Kala ho kongo ewiliko laKalunga moinima aishe

“Kalunga ou, Oye tuu Kalunga ketu alushe fiyo alushe; note tu endifa fiyo omokufya.” — EPS. 48:15.

1, 2. Omolwashike tu na okulandula ewiliko laJehova ponhele yokulineekela mounongo wetu vene, nomapulo elipi a holoka po?

NGEENGE hatu diladila shi na sha noinima oyo ihe na oshilonga ile ya nyika oshiponga, oshi na oupu tu lifufye. (Omayel. 12:11) Ngeenge twa halelela okuninga oshinima shonhumba osho inashi yuka kOmukriste, omitima detu luhapu ohadi kongo omalipopilo oku shi ninga. (Jer. 17:5, 9) Onghee hano, omupsalme umwe okwa ulika kutya oku na ounongo eshi a li a ilikana kuJehova a ti: “Tumine nge ouyelele noshili yoye! Oyo i kwatele nge komesho.” (Eps. 43:3) Omupsalme oo okwa li e lineekela Jehova ndele hamounongo waye oo wa ngabekwa, nokwa li e shii kutya Jehova oye ashike ta dulu oku mu wilika monghedi ya denga mbada. Nafye otu na okukonga ewiliko kuKalunga, ngaashi omupsalme oo a li a ninga.

² Ndele mbela omolwashike tu na okulineekela ewiliko laJehova komesho yoinima aishe? Onaini tu na okukonga ewiliko laJehova? Otu na okukala tu na oikala ilipi opo tu mone ouwa mewiliko la tya ngaho, na Jehova ohe tu wilike ngahelipi kunena? Ohatu ka kundafana omapulo oo a fimana moshitukulwa eshi.

Omolwashike tu na okulineekela ewiliko laJehova?

3-5. Omolwashike tu na okukala twe lineekela filufilu ewiliko laJehova?

³ Jehova oTate yetu womeulu. (1 Kor. 8:6) Oku tu shii nawa pauhandimwe noha dulu okumona osho shi li momitima detu. (1 Sam. 16:7; Omayel. 21:2) Ohamba David oya li ya popya naKalunga ya ti: “Nande ndi li omutumba, ile handi fikama, owe shi shiiva; omadiladilo ange ou a uditile kokule; osheshi fimbo etumbulo inali uya kelaka lange, Omwene, Ove we li koneka.” (Eps. 139:2, 4) Ngeenge Jehova oku tu shii nawa, mbela otu na okukala twa limbililwa kutya pamwe ke shii osho sha denga mbada kufye? Jehova oye omunaendunge a shiya ko. Oha mono keshe shimwe e dule ovanhu aveshe noku shii oidjemo yoinima okudja pehovelo layo. (Jes. 46:9-11; Rom. 11:33) Oye “Kalunga omunaendunge aeke.” — Rom. 16:27.

⁴ Kakele kaasho, Jehova oku tu hole nokwe tu halela alushe ouwa. (Joh. 3:16; 1 Joh. 4:8) Ohe tu pe nehalo liwa molwaashi omunahole. Omuhongwa Jakob okwa shanga a ti: “Keshe oshipewa shiwa, nokeshe oshali sha wanenena, ohashi di kombada, okuXe yomauyelele.” (Jak. 1:17) Ovo hava tambula ko ewiliko laKalunga ohava mono ouwa munene omolwokuyandja kwaye nehalo liwa.

⁵ Natango, Jehova oye omunaenghono adishe. Omupsalme okwa popya shi na sha naasho a ti: “Ou e li omutumba meameno laau wOkombadambada, ndee ta kala momudidimbe wOmunaenghono adishe, ye ota ti kOmwene: Eameno lange, nohotengulu yange, Kalunga kange, ou handi mu lineekele.” (Eps. 91:1, 2) Ngeenge ohatu landula ewiliko laJehova, ohatu kongo eameno la denga mbada molwaashi Jehova iha nyengwa kusha. Nokuli nonande otwa hangwa komapataneko Jehova ote ke tu kwafela. Ite ke tu nyemateka nande. (Eps. 71:4, 5; Lesha Omayeletumbulo 3:19-26.) Jehova oku shii shili osho sha denga mbada kufye, okwe tu halela ouwa nota dulu oku tu pa osho sha denga mbada. Inashi nyika tuu oulai okukala hatu lipwililikile ewiliko laJehova! Ndele mbela onaini hatu kala twa pumbwa ewiliko la tya ngaho?

