Omolwashike tu na okushikula “Kristus”?
‘Ngeenge ope na ou a hala okushikula nge, ne lixupule ye mwene, ye na shikule nge.’ — LUK. 9:23.
1, 2. Omolwashike sha fimanenena kufye okukonakona kutya omolwashike tu na okushikula “Kristus”?
JEHOVA iha kala tuu a hafa okumona ovo vape nosho yo ovanyasha va ongala pamwe novalongeli vaye! Ngeenge owa twikile okukonakona Ombibeli nokukala pokwoongala kwopaKriste nopehe na okufaula, oto ka mona eshiivo lihapu loshili okudja mEendjovo daKalunga olo tali xupifa eemwenyo. Owa pumbwa okudiladila wa mana mo keshivo laJesus olo tali ti: “Ngenge pe na ou a hala okushikula nge, ye ne lixupule ye mwene, ne litwike [omuti waye womahepeko, NW] keshe efiku, ye na shikule nge.” (Luk. 9:23) Jesus okwa ti kutya otu na okulixupula fye vene opo tu dule okuninga ovashikuli vaye. Onghee hano, osha fimanenena kufye okushiiva kutya omolwashike tu na okushikula “Kristus.” — Mat. 16:13-16.
2 Ongahelipi shi na sha nafye ovo hatu shikula nale oshikoti shaJesus Kristus? Ohatu ladipikwa tu ‘shi ningeni shi dule shito.’ (1 Tes. 4:1, 2, OB-1986) Okukonakona kutya omolwashike tu na okushikula Kristus otaku ke tu kwafela tu tule moilonga ekumaido laPaulus notu shikule Kristus filufilu monghalamwenyo yetu yakeshe efiku, kashi na nee mbudi kutya opo twa hovele okweendafana nelongelokalunga lashili ile otwa kala mo oule womido dihapu. Natu ka konakoneni omatomheno atano kutya omolwashike tu na okushikula Kristus.
Otu na okushikula Kristus opo tu kale tu na ekwatafano lopofingo naJehova
3. Omeenghedi mbali dilipi hatu dulu okulihonga kombinga yaJehova?
3 Omuyapostoli Paulus okwa li a popya nOvaatena eshi a li ‘ofika pokati koAeropagi’ a ti: ‘Kalunga oiwana yovanhu okwe i yukifila nale omafimbo ayo neengaba dokukala kwayo, opo va kale nokukonga Kalunga, va tale ngeenge tava dulu okupamhadala fiyo okuye, noku mu mona, nande Oye ina kala kokule nafye nande oumwe.’ (Oil. 17:22, 26, 27) Osho otashi ulike kutya ohatu dulu shili okukonga Kalunga noku mu shiiva. Pashihopaenenwa, ngeenge otwa dilonga nolupandu keshito laKalunga ohatu ke lihonga shihapu kombinga yomaukwatya aye nosho yo okudula kwaye. (Rom. 1:20) Jehova okwe tu pa yo ouyelele muhapu u na sha naye okupitila mEendjovo daye, Ombibeli. (2 Tim. 3:16, 17) Ngeenge otwa kala hatu ‘diladila koilonga yaye nokufekaafeka oiningwa yaye inene,’ ohatu ke mu shiiva nawa. — Eps. 77:13.
