‘Ila u shikule nge’
“Ngenge pe na ou a hala okushikula nge, ye ne lixupule ye mwene, ne litwike [omuti waye womahepeko] keshe efiku [ndele ta kala nokushikula nge].” — LUK. 9:23, yelekanifa NW.
1, 2. (a) Eshivo lopahole lilipi Jesus ta shivi nalo ovanhu? (b) Mbela owa tambula ko eshivo laJesus?
LWOPEXULILO loukalele waye, Jesus okwa li a udifila muPerea, oshitukulwa osho sha li koushilo womulonga waJordan, koushilolundume waJudea. Fimbo a li oko, okwa li a pulwa komulumenhu omunyasha kutya oshike e na okuninga opo a dule oku ka mona omwenyo waalushe. Eshi Jesus a li a didilika kutya omulumenhu oo okwa li ha diinine Omhango yaMoses, okwa li e mu shiva, a ti: “Inda u ka [landife] po oinima yoye aishe ei u na, ove u i yandje keehepele, ndele to kala u nemona meulu, ove u uye u shikule nge.” (Mark. 10:21) Kali fi tuu eshivo la denga mbada okushivwa tu shikule Jesus, Omona ewifa laKalunga Omukombadambada!
2 Omulumenhu oo omunyasha ka li a tambula ko eshivo olo. Ashike opa li vamwe ovo va li va tambula ko eshivo laJesus. Pashihopaenenwa, Jesus okwa li a shiva Filippus a ti: “Shikule nge!” (Joh. 1:43) Filippus okwa li a tambula ko eshivo olo, nolwanima okwa ka ninga omuyapostoli waJesus. Jesus okwa li yo a shiva Mateus, na Mateus okwa li a tambula ko eshivo olo. (Mat. 9:9; 10:2-4) Jesus ota shivi natango ovaholi vouyuki aveshe ta ti: “Ngenge pe na ou a hala okushikula nge, ye ne lixupule ye mwene, ne litwike [omuti waye womahepeko, NW] keshe efiku [ndele ta kala nokushikula nge, NW].” (Luk. 9:23) Eendjovo odo otadi ulike kutya keshe ou a hala shili okuninga omushikuli waJesus, ota dulu oku shi ninga. Mbela ove owa halelela okuninga omushikuli waJesus? Vahapu vomufye otwa tambula ko nale eshivo olo laJesus lopahole, nohatu kwafele yo vamwe moukalele opo va tambule ko eshivo la tya ngaho.
3. Oshike tashi ke tu kwafela tuha twalwaatwalwe ndele hatu efa po okushikula Jesus?
3 Shinyikifa oluhodi, ovanhu vamwe ovo va li ve na ohokwe moshili yOmbibeli, paife ova efa po okukonakona Ombibeli. Mokweendela ko kwefimbo, ova enda tava nghundipala, ngolongo osheshi va ‘twalwaatwalwa’ ndele tava efa po okushikula Jesus. (Heb. 2:1, NW) Oshike tashi ke tu kwafela opo tuha ye momwiyo wa tya ngaho? Oshiwa okulipula omapulo aa: ‘Oshike sha li she tu linyengifa tu shikule Jesus? Okushikula Jesus osha hala okutya shike?’ Okukaleka momadiladilo omanyamukulo omapulo oo otashi ke tu kwafela tu kale twa tokola toko okweenda mondjila iwa oyo twa hoolola okweenda nayo. Otashi ke tu kwafela yo tu twe vamwe omukumo opo va shikule Jesus.
Omolwashike tu na okushikula Jesus?
4, 5. Omolwashike Jesus a wana okukala Omuwiliki wetu?