Onaini hatu kala twa pumbwa ewiliko laKalunga?

6, 7. Onaini hatu kala twa pumbwa ewiliko laJehova?

⁶ Otwa pumbwa ewiliko laKalunga monghalamwenyo yetu aishe, okudja kounona fiyo omoukulupe. Omupsalme umwe okwa ti: “Kalunga ou, Oye tuu Kalunga ketu alushe fiyo alushe; note tu endifa fiyo omokufya.” (Eps. 48:15) Ngaashi omupsalme oo, Ovakriste ovanaendunge ihava efa okukonga ewiliko kuKalunga.

⁷ Ope na omafimbo amwe oo hatu kala tu udite twa pumbwa ekwafo meendelelo. Omafimbo amwe ohatu kala tu li “moudjuu,” tashi dulika hatu patanekwa, tu na omukifi wa kwata moiti ile twa kanifa oilonga ombadilila. (Eps. 69:17, 18) Meenghalo da tya ngaho, otashi hekeleke okukonga ewiliko kuJehova, tu na elineekelo kutya ote ke tu pameka tu dule okulididimika nokuninga omatokolo e li pandunge. (Lesha Epsalme 102:18.) Ndele nande ongaho, otwa pumbwa yo ekwafo laye moinima imwe vali. Pashihopaenenwa, ngeenge twa hala okuudifila ovanhu vakwetu onghundana iwa yOuhamba, otwa pumbwa ewiliko laJehova opo tu pondole. Ngeenge hatu ningi etokolo lonhumba, kutya nee oli na sha nomalihafifo, okudjala nokuliwapeka, eendafano, oilonga, ehongo ile keshe tuu, ohatu ka dula ashike okuninga etokolo li li pandunge ngeenge otwa landula ewiliko laJehova. Otwa pumbwa shili ewiliko laJehova meembinga adishe dokukalamwenyo.

Osha nyika oshiponga okuhakonga ewiliko laKalunga

8. Okulya oshiimati sha dilikwa kwaEva otaku ulike shike?

⁸ Natu dimbuluke kutya otu na okulandula ewiliko laJehova nehalo liwa. Kalunga ite ke tu kondjifa tu kale hatu landula ewiliko laye ngeenge inatu hala. Eva okwa li omunhu wotete oo a li a hoolola okuhalandula ewiliko laJehova, noshihopaenenwa shaye otashi ulike nghee sha nyika oshiponga okuhalandula ewiliko laJehova. Onghatu oyo Eva a li a katuka okwa li tai ulike shike? Eva okwa li a lya oshiimati osho sha li sha dilikwa molwaashi okwa li a hala ‘okushiiva ouwa nowii ngaashi Kalunga.’ (Gen. 3:5) Eshi Eva a ninga ngaho, okwa li a hala okulonga po oilonga oyo i na okulongwa kuKalunga, a tokola kuye mwene kutya shilipi shi li mondjila nosho yo osho sha puka, ponhele yokulandula ewiliko laJehova. Kungaho, okwa ekelashi ounamapangelo waJehova. Okwa li a hala okukala ta yukifa onghalamwenyo yaye kuye mwene. Omushamane waye Adam naye okwa li yo a landula ounashibofa waye. — Rom. 5:12.

9. Ngeenge otwa ekeleshi ewiliko laJehova, ohatu ningi shike paulelalela, nomolwashike okuninga ngaho kuhe li pandunge nandenande?

