Jehova iha efa ovapiya vaye ovadiinini

‘[Jehova] ovadiinini vaye ite va efa nande. Ote va amene fiyo alushe.’ — EPS. 37:28, yelekanifa OB-1986.

1, 2. (a) Oinima ilipi ya li ya yeleka oudiinini wovapiya vaKalunga mefelemudo eti-10 K.O.P.? (b) Jehova okwa li a amena ovapiya vaye ovadiinini meenghalo nhatu dilipi?

MEFELEMUDO eti-10 K.O.P., omapata omulongo aIsrael okolundume oo a li taa mono oixuna okwa li a mona epepelelo, molwaashi oita yopashiwana oyo ya li hanga ya tukuka muIsrael oya li ya iwa moshipala. Ndele ovapiya vaKalunga ovadiinini ova li va taalela eyeleko li na sha noudiinini wavo kelongelokalunga lashili, molwaashi ohamba yomapata oo, Jerobeam, oyo opo ya li ya nangekwa po, oya li ya hala okunghonopaleka epangelo layo eshi ya li ya tota po elongelokalunga lipe lopapangelo noya li ya hala ovapangelwa vayo va kale ovadiinini kuyo filufilu. Mbela ovapiya vaJehova ovadiinini ova li tava ka ninga po shike? Ova li ngoo tava ka kala ovadiinini kelongelokalunga lashili? Omayovi mahapu omuvo okwa li a kanyatela oudiinini wavo kelongelokalunga lashili, na Jehova okwa li e va amena. — 1 Eeh. 12:1-33; 2 Omaf. 11:13, 14.

² Kunena, oudiinini wovapiya vaKalunga ohau yelekwa yo. Ombibeli oye tu londwela ya ti: “Kaleni mu nelidiliko nomwa pashuka, omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” Mbela ohatu dulu ngoo okupondola oku ‘mu lwifa twa pama meitavelo’? (1 Pet. 5:8, 9) Natu ka konakoneni oiningwanima yonhumba oyo ya li ya ningwa pefimbo lokunangekwa po kwohamba Jerobeam mo 997 K.O.P. nokutala kutya oshike hatu dulu okulihonga mwaasho sha li sha ningwa po. Shotete, ovapiya vaJehova ovadiinini ova li tava hepekwa pomafimbo oo a li madjuu. Oshitivali, ova li mokati kovashunimonima. Oshititatu, ova li yo tava wanifa po oinakuwanifwa idjuu. Ndele meenghalo adishe odo, Jehova ka li nande a efa ovapiya vaye ovadiinini noite ke tu efa nande kunena. — Eps. 37:28.

Jehova iha efa ovapiya vaye ovadiinini ngeenge tava hepekwa

3. Omolwashike ohamba David ya li ihai hepeke ovapangelwa vayo?

³ Natu ka konakoneni tete kutya eenghalo oda li da tya ngahelipi pefimbo opo Jerobeam a li a ninga ohamba. Omayeletumbulo 29:2 otaa ti: “Ovahenakalunga ngenge tava pangele, ovanhu tava keme.” Eshi ohamba David ya li tai pangele muIsrael shonale, ovanhu kava li tava keme. David ka li a wanenena, ndele nande ongaho, okwa li omudiinini kuKalunga nokwa li e mu lineekela noka li ha hepeke ovapangelwa vaye. Nomolwaasho Jehova okwa li a ninga ehangano naye, a ti: “[Epata] loye nouhamba woye otau ka kala po koshipala shoye fiyo alushe. Olukalwapangelo loye tali ka kala la pama fiyo alushe.” — 2 Sam. 7:16.

4. Omanangeko noupuna oo ovapangelwa vaSalomo va li tava hafele okwa li e likolelela kushike?

⁴ Pehovelo lokupangela kwomonamati waDavid, Salomo, ovanhu ova li ve na ombili nova li va hepuluka. Osho osha li tashi faneke epangelo laKristus Jesus lomonakwiiwa eshi ta ka pangela oule wOmido Eyovi. (Eps. 72:1, 17) Pefimbo lokupangela kwaSalomo, omapata 12 aIsrael kaa li nande e na etomheno lokutukula ounashibofa. Ndele nande ongaho, omanangeko noupuna oo Salomo nosho yo ovapangelwa vaye va li tava hafele okwa li e likolelela kokuwanifa po oiteelelwa yonhumba. Jehova okwa li a lombwela Salomo a ti: “Ove ngenge to kala nokweenda meenghedimhango dange ndee to wanifa omalombwelo ange ndee to diinine oipango yange u ende nayo, opo nee Ame ohandi ke ku wanifila eendjovo dange [nde] di lombwela xo David, naame ohandi ka kala mokati kovana vaIsrael ndele itandi ka efa ovanhu vange Ovaisrael.” — 1 Eeh. 6:11-13.

