga yokuudifa otaku ulike kutya ove li ovadiinini kuKalunga nove na eitavelo la kola. Nomolwaasho ovashikuli vaJesus vonale va li va twikila okuudifa nonande ova li va shakeneka omapataneko. Ova li ve lineekela meenghono daJehova, va li va ilikana opo e va kwafele va dule okutwikila “okupopya nouladi aushe eendjovo” daye. Jehova okwa li a nyamukula eilikano lavo moku va pa omhepo iyapuki, nova li va udifa eendjovo daye nouladi. — Oil. 4:18, 29, 31.

⁹ Mbela ovashikuli vaJesus ova li va efa po okuudifa onghundana iwa eshi va li va hangwa komahepeko a kwata moiti? Hasho nandenande. Eshi ovawiliki velongelokalunga lOshijuda va li va handukifwa keudifo lovayapostoli, ova li ve va kwata po ndele tave va aneke noku va denga neeshokoto. Ndele nande ongaho, ovayapostoli ‘inava efa okulonga nokuudifa evangeli laKristus Jesus.’ Ova li ve udite ko nawa kutya ove na ‘okudulika kuKalunga ponhele yokudulika kovanhu.’ — Oil. 5:28, 29, 40-42.

10. Ovakriste ohava hangwa komayeleko elipi kunena, ndele nande ongaho, elihumbato lavo liwa otali dulu okweetifa oidjemo ilipi?

¹⁰ Ovapiya vaKalunga vahapu kunena inava dengwa ile va tulwe meedolongo omolwokuudifa. Ndele nande ongaho, Ovakriste vashili aveshe ohava shakeneke omayeleko e lili noku lili. Pashihopaenenwa, eliudo loye la deulwa kOmbibeli otashi dulika tali ku linyengifa u tambule ko elihumbato olo lihe holike kovanhu vahapu ile olo tali ku ningifa u kale wa yooloka ko kuvamwe. Ovanailonga vakweni, ovanafikola vakweni nosho yo ovashiinda shoye otashi dulika va diladile kutya ou li shimwe shi lili molwaashi oho ningi omatokolo e likolelela komafinamhango Ombibeli. Ndele nande ongaho, omapopyo avo mai inae ku teya omukumo. Ounyuni ou li momilaulu dopamhepo, ndele Ovakriste ove na ‘okuvilima ngaashi eenyofi.’ (Fil. 2:15) Ovanamitima diwa ovo tave ku mono otashi dulika va pandule oilonga yoye iwa ndele tashi ve linyengifa va fimaneke Jehova. — Lesha Mateus 5:16.

11. (a) Ovanhu vamwe otashi dulika ve linyenge ngahelipi koilonga yokuudifa? (b) Omuyapostoli Paulus okwa li a shakeneka omapataneko elipi, nokwa li e linyenga ngahelipi?

¹¹ Otwa pumbwa ouladi opo tu twikile okuudifa etumwalaka lOuhamba. Ovanhu vamwe, novapambele vetu nokuli, otashi dulika ve tu sheke ile va kendabale oku tu teya omukumo monghedi yonhumba. (Mat. 10:36) Omuyapostoli Paulus okwa li a dengwa lwoikando omolwokuudifa kwaye noudiinini. Didilika kutya okwa li e linyenga ngahelipi komapataneko oo, eshi a ti: ‘Nande twa hangelwe opo twa hepekwa ndele twa langaulwa, otwa li tu nouladi muKalunga oku mu udifila evangeli laKalunga omolwoodi linene.’ (1 Tes. 2:2) Osha li lela sha pula Paulus ouladi opo a dule okutwikila okuudifa onghundana iwa konima eshi a li a kwatwa po, a pombaulilwa oikutu yaye, a dengwa neeshokoto nokwa li a tulwa modolongo. (Oil. 16:19-24) Oshike sha li she mu kwafela a kale e na ouladi wokutwikila okuudifa? Okwa li a kwafelwa kokukala nehalo linene lokuwanifa po oshilonga osho a pewa kuKalunga shokuudifa. — 1 Kor. 9:16.

12, 13. Ovakriste vamwe ohava shakeneke omashongo elipi, nohava kendabala oku a finda ngahelipi?

¹² Oshi li yo eshongo okukala ovaladi moitukulwa omo ovanhu ihava kala naanaa momaumbo ile vehe na naanaa ohokwe metumwalaka lOuhamba. Otu na okuninga shike ngeenge otwa shakeneke eenghalo da tya ngaho? Otashi dulika twa pumbwa ouladi wa wedwa po opo tu kale hatu popi novanhu keshe opo hatu va shakeneke. Otashi dulika yo twa pumbwa okulundulula omafimbo etu okuudifa ile okuninga eenghendabala tu udifile moitukulwa omo hatu dulu okuhanga ovanhu vahapu. — Yelekanifa Johannes 4:7-15; Oilonga 16:13; 17:17.