4. Ongahelipi okushikula Kristus taku dulu oku tu kwafela tu kale tu na ekwatafano lopofingo naJehova?
4 Okushikula Kristus oko onghedi ya denga mbada oyo tai dulu oku tu kwafela tu kale tu na ekwatafano lopofingo naJehova. Diladila shi na sha nefimano olo Jesus a li e na eshi a li puXe “ounyuni fimbo inau shitwa.” (Joh. 17:5) Jesus oye “efina leshito laKalunga.” (Eh. 3:14) “Omudalwa wotete [woishitwa] aishe” oo okwa kala meulu pamwe naXe Jehova oule wefimbo lile. Fimbo Jesus a li ine uya kombada yedu, okwa li a longa shihapu shihe fi ashike okukala puXe. Okwa li kaume Kalunga kopofingo nova li hava longo pamwe nehafo, nokwa li e na ekwatafano lopofingo naXe la kola e dule oishitwa aishe. Jesus ka li ashike a konenena onghedi omo Xe ta ningi oinima, ndele okwa li yo a didilika kutya oha kala e udite ngahelipi noku na omaukwatya a tya ngahelipi. Okwa li yo e lihonga nokutula moilonga ashishe osho e lihonga kuXe. Onghee hano, Omona waKalunga oo omuduliki oku na omaukwatya a fa aXe filufilu, nomolwaasho Ombibeli ya ti kutya oye ‘olupe laKalunga iha monika.’ (Kol. 1:15) Ngeenge otwa shikula Kristus filufilu, ohatu ka kala tu na ekwatafano lopofingo naJehova.
Otu na okushikula Kristus opo tu dule okuhopaenena Jehova filufilu
5. Oshike tashi dulu oku tu kwafela tu hopaenene Jehova filufilu, nomolwashike?
5 Ohatu dulu okuhopaenena omaukwatya aKalunga molwaashi otwa ‘shitwa oshifeka shaye, twe mu fa.’ (Gen. 1:26) Omuyapostoli Paulus okwa li a ladipika Ovakriste a ti: ‘Ningeni ovahopaeneni vaKalunga ngaashi ovana ovaholike.’ (Ef. 5:1) Okushikula Kristus otaku tu kwafele tu dule okuhopaenena Tate yetu womeulu, molwaashi Kristus okwa li a hopaenena onghedi yaXe yokudiladila, omaliudo aYe nosho yo omaukwatya aye, nokape na oo ta dulu oku tu honga nawa kombinga yaXe e mu dule. Eshi Jesus a li kombada yedu, okwa li a ninga shihapu shihe fi ashike okushiivifa edina laJehova. Okwa li yo a ulika kutya Jehova oku na omaukwatya a tya ngahelipi. (Lesha Mateus 11:27.) Osho Jesus okwa li eshi ulika okupitila meendjovo, moilonga, mokuhonga kwaye nosho yo moshihopaenenwa shaye.
6. Omahongo aJesus otaa holola shike kombinga yaJehova?
6 Jesus okwe tu honga kutya Kalunga okwa hala tu ninge shike nonokutya oha kala e uditile ngahelipi ovalongeli vaye. (Mat. 22:36-40; Luk. 12:6, 7; 15:4-7) Pashihopaenenwa, konima eshi Jesus a tofa mo shimwe shomOipango Omulongo osho tashi ti kutya “ino teya ohombo,” okwa li a popya kutya omunhu oha kala e na oikala ya tya ngahelipi momutima fimbo ina ya menyono la tya ngaho. Jesus okwa ti: ‘Keshe tuu ou ta tale omukainhu nokahalu, oye okwe mu haela momutima waye.’ (Ex. 20:14; Mat. 5:27, 28) Konima eshi Jesus a popya kombinga yanghee Ovafarisai va li hava fatulula omhango papuko tava ti kutya “hola omukweni, tonda omutondi woye,” okwa li a popya etaleko laJehova li na sha naasho a ti: “Holeni ovatondi veni, ilikaneneni ovahepeki veni.” (Mat. 5:43, 44; Ex. 23:4; Lev. 19:18) Okukala tu shii kutya Kalunga okwa hala tu ninge shike nonokutya oha diladila noha kala e udite ngahelipi, otaku ke tu kwafela tu mu hopaenene filufilu.
7, 8. Ohatu lihongo shike kombinga yaJehova moshihopaenenwa shaJesus?