5, 6. Oshike sha li sha etifwa kokuhenoudiinini kuKalunga kwaSalomo?

⁵ Eshi Salomo a kulupa, ka li vali omudiinini kuJehova nokwa li ha kufa ombinga momalongelokalunga oipupulu. (1 Eeh. 11:4-6) Mokweendela ko kwefimbo, Salomo okwa ka kala iha dulika vali keemhango daJehova nokwa li a ninga omukwanyanya. Nomolwaasho eshi Salomo a fya, ovanhu ova li va ya komonamati waye, Rehabeam, oo a li e mu pingena po, va ka yandje oushima shi na sha nepangelo laSalomo nova li va pula va pewe emanguluko. (1 Eeh. 12:4) Jehova okwa li e linyenga ngahelipi eshi Salomo a li ehe fi vali omudiinini?

⁶ Ombibeli oya ti: ‘Omwene okwa handukila Salomo, shaashi omutima waye we liteeka Kalunga kaIsrael, ou e mu lihololela luvali.’ Jehova okwa li a lombwela Salomo a ti: “Ove eshi . . . ino diinina ehangano lange neenghedimhango dange, odo nde di ku lombwela, oshili, Ame ohandi ke ku kufa ouhamba noku u yandja komupiya woye.” — 1 Eeh. 11:9-11.

7. Nonande Salomo ka li vali a hokiwa kuJehova, ongahelipi Jehova a li a fila oshisho ovapiya vaye ovadiinini?

⁷ Jehova okwa li a tuma omuprofeti waye Ahia a ka vaeke Jerobeam a ninge ohamba opo a mangulule oshiwana shaYe moupika waSalomo. Jerobeam okwa li a wana okuwanifa po oshinakuwanifwa osho, molwaashi okwa li ha longele Salomo fimbo ina fya. Nonande Jehova okwa li a diinina ehangano lOuhamba olo a li a ninga naDavid, okwa li yo a pitika ouhamba womapata 12 u tukulwe. Omapata 10 okwa li taa ka kala koshi yepangelo laJerobeam, ofimbo makwao avali a li a fyaala koshi yepangelo leehamba domepata laDavid, na Rehabeam oye a li ohamba yomapata oo avali. (1 Eeh. 11:29-37; 12:16, 17, 21) Jehova okwa li a lombwela Jerobeam a ti: “Ngenge to pwilikine adishe odo Ame handi ku lombwele ndee ho ende neendjila dange, ndee to ningi eshi sha yuka momesho ange mokudiinina eenghedimhango dange noipango yange ngaashi omupiya wange David a ninga, opo nee Ame ohandi ka kala naave noku ku dikila ongulu tai kalelele, ngaashi nda dikila David, ndele handi ku pe Israel.” (1 Eeh. 11:38) Pefimbo opo, Jehova okwa li a amena oshiwana shaye nokwa li e shi pa epepelelo.

8. Omayeleko elipi haa hange ovapiya vaKalunga kunena?

⁸ Kunena, omahepeko nokuhenouyuki oi li apeshe. Omuudifi 8:9 okwa ti: “Omunhu ta pangelele omukwao omupya.” Ovashingifi ovanalwisho nosho yo ovapangeli va nyonauka otashi dulika va etife omaupyakadi e na sha nouxupilo. Luhapu, ovakwanepangelo, ovanangeshefa nosho yo ovawiliki vomalongelokalunga ohava tula po oshihopaenenwa shii shi na sha neenghedi. Nomolwaasho, ngaashi omuyuki Lot, ovapiya vaKalunga vokunena ovadiinini ohava “yahamekwa keenghedi dovalundakani [ovo hava] kala moixuna yokuwanifa ouhalu.” (2 Pet. 2:7) Natango, nonande ohatu kendabala okudulika komifikamhango daKalunga nopehe na okupiyaaneka vamwe, luhapu ohatu hepekwa kovapangeli ovakwanyanya. — 2 Tim. 3:1-5, 12.

9. (a) Jehova okwa katuka eenghatu dilipi opo a mangulule ovapiya vaye? (b) Omolwashike hatu dulu okukala noushili kutya Jesus ota ka kala alushe omudiinini kuKalunga?

