Oohapu dhaJehova odhi na omwenyo
Omanenedhiladhilo okuza montumwafo ya nyolelwa Aaroma
OMUYAPOSTOLI Paulus okwa li a thiki moshilando shaKorinto lwomo 56 E.N., sho a li molweendo lwe olutitatu lwetumo. Okwa li e shi tseya kutya opwa li pu na omahilathano pokati kAakriste muRoma mboka Aajuda naamboka ya li kaaye shi Aajuda. Paulus okwa li e ya nyolele ontumwafo molwaashoka okwa li a hala e ya hanganithe muukumwe naKristus.
Montumwafo ye kAaroma, Paulus okwa yelitha nkene mboka ye li aayuki ye na okukala. Ontumwafo ndjoka otayi kokeke ontseyo yetu yokutseya Kalunga nOohapu dhe, otayi tsu omuthindo esilohenda inaali longelwa lyaKalunga notayi simaneke wo onkandangala ndjoka Kristus ta dhana mehupitho lyetu.—Heb. 4:12.
ONGIINI OMUNTU TA VULU OKUNINGA OMUYUUKI?
Paulus okwa nyola a ti: “Ayehe oya yona, kaye na oonkondo dhaKalunga dhokuya hupitha. Ihe omolwomagano gesilohenda lye Kalunga ote ya ningi aayuuki, oshoka Jesus Kristus okwe ya kulila.” Okwa ti wo: “Omuntu ota ningi owala omuyuuki koshipala shaKalunga, sho i itaala, ihe hamolwaasho ta gwanitha shoka tashi pulwa kompango.” (Rom. 3:23, 24, 28) Okupitila meitaalo lyawo okwiitaala “oshilonga shimwe shuuyuuki” Aakriste ayehe aagwayekwa nosho wo iilyo ‘yongundu onene’ ‘yoonzi dhilwe’ otayi vulu ‘okuninga aayuuki.’ Aagwayekwa otaya ka kala nomwenyo megulu nokupangela pamwe naKristus, iilyo yongundu onene otayi ka ninga ookuume kaKalunga noyi na etegameno lyoku ka hupa ‘muudhigu mboka unene.’—Rom. 5:18; Eh. 7:9, 14, OB-1954; Joh. 10:16; Jak. 2:21-24; Mat. 25:46.
Paulus okwa pula a ti: “Ongiini ano? Otu na okukala muulunde, oshoka katu li kohi yompango, ihe okohi yesilohenda lyaKalunga?” Okwa yamukula a ti: “Aawe, itashi vulika!” Paulus okwa yelitha a ti: ‘One aapika yaangoka tamu vulika kuye. Ngele tamu igandja okulonga uulunde, nena ehulilo olyo eso. Ihe ngele tamu vulika kuKalunga, evuliko ndyoka otali mú ningi aayuuki.’ (Rom. 6:15, 16) Okwa ti: “Ngele otamu dhipaga iilonga yuulunde nOmbepo, nena otamu kala mu na omwenyo.”—Rom. 8:13.
Omapulo gopamanyolo taga yamukulwa:
1:24-32—Mbela mboka taya popiwa moovelise ndhika ye na eihumbato ewinayi oya li Aajuda nenge oomboka kaye shi Aajuda? Nonando oohapu ndhika otadhi opalele oongundu adhihe, Paulus okwa li ta popi u ukilila Aaisraeli yonale mboka ya li aashunimonima. Nonando oya li ye shi omithikampango dhaKalunga dhuuyuuki, ‘oya dhini okunongela Kalunga.’ Oya li ye na ondjo.
3:24, 25—Ongiini ‘ekulilo lyaJesus Kristus’ tali vulu okudhima po ‘oondjo ndhoka’ dhonale komeho manga inaali ningwa? Ehunganeko lyotango ndyoka lya nyolwa muGenesis 3:15 olya li lya gwanithwa momumvo 33 E.N., sho Jesus a dhipagelwa komuti gwomahepeko. (Gal. 3:13, 16) Sho Jehova a popi ehunganeko ndyoka, okwa li e wete ekulilo lya fa lya gandjwa nale molwaashoka kapu na shoka tashi vulu okwiimba Kalunga a gwanithe po elalakano lye. Onkee ano Jehova ota vulu okudhima po oondjo dholuvalo lwaAdam ngele olu na eitaalo meuvaneko lyeyambo lyaJesus Kristus ndyoka lya li inaali ningwa natango. Omolwekulilo oshi li wo tashi vulika opo aantu mboka ya sa omanga Uukriste inaawu tameka ya ka yumudhwe.—Iil. 24:15.
