“Omu na okwaadhika mwa tya ngiini?”
“Ano iinima ayihe ngele tayi hanauka po ngeyi, omu na okwaadhika mwa tya ngiini? Omu na okwiiyapulila Kalunga noku mu igandjela [miilonga yometilokalunga, NW].”—2 PET. 3:11.
1. Omolwashike ontumwafo ontiyali yaPetrus ya li ekumagidho lyopethimbo kAakriste pethimbo lye?
SHO omuyapostoli Petrus a li a nyola ontumwafo ye ontiyali ya nwethwa mo, egongalo lyAakriste olya li nale lya piti momahepeko ogendji, ihe shika kasha li sha hulitha po uulaadhi walyo nenge shi ngambeke okukoka kwalyo. Onkee ano Ondiaboli oya li ya longitha omukalo gulwe, ngoka gwa kala nokupondola olundji. Ngaashi sha li sha hololwa kuPetrus, Satana okwa li ha kambadhala okuyona po oshigwana shaKalunga okupitila maalongi yiifundja mboka ‘ihaa kuta okulonga uulunde noomwenyo dhawo odha dheulilwa olwiho.’ (2 Pet. 2:1-3, 14; Jud. 4) Onkee ano, ontumwafo ontiyali yaPetrus oyi li ekumagidho tali zi komutima oku shi kumagidha shi kale oshidhiginini.
2. Petrus omutiyali ontopolwa 3 ota gandja eitulomo kushike, nomapulo geni tu na okwiipula?
2 Petrus okwa nyola a ti: “Onde shi tala shu uka, ndi mú penduthe noku mú dhimbulutha iinima mbika, manga natango ndi na omwenyo. . . . Otandi kambadhala oku mú ulukila ondjila, mu vule okudhimbulukwa aluhe iinima mbika nongele nda mana oondjenda.” (2 Pet. 1:13-15) Eeno, Petrus okwa li e shi shi kutya eso lye oli li popepi, ihe okwa kala a hala omakumagidho ge ga kale nokudhimbulukiwa. Dhoshili, oga ka ninga oshitopolwa shOmbiimbeli shoka tashi vulu okuleshwa kutse atuhe kunena. Petrus omutiyali ontopolwa 3 oku li lela omuhokithi kutse, molwaashoka ota gandja eitulomo ‘komasiku gopehulilo’ giinima yonkalelo yongashingeyi nosho wo kehanagulo lyomagulu nevi lyopathaneko. (2 Pet. 3:3, 7, 10) Omayele geni ngoka Petrus e tu nine? Ongiini okutula miilonga omayele ge taku tu kwathele tu kale twa hokiwa kuJehova?
3, 4. (a) Petrus okwa li a gandja elombwelo lini nelondodho lyashike? (b) Iitsa itatu yini tatu ka konakona?
3 Konima yokutumbula okuhanagulwa po kwuuyuni waSatana, Petrus okwa popi a ti: “Ne aantu omu na okwaadhika mwa tya ngiini? Omu na okwiiyapulila Kalunga noku mu igandjela [miilonga yometilokalunga, NW].” (2 Pet. 3:11, 12) Osha yela kutya okwa li a gandja elombwelo tali pendutha ohokwe. Petrus okwa li e shi shi kutya oomboka owala haya longo ehalo lyaJehova nokuulika omaukwatya gopakalunga taya ka hupithwa ‘mesiku lyonkone’ ndyoka tali ya. (Jes. 61:2, KB) Onkee ano, omuyapostoli okwa gwedha ko a ti: “Ihe ne, ookuume kandje, shika omu shi shi nale. Onkee ano kaleni mwa tonata, opo mwaa pukithwe komapukitho gaantu kaaye na ompango e tamu gu ko kekankameno lyeni lya kola.”—2 Pet. 3:17.
4 Sho Petrus a li gumwe gwomwaamboka ye “shi shi nale,” okwa li e shi shi kutya momasiku gahugunina, Aakriste oya li ye na okukala ya kotoka shili opo ya kaleke po uudhiginini wawo. Konima yethimbo, omuyapostoli Johannes okwa li a fatulula sha yela kutya omolwashike. Okwa li a mono sho Satana tu umbwa mo megulu noku udha “ondjahi” nokwa yi a ka kondjithe “oomboka haa vulika kiipango yaKalunga nohaa dhiginine oshili ndjoka ya hololwa kuJesus.” (Eh. 12:9, 12, 17) Aapiya yaKalunga aagwayekwa pamwe ‘noonzi dhilwe’ ndhoka oondhiginini otaya ka sindana. (Joh. 10:16) Ongiini kombinga yetu tu li oohandimwe? Mbela otatu kakatele uudhiginini wetu? Otatu ka kwathelwa oku shi ninga ngele otwa kambadhala (1) okukokeka omaukwatya gopakalunga, (2) okukala aayogoki notwaa na oshipo pamikalo nosho wo pambepo, (3) nokukala tu na etaloko li li nawa kombinga yomamakelo. Natu ka konakone iitsa mbika.