7 Jesus okwa li yo a ulika kutya Xe oku na omaukwatya a tya ngahelipi okupitila moshihopaenenwa shaye. Ngeenge hatu lesha mOmavangeli kutya Jesus okwa li a etela onghenda ovakwanaluhepo, a udila olukeno ovo va li tava mono oixuna nosho yo eshi a li a handukila ovahongwa vaye ovo va li tava kelele ounona vehe uye kuye, mbela osho itashi tu ulikile kutya Jehova naye osho ha kala e udite ngaho? (Mark. 1:40-42; 10:13, 14; Joh. 11:32-35) Ngeenge otwa diladila kombinga yeenghatu odo Jesus a li a katuka otashi tu kwafele tu shiive omaukwatya aKalunga a tongomana. Oikumwifilonga oyo Kristus a longa eshi a li kombada yedu otai ulike kutya oku na eenghono dinene. Ndele nande Jesus oku na eenghono dinene, ka li he di longifa omolwouwa waye mwene ile nelalakano lokweehameka vamwe. (Luk. 4:1-4) Okwa li a ulika ouyuki waye eshi a li a ta mo ovashingifi ovanalwisho motembeli. (Mark. 11:15-17; Joh. 2:13-16) Omahongo aye nosho yo okulongifa kwaye eendjovo da hoololekeka opo a hange omitima dovanhu, otai ulike kutya okwa li e na ounongo e “dule Salomo.” (Mat. 12:42) Ohole yaye inene oyo a ulika moku tu yandjela omwenyo waye oya popiwa nawa mOmbibeli taku ti: “Kape na ou e nohole i dule yaau.” — Joh. 15:13.
8 Omona waKalunga okwa li a hopaenena Xe filufilu moinima aishe, ngaashi meendjovo nomoilonga yaye, nomolwaasho okwa li a dula okupopya ta ti: ‘Ou a mona nge, oye a mona Tate.’ (Lesha Johannes 14:9-11.) Ngeenge ohatu shikula oshihopaenenwa shaKristus, ohatu hopaenene omaukwatya aJehova.
Jesus Omuvaekwa waJehova
9. Onaini nongahelipi Jesus a li a ninga Omuvaekwa waKalunga?
9 Natu taleni kwaasho sha li sha ningwa po pokufu mo 29 O.P., eshi Jesus a li a ya kuJohannes Omuninginifi. Pefimbo opo, Jesus okwa li e na omido 30. Ombibeli oya ti: “Jesus eshi a [ninginifwa, NW] okwa dja momeva diva, ndele tala, eulu la yeuluka, ndele e wete Omhepo yaKalunga [ya] fonghuti ya kuluka ndee tai uya kombada yaye.” Konima eshi Jesus a ninginifwa, okwa ninga Kristus ile Messias, na Jehova okwa li a popya kutya Jesus oku li Omuvaekwa waye, eshi a ti: “Ou Omona wange omuholike, onde mu hokwa.” (Mat. 3:13-17) Katu na tuu etomheno liwa okushikula Kristus!
10, 11. (a) Omeenghedi dilipi edinafimaneko “Kristus” la longifwa okuulika kuJesus? (b) Omolwashike tu na okushikula Jesus Kristus?
10 MOmbibeli, edinafimaneko Kristus ola longifwa meenghedi da yoolokafana, ngaashi Jesus Kristus, Kristus Jesus nosho yo Kristus. Jesus oye a li a popya oshikando shotete kutya oye “Jesus Kristus,” edina laye la tetekela edinafimaneko. Jesus okwa li a ilikana kuXe, a ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Joh. 17:3) Okulongifwa kwedina olo okwa yukifa elitulemo kwaao a li a tumwa kuKalunga nokwa ninga Omuvaekwa waye. Ngeenge edinafimaneko la tetekela edina lomunhu, pashihopaenenwa, “Kristus Jesus,” otashi divilike ondodo oyo omunhu e na. (2 Kor. 4:5) Ngeenge edinafimaneko “Kristus” li li olo alike, otali ulike kondodo yaJesus e li Messias. — Oil. 5:42.
