Diinina “ohole yoye yotete”

‘Diinina shili osho u kwete.’ — EH. 3:11.

1, 2. Owa li u udite ngahelipi eshi wa tomhwa u itavele kutya osho wa li to lihongo kombinga yaJehova oshoshili?

MBELA oto dimbuluka kutya owa li u udite ngahelipi eshi we lihonga tete kombinga yeteelelo likumwifi olo Jehova a udanekela ovanhu ovaduliki? Ngeenge owa li melongelokalunga limwe li lili, owa li u udite ngahelipi eshi wa yelifilwa omalalakano aKalunga okudja mOmishangwa nowa li u udite ngahelipi eshi wa uda ko omahongo oo wa li u wete madjuu okuuda ko? Otashi dulika wa li we shi mona mo kutya mboli owa li wa pukifwa nowa li wa hafa neenghono eshi wa yelifilwa oinima oyo. Ngeenge owa tekulwa moukwaneumbo wopaKriste, mbela owa li u udite ngahelipi eshi wa tomhwa u itavele kutya osho wa kala to lihongo kombinga yaJehova oshoshili nosho yo eshi wa tokola toko okukala metwokumwe naasho wa li to lihongo? — Rom. 12:2.

² Ovamwatate vahapu ohava hokolola kutya ova li va hafa neenghono nova li ve udite olupandu eshi Jehova e va nanena kuye. (Joh. 6:44) Ehafo olo ola li le ve linyengifa va kale hava kufa ombinga momalipyakidilo opaKriste. Molwaashi ova li va hafa neenghono, ova li yo va hala okulombwela keshe umwe kombinga yaasho ve lihonga. Mbela naave osho wa li u udite ngaho?

3. Eongalo lokuEfeso ola li li li monghalo ya tya ngahelipi eshi Jesus e va tumina etumwalaka?

³ Eshi Jesus a li a tuma etumwalaka keongalo lopaKriste lokuEfeso lomefelemudo lotete, okwa li a popya kombinga ‘yohole yavo yotete.’ Nonande Ovaefeso ova li ve na omaukwatya mahapu mawa, ohole yavo yokuhola Jehova oya li ya talala. Onghee hano, Jesus okwe va lombwela a ti: “Oilonga yoye ondi i shii noupyakadi woye nelididimiko loye, nomolwaashi u he nombili novanawii, ndele wa yeleka ava tave liti ovo ovayapostoli, ndelenee havo, ndele we va nongonona nokutya, ovo ovanaipupulu; ndele ove u nelididimiko, ndele wa humbata oudjuu molwedina lange ndele ino loloka. Ndelenee ondi na sha naave, eshi wa efa ohole yoye yotete.” — Eh. 2:2-4.

4. Omolwashike sha yeleka kufye kunena okukonakona etumwalaka laJesus olo a li a tumina Ovaefeso?

⁴ Omolweenghalo odo Ovakriste ovavaekwa va pita mudo okudja mo 1914 okuyuka komesho, osha yeleka okukonakona omayele oo Jesus a li a pa eongalo lokuEfeso nosho yo omaongalo makwao oo a tumbulwa mEhololo. (Eh. 1:10) Ovakriste vamwe kunena otashi dulika va efe ‘ohole yavo yotete’ yokuhola oshili yOmbibeli nosho yo Jehova i talale. Onghee hano, natu ka konakoneni nghee okudimbuluka oimoniwa yetu vene nokudilonga kuyo taku dulu okupepaleka nokupameka ohole yetu yotete yokuhola Kalunga noshili noku tu linyengifa tu kale nouladi oo twa li tu na pehovelo.

Oshike sha li she ku tomha u tambule ko oshili?

5, 6. (a) Omukriste keshe oku na okukala a shiiva shike? (b) Oshike she ku tomha u itavele kutya Eendombwedi daJehova ohadi hongo oshili? (c) Oshike tashi dulu okukwafela omunhu a pepaleke ohole yaye yotete yokuhola oshili?