6:3-5 (OB-1954)—Okuninginithwa muKristus Jesus nomeso lye otashi ti shike? Ngele Jehova a gwayeke aalanduli yaKristus nombepo ondjapuki, otaya kala ya hangana naJesus noya ninga iilyo yegongalo lyaagwayekwa ndyoka li li olutu lwaKristus ngoka e li omutse gwalyo. (1 Kor. 12:12, 13, 27; Kol. 1:18) Okuninginithwa muKristus Jesus osho tashi ti ngaaka. Aakriste aagwayekwa oya ‘ninginithwa muKristus nomeso lye,’ molwaashoka onkalamwenyo yawo oyi li metsokumwe neyambo lye nokaye na we etegameno lyasha lyokukala nomwenyo gwaaluhe kombanda yevi. Onkee ano, eso lyawo olyopayambo ngaashi owala lyaJesus, nonando lyawo kali na ongushu yasha yekulilo. Okuninginithwa kwawo meso lyaKristus ohaku hulu ngele ya si sho taya yumudhilwa omwenyo gwomegulu.
7:8-11—Ongiini ‘uulunde wa mono ompito mokulongitha oshipango’? Ompango oya li ya kwathele aantu yu uve ko ashihe shoka sha kwatelwa muulunde, noku ya kaleka ye shi shi nawa kutya yo aalunde. Oshizemo, oya li ya dhimbulula mo iilonga yawo mbyoka ya longa ye li aalunde naantu oyendji oye shi dhimbulula mo shi vulithe nale kutya yo oye li aalunde. Kungeyi otaku vulu okutiwa kutya uulunde owa mono ompito mokulongitha Ompango.
Iiyilongomwa kutse:
1:14, 15. Otu na omatompelo ogendji okuuvitha onkundana ombwanawa nuulaadhi. Etompelo limwe olyo kutya otu na ongunga yaantu mboka ya kulilwa nombinzi yaJesus notu na oshinakugwanithwa oku ya kwathela ya tseye Kalunga nomalalakano ge.
1:18-20. Aantu mboka ihaaya tila Kalunga nokaaye shi aayuuki “itaa vulu okwiipopila,” molwaashoka otaya vulu okumona omaukwatya ge meshito nonando ye iha monika.
2:28; 3:1, 2; 7:6, 7. Konima sho Paulus a li a popi oohapu ndhoka dha fa tadhi shundula Aajuda, okwa li a nengeneke oohapu dhe. Okwe tu tulila po oshiholelwa nkene tu na okuungaunga niikundathanwa mbyoka tashi vulika yu uvithe aantu nayi tatu shi ningi nondjaalela nonoondunge.
3:4. Uuna aantu taya popi shoka tashi kondjithathana naashoka shi li mOohapu dhaKalunga otatu ulike kutya “Kalunga oye omunashili” mokwiinekela etumwalaka lye ndyoka li li mOmbiimbeli nokukatuka metsokumwe nehalo lye. Otatu vulu okukwathela yalwe ya tseye kutya Kalunga oye omunashili ngele tatu kutha ombinga nuulaadhi miilonga yokuuvitha Uukwaniilwa noyokuninga aantu aalongwa.
4:9-12. Abraham okwa li a yalulwa e li omuuyuuki omolweitaalo lye omanga nokuli inaa pita etanda mepipi lyomimvo 99. (Gen. 12:4; 15:6; 16:3; 17:1, 9, 10) Mokuninga ngaaka Kalunga okwa li u ulike lela shoka hashi ningi omuntu omuyuuki koshipala she.
4:18. Etegameno olya pumbiwa opo tu kale tu na eitaalo, molwashoka eitaalo lyetu olya kankamena ketegameno.—Heb. 11:1.
5:18, 19. Paulus okwa li a yelitha paufupi efaathano ndyoka li li pokati kaJesus naAdam sho a popi kombinga yankene tashi vulika opo omulumentu gumwe ‘a gandja omwenyo gwe a hupithe oyendji.’ (Mat. 20:28) Otu na okuholela omukalo nguka gwokulonga aantu nawa nokutompathana nayo pandunge.—1 Kor. 4:17.
7:23, OB-1954. Iilyo yolutu lwetu ngaashi iikaha, omagulu nelaka otayi vulu oku tu ninga ‘aapika yompango yuulunde,’ onkene otu na okukala twa kotoka twaahe yi longithe papuko.
8:26, 27. Ngele otu li monkalo ndjoka twa ngwangwana nokatu shi kutya natu popye shike megalikano, “Ombepo oye mwene te tu galikanene.” Opo ihe, Jehova ngoka hu “uvu omagalikano,” ota ka taamba ko omagalikano ngoka ga nyolwa mOohapu dhe Ombiimbeli ongo ga fa taga zi kutse.—Eps. 65:2.
8:38, 39. Omaupyakadhi, iishitwa iiwinayi yopambepo nomapangelo gopantu itayi vulu okwiimba Jehova a kale e tu hole, yo itayi tu imbi wo nando tu kale tu mu hole.