11 Kashi na nee mbudi kutya edinafimaneko Kristus ola longifwa ngahelipi okuulika kuJesus, otali divilike oshili ya fimana ei kutya: Nonande Omona waKalunga okwa li e uya kombada yedu e li omunhu nokwa li a honga ovanhu ehalo laXe, ka li omunhu ile omuprofeti wongaho, ndele okwa li e uya okuninga Omuvaekwa waJehova. Onghee hano, natu shikuleni Omuvaekwa oo.
Ovanhu otava dulu ashike okuxupifwa okupitila muJesus
12. Omolwashike eendjovo odo Jesus a li a lombwela omuyapostoli Tomas da fimana kufye?
12 Etomheno vali limwe la fimanenena kutya omolwashike tu na okushikula Messias otali hangwa meendjovo daye odo a li a lombwela ovayapostoli vaye ovadiinini okafimbo kaxupi fimbo ina fya. Eshi Tomas a li a pula shi na sha naashi Jesus a li e va lombwela kutya ota shuna meulu note ke va longekidila onhele, Jesus okwa li e mu nyamukula a ti: “Aame ondjila noshili nomwenyo; kape na ou te uya kuTate, ngenge hamuame ta pitile.” (Joh. 14:1-6) Pomhito opo Jesus okwa li ta popi novayapostoli vaye ovadiinini 11 nokwa li e va udanekela kutya ote ke va longekidila onhele meulu. Ndele eendjovo odo oda fimana yo nokwaavo ve na eteelelo loku ka kala nomwenyo fiyo alushe kombada yedu. (Eh. 7:9, 10; 21:1-4) Omolwashike taku dulu okutiwa ngaho?
13. Omeityo lilipi Jesus e li “ondjila”?
13 Jesus Kristus oye “ondjila,” sha hala kutya, ohatu dulu ashike okwiilikana kuKalunga okupitila muye. Onghee hano, opo omailikano etu a udike kuKalunga oku na ashike okupitila muJesus, nokungaho ohatu ka kala noushili kutya Kalunga ote ke tu pa keshe osho hatu mu indile metwokumwe nehalo laYe. (Joh. 15:16) Jesus oku li yo “ondjila” meityo limwe vali. Okwa ‘yandja omwenyo waye u ninge oikulila yavahapu,’ molwaashi oulunde owa tukula ko ovanhu kuKalunga. (Mat. 20:28; Jes. 59:2) Ombibeli oya ti: ‘Ohonde yaJesus otai tu kosho omatimba aeshe.’ (1 Joh.1:7) Omona waKalunga okwe shi ninga tashi shiiva opo ovanhu va dule okuhanganifwa naKalunga. (Rom. 5:8-10) Ohatu dulu ashike okukala tu na ekwatafano lopofingo naKalunga ngeenge otwa kala tu na eitavelo tali longo muJesus nokudulika kuye. — Joh. 3:36.
14. Omolwashike taku tiwa kutya Jesus oye ‘oshili’?
14 Jesus oye ‘oshili’ ndele hamolwaashi ashike a li a popya kombinga yayo nokukala metwokumwe nayo, ndele omolwaashi yo omaxunganeko aeshe oo a li a popya kombinga yaye e li Messias okwe mu wanifilwa. Omuyapostoli Paulus okwa ti: ‘Keshe apa omuvalu womaudaneko aKalunga u fike, aeshe oku li muye heeno.’ (2 Kor. 1:20) Oinima yomOmhango yaMoses oyo ya li “omudidimbe wongaho wouwa wokomesho,” oya wanifilwa muKristus Jesus. (Heb. 10:1; Kol. 2:17) Omaxunganeko aeshe okwa popya kombinga yaJesus, nokwa yandja ouyelele u na sha nonghandangala oyo ta dana mokuwanifwa kwelalakano laJehova. (Eh. 19:10) Otwa pumbwa okushikula Messias opo tu dule oku ka mona ouwa eshi Kalunga ta ka wanifa po omalalakano aye e na sha nafye.
