Olye ta vulu okutseya onakuyiwa?

“Ongame awike Kalunga . . .  okuza kontsapo onda hunganeke mbyoka tayi ya; onalenale nda popi mbyoka tayi ka ningwa.”—Jesaja 46:9, 10.

METHIMBO ndika lya piyagana aakonakoni yopapolotika, yopangeshefa nosho wo yuulikumwe waantu otaya konakona ondjokonona nomagamo gopashinanena opo ya vule okuhunganeka shoka tashi ka ningwa monakuyiwa. Aantu yalwe oya halelela okutseya kombinga yonakuyiwa yawo nohaya pula aayanekelinyothi nenge oompulile dhi ya pe omayamukulo. Aantu mboka olundji ohaya yematekwa komayamukulo ngoka haya pewa. Mbela oshi li itaashi wapa okutseya shoka tashi ka ningilwa uuyuni mbuka, omaukwanegumbo getu nosho wo tse pauhandimwe? Ngele osho shi li ngawo, mbela opu na ngoka ta vulu okutseya onakuyiwa?

Moohapu dhe ndhoka dha popiwa metetekelo komupolofeti Jesaja, Jehova Kalunga Omunankondoadhihe, okwa popi kutya oku na oonkondo okuhunganeka shoka tashi ka ningwa monakuyiwa. Okupitila muJesaja Kalunga okwa li a hunganeke kutya Aaisraeli yonale otaya ka mangululwa muupika waBabilonia nokushuna ya ka tungulule Jerusalem notempeli. Mbela ehunganeko ndika olya li lya gwanithwa? Omimvo 200 lwaampono komeho yethimbo Jesaja okwa li a hunganeke kutya Kores ota ka sinda Babilonia. Natango, Jesaja okwa li a popi kutya Kores ota ka panuna mo omeya gomomulonga gwaEufrat ngoka gwa li gwa gamena oshilando. Okwa li nokuli a hunganeke kutya Kores ota ka adha omiyelo ominene dhoshilando dhe eguluka shoka tashi ka ningitha Kores a sindane nuupu.—Jesaja 44:24–45:7.

Okuyelekanitha aantu naKalunga, yo kaaye na oonkondo dhokumona shoka tashi ka ningwa monakuyiwa. Omukwaniilwa omunandunge Salomo okwa nyola a ti: “Ino itangela esiku lyanofu, oshoka ino tseya esiku ndyoka shoka tali etelele.” (Omayeletumbulo 27:1) Oohapu ndhoka odhoshili. Kapu na omuntu ta vulu okuhunganeka onakuyiwa nokuli noye mwene. Kalunga okwa yooloka ko ngiini kaantu? Ye okwa tseya nawa eshito lye alihe mwa kwatelwa uukwatya nosho wo egamo lyaantu. Kalunga oha vulu okumona shoka oohandimwe niigwana ayihe tayi ka ninga, ngele okwe shi hala. Natango, oku na oonkondo inaadhi ngambekwa okukaleka iilanduliko yiiningwanima yontumba. Ngele a hunganeke okupitila maapolofeti ye shoka tashi ka ningwa Jesaja 44:26 ota ti: “Aapiya yandje nge taa hunganeke, uuna tandi tumu aatumwa ya holole omadhiladhilo gandje, omadhiladhilo nomahunganeko ngoka otandi ke ga tsitha ga ninge goshili.” Jehova Kalunga oye owala ta vulu okuninga ngaaka.

Jesaja okwa li ko nale oomvula 700 manga Jesus inee ya kombanda yevi. Natango, Jesaja okwa li a hunganeke kombinga yokuya kwaMesiasa. Unene tuu okuza methelemumvo eti-18, aapataneki yOmbiimbeli oya kala nokupatana kutya embo lyaJesaja kali li paushili. Oya li ya popi kutya omahunganeko gaJesaja kaga li goshili, ihe oga li ga nyolwa konima yiiningwanima. Mbela omapopyo gawo ogoshili? Mo 1947 ondhinga yembo lyaJesaja pamwe nomitonywashangwa dhilwe dhonale odha li dhi itsuwa mekololo popepi nefuta lya sa. Aalafululi oya ti kutya omitonywashangwa ndhoka odha nyolwa nale oomvula 100 omanga evalo lyaMesiasa nenge Kristus inaali hunganekwa. Eeno, Ombiimbeli oya holola shoka tashi ka ningwa monakuyiwa.

Jesaja naanyoli yalwe yOmbiimbeli kaya li taya vulu okuhunganeka iiningwanima yonakuyiwa paunongo wawo yene. Ihe pehala lyaashono, “mokupopya elaka lya za kuKalunga oya wilikwa kOmbepo Ondjapuki.” (2 Petrus 1:21) Iitopolwa tayi landula, otayi ka kundathana uuyelele wumwe wonkalamwenyo yaJesus ndjoka ya li ya hunganekwa okupitila muJesaja. Otayi ka kundathana wo iiningwanima mbyoka Jesus naalongwa ye ya hunganeka kombinga yethimbo lyetu nosho wo onakuyiwa.