Kala omudiinini kuKalunga noku mu longela nomutima wa hanganifwa

‘Ohandi ende moshili yoye. Hanganifa omutima wange ndi tile edina loye.’ — EPS. 86:11, yelekanifa NW.

1, 2. (a) PaPsalme 86:2, 11, oshike tashi dulu oku tu kwafela tu kanyatele oudiinini wetu kuJehova ngeenge hatu yelekwa? (b) Omolwashike tu na okukala alushe ovadiinini kuJehova?

OMOLWASHIKE Ovakriste vamwe ovo va kala ovadiinini oule womido, nonande ova li va tulwa meedolongo ile va li va hepekwa hava ka ya momwiyo wokuhola omaliko? Enyamukulo kepulo olo ola kwatela mo omutima wetu wopafaneko, sha hala kutya, ounhu wetu womeni. Epsalme 86 ola kwatakanifa oudiinini nomutima wa hanganifwa, sha hala okutya, nomutima aushe. Omupsalme David okwa li a ilikana a ti: ‘Diinina omwenyo wange; osheshi aame omudiinini, Kalunga kange, xupifa omupiya woye, ou te ku lineekele! Omwene, ulikile nge ondjila yoye, ame ndi ende moshili yoye, hanganifa omutima wange, ndi tile edina loye.’ — Eps. 86:2, 11, yelekanifa NW.

² Oudiinini wetu kuJehova otau ka teywa po koinima imwe i lili, ngeenge inatu mu lineekela nomutima aushe. Omahalo okulihola mwene okwa fa eeboma da telwa mondjila omo hatu ende. Nonande otashi dulika twa li twa dula okukanyatela oudiinini wetu kuJehova fimbo twa li meenghalo donhumba didjuu, oshi na oupu tu wile meemwiyo daSatana. Onghee hano, osha fimanenena okukala alushe ovadiinini kuJehova, fimbo inatu hangwa komayeleko. Ombibeli oya ti: “Omutima woye [u] amena komesho yoinima aishe.” (Omayel. 4:23) Ohatu dulu okulihonga oilihongomwa ya fimanenena shi na sha nokukala alushe ovadiinini moshiningwanima shomuprofeti umwe oo kwa li a tumwa kuJehova okudja kuJuda a ye kuJerobeam, ohamba yaIsrael.

‘Ila ndi ku pe oshali’

3. Jerobeam okwa li e linyenga ngahelipi ketumwalaka laKalunga letokolo olo la li la yandjwa okupitila momuprofeti?

³ Kala nee ngeno wa fa u wete oshiningwanima eshi: Omuprofeti umwe waKalunga opo ashike a mane okuyandja etumwalaka la kwata moiti kohamba Jerobeam, oyo ya li ya tota po elongelokalunga lokwiilikana onhana mouhamba waIsrael wokolundume womapata omulongo. Okudja opo, ohamba oya li ya kwatwa kehandu neenghono noya li ya lombwela ovakwaita vayo va kwate po omutumwa waKalunga oo. Ndele Jehova okwa li a amena omupiya waye. Fimbo ohamba ya li tai ulike komuprofeti oo nehandu, ohaluka eke layo ola kukuta pashikumwifilonga noaltari yayo yelongelokalunga loipupulu oya li ya tauka pokati. Ohaluka, Jerobeam okwa li a lundulula oikala yaye. Okwa li a pula omulumenhu waKalunga a ti: “Handukululifa Omwene, Kalunga koye, u indilile nge onghenda, opo ndi dule okwaalula okwooko kwange.” Omuprofeti oo okwa li a ilikana, neke lohamba ola li la veluka. — 1 Eeh. 13:1-6.

4. Omolwashike eshivo lohamba la li la yeleka oudiinini womuprofeti waKalunga? (b) Omuprofeti okwa li a nyamukula ohamba ngahelipi?