4 Omuprofeti Jeremia okwa ti: “Omwene, ondi shi shii nokutya, ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” (Jer. 10:23) Ondjokonona otai koleke oushili weendjovo odo daJeremia. Oshi liwetikile mo lela kutya ovanhu inava wanenena itava dulu okupangela ndele tava pondola filufilu. Onghee hano, otwa tambula ko eshivo laJesus, molwaashi otwe lihonga kutya oye a wana filufilu okukala Omuwiliki wetu. Kape na omunhu kombada yedu ta xumbile muye nande. Natu ka taleni koinima imwe oyo ya ningifa Jesus a kale a wana okukala Omuwiliki wetu.
5 Shotete, Jesus okwa nangekwa po kuJehova ye mwene e li Messias Omuwiliki. Jehova Omushiti wetu oye aeke ta dulu okunangeka po Omuwiliki oo ta dulu oku tu wilika nawa. Oshitivali, Jesus oku na omaukwatya mahokwifa oo hatu dulu okuhopaenena. (Lesha Jesaja 11:2, 3.) Okwe tu tulila po oshihopaenenwa sha wanenena. (1 Pet. 2:21) Oshititatu, Jesus oku na ko nasha lela novashikuli vaye nokwe shi ulika eshi e tu fila. (Lesha Johannes 10:14, 15.) Jesus okwa li yo a ulika kutya oku li omufita muwa, oo te tu lifa opo tu hafele onghalamwenyo paife notu ka hafele onakwiiwa yaalushe ikumwifi. (Joh. 10:10, 11; Eh. 7:16, 17) Omatomheno aeshe oo nosho yo amwe e lili oo e tu linyengifa tu hoolole oku mu shikula. Ndele mbela oshike naanaa sha kwatelwa mokushikula Jesus?
6. Okushikula Jesus okwa kwatela mo shike?
6 Okukala omushikuli waKristus okwa kwatela mo shihapu shihe fi ashike okwiifanwa Omukriste. Kunena, ope na ovanhu omabiliyona avali lwaapo ovo have liti kutya Ovakriste, ndele oilonga yavo otai ulike kutya “ovakolokoshi.” (Lesha Mateus 7:21-23.) Ndele ngeenge ovanhu ova ulike ohokwe yokushikula Jesus, ohatu va yelifile kutya Ovakriste vashili ove na okukala metwokumwe nomahongo aJesus nokushikula oshihopaenenwa shaye efiku keshe. Opo tu shi ude ko nawa, natu ka taleni komaukwatya onhumba aJesus.
Kala omunongo ngaashi Jesus
7, 8. (a) Ounongo oshike, nomolwashike Jesus a li e na ounongo muhapu neenghono? (b) Jesus okwa li a ulika ngahelipi ounongo waye, nongahelipi hatu dulu okushikula oshihopaenenwa shaye?
7 Jesus okwa li e na omaukwatya mahapu a tongomana, ndele moshitukulwa eshi ohatu ka yukifa ashike elitulemo komaukwatya aye ane: ounongo, elininipiko, ouladi nosho yo ohole. Tete, natu taleni koukwatya waye wounongo. Okukala omunongo otashi ti kutya okudula okutula moilonga eshiivo neudeko monghedi tai pondola. Omuyapostoli Paulus okwa popya shi na sha naJesus a ti: “Muye mwa holekwa omamona aeshe ounongo neshiivo.” (Kol. 2:3) Mbela openi Jesus a li a hanga ounongo oo? Okwa popya ye mwene a ti: ‘Osho Tate a longa nge, osho ashike handi tongo.’ (Joh. 8:28) Jesus okwa pewa ounongo kuJehova, nomolwaasho itashi kumwifa eshi a li ha ningi omatokolo opandunge.