⁹ Kunena, ngeenge itatu landula ewiliko laJehova, nafye itatu dulika kounamapangelo waJehova ngaashi Eva a li a ninga. Pashihopaenenwa, diladila shi na sha nomunhu oo e na ondjikilile yokutala omafano oipala. Ngeenge oha endafana neongalo lopaKriste, oku shii ewiliko laJehova li na sha naasho. Katu na okupopya oinima inai koshoka ile oku i tala nokahalu. (Ef. 5:3) Ngeenge omunhu oo okwa ekeleshi ewiliko laJehova la tya ngaho, ita dulika kounamapangelo nokoukwamutwe waye. (1 Kor. 11:3) Oshinima sha tya ngaho kashi li pandunge nandenande, molwaashi ngaashi Jeremia a ti: “Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” — Jer. 10:23.

10. Omolwashike tu na okulongifa emanguluko letu lokuninga omatokolo monghedi ya yuka?

¹⁰ Ovanhu vamwe otashi dulika itava tu kumwe neendjovo daJeremia odo da popiwa mokatendo ka tetekela, tava ti kutya molwaashi Jehova okwe tu pa emanguluko lokuninga omatokolo, ke na oku tu tokola molwaashi hatu li longifa. Ndele nande ongaho, inatu dimbwa kutya emanguluko lokuninga omatokolo oli li oshali nola kwatela mo oinakuwanifwa. Otu na okulihokolola kuKalunga omolwoinima oyo hatu hoolola okuninga nosho yo okupopya. (Rom. 14:10) Jesus okwa ti: “Eshi shi yadi momutima, osho tashi popifa okanya.” Okwa ti yo vali: “Momutima omo hamu di omadiladilo [mai], omadipao, omanyonohombo, oluhaelo, oulunga, omalundilafano, omasheko.” (Mat. 12:34; 15:19) Osho otashi ulike kutya eendjovo odo hatu popi nosho yo oilonga yetu otai holola oikala yomitima detu. Ohai ulike kutya fye ovanhu lela va tya ngahelipi. Nomolwaasho Omukriste omunaendunge oha kongo ewiliko laJehova mukeshe shimwe. Monghedi ya tya ngaho, Jehova ota ka mona kutya Omukriste a tya ngaho ‘oku na omutima wa yuka note ke mu ningila ouwa.’ — Eps. 125:4.

11. Oshike hatu lihongo mondjokonona i na sha nOvaisrael?

¹¹ Dimbuluka ondjokonona i na sha nOvaisrael. Eshi kwa li va ninga omatokolo e li pandunge nova dulika koipango yaJehova, Jehova okwa li e va amena. (Jos. 24:15, 21, 31) Ndele oikando noikando ova li va longifa nai emanguluko lavo lokuninga omatokolo. Jehova okwa li a popya shi na sha navo pefimbo laJeremia a ti: “Inava uda vo inava ameka omatwi avo kuame, ndelenee ova enda pamhangela yavo vene nomoukukutu womitima davo dii; va pange ombuda, hashipala shavo.” (Jer. 7:24-26) Kashi nyikifa tuu oluhodi! Inatu efa po nande ewiliko laJehova ndele hatu kala hatu ende paemhangela detu ‘noku mu pa ombuda ndele hashipala’ omolwoutangalali wetu ile okukala twe litula mokuwanifa po omahalo etu.

Oshike twa pumbwa opo tu dule okulandula omayele aKalunga?

12, 13. (a) Oukwatya ulipi tau tu kwafele tu kale twa hala okulandula ewiliko laJehova? (b) Omolwashike eitavelo la fimanenena?

¹² Ohole yetu yokuhola Jehova ohai tu linyengifa tu landule ewiliko laye. (1 Joh. 5:3) Ndele Paulus okwa popya oukwatya umwe vali oo twa pumbwa, a ti: ‘Ohatu ende meitavelo, hamokumona.’ (2 Kor. 5:6, 7) Omolwashike sha fimana okukala tu na eitavelo? Jehova ote tu ‘endifa shili mondjila ya yuka’ ndele ondjila oyo itai twala koupuna ile keendodo da fimana dounyuni ou. (Eps. 23:3) Omolwetomheno olo, omesho etu eitavelo naa kale a tala kondjabi inenenene yopamhepo oyo hai di mokulongela Jehova. (Lesha 2 Ovakorinto 4:17, 18.) Eitavelo ohali tu kwafele tu kale twa wanenwa koinima oyo tu na. — 1 Tim. 6:8.

