Uukwaniilwa tawu topolwa

Pethimbo Salomo a li ta longele Jehova, muIsraeli omwa li ombili. Salomo okwa hokana aakiintu oyendji yomiigwana yilwe mboka ya li haya longele iikalunga. Kashona nakashona, Salomo okwa lunduluka, e ta tameke okulongela iikalunga. Jehova okwe mu geele, e te mu lombwele ta ti: ‘Israeli oto shi kuthwa e tashi topolwa miitopolwa iyali. Otandi ka gandja oshitopolwa oshinene kugumwe gwomaapiya yoye, ihe ezimo lyoye otali ka lela owala oshitopolwa oshishona.’

Jehova etokolo lye okwe li yelitha ishewe momukalo gulwe. Gumwe gwomaapiya yaSalomo, Jeroboam, okwa li te ende mondjila e ta tsakanene nomuhunganeki Ahija. Ahija okwi ihula elwaakani lye e te li tuula miitogonyona 12, e ta lombwele Jeroboam ta ti: ‘Jehova ota ka kutha uukwaniilwa waIsraeli mezimo lyaSalomo e te wu topola miitopolwa iyali. Kutha po iitogonyona omulongo, molwaashono oto ka ningwa omukwaniilwa gwomazimo omulongo.’ Omukwaniilwa Salomo sho u uvu onkundana ndjono, okwa li a hala okudhipaga Jeroboam. Jeroboam okwa fadhuka po e ta yi kuEgipiti. Konima yethimbo sho Salomo a si, omwana Rehoboam okwa ningi omukwaniilwa. Opo ihe Jeroboam okwa li u uvite kutya oshi li nawa okushuna kuIsraeli.

Aakuluntu yomuIsraeli oya lombwele Rehoboam ya ti: ‘Ngele oto ungaunga naantu nawa, otaya ka kala aadhiginini kungoye.’ Ihe ookuume kaRehoboam aagundjuka oye mu lombwele ya ti: ‘Owu na okuungaunga nayo nonyanya! Naya kale taya longo nuudhigu!’ Rehoboam okwa landula omayele gookuume ke aagundjuka. Oku ungaunga naantu nonyanya e taya tindi okuvulika kuye. Oya ningi Jeroboam omukwaniilwa gwomazimo omulongo, ngoka ga ka tseyika nawa ge li uukwaniilwa waIsraeli. Omazimo omakwawo gaali, oga ka tseyika nawa ge li uukwaniilwa waJuda noga kala omadhiginini kuRehoboam. Omazimo 12 gaIsraeli kungawo oga topolwa.

Jeroboam ka li a hala aantu ya ye ya ka galikanene muJerusalem, shoka sha li mepangelo lyaRehoboam. Owu shi kutya omolwashike kaa li e shi hala? Jeroboam okwa li a tila kutya pamwe otaye mu thigi po e taya yi kuRehoboam. Onkee okwa ningi ontana yoshingoli, e ta lombwele aantu ye ta ti: ‘KuJerusalem okokule, otamu vulu okugalikanena mpaka.’ Aantu oya tameke okugalikana ontana yoshingoli e taya dhimbwa ishewe Jehova.