8 Pashihopaenenwa, Jesus okwa li a ninga etokolo lopandunge eshi a li a hoolola onghedi yokukalamwenyo i li paunafangwa, opo a yukife elitulemo koshinima shimwe ashike: okulonga ehalo laKalunga. Jesus okwa li ha longifa nawa efimbo laye neenghono daye mokuxumifa komesho oinima yOuhamba. Nafye ohatu ningi eenghendabala opo tu shikule oshihopaenenwa shaJesus mokukala ‘neisho li li nawa,’ sha hala okutya eisho lanafangwa. Kungaho, ohatu liamene opo tuha wililwe po koinima yongaho oyo tai dulu okumana po eenghono detu notai imbi tu yandje elitulemo koinima yOuhamba. (Mat. 6:22) Ovakriste vahapu ohava ningi eenghendabala va kale nonghalamwenyo yanafangwa opo va dule okulongifa efimbo lihapu moukalele. Vamwe ova hoolola okukaleka onghalamwenyo yavo paunafangwa opo va dule okukufa oukokolindjila wondjikilile. Ngeenge ou li umwe womwaavo va ninga ngaho, oto pandulwa neenghono. Ohatu ka kala twa hafa neenghono notwa mbilipalelwa mokukalamwenyo kwetu ngeenge otwa “kongeni tete ouhamba waKalunga.” — Mat. 6:33.
Kala omulininipiki ngaashi Jesus
9, 10. Jesus okwa li a ulika ngahelipi elininipiko laye?
9 Oukwatya waJesus omutivali oo hatu ka kundafaneni paife oo elininipiko. Ngeenge ovanhu inava wanenena va pewa eenghonopangelo donhumba, luhapu ohava kwatwa keamo lokulikongela efimano. Jesus ka li tuu a yooloka ko kovanhu va tya ngaho! Nonande oye ta dana onghandangala inene mokuwanifwa kwelalakano laJehova, Jesus ka li nande omulinenepeki. Nafye ohatu ladipikwa tu kale ovalininipiki ngaashi Jesus. Omuyapostoli Paulus okwa ti: “Omadiladilo eni naa fe enya aKristus Jesus kwa li e a na, Oye nande olupe laKalunga, Oye ina hakana a kale a fa Kalunga, ndelenee okwe lidula Ye mwene nokwa djala olupe lomupika nokufafana novanhu.” (Fil. 2:5-7) Osho mbela osha li sha kwatela mo shike?
10 Jesus okwa li ta hafele oufembanghenda munenenene wokukala pamwe naXe meulu, ndele nande ongaho, okwa li e “lidula Ye mwene nokwa djala olupe lomupika,” e shi ninga nehalo liwa. Omwenyo waye owa li wa lundululilwa moshidalelo shokakadona Okajuda, nokwa kala medimo oule weemwedi omuwoi fiyo a dalwa. Okwa li a dalelwa moukwaneumbo wa hepa, waxe omutekuli, Josef, oo a li omuhongi woipilangi. Fimbo Jesus a li ohanana, ka li ta dulu okulifila oshisho. Mokweendela ko kwefimbo, Jesus okwa li e lihonga okweenda, ta ningi okamatyona, fiyo a ninga omumati womido omulongo nasha, e li meumbo laJosef. Ashike Jesus okwa li omunhu a wanenena. Ndele nande ongaho, okwa li omunyasha ha dulika kovadali vaye ovo va li inava wanenena. (Luk. 2:51, 52) Osho kasha li tuu tashi pula elininipiko!
