Jesus—oye oshiholelwa sha gwanenena shoka tu na okulandula

MBELA owa hala okuhwepopaleka onkalamwenyo yoye nokukala wa nyanyukwa? Omuyapostoli Petrus okwa yelitha nkene tatu vulu oku shi ninga sho a nyola a ti: “Kristus wo okwa hepekwa omolweni nokwe mú thigile oshiholelwa, opo mu landule ondjila ndjoka a li e yi ende.” (1 Petrus 2:21) Dhoshili, molwaashoka Jesus Kristus okwa li e na onkalamwenyo onkumithi, otatu vulu okwiilonga oshindji kuye. Mokwiilonga kombinga yaJesus nokuholela okukalamwenyo kwe, otatu vulu okuhwepopaleka lela onkalamwenyo yetu nokukala twa nyanyukwa. Natu tale nawa komaukwatya gamwe ngoka taga ndhindhilikitha omulumentu nguka omunene nokutala nkene tatu vulu okumona uuwanawa mokuholela oshiholelwa she.

Jesus okwa li e na ondjele monkalamwenyo ye. Nonando Jesus okwa li a popi kutya ka li e na “mpoka ta langeke omutse gwe,” ka li hi ikalele nokuladhipika yalwe ye shi ninge. (Mateus 8:20) Okwa li a yi kiituthi. (Lukas 5:29) Oshikumithalonga she shotango sho a li a shitukitha omeya ga ninge omaviinu pohango osha li shu ulike kutya ka li omuntu ngoka kee hole aantu nenge omugeyentu. (Johannes 2:1-11) Ihe nonando ongaaka, Jesus okwa li u ulike sha yela kutya oshike sha li sha simana kuye sho a ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.”—Johannes 4:34.

□ Mbela owa konakona onkalamwenyo yoye wu tale kutya ongiini to vulu okukaleka pandjele omalalakano goye ge na ko nasha nomaliko nosho wo niinima yopambepo?

Jesus okwa li ha popiwa naye nuupu. Ombiimbeli otayi ulike kutya Jesus okwa li omulumentu omunyanyukwi noha kala naantu nombili. Ka li ta ningilwa nayi kaantu sho ya li ye ya kuye ye na omaupyakadhi gontumba nenge omapulo taga limbilike. Pompito yimwe sho ongundu yaantu ya li ye mu kundukidha, omukiintu gumwe ngoka a kala nokumona iihuna kuuvu wetiko lyombinzi uule woomvula 12 okwa li a gumu konguwo ye, neinekelo kutya ota ka kwathelwa molwonkalo ye. Ka li a ti kutya ine mu guma ngaashi yamwe ya li taya dhiladhila kutya osho ta ka tya, ihe okwa li a popi naye nombili a ti: “Mumwandje, eitaalo lyoye lye ku aludha.” (Markus 5:25-34) Aanona nayo oya li haya kala ya manguluka okukala naye, nopwaahe na uumbanda kutya ita ka kala e na nayo. (Markus 10:13-16) Omukalo ngoka a li u ungaunga naalongwa ye ogwa li tagu ulike kutya ohaya popi ye mu mangulukila. Inaya kakadhala okuhedha popepi naye.—Markus 6:30-32.

□ Mbela ohashi kala oshipu kuyalwe okupopya nangoye?

Okwa li ha yaalele yalwe nohe ya kenukile. Uukwatya waJesus wumwe uuwanawa noonkondo owa li okwiitula moompadhi dhayalwe opo a kale u uvite ngaashi yo noku ya kwathela. Omuyapostoli Johannes okwa popi kutya sho Jesus a li a mono Maria ta lili omolweso lyomumwayinamati Lasarus, Jesus okwa li a ‘hendwa komutima nokwa li u uvite uudhigu meni lye,’ nosho wo okwa li a “lili.” Aatali oya li taya vulu okumona nuupu kutya Jesus oku hole noonkondo uukwanegumbo mboka noka li a sa ohoni oku shi ulika. Ka li tuu u ulike kutya oku na olukeno nayalwe sho a li a yumudha kuume ke!—Johannes 11:33-44.

Pompito yimwe ishewe, omulumentu gumwe a li ta mono iihuna kuuvu wuulepela mboka wu li omukithi omunyanyalithi ngoka gwa li gwe mu ningitha a kale i ikalela okwa li i indile Jesus a ti: “Omuwa, ngele wa hala, oto vulu okwaaludha ndje.” Eyamukulo lyaJesus olya li lela tali nyanyudha omutima. ‘Okwa ganeke oshikaha she nokwe mu kwata e ta ti: “Onda hala, yela!”’ (Mateus 8:2, 3) Jesus ka li owala a aludha aantu opo a gwanithe ehunganeko. Okwa li a hala okutheta po omahodhi gawo. Kehe shoka a li a longo osha li sha wilikwa koohapu ndhoka a li e hole noonkondo tadhi ti: “Shoka mwa hala aantu ye mú ningile osho ya ningileni wo.”—Lukas 6:31.

