Oohapu dhaJehova odhi na omwenyo
Omanenedhiladhilo okuza moontumwafo dhaJakob naPetrus
KONIMA yomimvo 30 okuza sho aalongwa ya li ya tililwa ombepo ondjapuki pOpentekoste mo 33 E.N., omulongwa Jakob ngoka omumwayina gwaJesus okwa li a nyolele ontumwafo “omazimo omulongo nagaali” gaIsraeli shopambepo. (Jak. 1:1) Elalakano lye olya li oku ya kumagidha ya kale ya kola meitaalo nokwiidhidhimika uuna taya makelwa. Okwa li wo e ya pe omayele nkene ye na okukandula po omaupyakadhi ngoka ga li momagongalo.
Manga omukeesali Nero inaa tameka okuhepeka Aakriste mo 64 E.N., omuyapostoli Petrus okwa li e ya nyolele ontumwafo te ya ladhipike ya kale ya kola meitaalo. Nziya konima owala yontumwafo yotango, okwa li a landulitha ko ontiyali moka a ladhipike ooitaali ooyakwawo ya kale nokugandja eitulomo kOohapu dhaKalunga noku ya londodha shi na ko nasha nokuya kwesiku lyaJehova. Otatu ka mona uuwanawa shili ngele tatu gandja eitulomo ketumwalaka ndyoka li li moontumwafo dhaJakob naPetrus.—Heb. 4:12.
KALUNGA OHA GANDJA UUNONGO KWAAMBOKA TAYE MU ‘INDILE MEITAALO’
(Jak. 1:1–5:20)
Jakob okwa nyola a ti: “Omulumentu omunelago oongoka ta sindana mokumakelwa, oshoka shampa a piti mo, Kalunga ote ke mu pa ondjambi, omwenyo gwaaluhe.” Jehova oha gandja uunongo wa pumbiwa kwaamboka taye mu ‘indile meitaalo’ opo yi idhidhimikile omamakelo.—Jak. 1:5-8, 12.
Eitaalo nuunongo owa pumbiwa wo kwaamboka “ya hala okuninga aalongi” megongalo. Konima sho Jakob a popi elaka li li okanima ‘okashona,’ ihe ohali vulu ‘okunyateka omuntu,’ okwa li a londodha kombinga yiikala yuuyuni kutya otayi vulu okuyona po ekwatathano lyomuntu naKalunga. Okwa li wo a popi shoka shi na okuningwa kwaangoka te ehama pambepo opo a aluke.—Jak. 3:1, 5, 6; 5:14, 15.
Omapulo gopamanyolo taga yamukulwa:
2:13—Ongiini ‘mboka ye na ohenda taa ka pita mepangulo’? Uuna tashi ya pokwiihokolola tse yene kuKalunga, ota ka tala kohenda ndjoka tu ulukila yalwe note ke tu dhimina po ihe omolwekuliloyambo lyOmwana. (Rom. 14:12) Inashi simanenena tuu tu kale hatu ulike ohenda monkalamwenyo yetu ayihe!
4:5—Openi Jakob a li a totha ovelise ndjika? Jakob ina totha nando ovelise yontumba kondandalunde. Ihe edhiladhilo lyoohapu ndhika dha nwethwa mo otashi vulika lya kankamena komanyolo ngaashi Genesis 6:5; 8:21; Omayeletumbulo 21:10 nosho wo Aagalati 5:17.
5:20 (OB-1954)—‘Ngoka ta galula omulunde mondjila yomapuko ge,’ ota hupitha omwenyo gwalye meso? Omukriste ngoka ta kwathele omuyoni e ethe ondjila ye ya puka ota hupitha omwenyo gwomuyoni ngoka meso lyopambepo, tashi vulika wo nomehanagulo lyaaluhe. Omuntu ngoka ta kwathele omuyoni momukalo ngoka ‘ota siikile wo omayonagulo gwomuntu ngoka.’
Iiyilongomwa kutse:
1:14, 15. Uulunde owa holoka po omolwomahalo omawinayi. Onkee ano, katu na okukala twa landula omahalo omawinayi. Pehala lyaashono, otu na okukala “nokudhiladhila” iinima mbyoka tayi tungu nokuudhitha omadhiladhilo getu nomitima dhetu nayo.—Fil. 4:8.
2:8, 9, OB-1954. ‘Okusimaneka ondjelo yomuntu’ oshi li ompinge ‘nompango yopakwaniilwa’ yohole. Onkee ano, Aakriste yashili ihaya simaneke ondjelo yokombanda.
2:14-26. Ohatu ‘hupithwa keitaalo,’ ihe ‘hamolwoonkambadhala dhetu’ nenge iilonga yetu yokuvulika kOmpango yaMoses nenge mbyoka hayi longwa kAakriste. Eitaalo lyetu kali na okukala owala lyomokana. (Ef. 2:8, 9; Joh. 3:16) Oli na oku tu inyengitha tu longe metsokumwe nehalo lyaKalunga.