11. Omeenghedi dilipi hatu dulu okuulika elininipiko ngaashi Jesus?
11 Nafye ohatu hopaenene Jesus ngeenge hatu tambula ko nelininipiko nosho yo nehalo liwa oinakuwanifwa oyo tashi dulika i kale ya talika ko idinifa. Pashihopaenenwa, diladila kombinga yoshinakuwanifwa shetu shokuudifa onghundana iwa. Oilonga ya tya ngaho otashi dulika i kale ya fa itai ti sha, unene tuu ngeenge ovanhu itava ulike ohokwe, ile otave tu sheke ile otava ungaunga nafye nonyanya. Ndelenee ngeenge otwa twikile okuudifa, ohatu ka kwafela vamwe va tambule ko eshivo lokushikula Jesus. Kungaho, ohatu ka xupifa eemwenyo davo. (Lesha 2 Timoteus 4:1-5.) Oshihopaenenwa vali shimwe osho okukaleka Olupale letu lOuhamba monghalo iwa. Otashi pula lela elininipiko okukala hatu longo oilonga ngaashi okutilashi oimbodi, okuwapaleka meni lOlupale lOuhamba nosho yo moundjuwo. Natango, otu shi shii kutya eshi hatu kaleke Olupale letu lOuhamba monghalo iwa, kungaho ohatu longo oilonga iyapuki, molwaashi Omalupale etu oku li ondingandinga yelongelokalunga la koshoka moitukulwa omo tu li. Onghee hano, ngeenge hatu wanifa po nehalo liwa oilonga oyo ya talika ko yanafangwa, ohatu ulike kutya otu na elininipiko nohatu shikula oshikoti shaKristus.
Kala omuladi ngaashi Jesus
12, 13. (a) Jesus okwa li a ulika ngahelipi ouladi waye, noshike sha li she mu linyengifa? (b) Oshike tashi ke tu linyengifa tu kale ovaladi moukalele?
12 Natu ka taleni koshihopaenenwa shaJesus shouladi moukalele. Jesus okwa li a ninga oinima ihapu eshi a li kombada yedu. Pashihopaenenwa, pehovelo lokukalamwenyo kwaye kwokombada yedu, Jesus otashi dulika a li ha hongo oipilangi pamwe naxe omutekuli, Josef. Eshi Jesus a hovela oukalele waye, okwa li ha longo oikumwifilonga, ngaashi okuvelula ovanaudu nokunyumuna ovafi. Ndele nande ongaho, Jesus okwa li unene a pitifa komesho oilonga yokuudifa onghundana iwa nokuninga ovanhu ovahongwa. (Mat. 4:23) Nafye otu na okuninga sha faafana, molwaashi otu li ovashikuli vaye. Mbela ongahelipi hatu dulu okushikula oshihopaenenwa shaJesus? Onghedi imwe omo hatu dulu oku shi ninga, omokukala tu na omalinyengotomheno ngaashi aJesus.
13 Oshinima sha fimanenena osho sha li she linyengifa Jesus a udife nokuhonga ovanhu, osho ohole yaye yokuhola Kalunga. Jesus okwa li yo e hole oshili oyo a li ha hongo ovanhu. Okwa li a tala ko eeshili odo di li ngaashi omamona ondilo, nokwa li a halelela oku di hepaululila vamwe. Tu li ovahongi veendjovo daKalunga, nafye osho tu na okukala tu udite ngaho. Diladila shi na sha neeshili dimwe di na ondilo odo twe lihonga mEendjovo daKalunga! Otwe lihonga kombinga yomhata i na sha nounamapangelo weshito alishe nonokutya otai ka kandulwa po ngahelipi. Otwa shiiva nawa kutya Omishangwa otadi ti shike shi na sha nonghalo yoonakufya nonokutya omanangeko noupuna elipi taa ka hafelwa mounyuni mupe waKalunga. Kutya nee opo twe lihongo eeshili odo ile otwe di lihonga nale, osho sha yela oshosho kutya eeshili da tya ngaho odi na ongushu neenghono noihadi tutuka nandenande. (Lesha Mateus 13:15.) Ohatu ulike kutya otwa lenga eeshili odo Jehova e tu honga mokuudifila vamwe nouladi, hatu shi ningi tashi di komutima.