¹³ Jesus okwa popya kutya elongelokalunga lashili ola kwatela mo okuninga omaliyambo, notashi pula yo eitavelo. (Luk. 9:23, 24) Ovalongelikalunga vamwe ovadiinini ova ninga omaliyambo manene, ve lididimikila oluhepo, omafininiko, outondwe nosho yo omahepeko a kwata moiti. (2 Kor. 11:23-27; Eh. 3:8-10) Ndele ova li ashike va dula okulididimikila nehafo eenghalo da tya ngaho omolweitavelo la pama. (Jak. 1:2, 3) Okukala tu na eitavelo la pama ohaku tu kwafele tu kale twe lineekela filufilu kutya ewiliko laJehova otali tu etele alushe ouwa. Otu na oushili filufilu kutya ovo tave lididimike noudiinini otava ka pewa ondjabi inene i dule okumona oixuna oko tava mono oule wokafimbo. — Heb. 11:6.

14. Omolwashike Hagar a li a pumbwa okulininipika?

¹⁴ Otwa pumbwa yo okukala tu na elininipiko opo tu dule okulandula ewiliko laJehova. Oshihopaenenwa shaHagar, omupika waSara, otashi koleke oushili oo. Eshi Sara a li ongadji natango, okwa li a yandja Hagar kuAbraham, na Hagar okwa li a ninga oufimba waAbraham. Okudja opo Hagar okwa li e linenepekela omwene waye Sara, ndele Sara okwa li “e mu monifa oixuna,” na Hagar okwa li a ya onhapo. Omweengeli waJehova okwa li a shakeneka Hagar ndele te mu lombwele ta ti: “Shuna komwene woye, ove u lininipikile epangelo laye.” (Gen. 16:2, 6, 8, 9) Hagar otashi dulika a li a hala ngeno ewiliko limwe li lili. Nomolwaasho a li e na okweefa po oikala yelinenepeko opo a dulike kewiliko lomweengeli. Opo nee Hagar okwa li e lininipika ngaashi omweengeli a li e mu lombwela, nokwa li a dalela omonamati waye Ismael meameno leumbo laxe Abraham.

15. Tumbula eenghalo donhumba omo tashi dulika twa pumbwa elininipiko opo tu landule ewiliko laJehova kunena.

¹⁵ Omafimbo amwe otashi dulika nafye twa pumbwa okulininipika opo tu landule ewiliko laJehova. Vamwe otashi dulika va pumbwa okutambula ko ouyelele wonhumba u na sha nokutya omalihafifo onhumba oo ve hole itaa hafifa Jehova. Omukriste wonhumba otashi dulika a nyemateka mukwao nokwa pumbwa oku mu pa ombili. Ile otashi dulika a ninga epuko lonhumba nokwa pumbwa okudimina kutya okwa ninga epuko. Ongahelipi ngeenge umwe okwa nyona enyono la kwata moiti? Okwa pumbwa okulininipika nokuhokololela ovakulunhuongalo enyono laye. Otashi dulika nokuli omunhu a tya ngaho a kondwe mo meongalo. Ndele opo a alukile mo, oku na okulininipika nokulivela ombedi ndele te lialuluka. Eendjovo dOmayeletumbulo 29:23 otadi hekeleke omunhu ngeenge e li meenghalo da tya ngaho ile dimwe da yukila oko, odo tadi ti: “Elinenepeko lomunhu tali mu xutula, ndelenee ou e nomhepo i nelininipiko, ota ka fimanekwa.”

Jehova ohe tu wilike ngahelipi?

16, 17. Ongahelipi hatu dulu okumona ouwa pauyadi mOmbibeli oyo i li odjo yewiliko laKalunga?

¹⁶ Eendjovo daKalunga da nwefwa mo, Ombibeli, odo odjo yewiliko la shiya ko. (Lesha 2 Timoteus 3:16, 17.) Opo tu mone ouwa pauyadi mEendjovo daKalunga, otu na okukonga ewiliko mudo fimbo inatu hangika keenghalo donhumba didjuu. Otu na okukala hatu lesha Ombibeli efiku keshe. (Eps. 1:1-3) Kungaho, ohatu ka kala tu shii nawa omishangwa da nwefwa mo. Ohatu ka kala hatu diladila ngaashi Kalunga, nohatu ka kala nokuli twe lilongekidila nomaupyakadi oo haa holoka po ombadilila.