9:22-28; 11:1, 5, 17-26. Omahunganeko ogendji ge na ko nasha nokutungululwa kwaIsraeli oga gwanithilwa megongalo lyAakriste aagwayekwa, ndyoka iilyo yalyo‘inaayi kuthwa owala mAajuda, ihe nomaapagani wo.’
10:10, 13, 14. Ohole yetu yokuhola Jehova naantu ooyakwetu nosho wo eitaalo lyetu muJehova nomomauvaneko ge otayi vulu oku tu inyengitha tu kuthe ombinga nuulaadhi muukalele wopaKriste.
11:16-24, 33. “Uuwanawa nuugeyi waKalunga” kawu na tuu ondjele! Eeno, “oye emanya; iilonga ye oyolela, noondjila dhe adhihe odhu uka.”—Deut. 32:4.
NATU KALENI METSOKUMWE NOKUNINGWA AAYUUKI
Paulus okwa ti: “Onkee ano, one aamwameme, otandi mú kumagidha, mu dhimbulule esilohenda lyaKalunga kutseni mpoka li thike: Igandjeni ne yene kuKalunga eyambo li na omwenyo, mu kale mwe mu iyapulila, ne mu kale mwe mu opalela.” (Rom. 12:1) “Onkee ano” nenge uushili mboka kutya Aakriste oye li metsokumwe nuuyuki omolweitaalo lyawo, oohapu dhaPaulus tadhi landula ko odhi na okuguma iikala yawo shi na ko nasha nayalwe nosho wo nomapangelo.
Paulus okwa nyola a ti: “Onda hala oku mú lombwela one amuhe: Inamu idhiladhilila pehala mpoka inaamu adha, ihe idhiladhilileni pandjele.” Okwa kumagidha ta ti: ‘Ohole yeni nayi kale yashili.’ (Rom. 12:3, 9) “Omuntu kehe na vulike kaapangeli mboka taye mu pangele.” (Rom. 13:1) Okwa li a ladhipike Aakriste ‘kaaya pangulathane’ miinima mbyoka yi ikolelela keiyuvo lyomuntu ye mwene.—Rom. 14:13.
Omapulo gopamanyolo taga yamukulwa:
12:20—Ongiini tatu “gongele omakala ga tema” komitse dhaatondi yetu? Pethimbo lyOmbiimbeli, oshiyela osha li hashi tulwa meziko moka omakala haga tulwa kombanda nokohi yasho. Uupyu mboka tawu zi kombanda ohawu shi kwathele shi hengumuke opo omange ga ze ko. Momukalo gwa faathana, otatu gongele omakala ga tema komitse dhaatondi yetu moku ya ulikila ohenda shoka hashi ya ningitha ya hengumune iikala yawo yoku tu tonda nokutameka okuulika uukwatya uuwanawa.
12:21—Ongiini tatu vulu ‘okusinda uuwinayi nuuwanawa’? Omukalo gumwe moka tatu vulu oku shi ninga omokutsikila okuuvitha onkundana ombwanawa yUukwaniilwa nopwaahe na uumbanda sigo ethimbo ndyoka Jehova ta ti opuwo.—Mark. 13:10.
13:1—Omomukalo guni aapangeli ya “tulwa po kuKalunga”? Aapangeli “oya tulwa po kuKalunga” molwaashoka oye e ya pitika ya pangele, nopoompito dhimwe Kalunga okwa hunganeka nale kutya otaya ka ninga aapangeli. Uushili waashika otawu adhika momahunganeko gOmbiimbeli kombinga yaapangeli yontumba.
Iiyilongomwa kutse:
12:17, 19. Okugalulila omuntu uuwinayi nena otwi ikuthila miikaha yetu oshilonga shoka shi na owala okulongwa kuJehova. Kashi li tuu einenepeko kutse ngele tatu ‘shunithile gumwe uuwinayi’!
14:14, 15. Katu na okunikitha omumwatate oluhodhi nenge tu mu pundukithe niikulya nenge niikunwa mbyoka tatu mu pe.
14:17. Opo tu kale tu na ekwatathano ewanawa naKalunga inaashi ikolelela nando kwaashoka hatu li nenge hatu nu nenge kwaashoka ihaatu li nenge ihaatu nu. Pehala lyaashono oshi ikolelela kuuyuuki, kombili nokenyanyu.
15:7. Nopwaahe na ondjoolola yasha natu taambe ko ayehe mboka taya kongo oshili megongalo nokuuvithila onkundana yUukwaniilwa ayehe mboka tatu adha.
[Omathano pepandja 13]
Mbela eyambo otali vulu okudhima po oondjo dhonale omanga inaali ningwa?