3:13-17. Odhoshili kutya “uunongo wokombanda” owu vule kokulekule mboka ‘wopantu nowoompwidhuli.’ Otu na ‘okukonga uunongo wopakalunga ngaashi eliko lya holekwa.’—Omayel. 2:1-5.
3:18, OB-1954. Oombuto dhonkundana ombwanawa yUukwaniilwa otadhi ‘kunwa nombili kwaamboka haa dhiginine ombili.’ Osha simana tu kale aanambili, ihe hakukala tu na uuntsa, aatamanani nenge kaatu na elandulathano.
“KALENI MU NA EITAALO LYA KOLA”
(1 Pet. 1:1–5:14)
Petrus okwa li a dhimbulukitha ooitaali ooyakwawo shi na ko nasha ‘netegameno lya kola’ lyuuthiga wawo womegulu. Petrus okwe ya lombwele a ti: “One ezimo lya hogololwa, aayambi yOmukwaniilwa, oshigwana oshiyapuki.” Konima sho a gandja omayele gokondandalunde kombinga yaashoka, okwa ladhipike ayehe ya kale ye na “edhiladhilo limwe neuvitopamwe. Kaleni mu holathane ongaamwayinathana. Silathaneni ohenda ne mu ifupipikilathane.”—1 Pet. 1:3, 4; 2:9; 3:8.
Molwaashoka “ehulilo lyiinima ayihe [yonkalelo yOshijuda olya] li popepi, Petrus okwa li a pe aamwahe omayele ‘yi ikwate nawa noya kale ya tonata, opo ya vule okugalikana.’ Okwe ya lombwele a ti: “Kotokeni ne mu tonate! . . . Kaleni mu na eitaalo lya kola, opo mu vule okukondjitha [Satana].”—1 Pet. 4:7; 5:8, 9.
Omapulo gopamanyolo taga yamukulwa:
3:20-22 (Yelekanitha NW.)—Eninginitho ohali tu hupitha ngiini? Eninginitho oli li oshitegelelwa kwaamboka taya kongo ehupitho. Ihe eninginitho lyo lyene ihali tu hupitha. Otatu ka hupithwa “omolweyumuko lyaJesus Kristus.” Omuntu ngoka ta ninginithwa oku na okukala e na eitaalo kutya ehupitho otali monika owala omolweso lyeyambo lyaJesus, ngoka a li a yumudhwa “noku li kolulyo lwaKalunga,” noku na oonkondo okupangela aanamwenyo naasi. Eninginitho lya kankamena keitaalo ndyoka olyo lya li lya ‘hupithitha aantu yahetatu ayeke komeya.’
4:6—“Aasi” yeni ya li ‘yu uvithilwa elaka etoye’? Aasi mboka ya li ya ‘sa pambepo omolwokwaavulika kuKalunga nomolwoondjo dhawo,’ omanga inaaya uva elaka etoye nenge onkundana ombwanawa. (Ef. 2:1) Konima ihe sho yi itaale onkundana ombwanawa oya ningi “omwenyo” pambepo.
Iiyilongomwa kutse:
1:7. Opo eitaalo lyetu li kale li na ongushu oli na okupita momamakelo. Eitaalo ndyoka lya kola otali ‘hupitha oomwenyo’ shili. (Heb. 10:39) Katu na okushuna monima ngele eitaalo lyetu tali makelwa.
1:10-12. Aayengeli oya li ya hala okuuva ko ooshili dhaKalunga ndhoka aapolofeti yonale ya nyola shi na ko nasha negongalo lyAakriste aagwayekwa. Ihe ooshili ndhoka odha ka yela owala sho Jehova a tameke okweendathana negongalo ndyoka. (Ef. 3:10) Mbela katu na okulandula oshiholelwa shaayengeli nokukambadhala okukonakona ayihe “noyomuule womadhiladhilo gaKalunga”?—1 Kor. 2:10.
2:21. Mokuholela Jesus Kristus, otu na okukala twi ilongekidha okumona iihuna, nonando otashi pula eso opo tu yambidhidhe uunamapangelo waJehova.
5:6, 7. Uuna twa tsika iimpwiyu yetu Jehova, ohe tu kwathele tu pitithe komeho elongelokalunga lyashili monkalamwenyo yetu pehala lyokukala tatu ipula unene nesiku lya landula ko.—Mat. 6:33, 34.
“ESIKU LYOMUWA OTALI YA”
(2 Pet. 1:1–3:18)
Petrus okwa nyola a ti: “Kaku na nando elaka lyopahunganeko lya za mehalo lyomuntu, ihe aantu mokupopya elaka lya za kuKalunga oya wilikwa kOmbepo Ondjapuki.” Ngele otatu gandja eitulomo koohapu dhomahunganeko otashi vulu oku tu gamena ‘kaalongi aafundja’ nosho wo koohandimwe mboka ya yonuka.—2 Pet. 1:21; 2:1-3.
Petrus okwa londodha a ti: “Tangotango kaleni mu shi shi, pomasiku omahugunina otaku zi aasheki taa shekagula.” Ihe “esiku lyOmuwa otali ya ngomufuthi.” Petrus okwa hulitha ontumwafo ye nomayele omawanawa kwaamboka ‘ya tegelela nokweendelelitha eyo lyesiku lyaKalunga.’—2 Pet. 3:3, 10-12, OB-1954.