Imika omaukwatya gopakalunga
5, 6. Omaukwatya geni tu na okukambadhala okukokeka, nomolwashike hashi pula tu ninge ‘oonkambadhala’?
5 Petameko lyontumwafo ye ontiyali, Petrus okwa nyola a ti: “Onkee ano kambadhaleni, eitaalo lyeni li ze iilonga iiwanawa; niilonga iiwanawa yi ze oondunge; oondunge dhi ze eikwatonawa; eikwatonawa li ze eidhidhimiko; edhidhimiko li ze okusimaneka Kalunga; okusimaneka Kalunga ku ze ohole yaamwayinathana; ohole yaamwayinathana yi ze ohole yokuhola ayehe. Mbika oyo iinima mbyoka mwe yi pumbwa, nongele omu yi na ya gwana e tayi indjipala, otayi mú tula miilonga mbyoka tayi eta iiyimati mokutseya kweni Omuwa gwetu Jesus Kristus.”—2 Pet. 1:5-8.
6 Dhoshili, ohashi pula ‘oonkambadhala’ okukutha ombinga momaipyakidhilo ngoka tage tu kwathele okukokeka omaukwatya gopakalunga. Pashiholelwa, ohashi pula oonkambadhala okuya kokugongala kehe kwopaKriste, okulesha Ombiimbeli esiku kehe nosho wo okukaleka po elandulathano ewanawa lyokukonakona paumwene. Otashi vulika shi pule wo okulonga nuudhiginini nokuninga oompangela oombwanawa opo tu kale tu na Ekonakono lyUukwanegumbo lyakwalukehe tali ti sha nolinyanyudha. Ihe shampa tu na elandulathano ewanawa, otashi ka kala oshipu okukala nondjigilile ombwanawa, unene tuu ngele twa mono mo uuwanawa.
7, 8. (a) Yamwe oya ti shike kombinga yEkonakono lyUukwanegumbo lyokongulohi? (b) Oho mono mo uuwanawa wuni mekonakono lyuukwanegumbo?
7 Shi na ko nasha nelongekidho lyekonakono lyuukwanegumbo, omumwameme gumwe okwa nyola a ti: “Shika ohashi tu pe ompito yokwiilonga kombinga yiinima oyindji.” Gulwe okwa ti: “Okupopya oshili, kanda li nda hala ekonakono lyembo li hule. Okugongala hoka onda li ndi ku hole noonkondo. Ihe ngashingeyi, sho tu na Ekonakono lyUukwanegumbo lyokongulohi, onda dhimbulula kutya Jehova oku shi shoka twa pumbwa nuunake twe shi pumbwa.” Omutse gumwe gwuukwanegumbo ogwa ti: “Ekonakono lyuukwanegumbo ohali tu kwathele noonkondo. Okukala tu na okugongala kwe eleka oompumbwe dhetu dhokondandalunde tu li aaihokani oku li dhingi. Atuhe otu uvite kutya otatu hwepopala mokuulika iiyimati yombepo ondjapuki, nohatu mono enyanyu olindji shi vulithe shito muukalele wetu.” Omutse gulwe gwuukwanegumbo ogwa ti: “Aanona ohaya kongo uuyelele wa gwedhwa po kuyo yene nokwiilonga oshindji, nohaye shi nyanyukilwa lela. Elongekidho ndika ohali tu ningi tu kale neinekelo olindji kutya Jehova oku shi iimpwiyu yetu noha yamukula omagalikano getu.” Mbela omadhiladhilo ngaka otagu ulike ngaa etaloko lyoye lyesiloshimpwiyu ndika ekumithi lyopambepo?