¹³ Ovakriste vahapu otava shakeneke omaupyakadi oo haa etifwa koukulupe nosho yo kokuhenoukolele, oo taa dulu oku va imba va kale tava longo ngaashi tava dulu moilonga yokuudifa. Ngeenge ou li monghalo ya tya ngaho, ino teka omukumo. Jehova oku shii nawa omangabeko oye nokwa pandula osho to ningi. (Lesha 2 Ovakorinto 8:12.) Kashi na nee mbudi kutya oto hangwa komaupyakadi a tya ngahelipi, kutya nee omapataneko, okuhenakonasha nonghundana iwa kwovanhu, okuhenoukolele, ninga ngaashi to dulu opo u kufe ombinga mokuudifila vamwe onghundana iwa. — Omayel. 3:27; yelekanifa Markus 12:41-44.

‘Diinina oukalele woye’

14. Omuyapostoli Paulus okwa tulila po Ovakriste vakwao oshihopaenenwa shilipi, nokwa yandja omayele elipi?

¹⁴ Omuyapostoli Paulus okwa li a lenga oukalele waye, nokwa li a ladipika ovaitaveli vakwao va ninge sha faafana. (Oil. 20:20, 21; 1 Kor. 11:1) Arkippus, Omukriste womefelemudo lotete, okwa li umwe womwaavo Paulus a li a ladipika pauhandimwe. Paulus okwa li a popya monhumwafo yaye oyo a li a shangela Ovakolossi, a ti: ‘Lombweleni Arkippus: Diinina oukalele oo wa, pewa kOmwene, opo u u wanife shili.’ (Kol. 4:17, yelekanifa NW.) Katu shii kutya Arkippus okwa li lyelye ile kutya eenghalo daye oda li ngahelipi, ndele osha yela kutya okwa li a tambula ko oshilonga shokuudifa. Ngeenge ou li Omukriste e liyapulila Jehova, osha yela kutya naave owa tambula ko oukalele. Mbela oto twikile ngoo okudiinina oukalele woye opo u u wanife po?

15. Eliyapulo lopaKriste ola kwatela mo shike, nosha etifa omapulo elipi?

¹⁵ Omunhu ohe liyapulile Jehova okupitila meilikano tali di komutima ofimbo ina ninginifwa. Osho osha hala okutya okwa tokola toko okulonga ehalo laJehova. Onghee hano, otu na okulipula kutya: ‘Mbela okulonga ehalo laKalunga oku li ngoo natango oshinima sha fimanenena kwaame monghalamwenyo yange?’ Otashi dulika tu kale tu na oinakuwanifwa i lili noku lili oyo Jehova e tu pa, ngaashi okufila oshisho omaukwaneumbo etu. (1 Tim. 5:8) Ndele mbela ohatu longifa ngahelipi efimbo letu lopaumwene nosho yo eenghono detu? Oshike twa pitifa komesho monghalamwenyo yetu? — Lesha 2 Ovakorinto 5:14, 15.

16, 17. Ovakriste ovanyasha nosho yo ovakulunhu ovo vehe na oinakuwanifwa ihapu otava dulu okulalakanena shike?

¹⁶ Mbela ou li omunyasha Omukriste e liyapulila Jehova, nowa mana omatrika ile u li pokumana? Otashi dulika ku na natango oinakuwanifwa ihapu youkwaneumbo. Ngeenge osho ngaho, owa tokola oku ka ninga shike monghalamwenyo yoye? Omatokolo elipi tae ke ku kwafela u wanife po eudaneko loye li na sha nokulonga ehalo laJehova? Ovanyasha vahapu ova unganeka nawa oinima yavo opo va dule okukokola ondjila, nova mona ehafo linene nosho yo embilipalelwo. — Eps. 110:3; Omuud. 12:1.