⁵ Keshe oo te liyapulile Jehova oku na tete ‘okushiiva’ kutya “ehalo laKalunga lilipi, naashi shiwa, sha wapalela nosha wana.” (Rom. 12:1, 2) Osho osha kwatela mo okulihonga oshili yOmbibeli. Ovanhu ohava tomhwa koinima ya yoolokafana kutya Eendombwedi daJehova ohadi hongo oshili. Vamwe otashi dulika va li va tomhwa eshi va ulikilwa edina laKalunga mOmbibeli ile eshi va yelifilwa kombinga yonghalo omo oonakufya ve li shili. (Ex. 15:3, OB-1986; Omuud. 9:5, 10) Vamwe ova li ve linyengifwa kohole oyo va mona mokati koshiwana shaJehova. (Joh. 13:34, 35) Vamwe ova li ve linyengifwa eshi ve lihonga kutya okuhakala oshitukulwa shounyuni otashi ti ngahelipi. Ova li va fika pexulifodiladilo kutya Ovakriste vashili itava dulu okukala hava kufa ombinga moinima yopapolotika nosho yo moita yopashiwana. — Jes. 2:4; Joh. 6:15; 17:14-16.

⁶ Okuuda ko oinima oyo ya tumbulwa metetekelo osho sha li she linyengifa vamwe va kale ve hole Kalunga. Diladila kutya oshike sha li she ku tomha pauhandimwe u tambule ko oshili. Molwaashi ovanhu ova kulila meenghalo da yoolokafana nove na omaukwatya a yoolokafana, osho she ku linyengifa u kale u hole Jehova nou itavele omaudaneko aye otashi dulika hasho she linyengifa vamwe. Omatomheno oo kwa li e ku linyengifa pehovelo otashi dulika taa ti sha natango kwoove ngaashi ashike sha li pehovelo eshi we lihonga oshili. Oshili ihai lunduluka. Onghee hano, oshiwa okudilonga kombinga yanghee twa li tu udite pehovelo eshi twe lihonga oshili, molwaashi kungaho ohatu ka pepaleka ohole yetu yotete yokuhola oshili. — Lesha Epsalme 119:151, 152; 143:5.

Pameka ohole yoye yotete

7. Omolwashike twa pumbwa okupameka ohole yetu yotete yokuhola oshili, nongahelipi hatu dulu oku shi ninga?

⁷ Otashi dulika pwa ningwa omalunduluko mahapu monghalamwenyo yoye okudja eshi we liyapulila Jehova. Ohole yoye yotete yokuhola oshili oya fimana. Ndele mokweendela ko kwefimbo, ohole yoye yokuhola oshili oya li i na okweenda tai kulu opo u dule okutaalela omashongo mape oo taa yeleke eitavelo loye. Otashi dulika Jehova a kala te ku yambidida opo u kulike ohole ya tya ngaho. (1 Kor. 10:13) Onghee hano, oimoniwa oyo wa pita muyo momido odo da pita po oya fimana yo kwoove. Oye ku kwafela u pameke ohole yoye yotete nou shiive kutya ehalo laKalunga olilipi naasho shiwa nosha wapala. — Jos. 23:14; Eps. 34:9.

8. Jehova okwa li a lombwela Moses shike, nOvaisrael ove ke lihonga ngahelipi shihapu kombinga yaJehova?

⁸ Opo tu ude ko kutya oimoniwa oyo hatu piti muyo ohai pameke ohole yetu, diladila pashihopaenenwa kwaasho sha li sha ningilwa Ovaisrael konima eshi Jehova a li e va lombwela kutya ote ke va mangulula moupika waEgipti. Jehova okwa li a lombwela Moses a ti: “Ohandi ka kala osho handi ka kala.” (Ex. 3:7, 8, 13, 14, NW) Kungaho, Kalunga okwa li a hala okutya ota ka dana onghandangala keshe oyo a pumbwa okudana opo a mangulule oshiwana shaye. Ovaisrael ova li ve lihonga kombinga yomaukwatya aJehova e lili noku lili moiningwanima oyo ya ka ningwa po nosho yo meenghalo odo va pita mudo. Ova li ve lihonga kutya Jehova oKalunga Omunaenghono adishe, Omutokoli, Omuwiliki, Omuxupifi, Ofule nOmufilishisho. — Ex. 12:12; 13:21; 14:24-31; 16:4; Neh. 9:9-15.