⁹ Natu kale tu na elineekelo filufilu kutya: Jehova iha efa nande ovapiya vaye ovadiinini! Diladila kombinga yeenghatu odo Jehova a katuka nale opo a ka pingene po ovapangeli va nyonauka ovo ve li mounyuni. Ouhamba waKalunga wopaMessias oo u li mepangelo laKristus Jesus owa dikwa po nale meulu. Jesus Kristus okwa kala ta pangele meulu konyala oule womido efele. Onghee hano, mafiku Jesus ota ka etela ovo hava fimaneke edina laKalunga epepelelo monghedi ya wanenena. (Lesha Ehololo 11:15-18.) Jesus okwa ulika nale oudiinini waye kuKalunga fiyo okefyo. Onghee hano, ke na fiku a nyemateke ovapangelwa vaye, ngaashi Salomo a li a ninga. — Heb. 7:26; 1 Pet. 2:6.

10. (a) Ongahelipi hatu dulu okuulika kutya otwa lenga Ouhamba waKalunga? (b) Ohatu dulu okukala nelineekelo lilipi ngeenge hatu yelekwa?

¹⁰ Ouhamba waKalunga oo epangelo lolelalela olo tali ka xulifa po omahepeko aeshe. Otwe lineekela Jehova Kalunga nosho yo omaudaneko aye. Onghee hano, otwa efa po eenghedi dounyuni ou wouhenakalunga nohatu lalakanene filufilu oilonga iwa. (Tit. 2:12-14) Ohatu kendabala okukala tuhe na oshipo mounyuni ou. (2 Pet. 3:14) Onghee hano, kashi na nee mbudi kutya ohatu shakeneke omayeleko a tya ngahelipi paife, ohatu dulu okukala nelineekelo kutya Jehova ote ke tu amena pamhepo. (Lesha Epsalme 97:10.) Natango, Epsalme 116:15 otali tu shilipaleke tali ti: “Momesho Omwene efyo lovayuki vaye ola nendipalelwa.” Jehova okwa lenga neenghono ovapiya vaye nomolwaasho ita ka efa va hanaunwe po ve li ongudu.

Jehova iha efa ovapiya vaye ovadiinini ngeenge ve li mokati kovashunimonima

11. Osha enda ngahelipi opo Jerobeam a kale ehe fi vali omudiinini?

¹¹ Okupangela kwohamba Jerobeam okwa li taku dulu okweetela oshiwana shaKalunga epepelelo. Ndele ponhele yaasho, Jerobeam okwa li a katuka eenghatu odo da li da yeleka oudiinini woshiwana kuKalunga. Molwaashi ka li a wanenwa koufembanghenda oo a li e na e li ohamba, okwa li a ninga eenghendabala opo a nghonopaleke epangelo laye. Okwa li ta diladila ta ti: “Shaashi ovanhu ava tava fikama, va ka yambe omayambo mongulu yOmwene muJerusalem, opo nee omitima dovanhu ava tadi ka shuna komwene wavo Rehabeam, ohamba yaJuda, ndele vo tava ka dipaa nge nokushuna kuRehabeam, ohamba yaJuda.” Okudja opo Jerobeam okwa li a tota po elongelokalunga lipe lokwiilikana eenhana mbali doshingoli. Ombibeli otai ti: “Okwa li a dika imwe muBetel noikwao e i dika muDan. Noshinima tuu eshi sha li etimba. Novanhu va shikula efano [limwe] kuBetel nalikwao fiyo kuDan. Ye okwa tunga yo eetembeli koikulundu nokwa nangeka moilonga ovanhu velili vomoshiwana, ovo ve he shi Ovalevi ovapristeri.” Jerobeam okwa li yo a tota po efiku lokuningila “Ovaisrael oshivilo nokwa londa koaltari a ka twimine.” — 1 Eeh. 12:26-33.

12. Ovapiya vaKalunga ovadiinini ovo va li mouhamba wokolundume ova li va ninga po shike eshi Jerobeam a li a tota po elongelokalunga lokwiilikana onhana muIsrael?

