Elongo Lyoheli Ndyoka Lyi Itaalwa Apuhe
Arline okwa ti: “Onda li nda yaguma te pi moheli. Tandi umbilwa meziko lyomulilo e tandi penduka tandi kugu. Onkee ano, onda li nda kambadhala kaandi longe uulunde washa.”
MBELA owi itaala kutya oheli oyo ehala lya nuninwa okuhepekelwa aalunde? Oyendji osho yi itaala ngaaka. Pashiholelwa mo 2005 omulongwantu mOuniveesiti ya St. Andrews muSkotolanda okwa li a mono kutya oopelesenda 33 lwaampono dhaakwambepo Aaskoto odhi itaala kutya mboka inaayi itaala Kalunga otaya ka hepekwa “moheli pamadhiladhilo sigo aluhe.” Oopelesenda 20 odhi itaala kutya mboka ye li moheli ohaya hepekwa palutu.
Miilongo oyindji eitaalo kombinga yoheli oli li apuhe. Pashiholelwa, mIilongo yaHangana omapulapulo ngoka ga li ga ningwa mo 2007 oga li gu ulike kutya oopelesenda 70 lwaampono dhaamboka ya li ya pulwa odhi itaala moheli. Nokuli nomiilongo moka aantu oyendji kaaye shi aalongelikalunga, aantu oyi itaala natango moheli. Omapulapulo ngoka ga li ga ningwa mo 2004 muKanada oga li gu ulike kutya oopelesenda 42 dhaantu odhi itaala moheli. MuBritania namo oopelesenda 32 odhi itaala kutya oheli oko yi li.
Shoka aakwambepo haya longo aantu
Oyendji yomaakwambepo oya hulitha po okulonga aantu kutya oheli oyo ehala moka aantu haya fikwa lela. Pehala lyaashono, ohaya humitha komeho eityo lya faathana naandoka lya popiwa mokatikisa kOngeleka yaKatoolika ka nyanyangidhwa mo 1994. Okatikisa hoka otaka ti kutya “okugeelwa kwa kwata miiti moheli oko okutopolwa ko kuKalunga sigo aluhe.”
Nonando ongaaka, aantu oyendji oyi itaala kutya oheli oyo ehala lyokuhepekela aantu pamadhiladhilo nenge palutu. Mboka haya humitha komeho elongo ndika ohaya popi kutya olya kankamena kOmbiimbeli. Omupresidende Albert Mohler gwoSouthern Baptist Theological Seminary, okwa yelitha kombinga yeitaalo lye a ti: “Oli li pamanyolo.”
Omolwashike shono wi itaala shi li sha simana?
Ngele oheli oyo lela ehala lyokufikila aantu, nena owu na oku yi tila shili. Onkee ano, ngele elongo ndika kali shi lyoshili, aawiliki yomalongelokalunga mboka haye li longo aantu oye ya ngwangwaneka noye ye etela uumbanda wopamadhiladhilo inaashi pumbiwa. Ohaya lundile wo Kalunga.
Oohapu dhaKalunga Ombiimbeli otadhi ti ngiini kombinga yoshinima shika? Miitopolwa tayi landula otatu ka longitha Ombiimbeli okuyamukula omapulo gatatu taga landula: (1) Oshike naanaa hashi ningwa po ngele omuntu a si? (2) Jesus okwa longo aantu shike kombinga yoheli? (3) Okwiilonga oshili kombinga yoheli otaku ke ku guma ngiini?