15. Omeityo lilipi Jesus e li ‘omwenyo’?
15 Jesus oye ‘omwenyo’ molwaashi okwa kulila ovanhu nohonde yaye, nomwenyo waalushe ou li oshali ya dja kuKalunga okupitila “muKristus Jesus, Omwene wetu.” (Rom. 6:23) Jesus oku li yo ‘omwenyo’ nokwaavo va fya. (Joh. 5:28, 29) Kakele kaasho, natu diladile kwaasho ta ka ninga pefimbo lEpangelo laye lOmido Eyovi e li Omupristeri Omukulunhu. Pefimbo opo, Jesus ota ka xupifa ovapangelwa vaye vokombada yedu moulunde nefyo fiyo alushe. — Heb. 9:11, 12, 28.
16. Etomheno lilipi tu na lokushikula Jesus?
16 Enyamukulo olo Jesus a li a pa Tomas otali ti sha yo kufye kunena. Jesus oye ondjila noshili nomwenyo. Kalunga okwa li a tuma Jesus kombada yedu opo a xupife ounyuni. (Joh. 3:17) Kape na oo ta dulu okuya kuKalunga okuninga ta pitile muJesus. Ombibeli oya ti: “Kaku namukwao, exupifo la kala muye, osheshi kaku nedina limwe lilili koshi yeulu, la yandjelwa ovanhu omo tu nokuxupifilwa mo.” (Oil. 4:12) Kashi na nee mbudi kutya otwa li twa itavela shike, oshi li pandunge okwiitavela Jesus noku mu shikula opo tu dule oku ka mona omwenyo. — Joh. 20:31.
Jehova okwe tu lombwela tu pwilikine kuKristus
17. Omolwashike sha fimana okupwilikina kOmona waKalunga?
17 Petrus, Johannes naJakob ova li peshituluko laJesus. Pomhito opo, ova li va uda ondaka ya dja meulu tai ti: “Ou Omona wange omuhoololwa, mu udeni.” (Luk. 9:28, 29, 35) Osha fimanenena okudulika kelombwelo olo kutya natu pwilikine kuMessias. — Lesha Oilonga 3:22, 23.
18. Ongahelipi hatu dulu okupwilikina kuJesus Kristus?
18 Okupwilikina kuJesus okwa kwatela mo ‘okutala kuye nokudimbuluka’ oshihopaenenwa shaye. (Heb. 12:2, 3) Onghee hano, “otu nokudiinina” osho hatu lesha kombinga yaye mOmbibeli, moishangomwa oyo ya nyanyangidwa ‘komupiya omudiinini nomunaendunge’ nosho yo osho hatu udu kombinga yaye pokwoongala kwopaKriste. (Heb. 2:1; Mat. 24:45) Tu li eedi daJesus, otu na oku mu pwilikina nawa noku mu shikula. — Joh. 10:27.
19. Oshike tashi dulu oku tu kwafela tu twikile okushikula Kristus?
19 Ohatu dulu okupondola okushikula Kristus alushe, kashi na nee mbudi kutya ohatu shakeneke omaupyakadi a tya ngahelipi. Ndele ohatu ka pondola ashike ngeenge otwa ‘diinine oshihopaenenwa sheendjovo odo diwa’ mokutula moilonga osho hatu lihongo “meitavelo nomohole, oyo i li muKristus Jesus.” — 2 Tim. 1:13.
Owe lihonga shike?
• Ongahelipi okushikula “Kristus” taku dulu oku tu kwafela tu kale tu na ekwatafano lopofingo naJehova?
• Omolwashike taku dulu okutiwa kutya ngeenge ohatu shikula oshihopaenenwa shaKristus ohatu hopaenene omaukwatya aJehova?
• Omeityo lilipi Jesus e li “ondjila noshili nomwenyo”?
• Omolwashike tu na okupwilikina kOmuvaekwa waJehova?
[Efano pepandja 28]
Okudiladila kwaJehova kwa denga mbada oku liwetikile momahongo aJesus
[Efano pepandja 29]
Otu na okushikula Omuvaekwa waJehova noudiinini
[Efano pepandja 31]
Jehova okwa ti: ‘Ou Omona wange, mu udeni’