¹² Ovapiya vaKalunga ovadiinini ovo va li mouhamba wokolundume ova li tava ka ninga po shike? Ngaashi ashike ooxekulululwa ovo va li ovadiinini, Ovalevi ovo va li hava kala moilando oyo va li va pewa moitukulwa youhamba wokolundume ova li va katuka eenghatu nopehe na okwoongaonga. (Ex. 32:26-28; Num. 35:6-8; Deut. 33:8, 9) Ova li va fiya po oshitukulwafyuululwa shavo ndele tava tembukile kuJuda osho sha li kolukadi pamwe nomaukwaneumbo avo, nova li va twikila okulongela Jehova nopehe na nande oshiimbi sha sha. (2 Omaf. 11:13, 14) Ovaisrael vamwe ovo va li ve uya okukala muJuda oule wokafimbo, ova li va tokola okukalelela muJuda noinava shuna ko vali oko va dile. (2 Omaf. 10:17) Jehova okwa li a yandja omhito komapupi okomesho omouhamba wokolundume opo a dule okweefa po elongelokalunga lokwiilikana onhana nokwaalukila kelongelokalunga lashili kuJuda. — 2 Omaf. 15:9-15.

13. Enwefemo lovashunimonima ohali yeleke ngahelipi oudiinini wovapiya vaKalunga kunena?

¹³ Oudiinini wovapiya vaKalunga vokunena otau yelekwa kovashunimonima nosho yo kenwefemo lavo. Ovapangeli vamwe ohava toto po omalongelokalunga opapangelo nohava fininike ovapangelwa vavo va tambule ko omalongelokalunga oo. Ovawiliki vOukwakriste nosho yo ovanhu vamwe ovo ve na ounhwa, ohave liti kutya ovo ‘ongudu youpristeri pauhamba,’ oyo ya li ya xunganekwa. Ndele ovavaekwa vashili, ovo ve li ‘ongudu youpristeri pauhamba,’ otava hangwa ashike mokati kOvakriste vashili. — 1 Pet. 2:9; Eh. 14:1-5.

14. Otu na okulinyenga ngahelipi komadiladilo ovashunimonima?

¹⁴ Ngaashi ashike Ovalevi ovadiinini ovo va li ko mefelemudo eti-10 K.O.P., ovapiya vaKalunga ovadiinini vokunena ihava pukifwa komadiladilo ovashunimonima. Ovakriste ovavaekwa nosho yo eedi dimwe ohava henuka filufilu omadiladilo ovashunimonima. (Lesha Ovaroma 16:17.) Nonande ohatu dulika komapangelo, ihatu lidopo momalipumomumwe omounyuni ou, ndele ohatu yambidida noudiinini Ouhamba waKalunga. (Joh. 18:36; Rom. 13:1-8) Ohatu ekeleshi filufilu omapopyo aavo tave liti kutya ohava longele Kalunga ndele ihave mu fimanekifa melihumbato lavo. — Tit. 1:16.

15. Omolwashike tu na okukala ovadiinini ‘komupiya omudiinini nomunaendunge’?

¹⁵ Diladila yo shi na sha noushili oo kutya Jehova okwe shi ninga tashi shiiva opo ovanamitimadiwa va dule okudja mo mounyuni ou woukolokoshi, oku shi popya pafaneko, nova ye moparadisa yopamhepo oyo a dika po. (2 Kor. 12:1-4) Otwa hafa neenghono eshi hatu endafana ‘nomupiya omudiinini nomunaendunge, oo Omwene waye e mu tula kombada yovapiya vaye, e va pe oikulya pefimbo layo.’ Kristus okwa nangeka po omupiya oo a pashukile ‘oinima yaye aishe.’ (Mat. 24:45-47) Onghee hano, ngeenge efimbo limwe katu udite ko filufilu pauhandimwe etokolo lonhumba olo la ningwa kongudu yomupiya oo, kashi na oku tu ningifa tuhe li tambule ko ile tu shune mounyuni waSatana. Ndele ponhele yaasho, oudiinini otau ke tu linyengifa tu kale twe lininipika notu teelele Jehova oye a yukife oinima.

Jehova iha efa ovapiya vaye ovadiinini ngeenge tava wanifa po oinakuwanifwa yaye

16. Omuprofeti umwe oo a li a dja kuJuda okwa li a pewa oshinakuwanifwa shilipi?

¹⁶ Jehova okwa li a tokola Jerobeam omolwoushunimonima waye. Okwa li a tuma omuprofeti waye umwe okudja kuJuda a ye kuBetel, osho sha li kolundume, opo a ka popye naJerobeam fimbo a li ta ningi omayambo koaltari yaye. Omuprofeti oo okwa li a twala etumwalaka laKalunga letokolo kuJerobeam. Nopehe na omalimbililo, osho osha li oshinakuwanifwa shidjuu. — 1 Eeh. 13:1-3.