8 Ino etha iinima yowala yi idhope mekonakono lyuukwanegumbo. Aaihokani yamwe oya ti: “Etine kehe kongulohi miiwike mbika ine yahugunina, oshinima shontumba osha li sha holoka muukwanegumbo wetu shoka konyala shi tu ethithe okukala tu na ekonakono, ihe inatu shi etha shi idhope mo.” Oshoshili kutya omathimbo gamwe otashi vulika mu na okulundulula elandulathano lyeni. Ihe nonando ongaaka, kaleni mwa tokola toko mwaa ethe po Ekonakono lyUukwanegumbo lyokongulohi, kutya nduno oshiwike shimwe!
9. Ongiini Jehova a li a kwathele Jeremia, noshike tatu vulu okwiilonga mo moshiholelwa she?
9 Omupolofeti Jeremia oku li oshiholelwa oshiwanawa kutse. Okwa li a pumbwa iipalutha yopambepo mbyoka a li a pewa kuJehova nokwa li e yi pandula noonkondo. Iipalutha mbyoka oya li ye mu koleke opo a uvithile neidhidhimiko aantu mboka inaaya pulakena. Jeremia okwa ti: “Etumwalaka [lyaJehova] olya fa omulilo gwa hwama meni lyandje.” (Jer. 20:8, 9) Osha li she mu kwathele wo i idhidhimikile omathimbo omadhigu ngoka ga li ga hugunine nehanagulopo lyaJerusalem. Kunena, otu na Oohapu dhaKalunga dha gwana po. Ngele tatu dhi konakona nuudhiginini nokukala tu na etaloko lya fa lyaKalunga, otatu ka kala twa fa Jeremia mokwiidhidhimika nenyanyu muukalele, mokukala aadhiginini momamakelo nomokukala aayogoki pamadhiladhilo nosho wo pambepo.—Jak. 5:10.
Kaleni “aayogoki nomwaa na oshipo”
10, 11. Omolwashike tu na okukambadhala tu kale ‘aayogoki notwaa na oshipo,’ naashoka otashi tu pula shike?
10 Tu li Aakriste otu shi shi kutya otu li pethimbo lyehulilo. Onkee ano, inatu kumwa sho uuyuni wu udhithwa niinima mbyoka yi tondike kuJehova, ngaashi olwiho, onyata yiipala nosho wo elongithonkondo. Omikalo dhaSatana ndhoka ha longitha otashi vulika dhi ngongwe noohapu ndhika: ‘Aapiya yaKalunga ngele itaya vulu okutilithwa, otashi vulika omikalo dhawo dhi yonwe po.’ (Eh. 2:13, 14) Onkee ano, otu na okupulakena kekumagidho lyopahole lyaPetrus ndyoka tali ti: ‘Kambadhaleni okukala aayogoki nomwaa na oshipo koshipala shaKalunga, nomu na ombili naye.’—2 Pet. 3:14.
11 Uutumbulilo “kambadhaleni” owa faathana nekumagidho lyaPetrus lya tetekele. Osha yela kutya Jehova ngoka a nwetha mo Petrus a popye oohapu ndhoka, oku shi shi kutya otwa pumbwa okulonga nuudhiginini opo tu kale ‘aayogoki notwaa na oshipo,’ twaaha nyatekwe kuuyuni mbuka waSatana wa nyata. Okulonga nuudhiginini okwa kwatela mo okugamena omitima dhetu dhaa kwatwe ko komahalo ga puka. (Lesha Omayeletumbulo 4:23; Jakob 1:14, 15.) Osha kwatela mo wo okukondjitha nuudhiginini mboka ya limbililwa kokukalamwenyo kwetu kwopaKriste nosho wo mboka ‘taye tu sheke.’—1 Pet. 4:4.
12. Eshilipaleko lini li li muLukas 11:13?
12 Omolwokuhagwanenena kwetu, oshi li ekondjo okulonga shoka shi li mondjila. (Rom. 7:21-25) Otatu vulu okukala tu na etegameno lyokupondola ngele owala twa gama kuJehova ngoka ha gandja nehalo ombepo ondjapuki kwaamboka haye mu indile. (Luk. 11:13) Ombepo ndjoka otayi ka kokeka mutse omaukwatya ngoka tage tu ningitha tu kale twa hokiwa kuKalunga noku tu kwathela tu kondjithe omahongololo gonkalamwenyo nokwiidhidhimikila wo omamakelo ngoka tashi vulika tagi indjipala sho esiku lyaJehova tali hedha popepi.