9, 10. Onghalo ilipi tai dulu oku tu kwafela tu shiive nawa Kalunga, nomolwashike shiwa okudilonga koimoniwa oyo hatu piti muyo?

⁹ Nonande eenghalo odo wa pita mudo inadi faafana naado dOvaisrael vopefimbo laMoses, oimoniwa oyo wa pita muyo otashi dulika ye ku kwafela u mone kutya Kalunga oku na ko nasha naave pauhandimwe, naasho osha pameka eitavelo loye. Otashi dulika wa mona meenghedi donhumba kutya Jehova Omufilishisho, Omuhekeleki nonokutya Omuhongi. (Lesha Jesaja 30:20b, 21.) Ile otashi dulika wa mona nghee omailikano oye onhumba a nyamukulwa. Otashi dulika wa li wa hangwa keshongo lonhumba, ndele owa kwafelwa kOmukriste mukweni. Ile otashi dulika wa mona omishangwa donhumba fimbo wa li to konakona paumwene, odo de ku kwafela monghalo yonhumba.

¹⁰ Ngeenge owa hokololele vamwe oimoniwa ya tya ngaho, otashi dulika itava ka kala lela va tunhukwa kuyo. Nonande oimoniwa ya tya ngaho kai fi oikumwifilonga, otai ti sha filufilu kwoove. Meenghalo da tya ngaho, Jehova okwe ku ningila naanaa ngaashi wa li wa pumbwa. Diladila komido odo wa kala moshili. Mbela oto dimbuluka eemhito donhumba eshi wa li u udite kutya Jehova oku na ko nasha naave pauhandimwe? Okudilonga koimoniwa ya tya ngaho nokunghee wa li u udite pefimbo olo otaku dulu okupepaleka ohole yokuhola Jehova oyo wa li u na pefimbo olo. Kala wa lenga oimoniwa ya tya ngaho nokukala to dilonga kuyo efimbo nefimbo. Oimoniwa oyo otai ku shilipaleke kutya Jehova oku na ko nasha naave shili pauhandimwe, nokape na ou ta dulu oku ku pataneka kutya hasho shi li ngaho.

Likonakona ove mwene

11, 12. Oshike tashi dulu okuningifa ohole yOmukriste yokuhola oshili i talale, nelondwelo lilipi Jesus a yandja?

¹¹ Ngeenge ohole yoye yokuhola Kalunga nosho yo oshili oya talala, osho inashi hala okutya Kalunga okwa lunduluka. Jehova Kalunga iha lunduluka nandenande. (Mal. 3:6; Jak. 1:17) Natango oku na ko nasha ashike naave kunena ngaashi nale. Onghee hano, lipula omapulo taa landula. Oshike sha enda po lwopokati opo osho tashi dulika sha kuma ekwatafano lange naJehova? Otashi dulika mbela pe na omafininiko mahapu ile nda wililwa po koisho ihapu? Otashi dulika monakudiwa wa li ho ilikana wa mana mo, ho konakona noukeka Eendjovo daKalunga noho dilonga luhapu kudo. Mbela owa li u na ouladi wokuya moukalele nokuya kokwoongala pandjikilile shi dulife paife? — 2 Kor. 13:5.

¹² Otashi dulika eshi we likonakona, ku na ounghundi moinima ya tya ngaho, ndele ngeenge ou na ounghundi wa tya ngaho, mbela oshike she u etifa? Mbela omalipulo oo tashi dulika e shii okuudiwa ko okwe ku pofipaleka uha kale vali u wete kutya efiku laJehova ola ehena popepi; ngaashi okufila oshisho nawa oukwaneumbo woye, oukolele woye nosho tuu? Jesus okwa li a londwela ovayapostoli vaye a ti: “Lipashukileni, omitima deni di ha lolokifwe koitendele nokokukolwa nokoshisho shoipalwifa, efiku olo li he mu vakele ngaashi omwiyo, osheshi olo otali hange aveshe hava kala kombada yedu alishe. Pashukeni hano omafiku aeshe nokwiilikana, mu mone eenghono okuya onhapo ei aishe tai ka ningwa.” — Luk. 21:34-36.