⁴ Jerobeam okwa li vali a lombwela omulumenhu waKalunga kashili a ti: “Ila, tu ye keumbo, ove u lipameke nondi ku pe oshali.” (1 Eeh. 13:7) Mbela omuprofeti oo okwa li e linyenga ngahelipi? Mbela ota ka tambula ko ngoo eshivo lohamba nonande opo ashike a hangika a yandje etumwalaka laKalunga letokolo kohamba oyo? (Eps. 119:113) Ile ota ka anya okutambula ko eshivo lohamba nonande oya li tai monika ya fa ye livela ombedi? Jerobeam okwa li oshipuna nokwa li ta dulu oku pa ookaume kaye eeshali dondilo. Ngeenge omuprofeti waKalunga oo okwa li a hangwa e na oikala yokuhola omaliko momutima waye, oshali oyo oya li tai ka kala eyeleko linene kuye. Ndelenee Jehova okwa hangwa nale a lombwela omuprofeti oo a ti: “Ino lya ko omungome, ndele ino nwa ko omeva, ndele ino aluka nondjila oyo wa ya ko nayo.” Onghee hano, omuprofeti okwa li a nyamukula nomufindo a ti: “Nande u pe nge etata leumbo loye, ame itandi i pamwe naave, ndele itandi li omungome noitandi nu omeva monhele ei.” Opo nee, omuprofeti oo okwa li a fiya po Betel, ndele ta shuna nondjila imwe i lili. (1 Eeh. 13:8-10) Oshilihongomwa shilipi hatu lihongo metokolo olo la li la ningwa komuprofeti oo shi na sha nokukala alushe ovadiinini? — Rom. 15:4.

Natu kale ‘twa wanenwa’

5. Ongahelipi ohole yokuhola omaliko tai dulu okuyeleka oudiinini wetu?

⁵ Ohole yokuhola omaliko otai dulu okuyeleka oudiinini wetu. Mbela otwe lineekela ngoo eudaneko laJehova olo kutya ote ke tu pa osho twa pumbwa shili? (Mat. 6:33; Heb. 13:5) Ponhele yokuninga eenghendabala tu limonene oinima yonhumba youdjeko monghalamwenyo oyo itatu dulu okumona noupu, mbela itatu dulu okukala tuhe i na? (Lesha Ovafilippi 4:11-13.) Mbela ohatu yelekwa tu kale itatu longo ngaashi hatu dulu meongalo ile tu efe po okulongela Kalunga opo tu lalakanene oinima oyo twa hala paife? Mbela otwa pitifa ngoo komesho oilonga yokulongela Jehova noudiinini monghalamwenyo yetu? Omanyamukulo etu komapulo oo okwe likolelela kungeenge ohatu longele Kalunga nomutima aushe ile hasho. Omuyapostoli Paulus okwa ti: “Etilokalunga olo eliko linene shili, shamha omunhu a wana naai yaye. Osheshi fye inatu eta mo sha mounyuni, ndele itatu dulu okudja mo nasha. Ndelenee ngenge tu na oipalwifa noikutu, osho tuu nashi tu [wanene].” — 1 Tim. 6:6-8.

6. Otashi dulika tu pewe eeshali doludi lilipi, noshike tashi ke tu kwafela tu tokole ngeenge ohatu ke di tambula ko ile hasho?

⁶ Natu ka tale koihopaenenwa tai landula. Omuyandji woilonga wetu otashi dulika a kale a hala oku tu yela moilonga nokuwedela ondjabi yetu nosho yo oku tu pa omauwa amwe vali. Ile otashi dulika twa mona kutya oshixwepo okutembukila koshilongo shimwe ile konhele imwe tu ka konge oilonga nelalakano opo tu dule okulikola oimaliwa ihapu. Potete, eemhito da tya ngaho otashi dulika di kale tadi monika da fa omanangeko noupuna a dja kuJehova. Ndele fimbo inatu ninga etokolo moshinima osho, mbela katu na okukonakona omalinyengotomheno etu? Epulo la fimana olo tu na okulipula tete olo kutya: “Etokolo lange olo handi ningi otali ka kuma ngahelipi ekwatafano lange naJehova?”

7. Omolwashike sha fimana okweefa po ohole yokuhola omaliko?

⁷ Ounyuni waSatana otau xwaxwameke alushe ohole yokuhola omaliko. (Lesha 1 Johannes 2:15, 16.) Ondiaboli oya halelela okunyateka omitima detu. Onghee hano, otwa pumbwa okulikonakona tu tale ngeenge inatu kwatwa kohole yokuhola omaliko, nongeenge osho, natu i efe po. (Eh. 3:15-17) Jesus okwa li a anya filufilu okutambula ko omauhamba ounyuni aeshe oo Satana a li te mu pe. (Mat. 4:8-10) Okwe tu londwela a ti: “Pashukeni onye mu lungame keshe tuu olwisho, osheshi omwenyo womunhu ihau xupifwa kouhapu weliko laye.” (Luk. 12:15) Oudiinini otau ke tu kwafela tu kale twe lineekela muJehova ponhele yokukala twe lineekela mufye vene.