Omapulo gopamanyolo taga yamukulwa:
1:19—Olye ‘onyothi yokoongulasha,’ uunake ta minikile, notu shi shi ngiini kutya shika osha ningwa nale? ‘Onyothi yokoongulasha’ oJesus Kristus konima sho a ningi Omukwaniilwa gwUukwaniilwa waKalunga. (Eh. 22:16) Mo 1914 Jesus okwa li a minikile iishitwa ayihe mUukwaniilwa we wopaMesiasa, shoka sha li tashi ulike kutya esiku epe olya tameka. Sho Jesus a li a shitululwa, osha li sha gandja eadhimo lye nkene tali ka kala sho e li moonkondo dhUukwaniilwa, shoka sha li tashi tsu omuthindo uushili woohapu dhopahunganeko dhaKalunga. (Markus 9:1-3) Ngele otatu gandja eitulomo koohapu ndhoka dhi minikile momitima dhetu, otatu ka kala tu shi shi nokutya onyothi yokoongulasha otayi minikile.
2:4—‘Oheli’ nenge ‘oombogo’ (OB-1954) ndjoka tayi popiwa movelise ndjoka oshike, nuunake oompwidhuli dha li dhu umbilwa mo? Melaka lyOshigreka oshitya shoka sha tolokwa oheli nenge oombogo osho “Tartarus,” shoka tashi ulike konkalo moka iishitwa yopambepo hayi kala ya ngambekwa, ihe haantu nando. Oyi li onkalo yomilema thokothoko naamboka ye li mo kaye na nando uuyelele waKalunga. Mboka ye li muTartarus kaye na etegameno lyasha lyonakuyiwa. Kalunga okwa li u umbile mo aayengeli mboka inaaya vulika kuye pethimbo lyaNoowa notaya kala monkalo moka ya fa ye li mombwili sigo ya hanagulwa po.
3:17—Petrus okwa li a hala okutya shike sho a ti kutya “omu shi shi nale”? Petrus okwa li ta popi kutya oye shi nale iinima mbyoka tayi ka ningwa komeho, mbyoka a li a lombwelwa nosho wo aanyoli yalwe yOmbiimbeli mboka ya li ya nwethwa mo. Nonando ontseyo ndjika oya li ya ngambekwa, shika itashi ti kutya Aakriste yopethimbo ndyoka oya li ya tseya iinima ayihe kombinga yonakuyiwa. Ihe oya li ye shi owala iinima ya simana mbyoka ya li ya tegelela yi ka ningwe monakuyiwa.
Iiyilongomwa kutse:
1:2, 5-7. Kakele koku tu kwathela opo ontseyo yetu ‘yokutseya Kalunga naJesus’ yi indjipale, okukambadhala tu kokeke uukwatya ngaashi eitaalo, eidhidhimiko netilokalunga otaku ke tu kwathela wo ‘tu ete iiyimati’ yi na ko nasha nontseyo ndjoka.
1:12-15. Opo tu kale twa “kolelela moshili” otwa pumbwa okudhimbulukithwa aluhe, ngaashi okupitila mokugongala, mekonakono lyopaumwene nomokulesha Ombiimbeli.
2:2. Otu na okukala twa kotoka opo eihumbato lyetu kaali shekithe Jehova nehangano lye.—Rom. 2:24.
2:4-9. Uuna tu na shoka twa li twa ninga nale otatu vulu okukala nuushili kutya “Omuwa oku shi shi, nkene e na okuhupitha aantu ye momamakelo ngoka tage ya adha. Ihe oye ota geele aakolokoshi sigo omesiku lyepangulo.”
2:10-13, OB-1954. Nonando “omapangelombepo,” sha hala okutya, aakuluntugongalo ohaya ningi omapuko nohaya yono ethimbo limwe, katu na oku ya popila muuwinayi.—Heb. 13:7, 17.
3:2-4, 12. Okugandja eitulomo lela ‘koohapu ndhoka dha popiwa nalenale kaahunganeki aayapuki nokoshipango sha za kOmuwa Omukulili’ otaku ke tu kwathela tu mone kutya esiku lyaJehova oli li popepi.
3:11-14. Sho twa ‘tegelela esiku lyaKalunga noku li endelelitha,’ otu na (1) “okwiiyapula” mokukala twa yogoka palutu, pamadhiladhilo, pamikalo nopambepo; (2) okukutha ombinga miilonga mbyoka tayi ulike kutya ‘otwi igandjela Kalunga,’ ngaashi mbyoka yokuuvitha Uukwaniilwa noyokuninga aantu aalongwa; (3) okukaleka eihumbato lyetu nuukwatya wetu wa ‘yogoka’ nokaawu nyatekwe kuuyuni; (4) okukala kaatu “na oshipo” nokulonga ayihe neinyengotompelo lya yela nosho wo (5) okukala tu na “ombili” naKalunga, nAakriste ooyakwetu nosho wo naantu ayehe.