17. Jehova okwa li a amena ngahelipi omutumwa waye?

¹⁷ Ohamba Jerobeam oya li ya kwatwa kehandu neenghono eshi ya uda etokolo laJehova. Opo nee, oya lombwela ovalumenhu ovo va li popepi nayo, tai ulike komuprofeti waKalunga tai ti: “Mu kwateni!” Ombadilila, fimbo inave mu kwata, ‘okwooko kwayo oko ya li ye mu ulika nako okwa kukuta noya li ya nyengwa oku ku alula. Noaltari ya tenda pokati, nomute ou wa li koaltari wa tika poshi.’ Jerobeam okwa li a fininikwa a pule omuprofeti a ilikane kuJehova opo a handuluke nokuvelule eke laye. Omuprofeti okwa li a ilikanena ohamba, neke layo ola li la veluka. Kungaho, Jehova okwa li a amena omutumwa waye aha ningilwe owii. — 1 Eeh. 13:4-6.

18. Jehova ohe tu amene ngahelipi eshi hatu mu longele oilonga iyapuki nopehe na oumbada?

¹⁸ Omafimbo amwe, ohatu shakeneke ovanhu ovo vehe na ko nasha ile ve tonde etumwalaka letu ngeenge hatu kufa ombinga noudiinini moilonga yokuudifa Ouhamba noyokuninga ovanhu ovahongwa. (Mat. 24:14; 28:19, 20) Ndele nande ongaho, katu na nande okweefa oumbada wokutila okuhatambulwa ko u tu ningife tu kale itatu wanifa po oukalele wetu nouladi. Otu na ‘oufembanghenda wokulongela Jehova noudiinini oilonga iyapuki tuhe na oumbada,’ ngaashi ashike omuprofeti wopefimbo laJerobeam oo ina tumbulwa kedina.a (Luk. 1:74, 75, yelekanifa NW.) Nonande Jehova ihe tu amene pashikumwifilonga kunena, ohe tu amene okupitila momhepo yaye iyapuki nosho yo movaengeli vaye, molwaashi otu li Eendombwedi daye. (Lesha Johannes 14:15-17; Ehololo 14:6.) Kalunga iha efa ovo tava twikile okuudifa eendjovo daye nopehe na oumbada. — Fil. 1:14, 28.

Jehova oha amene ovapiya vaye ovadiinini

19, 20. (a) Omolwashike tu na oushili kutya Jehova ite ke tu efa? (b) Omapulo elipi hatu ka kundafaneni moshitukulwa tashi landula?

¹⁹ Jehova Kalunga ketu omudiinini. (Eh. 15:4, NW; 16:5, NW) Ombibeli otai ti kutya Jehova ‘omuyuki [“omudiinini,” NW] meendjila daye adishe.’ (Eps. 145:17) Natango, Ombibeli otai tu shilipaleke tai ti: “[Oha] amene ondjila [yovadiinini, NW] vaye.” (Omayel. 2:8) Ovapiya vaKalunga ovadiinini otava dulu okukala nelineekelo kutya ote ke va amena note ke va yambidida ngeenge tava shakeneke omayeleko ile ngeenge va dingililwa kovashunimonima nosho yo eshi tava wanifa po oinakuwanifwa yavo idjuu.

²⁰ Atusheni pauhandimwe otwa pumbwa okulipula kutya: Oshike tashi ka kwafela nge ndi twikile okukala omudiinini kuJehova kashi na nee mbudi kutya ohandi shakeneke omayeleko a tya ngahelipi? Ile tu lipule kutya, ongahelipi handi dulu okukanyatela oudiinini wange kuKalunga?

[Eshangelo lopedu]

Oto nyamukula ngahelipi?

• Jehova okwa ulika ngahelipi kutya iha efa ovapiya vaye ovadiinini ngeenge tava hepekwa?

• Otu na okulinyenga ngahelipi komadiladilo ovashunimonima?

• Jehova oha amene ngahelipi ovapiya vaye ovadiinini ngeenge tava wanifa po oukalele wavo wopaKriste?

[Okaalita/Efano pepandja 10]

(Opo u mone nghee ouyelele wa unganekwa, tala oshishangomwa sho vene)

OUHAMBA WOKOLUNDUME (Jerobeam)

Dan

SIKEM

Betel

OUHAMBA WOKOLUKADI (Rehabeam)

JERUSALEM

[Efano pepandja 8]

Omanangeko noupuna oo a li taa hafelwa kuSalomo nosho yo kovapangelwa vaye okwa li e likolelela kokuwanifa po oiteelelwa yonhumba

[Efano pepandja 10]

Jehova ka li a efa ovapiya vaye ovadiinini eshi Jerobeam a li a tota po elongelokalunga lokwiilikana onhana