¹⁷ Mbela ou li omunyasha womido dopokati (omido 20 nasha no 30 nasha)? Otashi dulika ho longo oilonga yokulikongela omboloto yefimbo liyadi, ndele ku na vamwe ovo to file oshisho. Nopehe na omalimbililo, oho hafele okukufa ombinga momalipyakidilo e na sha neongalo ngaashi to dulu. Mbela ino hala okumona vali ehafo la wedwa po? Mbela ino hala okutamununa mo oukalele woye? (Eps. 34:9; Omayel. 10:22) Moitukulwa imwe, omu na oilonga ihapu natango ya pumbwa okulongwa opo ovanhu aveshe va dule okuudifilwa etumwalaka lexupifo. Mbela ito dulu okuninga omalunduluko onhumba monghalamwenyo yoye, opo u ka longe nande okoitukulwa oko ku na omhumbwe inene yovaudifi vOuhamba? — Lesha 1 Timoteus 6:6-8.

18. Omalunduluko elipi ovalihomboli vamwe ovanyasha va li va ninga, noshidjemo osha li shike?

¹⁸ Diladila shi na sha noshihopaenenwa shaKevin naElena vokOilongo yaHangana ovo opo va hombola.a Okwa li ve udite kutya ove na okulanda eumbo ngaashi sha li hashi ningwa kovanyasha ovo opo va hombola moshitukulwa shavo. Aveshe ova li hava longo oilonga yokulikongela omboloto yefimbo liyadi novali tava dulu okukala nonghalamwenyo youdjeko. Oilonga yavo yokulikongela omboloto nosho yo oilonga yopeumbo ka ya li hai va fiile po efimbo la wana lokuya moilonga yomomapya. Ova li va mona kutya ohava longifa konyala efimbo lavo neenghono davo adishe moinima yopaumwene. Ndele eshi va mona ovalihomboli vamwe ovo ve li ovakokolindjila ve na onghalamwenyo i li paunafangwa nova hafa, ova li va tokola okuninga po omalunduluko e na sha naasho va pitifa komesho monghalamwenyo yavo. Konima eshi va ilikana kuJehova opo e va kwafele va ninge omatokolo e li pandunge, ova landifa po eumbo lavo ndele tava ka kala mokafuleta. Elena okwa li a ninga omalunduluko opo a kale ha longo eevili dinini moilonga yokulikongela omboloto ndele ta ningi omukokolindjila. Kevin okwa ka efa po oilonga yaye ndele ta ningi omukokolindjila molwaashi okwa li a tuwa omukumo koimoniwa oyo omukulukadi waye a li ta hafele moukalele. Konima yefimbo, ova li va tembukila koshilongo shimwe shokuAmerika lokOlukadi opo va ka longe oko ku na omhumbwe inene yovaudifi vOuhamba. Kevin okwa ti: “Otwa kala alushe tu udite elao mohombo yetu, ndele eshi twa li twe litulila po omalalakano okutamununa mo oukalele wetu oshe tu etela ehafo linene.” — Lesha Mateus 6:19-22.

19, 20. Omolwashike okuudifa onghundana iwa ku li oshilonga sha fimanenena kunena?

¹⁹ Okuudifa onghundana iwa oku li oshilonga sha fimanenena osho tashi longwa kombada yedu kunena. (Eh. 14:6, 7) Otashi yapulifa yo edina laJehova. (Mat. 6:9) Etumwalaka lOmbibeli oha li xwepopaleke onghalamwenyo yovanhu omayovi mahapu ovo have li tambula ko omudo keshe, nokungaho otava dulu oku ka xupifwa. Omuyapostoli Paulus okwa li a pula a ti: “[Otava] udu ngahelipi ngenge kape nomuudifi?” (Rom. 10:14, 15) Itashi ka kala mbela shidjuu kovanhu ngeenge kape na oo te va udifile? Kala wa tokola toko okuninga ngaashi to dulu opo u wanife po oukalele woye.

²⁰ Onghedi imwe omo to dulu okukwafela ovanhu va ude ko kutya omolwashike tu li momafimbo madjuu nosho yo kutya omatokolo oo tava ningi otae ke va etela oilanduliko ya tya ngahelipi, oyo okuxwepopaleka ounghulungu woye wokuhonga. Oshitukulwa tashi landula otashi ke ku kwafela u mone nghee to dulu okuxwepopaleka ounghulungu woye wokuhonga.

[Eshangelo lopedu]

Oto nyamukula ngahelipi?

• Ovakriste ove na oshinakuwanifwa shokulondwela ovanhu shilipi?

• Otu na okuungaunga ngahelipi nomashongo oo hatu shakeneke moilonga yokuudifa?

• Ongahelipi hatu dulu okuwanifa po oukalele wetu?

[Efano pepandja 9]

Otwa pumbwa ouladi opo tu udife nonande ope na omapataneko

[Efano pepandja 10]

Oto ka ninga po shike ngeenge oho udifa moshitukulwa omo ovanhu ihava kala naanaa momaumbo?