Omuprofeti waKalunga ‘okwa li a lombwelwa oipupulu’ komuprofeti omunamido

8. Oudiinini womuprofeti waKalunga owa li wa yelekwa ngahelipi?

⁸ Ngeno omuprofeti waKalunga okwa li a twikila nolweendo laye fiyo okeumbo oko a dile, ngeno oinima oye ke mu endela nawa. Ndele fimbo ina fika, omuprofeti oo okwa li a shakeneka eyeleko limwe vali. Ombibeli otai ti: “MuBetel mwa li omuprofeti a kulupa. Ovana vaye ovamati ve uya ndele ve mu hepaululila” ashishe osho sha li sha ningwa po efiku olo muBetel. Eshi omunamido oo a li a uda ehokololo olo, okwa li a lombwela ovanamati ve mu mangele ondongi opo a dule oku ka shikula omuprofeti waKalunga. Eshi omunamido oo kwa li a shikula omuprofeti waKalunga okwe mu hanga ta fuda po momudile womuti. Omunamido oo okwa li a lombwela omuprofeti a ti: “Ila tu ye pamwe keumbo lange, tu lye omungome.” Eshi omuprofeti waKalunga kashili a li a anya okutambula ko eshivo olo, omunamido okwe mu nyamukula a ti: “Naame yo omuprofeti ngaave, ndele omwengeli okwa lombwela nge pandjovo yOmwene ndee ta ti: Mu twala pamwe naave keumbo loye, opo a lye omungome ndee a nwe omeva.” Ndele Ombibeli oya ti kutya omuprofeti waKalunga ‘okwa li a lombwelwa oipupulu’ komuprofeti omunamido. — 1 Eeh. 13:11-18.

9. Omishangwa otadi ti ngahelipi shi na sha naavo hava popi oipupulu, nohava nyono po ekwatafano loolyelye?

⁹ Omuprofeti oo omunamido okwa li a popya oipupulu, kashi na nee mbudi kutya oshike sha li she mu linyengifa a ninge ngaho. Omunamido oo otashi dulika a li nale omuprofeti waJehova omudiinini. Ndelenee pomhito oyo, okwa li ta popi oipupulu. Ombibeli oya tokola filufilu oikala ya tya ngaho. (Lesha Omayeletumbulo 3:32.) Omunaipupulu iha nyono po ashike ekwatafano laye naKalunga, ndele oha nyono po yo ekwatafano lavamwe naKalunga.

Omuprofeti waKalunga okwa li a “ya pamwe” nomuprofeti omunamido keumbo laye

10. Omuprofeti waKalunga okwa li e linyenga ngahelipi keshivo lomunamido, nosha li sha eta oilanduliko ya tya ngahelipi?

¹⁰ Omuprofeti oo a dile kuJuda okwa li ta dulu okukwata mo oipupulu yomuprofeti omunamido. Okwa li ta dulu okulipula kutya: ‘Omolwashike Jehova e na okutuma omweengeli komunhu umwe e lili nokupa nge omalombwelo mape?’ Omuprofeti oo okwa li ta dulu okupula Jehova a yelife oinima, ndele Omishangwa inadi popya kutya osho a li a ninga ngaho. Ponhele yaasho, okwa li a “ya pamwe [nomunamido] ndee ta li omungome ndee ta nu omeva meumbo laye.” Ndele Jehova ka li a hokwa onghatu oyo omuprofeti waye a li a katuka. Onghee hano, konima eshi a li a hekwa a lye nokunwa, okwa li ta shuna ngeno kuJuda ndele mondjila okwa li a shakeneka onghoshi ndele tai mu dipaa. Omuprofeti oo ka li tuu a mona oilanduliko i nyikifa oluhodi! — 1 Eeh. 13:19-25.a

11. Ahia okwa tula po oshihopaenenwa shiwa shilipi?

¹¹ Mepingafano nomuprofeti oo a li ehe fi omudiinini, omuprofeti Ahia, oo a li a tumwa kuJehova a ka vaeke Jerobeam a ninge ohamba, okwa li a kanyatela oudiinini waye fiyo omoukulupe. Eshi Ahia a kulupa nokwa li a twika, Jerobeam okwa li a tuma omukulukadi waye a ka pule Ahia shi na sha nonghalonawa yokamonamati kavo oko ka li ta ka vele. Ndele Ahia okwa li a lombwela omukulukadi waJerobeam nouladi kutya omonamati wavo ota ka fya. (1 Eeh. 14:1-18) Ahia okwa li a mona omanangeko noupuna mahapu. Okwa li e na oufembanghenda wokukala e na ombinga mokushanga Eendjovo daKalunga da nwefwa mo, molwaashi omupristeri Esra okwa ka longifa ouyelele oo wa shangwa komuprofeti Ahia. — 2 Omaf. 9:29.