Omamakelo nage ku nkondopaleke
13. Ngele tatu mono omamakelo, oshike tashi ke tu kwathela tu idhidhimike?
13 Omanga tu li muuyuni mbuka uukulu, aluhe otatu kala nokumona omamakelo gi ili nogi ili. Ihe pehala lyokuteka omukumo, omolwashike itoo tala ko omamakelo ge li ompito yokuulika kutya owu hole Kalunga nokunkondopaleka eitaalo lyoye muye nomOohapu dhe? Omulongwa Jakob okwa nyola a ti: “Aamwameme, italeni aanelago, ngele tamu adhika komamakelo gi ili nogi ili, oshoka omwa tseya, eitaalo lyeni uuna tali piti momayeleko ga tya ngeyi, nena otamu mono omukumo gwokwiidhidhimika.” (Jak. 1:2-4) Dhimbulukwa wo kutya “Omuwa oku shi shi, nkene e na okuhupitha aantu ye momamakelo ngoka tage ya adha.”—2 Pet. 2:9.
14. Ongiini oshiholelwa shaJosef tashi tu ladhipike?
14 Tala koshiholelwa shaJosef omwanamati gwaJakob, ngoka a li a landithwa po muupika kaamwayina. (Gen. 37:23-28; 42:21) Mbela Josef okwa li a kanitha eitaalo lye omolwuuwinayi mboka a li a ningilwa? Mbela okwa li a geyela Kalunga molwaashoka a li e etha uuwinayi wu mu ningilwe? Oohapu dhaKalunga otadhi yamukula sha yela kutya aawe! Kakele kaashono, shoka kasha li emakelo lyahugunina lyaJosef. Konima yethimbo, okwa li a lundililwa onkambadhala yokukwata onkonga nokwa tulwa mondholongo. Nonando ongawo, okwa kala omudhiginini kuKalunga. (Gen. 39:9-21) Okwe etha omamakelo ge mu nkondopaleke, nomolwaashoka okwa li a lalekwa nuuyamba.
15. Oshike tatu vulu okwiilonga moshiholelwa shaNaemi?
15 Odhoshili kutya omamakelo otaga vulu oku tu nikitha oluhodhi nenge nokuli ge tu uvithe nayi. Otashi vulika Josef a li ha kala u uvite ngaaka omathimbo gamwe. Aapiya yalwe aadhiginini yaKalunga osho ya li yu uvite. Dhiladhila kombinga yaNaemi, ngoka a li a silwa omulumentu gwe noyanamati yaali. Okwa ti: “Inamu tya ndje we Naemi, tyeni shila Mara [tashi ti “Nelulu”], oshoka Kalunga Omunankondoawike okwa monitha ndje uululu.” (Rut 1:20, 21) Oshi shi okuuviwa ko sho Naemi a li u uvite ngaaka. Ngaashi Josef, Naemi ka li e etha po eitaalo lye nenge uudhiginini we wu tengauke. Konima yethimbo, Jehova okwa li a yambeke omukiintu ngoka omwaanawa. (Rut 4:13-17, 22) Kakele kaashono, mOparadisa yokombanda yevi ndjoka tayi ya, ota ka kutha po uuwinayi awuhe mboka we etwa po kuSatana nosho wo kuuyuni we wa kolokosha. “Iiningwanima yonale otayi ka dhimbiwa thiluthilu.”—Jes. 65:17.
16. Iikala yetu oyi na okukala ya tya ngiini shi na ko nasha negalikano, nomolwashike shi li ngawo?
16 Kashi na nduno mbudhi kutya otatu adhika komamakelo ge thike peni, Kalunga ote ke tu ambidhidha omolwohole ye. (Lesha Aaroma 8:35-39.) Nonando Satana ite ke etha okukambadhala oku tu teya omukumo, ita ka pondola ngele otwa kala ‘twa tonata opo tu vule okugalikana.’ (1 Pet. 4:7) Jesus okwa ti: “Tonateni, ne mu galikane ethimbo kehe, mu mone oonkondo dhoku mú pititha mumbika ayihe tayi ka ningwa, nokuthikama koshipala shOmuna gwOmuntu.” (Luk. 21:36) MOshigreka Jesus okwa longitha oshitya shoka tashi ulike kokugalikana wa mana mo. Moku tu kumagidha tu galikane twa mana mo, Jesus okwa li a tsu omuthindo kutya oshe endelela okushilipaleka kutya otu li pamuthika ngoka ye naHe ya hokwa. Oomboka owala ye li monkalo ndjoka ya hokiwa kuyo taya ka kala ye na etegameno lyoku ka hupa mesiku lyaJehova.