13. Jakob okwa faafanifa Eendjovo daKalunga nashike?

¹³ Omushangi umwe wOmbibeli, Jakob, okwa li a nwefwa mo a ladipike ovaitaveli vakwao ve likonakone va mana mo tava longifa Eendjovo daKalunga, a ti: “Kaleni hano ovawanifi veendjovo, havapwilikini vongaho nokulifufya nye vene. Osheshi umwe ngenge omupwilikini weendjovo ndele hamuwanifi wado, okwa fa omulumenhu ta tale oshipala shaye mokatengelelo; ye ote litale, ndee ta di po, ndee te lidimbwa diva nhumbi ye a tya. Ndelenee ou ta tale nokukonakona momhango ei ya wana yemanguluko ndee ta kala mo, ye e he fi omupwilikini ha dimbwa, ndelenee omuwanifi shili, oye ta kala omunelao mokulonga kwaye.” — Jak. 1:22-25.

14, 15. (a) Ombibeli otai dulu oku ku kwafela ngahelipi opo u xwepopaleke oupamhepo woye? (b) Otashi dulika wa pumbwa okudilonga kombinga yomapulo elipi?

¹⁴ Omunhu ota dulu okulongifa oshitengelelo (oshisipili) opo a shilipaleke ngeenge ota monika nawa. Pashihopaenenwa, ngeenge omulumenhu okwa mono kutya otaye yaye inai yukilila, oku na oku i yukililifa. Ngeenge omukainhu okwa mono kutya eexwiki daye oda xwidaukila, oku na oku di fula nawa. Sha faafana, Omishangwa ohadi tu kwafele tu likonakone tu mone nhumbi tu li. Ngeenge ohatu liyelekanifa naasho Ombibeli tai tu lombwele nhumbi tu na okukala, kungaho ohatu i longifa i li oshitengelelo. Ndele mbela otashi ka kala ngoo shi li pandunge okulitalela moshitengelelo ndele hatu efa okuwapeka epuko olo twa mona? Otashi ka kala ashike pandunge ngeenge otwa katuka onghatu tu yukife omapuko oo hatu limono eshi hatu litalele “momhango ei ya wana,” nokungaho ohatu ningi “ovawanifi veendjovo” daKalunga. Onghee hano, keshe oo a didilika kutya ohole yaye yotete yokuhola Jehova nosho yo oshili oya talala, oshiwa e lipule omapulo aa: ‘Omafininiko elipi handi shakeneke monghalamwenyo yange, nohandi ungaunga nao ngahelipi? Okwa li handi ungaunga nao nale ngahelipi? Oshike mbela sha enda po lwopokati opo?’ Ngeenge owa mono kutya ou na ounghundi wonhumba eshi to lipula omapulo oo, ino lipwililikila ounghundi wa tya ngaho. Ino ongaonga nandenande okuninga omalunduluko apa sha pumbiwa. — Heb. 12:12, 13.

¹⁵ Okulikonakona kwa tya ngaho otaku dulu oku ku kwafela u litulile po omalalakano opamhepo e li pandjele opo u ninge exumokomesho. Omuyapostoli Paulus okwa li a pa omulongi pamwe naye, omunyasha Timoteus, omayele a nwefwa mo, opo a kwafele Timoteus a xwepopaleke oukalele waye. Paulus okwa ladipika Timoteus a ti: “Aishe ei i [dilonga, NW], ove u kale muyo, opo okweehena kwoye komesho ku monike kuaveshe.” — 1 Tim. 4:15.