14. Ongahelipi hatu dulu okuhopaenena onghedi yaJesus yokuhonga?
14 Didilika yo onghedi yaJesus yokuhonga. Jesus okwa li ha yukifa alushe elitulemo lovapwilikini vaye kOmishangwa. Luhapu okwa li ha ningi etwalemo loshitwa shaye osho sha fimana ta longifa outumbulilo ngaashi: “Okwa shangwa.” (Mat. 4:4; 21:13) Eendjovo daJesus odo da shangwa otadi ulike kutya okwa li ha tofa odikilila momambo mahapu Omishangwa dOshiheberi ile ta popi a kanghamena kudo. Ngaashi Jesus, nafye ohatu popi twe likolelela filufilu kOmbibeli ngeenge tu li moukalele nohatu kendabala okuleshela ovanhu Omishangwa donhumba ngeenge omhito otai shi pitike. Kungaho, ohatu kwafele ovanamitimadiwa va mone kutya osho hatu va hongo kashi fi shetu vene, ndele ohatu va hongo Eendjovo daKalunga. Ihatu kala tuu twa hafa ngeenge umwe a dimina tu mu leshele omushangwa wonhumba mOmbibeli, nokuyelifa ongushu nosho yo eityo lEendjovo daKalunga! Ohatu kala yo twa hafa neenghono ngeenge ovanhu va tya ngaho tava tambula ko eshivo laJesus.
Ovashikuli vaJesus ove na okukala ve hole ovanhu vakwao
15. Oukwatya waJesus umwe wa tongomana oulipi, notashi ke tu kuma ngahelipi ngeenge otwa dilonga kuo?
15 Xuuninwa, ohatu ka kundafaneni kombinga youkwatya waJesus oo tau kumu omutima neenghono, ohole yaye yokuhola ovanhu vakwao. Omuyapostoli Paulus okwa ti: “Ohole yaKristus tai tu fininike.” (2 Kor. 5:14) Ngeenge hatu dilonga kombinga yohole yaJesus yokuhola ovanhu aveshe, nafye twa kwatelwa mo pauhandimwe, ohashi tunhukifa omitima detu nohashi tu linyengifa tu shikule oshikoti shaye.
16, 17. Omeenghedi dimwe vali dilipi Jesus a li a ulikila ovanhu ohole?
16 Jesus okwa li a ulikila ovanhu ohole ngahelipi? Okwa li a ulikila ovanhu ohole monghedi ya tongomana eshi e va yandjela omwenyo waye nehalo liwa. (John 15:13) Kakele kaasho, Jesus okwa li yo a ulikila ovanhu ohole meenghedi dimwe vali eshi a li ta wanifa po oukalele waye kombada yedu. Pashihopaenenwa, okwa li ha udile oukwao wananghali ovanhu ovo tava mono oixuna. Okwa li a uda nai neenghono eshi a mona Maria nosho yo vamwe tava lili omolwefyo laLasarus. Nonande Jesus okwa li ta ka nyumuna Lasarus, okwa li a nyika oluhodi neenghono nokwa “lila.” — Joh. 11:32-35.
17 Lwopehovelo loukalele waJesus, omulumenhu wonhumba oo a li e na oshilundu okwa li e uya kuye ndele ta ti kuye: “Oove ngenge wa hala, oto dulu okuyelifa nge.” Mbela Jesus okwa li e mu nyamukula ngahelipi? Ombibeli otai ti: “Jesus okwe mu fila onghenda.” Opo nee, Jesus okwa li a longa oshikumwifilonga. “Okwa nana eke laye, ndele okwe mu kuma, ndee ta ti: Onda hala, yela. Oshilundu osha dja mo muye diva, ndele ye okwa yela.” PaMhango yaMoses, ovanashilundu ova li va talika ko inava koshoka. Onghee hano, Jesus ka li a pumbwa okukuma omulumenhu oo kolutu opo ngeno e mu velule. Ndele nande ongaho, Jesus okwa li a kuma omulumenhu oo opo e mu udife ouumbo noku mu velule. Otashi dulika pa li pa pita oule womido dihapu omulumenhu oo ina kumwa nande okomunhu. Jesus okwa li lela a ulikila omulumenhu oo oukwao wananghali. — Mark. 1:40-42.