¹⁷ Osha fimana yo okukala hatu dilonga kwaasho hatu lesha mOmishangwa nokwiilikana metwokumwe nasho. Ngeenge hatu dilonga shi na sha nomishangwa dOmbibeli, ohatu mono nghee hatu dulu oku di tula moilonga meenghalo donhumba. (1 Tim. 4:15) Ngeenge tu li momaupyakadi a kwata moiti, ohatu ilikana kuJehova, hatu mu pula e tu kwafele tu mone ewiliko olo twa pumbwa. Omhepo yaJehova otai ke tu kwafela tu dimbuluke omafinamhango opamishangwa oo twa lesha mOmbibeli ile moishangomwa ye likolelela kOmbibeli. — Lesha Epsalme 25:4, 5.

18. Omeenghedi dilipi Jehova he tu wilike okupitila moumwainafana wetu wopaKriste?

¹⁸ Oumwainafana wetu wopaKriste ou li yo odjo imwe ya denga mbada omo hatu dulu okukonga ewiliko laJehova. Oshitukulwa sha fimanenena shoumwainafana oo osho “omupiya omudiinini nomunaendunge” nOlutuwiliki laye, olo hali tu pe alushe eendja dopamhepo okupitila moishangomwa nosho yo meeprograma dokwoongala nodoyoongalele. (Mat. 24:45-47; yelekanifa Oilonga 15:6, 22-31.) Kakele kaasho, moumwainafana wetu wopaKriste omu na Ovakriste va pyokoka pamhepo, unene tuu ovakulunhuongalo, ovo va wana oku tu pa omayele opamishangwa pauhandimwe. (Jes. 32:1) Ovanyasha ovo ve li momaukwaneumbo opaKriste ove na yo odjo yewiliko ya denga mbada. Ovadali vavo ovatilikalunga ova pewa eenghonopangelo kuKalunga, nounona otava ladipikwa alushe va konge ewiliko kuvo. — Ef. 6:1-3.

19. Omanangeko noupuna elipi hatu mono omolwokukonga alushe ewiliko laJehova?

¹⁹ Jehova ohe tu wilike shili okupitila meenghedi dihapu, notu na okutambula ko ewiliko la tya ngaho nomutima aushe. Ohamba David oya li ya popya shi na sha nOvaisrael eshi va li ovadiinini kuKalunga, ya ti: “Ootatekulu vonale okwa li ve ku lineekela, ve litula melineekelo, ndele Ove we va xupifa, ova li ve ku ifana, nova mona exupifo; nove ku lineekela, ndele inava fifwa ohoni.” (Eps. 22:4-6) Ngeenge ohatu landula ewiliko laJehova nelineekelo, nafye itatu ka “fifwa ohoni.” Jehova ote ke tu wanifila osho e tu udanekela. Ngeenge ‘otwa tula ondjila yetu meke lOmwene’ ponhele yokulineekela meendunge detu vene, ohatu ka mona omanangeko noupuna mahapu, nokuli nopaife. (Eps. 37:5) Ngeenge otwa kanyatele oudiinini wetu kuJehova, ohatu ka mona omanangeko noupuna taa kalelele. Ohamba David oya shanga ya ti: “Omwene oku hole ouyuki, novadiinini vaye ite va efa nande. . . . Ovayuki, vo otava ka fyuulula [edu, OB-1986], ndee tava kala mo alushe.” — Eps. 37:28, 29.

Oto dulu okuyelifa?

• Omolwashike twe lineekela ewiliko laJehova?

• Ngeenge otwa ekeleshi ewiliko laJehova ohatu ningi shike paulelalela?

• Omeenghalo dimwe dilipi Omukriste a pumbwa elininipiko?

• Jehova ohe tu wilike ngahelipi kunena?

[Omafano pepandja 16]

Mbela oho kongo ewiliko laJehova meembinga adishe dokukalamwenyo kwoye?