16. Oshike twa pumbwa okulungamena eshi hatu likonakona hatu longifa Omishangwa?

¹⁶ Kala u shi shii kutya ngeenge owe likonakona wa mana mo, oto ka mona kutya ou na omaunghundi onhumba. Osho otashi dulika shi ku teye omukumo. Ndele ku na okuteka omukumo, molwaashi elalakano lokulikonakona okutala kutya openi wa heva nokuninga omalunduluko oo a pumbiwa. Ashike, Satana, ota ka kala a hala oku ku ningifa u kale u udite uhe na oshilonga omolwokuhawanenena kwoye. Satana okwa li a xwaxwameka ovalumenhu vamwe va popye kutya eenghendabala adishe odo ovanhu tava ningi okulongela Kalunga odoshimha. (Job 15:15, 16; 22:3) Jesus okwa li a nyaneka pomutenya oipupulu ya tya ngaho, nokwa li a divilika kutya Kalunga oha tale ko keshe umwe womufye e na ondilo momesho aYe. (Lesha Mateus 10:29-31.) Okukala tu shii kutya inatu wanenena oku na oku tu linyengifa tu pule ekwafo kuJehova nelininipiko, opo e tu kwafele tu xwepopale. (2 Kor. 12:7-10) Ngeenge oto imbwa komukifi wonhumba ile koukulupe u longe shihapu, litulila po omalalakano e li pandjele. Ino tyololoka nandenande ile u efe ohole yoye i talale.

Otu na shihapu okupandula

17, 18. Omauwa elipi hatu ka mona ngeenge otwa pameke ohole yetu yotete?

¹⁷ Ohatu ka mona omauwa mahapu ngeenge otwa twikile okupameka ohole yetu yotete. Eshiivo letu lokushiiva Kalunga otali ka hapupala nohatu ka kala nolupandu linene okupandula ewiliko laye lopahole. (Lesha Omayeletumbulo 2:1-9; 3:5, 6.) Omupsalme umwe okwa ti: ‘Moku diinina eemhangela dOmwene, otamu di ondjabi inene.’ Okwa ti yo kutya: “Ehepaululo lOmwene oli [shii] okulineekelwa shili, [nohali] nongopaleke omalai.” Omupsalme umwe vali okwa ti: “Ovanelao ovava, ve nondjila ya yuka, ndee tava ende pamhango yOmwene.” — Eps. 19:8, 12; 119:1.

¹⁸ Nopehe na omalimbililo, oto dimine kutya ope na oinima ihapu iwa oyo to dulu okupandula Jehova molwayo. Ou shii omatomheno kutya omolwashike eenghalo dounyuni di li ngaho. Oho mono omauwa mahapu okupitila momafiloshisho oo Jehova ha pe oshiwana shaye. Natango, ou na olupandu eshi Jehova e ku nanena mehangano laye nokwe ku pa oufembanghenda wokukala Ondombwedi yaye. Kala u na olupandu omolwomanangeko noupuna aeshe oo! Ngeno ou shange omanangeko noupuna oo wa mona, otashi dulika ito a mane ko. Ndele okukala to diladila efimbo nefimbo komanangeko noupuna oo wa mo, otashi ke ku kwafela u dulike kekumaido eli: ‘Diinina shili osho u kwete.’ — Eh. 3:11.

19. Kakele kokudilonga kombinga yekwatafano letu naKalunga, oinima vali imwe ya fimana ilipi tai ke tu kwafela tu kale twa pama pamhepo?

¹⁹ Okudilonga kunghee eitavelo letu la enda tali kolo mokweendela ko kwefimbo oshimwe ashike shomoinima oyo tai tu kwafele tu diinine osho tu kwete. Oshungonangelo ohai tu ladipike luhapu tu longife yo omafiloshisho makwao a fimana opo tu kale twa pama pamhepo. Pashihopaenenwa, ohai tu ladipike tu diinine okwiilikana, okukala pokwoongala kwopaKriste nokukufa ombinga muko notu kale hatu kufa ombinga nouladi moukalele wetu womoipafi. Oinima oyo otai dulu oku tu kwafela tu pameke nokupepaleka ohole yetu yotete. — Ef. 5:10; 1 Pet. 3:15; Jud. 20, 21.

Oto nyamukula ngahelipi?

• Ongahelipi omatomheno oo a li e ku linyengifa u kale u hole Jehova taa dulu okukala odjo yetwomukumo kwoove paife?

• Ngeenge owa dilonga koimoniwa oyo wa pita muyo, otashi ke ku kwafela u kale noushili ulipi?

• Omolwashike u na okulikonakona shi na sha nohole yoye yokuhola Kalunga?

[Efano pepandja 29]

Oshike sha li she ku nanena moshili ile she ku tomha u tambule ko oshili?

[Efano pepandja 31]

Mbela ou wete oinima oyo wa pumbwa okuninga omalunduluko muyo?