Kala wi ipyakidhila miilonga yaJehova
17. Ngele oshi li eshongo okuuvithila aantu moshitopolwa sheni, ongiini to vulu okumona uuwanawa miiholelwa iiwanawa yaapolofeti yonale?
17 Okukutha ombinga momaipyakidhilo ge na ko nasha niinima yopambepo ohaku tu talaleke. Shika otashi tu dhimbulukitha oohapu dhaPetrus ndhoka tadhi ti: “Ne aantu omu na okwaadhika mwa tya ngiini? Omu na okwiiyapulila Kalunga noku mu igandjela [miilonga yometilokalunga, NW].” (2 Pet. 3:11) Oshilonga sha simana shomiilonga mbika osho okuuvitha onkundana ombwanawa. (Mat. 24:14) Dhoshili, miitopolwa yimwe ohashi kala eshongo okukutha ombinga miilonga yokuuvitha, tashi vulika molwokwaahe na ko nasha kwaantu nenge omolwomapataneko nenge molwaashoka aantu yi ipyakidhila niimpwiyu yakehe esiku. Aapiya yaJehova yopethimbo lyonale nayo wo oya li ye na okuungaunga niikala ya faathana naambyoka. Nonando ongaaka, oya li ya “tsikile” okuuvitha etumwalaka lyaKalunga. (Lesha 2 Ondjalulo 36:15, 16; Jer. 7:24-26) Oshike sha li she ya kwathele yi idhidhimike? Oya li ya tala ko oshinakugwanithwa shawo ngaashi Jehova e shi tala ko, hangaashi uuyuni we shi tala ko. Oya li wo ye shi tala ko shi li esimano enene okuhumbata edhina lyaKalunga.—Jer. 15:16.
18. Ongiini iilonga yokuuvitha Uukwaniilwa tayi ka simanekitha edhina lyaKalunga monakuyiwa?
18 Natse wo otu na uuthembahenda wokutseyitha edhina lyaJehova nelalakano lye. Dhiladhila kwaashika: Omolwiilonga yetu yokuuvitha, aatondi yaKalunga itaya ka vula okwiipopila kutya kaya li nando ya lombwelwa kombinga ye nomalalakano ge sho esiku lye enene tali ke ya. Dhoshili, ngaashi Farao gwonale, otaya ka kala ye shi shi kutya Jehova oye te ya katukile onkatu. (Eks. 8:1, 20; 14:25) Pethimbo opo tuu mpoka, Jehova ota ka tumbalekitha aapiya ye aadhiginini moku shi yelitha nawa kutya oye li shili aakalelipo ye.—Lesha Hesekiel 2:5; 33:33.
19. Ongiini tatu vulu okuulika kutya otu na olupandu omolweidhidhimiko lyaJehova?
19 Lwopehulilo lyontumwafo ye ontiyali, Petrus okwa li a nyolele ooitaali ooyakwawo a ti: “Taleni kontalanteni yOmuwa gwetu. Oyo ompito yeni okuhupithwa.” (2 Pet. 3:15) Eeno, natu tsikileni okuulika kutya otu na olupandu omolwontalanteni yaJehova. Ngiini? Omokukokeka omaukwatya ngoka ga hokiwa kuye, mokukala ‘aayogoki notwaa na oshipo,’ mokukala tu na iikala iiwanawa ngele twa taalela omamakelo nomokukala twi ipyakidhila miilonga yUukwaniilwa. Ngele tatu shi ningi, nena otatu ka mona omalaleko nuuyamba ngoka tage ke etwa ‘kegulu epe nevi epe.’—2 Pet. 3:13.
Oto dhimbulukwa?
• Ongiini tatu vulu okukokeka omaukwatya gopakalunga?
• Ongiini tatu vulu okukala ‘aayogoki notwaa na oshipo’?
• Oshike tatu vulu okwiilonga kuJosef nosho wo kuNaemi?
• Omolwashike okukutha ombinga miilonga yokuuvitha ku li uuthembahenda uunene?
[Ethano pepandja 21]
Oshike tashi ke mu kwathela ne aasamane mu kokeke omaukwatya gopakalunga mune yene nomuukwanegumbo weni?
[Omathano pepandja 23]
Oshike tatu vulu okwiilonga kunkene Josef a li a ungaunga nomamakelo?