12-14. (a) Oshilihongomwa shilipi hatu dulu okulihonga moshiningwanima shi na sha nomuprofeti waKalunga? (b) Yelifa to yandje oshihopaenenwa kutya omolwashike sha fimana okudilonga pamwe neilikano komayele e likolelela kOmbibeli oo haa yandjwa kovakulunhuongalo.

¹² Ombibeli inai popya kutya omolwashike omuprofeti waKalunga a li ina pula omayele kuYe ofimbo ina shuna nomuprofeti omunamido opo a ka lye nokunwa pamwe naye. Mbela pamwe omolwaashi omunamido oo a li a lombwela omuprofeti oo oinima oyo ya li tai nyuwifa omatwi aye? Oshike hatu lihongo moshinima osho? Otwa pumbwa okukala twa tomwa filufilu kutya oiteelelwa yaJehova oya yuka notu na okukala twa tokola toko okukala metwokumwe nayo, kashi na nee mbudi kutya oshike tashi ningwa po.

¹³ Ovanhu vamwe ngeenge tava pewa omayele ohava yandje ashike elitulemo kwaasho tashi nyuwifa omatwi avo. Pashihopaenenwa, omuudifi umwe otashi dulika a mone oilonga yokulikongela omboloto oyo tai dulu okumana po efimbo lokukala pamwe noukwaneumbo waye nolokukufa ombinga momalipyakidilo opauteokratika. Ndele fimbo ina hovela oilonga oyo, otashi dulika a ka pule omayele komukulunhuongalo wonhumba. Omukulunhuongalo oo otashi dulika a dimine pehovelo kutya ke na oufemba wokulombwela omuudifi oo kutya oku na okuyambidida oukwaneumbo waye ngahelipi. Opo nee, omukulunhuongalo oo otashi dulika a kundafane nomumwatate oo shi na sha noiponga yopamhepo oyo tai dulu oku mu hanga ngeenge okwa ka hovela oilonga ya tya ngaho. Omumwatate oo mbela ota ka yandja ashike elitulemo keendjovo odo da popiwa pehovelo komukulunhuongalo ile ota ka yandja elitulemo kouyelele aushe oo a pewa? Osha yela kutya omumwatate oo okwa pumbwa okuninga etokolo olo tali ke mu kwafela a kale e na oupamhepo muwa.

¹⁴ Natu tale natango koshihopaenenwa shimwe. Omumwameme umwe otashi dulika a ka pule omukulunhuongalo wonhumba ngeenge ota dulu okutopoka nomushamane waye oo ehe fi omwiitaveli. Nopehe na omalimbililo, omukulunhuongalo ota ka yelifila omumwameme oo kutya oye mwene e na okuninga etokolo. Opo nee, omukulunhuongalo oo otashi dulika a kundafane naye omayele Ombibeli a pamba oshinima osho. (1 Kor. 7:10-16) Mbela omumwameme oo ota ka yandja ngoo elitulemo komayele oo a pewa komukulunhuongalo? Ile okwa ninga nale etokolo kutya ota ka topoka nomushamane waye? Otashi ka kala pandunge ngeenge omumwameme oo okwa dilonga pamwe neilikano komayele e likolelela kOmbibeli oo a pewa manga ina ninga etokolo.

Kala omulininipiki

15. Oshike hatu dulu okulihonga mepuko olo la li la ningwa komuprofeti waKalunga?

¹⁵ Oshike vali hatu dulu okulihonga mepuko olo la li la ningwa komuprofeti wokuJuda? Omayeletumbulo 3:5 otaa ti: “Nomutima woye aushe lineekela Omwene, ino liameka keendunge doye mwene.” Ponhele yokutwikila okukala e lineekela Jehova ngaashi a li a ninga mefimbo la tetekela, pomhito oyo omuprofeti wokuJuda okwa li a ninga etokolo kuye mwene. Epuko olo a li a ninga ola li le mu pula omwenyo waye nokwa li a nyona po edina laye liwa naKalunga. Oshimoniwa osho itashi divilike tuu kutya osha fimana okukala twe lininipika nokulongela Jehova noudiinini!