18. Ongahelipi hatu dulu okuulikila vamwe “oukwao wananghali”?
18 Molwaashi otu li ovashikuli vaKristus, otu na okukala hatu ulikile vamwe ohole ‘moku va fila onghenda’ ile tu tye oku va ulikila “oukwao wananghali.” (1 Pet. 3:8, yelekanifa NW.) Oshoshili kutya kashipu okuuda ko omaliudo ovaitaveli vakwetu ovo tava mono oixuna komikifi doshinamenena ile ve kwetwe kepolimano la kwata moiti, unene tuu ngeenge inatu pita nande onale meenghalo da tya ngaho. Ashike Jesus okwa li ha udile ovanaudu oukwao wananghali, nonande ye shidalelwe a vele. Ongahelipi nafye hatu dulu okuulikila vamwe oukwao wananghali ngaashi Jesus? Omokukala hatu pwilikine nelitulemo ngeenge ovo tava vele tave tu hepaululile kombinga yomauyahame avo. Ohatu dulu yo okulipula kutya, ‘Ngeno aame nda li monghalo ya tya ngaho, ngeno ohandi kala ndi udite ngahelipi?’ Ngeenge otwe lihongo okukala hatu yavelele omaliudo avamwe, ohatu ka dula ‘okupopya nehekeleko neemwenyo da polimana.’ (1 Tes. 5:14, NW) Kungaho, ohatu shikula oshihopaenenwa shaJesus.
19. Oshihopaenenwa shaJesus oshe tu kuma ngahelipi?
19 Mbela ito dimine kutya otu na shihapu okulihonga mokutala keendjovo nokoilonga yaJesus Kristus? Apa ngoo pe fike okulihonga kwetu kombinga yaye, opo ngoo tapa kala pe fike okukala twa hala oku mu hopaenena. Naasho otashi ke tu linyengifa yo tu kale twa hala okukwafela vamwe ve mu hopaenene. Natu kaleni twa tokola toko okushikula Ohamba yopaMessias, paife nosho yo fiyo alushe.
Oto dulu okuyelifa?
• Ngaashi Jesus, ongahelipi hatu dulu okuulika ounongo?
• Omeenghedi dilipi hatu dulu okuulika elininipiko?
• Ongahelipi hatu dulu okuulika ouladi wetu moukalele?
• Ngaashi Jesus, omeenghedi dilipi hatu dulu okuulikila vamwe ohole?
[Oshimhungu/Efano pepandja 11]
OSHISHANGOMWA OSHO TASHI DULU OKU TU KWAFELA TU HOPAENENE KRISTUS
Otwa li twa pewa embo lipe lomapandja 192 poshoongalele shoshitukulwa shomo 2007, li na oshipalanyole: “Come Be My Follower” (osho sha hala okutya ‘Ila u shikule nge’). Oshishangomwa osho osha nuninwa okukwafela Ovakriste va yukife elitulemo lavo kuJesus, unene tuu komaukwatya aye nosho yo keenghatu daye. Konima eshi embo olo la ngonga pauxupi omaukwatya aJesus a tongomana, ola kundafana moule kombinga yelininipiko laye, ouladi waye, ounongo waye, eduliko laye nosho yo elididimiko laye.
Konima yaasho, okwa ka landula omatukulwa taa popi kombinga yomalipyakidilo aJesus e li omuhongi nomuudifi wonghundana iwa nola kundafana yo eenghedi dimwe omo Jesus a li a ulika ohole yaye inene. Membo omo ohatu hange mo ouyelele oo tau dulu okukwafela Omukriste keshe a shikule oshihopaenenwa shaJesus.
Otwe lineekela kutya oshishangomwa osho otashi ke tu linyengifa atusheni tu likonakone nokulipula kutya: ‘Ohandi shikula ngoo Jesus shili? Ongahelipi handi dulu okushikula oshikoti shaJesus nawanawa?’ Oshishangomwa osho otashi ka kwafela yo ‘aveshe ovo ve na oikala iwa i na sha nomwenyo waalushe’ va ninge ovashikuli vaJesus. — Oil. 13:48, NW.