□ Mbela oho ulikile yalwe ohenda okupitila miilonga yoye?

Jesus okwa li ha yaalele yalwe noku na oondunge dhokuyoolola. Nonando Jesus okwa li omulumentu inaa ninga epuko lyasha, ka li a tegelela yalwe ya kale ya gwanenena noina kala e wete e ya vule. Okwa kala ha yaalele yalwe. Oshikando shimwe, omukiintu ‘gwomoshilando shoka ngoka a li omulunde’ okwa li u ulike eitaalo lye nolupandu lwe mokuyoga oompadhi dhaJesus nomahodhi ge. Jesus okwa li e mu pitike e shi ninge, shoka sha li sha kumitha nakumuhiya ngoka a li u ula nayi omukiintu. Jesus ka li a nyana omukiintu omolwuulunde we, molwaashoka okwa li e wete kutya okwa li e na omutima omwaanawa. Pehala lyaashono, okwa ti: “Eitaalo lyoye lye ku hupitha. Inda nombili.” Molwaashoka Jesus okwa li a yamukula omukiintu ngoka nombili, osha yela kutya osha li she mu inyengitha e ethe po okukalamwenyo kwe kwonale.—Lukas 7:37-50.

□ Mbela yalwe oye shi kutya oho endelele okupandula yalwe noho ende kashona moku ya nyana?

Ka li e na ontondo nokwa li e na esimaneko. Tashi vulika omolwomaukwatya ngoka ya li ye na ga faathana nosho wo ekwatathano ndyoka lya li muukwanegumbo, Jesus okwa li e na ekwatathano lyi ikalekelwa nomulongwa gwe Johannes.a Nonando ongaaka, ka li a kala naye nontondo nenge a kala e mu lenga unene shi vulithe aalongwa ooyakwawo. (Johannes 13:23) Uushili owo kutya sho Johannes nomumwayina Jakob ya li ya pula ya pewe uuthembahenda mUukwaniilwa waKalunga, Jesus okwa li a yamukula a ti: “Omahala gokukuutumba kolulyo lwandje nenge kolumoho lwandje hangame tandi ga gandja.”—Markus 10:35-40.

Jesus okwa li aluhe ha simaneke yalwe. Ka li e na okayoya nonando mbono a li nayo oya li hayu ungaungwa nayo nokayoya sho a li kombanda yevi. Pashiholelwa, aakiintu oya li ya talika ko kaalumentu kaaye na oshilonga. Ihe Jesus okwa li u ungaunga naakiintu nesimaneko. Oshikando she shotango sho a li i iholola kutya oye Mesiasa, okwa li e shi ningile omukiintu ngoka a li kee shi Omujuda, ihe okwa li gumwe gwomAasamaria, mboka ya li ya dhinika kAajuda nokaya li haye ya popitha. (Johannes 4:7-26) Jesus okwa li wo a gandja uuthembahenda kaakiintu oyo ya ninge oonzapo dhotango dheyumuko lye.—Mateus 28:9, 10.

□ Mbela owu li kuu na ontondo mokuungaunga naantu mbono kaaye shi yomuhoko gwoye, yuukashike kookantu wa yooloka ko kuwoye, yelaka lyoye nenge yomoshigwana shoye?

Okwa li a gwanitha po iinakugwanithwa ye muukwanegumbo. Osha yela kutya he yaJesus Josef, ngoka a li e mu tekula, okwa si manga Jesus a li omugundjuka. Jesus okwa li ha hongo iipilangi opo a ambidhidhe yina nuundenge we. (Markus 6:3) Pethimbo lyahugunina lyonkalamwenyo ye kombanda yevi, okwa li i inekelele yina mesiloshimpwiyu lyomulongwa gwe Johannes.—Johannes 19:26, 27.

□ Mbela oto vulu okuholela Jesus mokusila oshimpwiyu iinakugwanithwa yuukwanegumbo ngaashi a li e shi ningi?

Jesus okwa li kuume kashili. Jesus okwa li kuume a dhenga mbanda. Ngiini mbela? Ka li e etha po ookuume ke molwaashoka owala ya li haya ningi omapuko, nokuli naashono ya kala nokuninga epuko limwe lwiikando. Aalongwa ye kaya li haya katuka aluhe momukalo ngoka a panda. Ihe okwa li kuume kawo mokutala komaukwatya gawo omawanawa pehala lyokupopya owala kutya oye na iikala iiwinayi. (Markus 9:33-35; Lukas 22:24-27) Ina kambadhala okuthindila maalongwa ye omataloko ge, ihe okwa li e ya lombwele ya popye ya manguluka nkene yu uvite.—Mateus 16:13-15.