16, 17. Oshike tashi ke tu kwafela tu kale ovadiinini kuJehova?

¹⁶ Oikala yomutima yokulihola mwene oyo hai tu pukifa. Ombibeli oya ti: “Omutima wovene ou nomakoto u dule ashishe nowa nyonauka.” (Jer. 17:9) Opo tu kale ovadiinini kuJehova, otu na okuninga eenghendabala tu lidule ounhu mukulu nosho yo oikala younhwa neamo lokukala twe lineekela mufye vene. Natango, otu na okudjala ounhu mupe, oo ‘a shitwa a fa Kalunga moudiinini nomouyapuki woshili.’ (Lesha Ovaefeso 4:22-24, yelekanifa NW.)

¹⁷ Omayeletumbulo 11:2 otaa ti: “Ounongo tau kala puava ve lininipika.” Okukala twe lineekela Jehova nelininipiko otaku ke tu kwafela tuha ninge oinima oyo tai ka etifa oilanduliko ya nyika oshiponga. Pashihopaenenwa, etekomukumo otali dulu oku tu ningifa noupu tu ninge omatokolo ehe li pandunge. (Omayel. 24:10) Otashi dulika tu kale tu udite twa loloka okukufa ombinga moilonga imwe iyapuki ndele hatu hovele okukala tu udite kutya otwa longa sha wana momukokomoko womido da pita, hatu diladila kutya Ovakriste vakwetu ovo nava longe po oilonga oyo. Ile otashi dulika tu kale twa hala onghalamwenyo yakwalukeshe oyo tai lalakanenwa kovanhu ovo ve tu dingilila. Onghee hano, ohatu ka amena omitima detu ngeenge ohatu ‘kondjo’ ‘nokukala alushe ovaladi moilonga yOmwene.’ — Luk. 13:24; 1 Kor. 15:58.

18. Ohatu dulu okuninga po shike ngeenge katu shii lela kutya natu ninge etokolo lilipi?

¹⁸ Omafimbo amwe otashi dulika tu kale twa pumbwa okuninga omatokolo a kwata moiti, ndele katu shii lela kutya natu ninge ngahelipi. Mbela ohatu ka kala tu na eamo lokuninga osho hatu diladila kutya osho tashi ka kandula po oupyakadi? Ngeenge otwa i meenghalo da tya ngaho, oshi li pandunge okupula ekwafo kuJehova okupitila meilikano. Jakob 1:5 ota ti: “Ngenge umwe womunye okwa hepa ounongo, ne u indile kuKalunga ou e hole okuyandjela aveshe.” Tate yetu womeulu ote ke tu pa omhepo yaye iyapuki i tu kwafele opo tu dule okuninga omatokolo opandunge. — Lesha Lukas 11:9, 13.

Natu kale twa tokola toko okukala ovadiinini

19, 20. Otu na okukala twa tokola toko okuninga shike?

¹⁹ Oudiinini wovapiya vaKalunga owa li tau yelekwa neenghono pefimbo lidjuu okudja eshi Salomo a li a yapuka mo melongelokalunga lashili. Oshoshili kutya ovanhu vahapu kava li va dula okukanyatela oudiinini wavo, ndele nande ongaho, ovapiya vaJehova vamwe ova li ovadiinini kuye.

²⁰ Efiku keshe, ohatu shakeneke eenghalo omo twa pumbwa okuninga omahoololo nomatokolo oo taa yeleke oudiiinini wetu. Ndele nafye ohatu dulu okuulika oudiinini wetu meenghalo da tya ngaho. Natu twikileni okukala ovadiinini kuJehova noku mu longela nomutima wa hanganifwa, nokukala tu na elineekelo filufilu kutya ota ka nangeka alushe noupuna ovapiya vaye ovadiinini. — 2 Sam. 22:26.

[Eshangelo lopedu]

Oto nyamukula ngahelipi?

• Omolwashike tu na okuninga eenghendabala tu efe po ohole yokuhola omaliko?

• Oshike tashi ke tu kwafela tu kale ovadiinini kuJehova?

• Ongahelipi elininipiko tali dulu oku tu kwafela tu kale ovadiinini kuKalunga?

[Omafano pepandja 15]

Mbela ohashi kala shidjuu kwoove okukondjifa omayeleko?

[Omafano pepandja 16]

Mbela oto ka dilonga pamwe neilikano komayele e likolelela kOmbibeli oo to pewa?