Komeho gaayihe, Jesus okwa li e hole ookuume ke. (Johannes 13:1) Shi thike peni mbela? Okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe omolwawo.” (Johannes 15:13) Mbela opu na ngoka ta vulu okupa ookuume ke oshinima shi na ondilo kaashi shi omwenyo gwe?

❑ Mbela oho kaleke po uukuume woye nayalwe nuuna tashi vulika taye ku ningile nayi nenge ye ku uvitha nayi?

Okwa li omulaadhi nosho wo ependa. Jesus okwa li a yooloka ko thiluthilu kwaangoka ha thanekwa nenge ha popiwa komalongelokalunga e li a nkundipala. Omavaangeli otage mu popi e li omulumentu e na oonkondo. Jesus okwa li a tidha mo lwiikando iyali aantu mboka ya li taya landithile motempeli. (Markus 11:15-17; Johannes 2:14-17) Sho ongundu yaahangakeni ya li ye ya okukwata po ‘Jesus Omunasareti,’ ka li e na uumbanda okwiiholola nokugamena aalongwa ye. Okwa popi a mana mo ta ti: “Ongame nguka. Ngele ano ongame tamu kongo, nena etheni, aalumentu mbaka ya ye.” (Johannes 18:4-9) Itashi kumitha sho Pontius Pilatus a li a mono uulaadhi waJesus sho ta kwatwa po nota monithwa iihuna e ta ti: “Taleni, omuntu oye ngu.”—Johannes 19:4, 5.

□ Mbela oho kala wu na omukumo nuulaadhi uuna wa mono shoka wu na okuninga?

Uukwatya mbuka wa tongomana nawulwe owa ningitha Jesus a kale oshiholelwa shetu sha gwanenena. Ngele otwi iyetha tu nwethwe mo koshiholelwa she, otatu ka hwepopaleka onkalamwenyo yetu nokukala twa nyanyukwa. Osho molwaashono omuyapostoli Petrus a ladhipike Aakriste ya landule thiluthilu oshiholelwa shaJesus. Mbela oho kambadhala wu landule thiluthilu oshiholelwa shaJesus ngaashi tashi vulika?

Okwa ninga oshindji kaashi shi owala oku tu tulila po oshiholelwa

Jesus ine tu tulila po owala oshiholelwa shoka tu na okulandula. Okwa ti: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” (Johannes 14:6) Kakele kokulonga aantu oshili kombinga yaKalunga hoka kwe ye egululile ondjila opo ya vule okuhedha popepi naKalunga, Jesus okwe shi ningi tashi wapa opo aantu aadhiginini ya vule okumona omwenyo.—Johannes 3:16.

Shi na ko nasha netompelo lyokuya kwe kombanda yevi, Jesus okwa ti: “Oshoka nOmuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.” (Mateus 20:28) Mokugandja omwenyo gwe gu li eyambo, Jesus okwa tula po ekankameno opo aantu ya vule okunyanyukilwa onkalamwenyo sigo aluhe. Oshike tu na okuninga po pauhandimwe opo tu vule okunyanyukilwa onkalamwenyo ndjoka? Jesus okwe shi yelitha a ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.”—Johannes 17:3.

Eeno, okutseya Jesus, okuholela okukalamwenyo kwe nokukala neitaalo tali longo meso lye lyopayambo oyi li iitegelelwa opo omuntu a vule oku ka mona omwenyo gwaaluhe. Otatu ku hiya wu kuthe ethimbo wu konakone monzo yontseyo ndjoka, Ombiimbeli, nokukambadhala wu longe shoka tayi ti, ngaashi naanaa Jesus a li a ningi.b

Onkalamwenyo yaJesus otayi tu longo kutya otu na okukala twa tya ngiini. Eso lye lyopayambo otali vulu oku tu kutha muulunde nomondjambi yawo, eso. (Aaroma 6:23) Kasha li tuu tashi vulu okukala shiyemateka andola Jesus Kristus okwa li inaa nwetha mo onkalamwenyo yetu! Ino pitika nando omaipyakidhilo niimpwiyu yonkalamwenyo yi kuthe po ompito yoye yokukonakona nokulandula nawa oshiholelwa shomulumentu omunenenene ngoka a li ko nale, Jesus Kristus.

[Omanyolo gopevi]

[Oshimpungu/Omathano pepandja 7]

◼ Jesus ka li e na ontondo nokwa li e na esimaneko

◼ Okwa li kuume kashili sigo ehulilo

◼ Okwa li omulaadhi

Mbela oho kambadhala wu landule thiluthilu oshiholelwa shaJesus ngaashi tashi vulika?

[Omathano pepandja 5]

Jesus okwa li e na ondjele . . .

ha popiwa naye nuupu . . .

ha kenukile yalwe